Ezra 3

Ghɨ kasi bàʼlɨ̀ àbaŋ ifu

¹A nà n-ghɨ ta ghelɨ Isìlæ̀ kàsi kfa ɨ̀ gvì dùʼì sɨ nà chî a àŋena ntèʼsɨ, ghɨ koʼ chem a njoŋsɨ nsòmbo nô ghelɨ ghɨ̀ jɨ̀m ɨ ndu yvɨ̀ŋtɨ̀ a Jèlusalèm kɨ̀ sɨ afo àmòʼ/ akaʼ àmòʼ. ²Joshwà ɨ wâyn Jòzadàk nɨ̀ ngàŋsɨ ndô Fɨyini sìsɨ̀ a ŋêyn àŋena nà n-felɨ̀ nɨ̀ Zèlobàbêl ɨ wâyn Sheltìyèl baʼsɨ̂ nɨ̀ ghelɨ ghì a ŋêyn àŋena nà n-felɨ ɨ zɨ̀tɨ̀ sɨ bàʼlɨ abaŋ ifu sɨ̂ Fɨyini fɨ Isìlæ̀ fɨ̀ sɨ nà fu tɨfu tɨ nyoʼnɨtɨ atû àteyn kɨ̀ ighel ta ghɨ nà n-sɨ ghɨ ma ghɨ nyaʼ meyn a ŋwàʼlɨ̀ ìsaʼ nɨ̀ Mosìs ɨ wul ɨ̀ Fɨyini vzɨ̀. ³Àŋena nɨn læ meyn kasi bàʼlɨ̀ àbaŋ ifu kɨ̀ alèʼ ghè a kɨ n-læ nà ghɨ ateyn sɨ asɨ, nô mɨ ta àŋena nɨn læ nà fayn ghelɨ ghì a àŋena nɨn læ se sɨ kasi sɨ kfa ghɨ chî a àŋena ilaʼ ɨ nà fu tɨ̀fu tɨ nyoʼnɨtɨ atû àteyn sɨ̂ Bôbo Fɨyini, fu tɨ̀fu tɨ nyoʼnɨtɨ tìtɨ̀ a ghɨ n-nî ghɨ nà fu aleŋ ɨlvɨ ikfa. ⁴Àŋena yɨ ayɨ a mɨ̂twò kɨ̀ ighel ta isaʼi nà n-dyêyn, a nà ghɨ nô mɨ achi à kà, àŋena fu tɨ̀fu tɨ koʼ kfeyn kɨ ta isaʼi nɨn dyêyn, ghɨ n-kelɨ sɨ fu achi nâ ghè. ⁵Àŋena nà n-fî fu tɨ̀fu tɨ nyoʼnɨ tìtɨ̀ a ghɨ nà n-fu kɨ̀ mɨchi ɨ̀n jɨ̀m a ndô Fɨyini nɨ̀ ɨtîtɨ̀ a ghɨ nà n-fu nô mɨ a nzɨ̀tɨ njoŋ ì kà nɨ̀ ɨtîtɨ̀ a ghɨ nà n-fu a mɨchi mɨ̀ àyɨ ɨ̀nlaynɨ̂ nɨ̀ Bôbo Fɨyini baʼsɨ̂ nɨ̀ ɨtîtɨ̀ a ghɨ nà n-gvî fu sɨ ayòŋnɨ̀ sɨ̂ Fɨyini fɨ̀ kûm ìboysɨ i ɨ̀nfeynfɨ. ⁶Àŋena nɨn læ zɨ̀tɨ sɨ fu tɨfu tɨ nyoʼnɨtɨ sɨ̂ Bôbo Fɨyini kɨ̀ achi a kɨ asɨ-a a njoŋsɨ nsòmbo nô mɨ ta ghɨ nà n-bu duʼ tɨ̀ we isas i ndo nɨ̀ Bôbo Fɨyini.

Ghɨ kasi bàʼlɨ ndô Fɨyini /Ghɨ zɨ̀tɨ̀ sɨ bàʼlɨ ndô Fɨyini

⁷Ghɨ n-fu meyn ɨ̀kwo sɨ̂ ghelɨ ghɨ baʼlɨnɨ nɨ̀ ghelɨ ghì a ghɨ n-kom ɨfwo, ghɨ fu ɨfwo ɨ yɨnɨ nɨ̀ mɨ̀lùʼ nɨ̀ mɨ̀vɨ̂l mɨ̀ olìfsɨ̀ sɨ̂ ghelɨ Sidòn nɨ̀ ɨ ghɨ Tayà ta ka àŋena na gvêl ɨ̀nkâʼ mɨ̀ Sedà a Lebanòn beʼì toynɨ̂ nɨ̀ ɨ̀mêyn a jvâ ì ghaʼnɨ gvî lêm a Jobà ɨ ighel ta Saylùs ɨ fòyn Besìyà nà n-ghɨ ma wù fu meyn àdyaʼ.

