Ezra 6

Ghɨ yeyn isaʼ zɨ̀ a fòyn Saylùs nɨn læ chwòsɨ na ghɨ kasi bàʼlɨ̀ ndô Fɨyini

¹Fòyn Dalìyùs ɨ yvɨ tî, ɨ chwòsɨ̀ ìsaʼ ghɨ kɨŋ iwo ateyn a ŋwàʼlɨsɨ̀ afî a ghɨ nà n-nyâʼ lêm awo ateyn a ndo afî a ghɨ nà n-lêm ɨfwo ateyn a ntoʼ Babilòn. ²Ghɨ n-yeyn meyn ŋwàʼlɨ̀ ì lì ma ghɨ ngàli ngali a Ekbàtanà ɨ ntèʼ ì ghaʼnɨ abàs a Mèdinà ma ghɨ nyaʼ meyn ateyn na:

Ŋwàʼlɨ̀ ìsaʼ yèyn nɨ̀n dyêyn na:

³À nà n-ghɨ a bêŋ ɨ yî àsɨ ta fòyn Saylùs koʼ achɨ, fòyn àteyn ɨ chwòsɨ̀ ìsaʼ kûm ndô Fɨyini a Jèlusalèm na:

Yì visi ghɨ kasi bàʼlɨ̀ ndô Fɨyini sɨ a alèʼ ghè a ka ghɨ na gvî fu tɨ̀fu tɨ nyoʼnɨtɨ ateyn. Ndo àteyn nɨn kelɨ sɨ nà dyêf chem ntàmsɨ̀ mɨ̀vɨm ɨ̀n tal. ⁴Ghɨ nà n-bâʼlɨ̀ mbaŋi sɨ̀ tal ɨwuyn ndo nɨ̀ ngòʼsɨ̀, ghɨ bàʼlɨ̀ mbaŋi ì lì atu nɨ̀ ɨsi nâ sìsɨ̀ nɨ̀ ɨ̀nkàʼ ɨ̀n ghaʼlɨnɨ̂. Ɨkwo vzɨ̀ a ka ghɨ laʼ ifêl nâ yèynì ateyn nɨ̂n lù a ntoʼ. ⁵Aso ɨkwo a baŋnɨ-a kì a kɨ n-læ lù a ndô Fɨyini nâ ghàyn nɨ̀ ɨ̀fwo vzɨ̀ a ghɨ n-faytɨ nɨ̀ àso ɨkwo a fɨfâ ta Nèbùkànezà nɨn læ lì a ndô Fɨyini nâ ghàyn a Jèlusalèm ɨ gvì nɨ̀ ɨ̀ŋweyn a Babilòn, ghɨ n-kelɨ sɨ kasi sɨ lì sɨ ndù sɨ lèm ɨlwèʼ ghè a ɨfwo nâ wèyn nɨn læ nà ghɨ ateyn a ndo nâ ghàyn a Jèlusalèm. Yì kasi ndù lèm ɨ̀fwo nâ wèyn a ndô Fɨyini a Jèlusalèm.

Dalìyùs ɨ fu isaʼ na ifêl ì na ndû kɨ asɨ

⁶Fòyn Dalìyùs ɨ kæ sɨ chwòsɨ̀ isaʼ sɨ̂ Tàtènây, ɨ wul ɨ vzɨ̀ a Babilòn lèm injɨyn i jvâ na wù na tisɨ̂ ghelɨ nɨ̀ Shètà-Bozenày baʼsɨ̂ nɨ̀ ghelɨ ghì a ŋêyn àŋena nɨn felɨ̀ alèʼ nâ ghè ɨ bè na, “Ka wùl sɨ̂ zɨ̀ fî ndù alèʼ nâ ghè. Ka wùl nɨ̂n tàysɨ̀ ìfêl zɨ̀ a ghɨ n-nî a ndô Fɨyini nâ ghàyn. ⁷Yì visi wul ɨ vzɨ̀ a wù n-tisɨ ghelɨ Jûsɨ̀ nɨ̀ chyeʼsɨ Jûsɨ̀ kasi bàʼlɨ̀ ndô Fɨyini nâ yèyn kɨ̀ alèʼ ghè a yì nà n-ghɨ ateyn sɨ asɨ.

⁸Sɨ kfeynsɨ, ma na fu kɨmɨ ìwo yèynì sɨ a isaʼ ta ka yì ni sɨ gàmtɨ chyeʼsɨ Jûsɨ̀ ifèl i ndô Fɨyini nâ ghàyn.

Yi n-lâʼ ɨ̀kwo vzɨ̀ nô ɨ̀ jɨ̀m a àŋena nɨn kɨŋ sɨ nì ifêl ateyn antêynɨ̀ ɨ̀kwo ntoʼ afî a yi n-lêm injɨyn i jvâ Yuflèt ta ka ifêl ateyn i faŋ tɨ̀ tìmi nɨ̀ dzɨ̀. ⁹Yì fu nô mɨ ghà ta àŋena nɨn wutɨ̂ kèsa à n-ghɨ mbòŋsɨ̀ nɨ̀ ɨ̀ywaʼ nɨ̀ bzɨsɨ njɨ̀sɨ̀ ta àŋena nɨn kɨŋ sɨ nà fu tɨfu tɨ nyoʼnɨtɨ ateyn sɨ̂ Bôbo iyvɨ kèsa à n-ghɨ ɨ̀nkfɨ̂ŋ mɨ̀ wît nɨ̀ fɨ̀ngvaŋfɨ nɨ̀ mɨ̀lùʼ nɨ̀ mɨ̀vɨ̂l mɨ̀ olìfsɨ̀. Yì fu nô mɨ ghà ta ngàŋsɨ ndô Fɨyinisɨ̀ nɨn bɨf a Jèlusalèm kɨ̀ mɨ̀chi ɨ̀n jɨ̀m, fesɨ̂ wì, kɨ̀ ighel ta àŋena bɨf, ¹⁰ta ka àŋena na fu tɨ̀fu tɨ nyoʼnɨtɨ sɨ̂ Bôbo iyvɨ, ni-à wu saŋlɨ-à fî jêm na fòyn ŋêyn woyn ŋweyn na ghɨ a jûŋ.

¹¹Ma na fî fu sɨ a isaʼ na wùl kæ sɨ tuynsɨ kèsa wù kfɨ̀nɨ ìsaʼ nâ yèynì a mà fù têyn, ghɨ choʼ fɨkâʼ a ŋweyn ɨwuyn ndo ɨ chobtɨ ɨ yɨ̀s ɨ dùŋ ŋweyn atû àteyn ɨ bɨ̀s ndô ŋweyn bòm kɨ̀ nô àtu a tonɨ-a nâ kèynà. ¹²Mɨ n-jêm na Bôbo vzɨ̀ a wù n-læ choʼ Jèlusalèm na ghɨ na koʼsɨ̂ ŋweyn ateyn/afu to chwò nô mɨ fòyn ɨ̀ kfà kèsa ghelɨ ta ghɨ n-mômsɨ̀ sɨ kfɨnɨ isaʼ nâ yèynì kèsa sɨ bebsɨ ndô Fɨyini nâ yèyn a Jèlusalèm. À chwòsɨ̀ mà Dalìyùs isaʼ nâ yèynì. Yì lutɨ sù nì kɨ iwo zɨ̀ a isaʼ nà yèynì nɨn bê/dyêyn.

Ghɨ bàʼlɨ mèsi ndô Fɨyini ɨ jèm ɨ fu/dyèyn sɨ̂ ɨ̀nfeynfɨ

¹³Fòyn Dalìyùs ɨ chwòsɨ̀ ìsaʼ tì, Tàtènây ɨ wul ɨ̀ tisɨnɨ vzɨ̀ a injɨyn i jvâ Yuflèt nɨ̀ Shètà-Bozenày bàʼsɨ nɨ̀ ghelɨ ghì a ŋêyn àŋena nɨn felɨ̀ ɨ lutɨ ni kɨ ta isaʼ ateyn i nɨn dyêyn. ¹⁴Hagày ɨ nfètɨ̀ ì ghaʼnɨ baʼsɨ̂ nɨ̀ Sàkàliyà ɨ wâyn Idò ɨ nà lûmsɨ̀ chyeʼsɨ ghelɨ Jûsɨ̀ nɨ̀ ìwo i Fɨyini-ì, àŋena faŋ ɨ nà ndû kɨ nɨ̀ ìfêl ì asɨ. Àŋena nɨn baʼlɨ meyn mèsì ndô Fɨyini kɨ̀ ta isaʼ i Bôbo ɨ Fɨyini fɨ Isìlæ̀ fɨ̀ nà n-bê ɨ fi luynsɨ kɨmɨ ìsaʼ i Dalìyùs nɨ̀ Saylùs nɨ̀ Àtazezès, ɨ tɨfôytɨ Besìyà. ¹⁵Ghɨ n-bàʼlɨ mèsi ndô Fɨyini a mɨchi ɨ̀n tal a njôŋ Adà a bêŋ afî a Dalìyùs nɨn luyn bègsɨ̀ ntufa ateyn achɨ.