⁸À nà n-ghɨ a njoŋ sɨ̀ bò a ànkùmtɨ̀ a bêŋ ta àŋena kàsi kfa a Jèlusalèm alèʼ ghè a ndô Fɨyini nà n-ghɨ ateyn sɨ asɨ, Zèlobabèl ɨ wâyn Sheltìyèl nɨ̀ Joshwà ɨ wâyn Jòzadàk baʼsɨ̂ nɨ̀ ghelɨ têyn ta ngàŋsɨ ndô Fɨyini, nɨ̀ ghelɨ isas i ndo nɨ̀ Levì nô nɨ̀ ghelɨ ghɨ̀ jɨ̀m ghì a ghɨ n-læ kasi kfa sɨ a ndô nchaʼ ɨ gvì a Jèlusalèm, ɨ zɨ̀tɨ̀ ìfêl sɨ kasi sɨ bàʼlɨ ndô Fɨyini. ⁹Joshwà ŋêyn woyn ŋweyn ghɨ lûmnɨ̀ nɨ̀ ghelɨ ndo nɨ̀ àŋena baʼsɨ̂ nɨ̀ Kadmìyèl nɨ̀ Hòdavìyà nà n-chɨ̂yntɨ̀ kinî dyêynsɨ̀ ìfêl i bàʼlɨ̀ i ndô Fɨyini ghelɨ ndo nɨ̀ Henadàd ɨ gâmtɨ̀ àŋena. Ghelɨ nâ ghì nô ghɨ̀ jɨ̀m tèyn nà n-ghɨ ghelɨ ndo nɨ̀ Levì.

¹⁰A nà ghɨ ta ghelɨ ghɨ baʼlɨnɨ we isas i ndo nɨ̀ Bôbo Fɨyini, ngàŋsɨ ndô Fɨyinisɨ̀ ɨ laf a àŋena ndzɨsɨ felɨnɨsɨ ɨ ghal tɨsoŋ, ghelɨ ndo nɨ̀ Levì nɨ̀ woyn Asàf ɨ lì ɨ̀fwo ɨ buʼnɨ ɨ gvi timi kɨ a dzɨ afî a Devìt ɨ fòyn Isìlæ̀ nɨ̀n læ bè, sɨ koʼsɨ Bôbo Fɨyini. ¹¹Àŋena nà n-yem koʼsɨ̂ Bôbo Fɨyini fî fu àyòŋnɨ̀ sɨ̂ ɨ̀nfeynfɨ bê na:

Bôbo Fɨyini nɨn jofà

Fɨ n-kôŋ ghelɨ Isìlæ̀ kɨ̀ ɨ a mɨlvɨ ɨ̀n jɨ̀m.

Nô ghelɨ ghɨ̀ jɨ̀m ɨ byal ɨ koʼsɨ Bôbo Fɨyini nɨ̀ gya ì to bòm ta ghɨ nà n-ghɨ ma ghɨ we meyn àchɨ a ndo nɨ̀ Bôbo Fɨyini. ¹²À nà n-ghɨ ta ghelɨ ghɨ dvɨnɨ ghɨ li nɨn byaytɨ nɨ̀ ìsaŋlɨ i, mɨtì ngàŋsɨ ndô Fɨyini sɨ lema sɨ dvɨnɨsɨ sɨ lisɨ nɨ̀ ghelɨ ndo nɨ̀ Levì nɨ̀ ɨ̀tu asas a ndosɨ ta àŋena nɨn læ yeyn ndô Fɨyini ɨyî àsɨ ɨ nà dzɨ̂ nô nɨ̀ gyà i to ta àŋena nɨn læ yeyn ta ghɨ n-we isas i ndô Fɨyini. ¹³Ghelɨ nà n-byaytɨ̂ nô sɨ a ŋaŋ ghɨ yvɨ àŋena ndû chem nô a ndyèyn, yi nà boynɨ̂ wì sɨ yvɨ sɨ keli nâ à n-saŋlɨ̂ ndà saŋlɨ-a, a dzɨ̂ ndà dzɨ-à.