¹⁶Ghɨ bàʼlɨ mèsì tì ghelɨ Isìlæ̀ ma à ti ngàŋsɨ ndô Fɨyini nɨ̀ ghelɨ ndo nɨ̀ Levì baʼsɨ̂ nɨ̀ ghelɨ ghì a ghɨ n-læ kasi kfa sɨ a ndô nchaʼ a Babilòn ɨ jèm ɨ fu ndo àteyn sɨ̂ Fɨyini fɨ nɨ̀ Isaŋlɨ-i. ¹⁷Àŋena nɨn læ se sɨ jèm sɨ fu ndo nâ yèyn sɨ̂ Fɨyini fɨ ɨ fu mbòŋsɨ̀ ɨvɨ nɨ̀ ɨ̀ywaʼ ighɨ ì bò baʼsɨ̂ nɨ̀ bzɨsɨ njɨ̀sɨ̀ ighɨ ì kæ̀ sɨ ifu sɨ̂ Bôbo. Àŋena nɨn fi meyn fu bzɨsɨ ndoŋ sɨ lûmnɨ̀sɨ̀ njvàsɨ̀ bò nô mɨ isas i ndo ì kà-i ɨ fu kɨ ìmòʼ ta ka Fɨyini lesɨ fù mbɨsɨ ghelɨ Isìlæ̀ nô sɨ̀ jɨ̀m. ¹⁸Àŋena nɨn lem meyn ngàŋsɨ ndô Fɨyini na sɨ na felà kɨ̀ isas i ndo isas i ndo ɨ fi lèm ghelɨ isas i ndo nɨ̀ Levì kɨ̀ inòyn inòyn na àŋena na felɨ̀ sɨ̂ Fɨyini fɨ a Jèlusalèm kɨ̀ ighel ta isaʼ i Mosìs ì nà n-dyêyn.

Ghɨ yɨ ayɨ iyaʼsɨ

¹⁹A nà ghɨ a mɨchi njvàsɨ̀ kæ̀ a njoŋ ɨ yî àsɨ, ghelɨ ghì a ghɨ n-kàsi kfa sɨ a ndô nchaʼ a Babilòn ɨ yɨ ayɨ iyaʼsɨ. ²⁰À nà n-ghɨ tì ma ngàŋsɨ ndô Fɨyinisɨ̀ nɨ̀ ghelɨ ndo nɨ̀ Levì su meyn làynsɨ̀ ngeŋsɨ àŋenasɨ nà layna nô ghɨ̀ jɨ̀m asɨ nɨ̀ Bôbo. Ghelɨ ndo nɨ̀ Levì ɨ sɨ wâyn njɨ̀ vzɨ̀ a ka ghelɨ ghì a ghɨ n-kasì kfa sɨ a ndô nchaʼ nɨ̀ woynà àŋena ma à ti ngàŋsɨ ndô Fɨyini nô nɨ̀ ngeŋsɨ àŋenasɨ ɨ kfɨl achi iyaʼsɨ nâ ghàyn. ²¹Ghɨ n-sɨ tî, ghelɨ Isìlæ̀ ghì a ghɨ n-kasi kfa tî ɨ kfɨl ɨ̀nyeyn ŋêyn ghelɨ ghɨ li ghì nô ghɨ̀ jɨ̀m ma ghɨ fvɨ̀sɨ̀ ngeŋ sɨ a awo a bɨ-a afî a ghelɨ ghì a ghɨ n-chi baʼsɨ sɨ̂ àŋena, kya wi Fɨyini nɨn nî sɨ koʼsɨ Bôbo Fɨyini ɨ Fɨyini fɨ Isìlæ̀. ²²Àŋena nɨn yɨ ayɨ ɨtuʼ ghaʼnɨ vzɨ̀ a ghɨ nà n-yɨ abayn ateyn bula fɨ̀shɨ̀k nɨ̀ ìsaŋlɨ i sɨ a mɨchi nsòmbo bòm ta Bôbo Fɨyini nà n-ghɨ ma wù ni meyn na àŋena na saŋlɨ-à. Wù n-kum meyn àtem a Saylùs wu gamtɨ̀ àŋena ta ghɨ nà n-nî ifêl a ndo nɨ̀ Bôbo ɨ Fɨyini fɨ Isìlæ̀.