Ezra 4

Mbàynɨ̀sɨ̀ ɨ nà nû na ka ghɨ n-kàsi bàʼlɨ̀ ndô Fɨyini

¹À nà n-ghɨ ta mbàynɨ̀sɨ ghelɨ Judà nɨ̀ ɨ ghɨ Benjamìn yvɨ na ghelɨ ghì a ghɨ n-læ ghaytɨ lu nɨ̀ àŋena kasi meyn kfa nà kasî bâʼlɨ̀ ndô Bôbo Fɨyini, ɨ Fɨyini fɨ ghelɨ Isìlæ̀, ²àŋena gvi yeyn Zèlobàbêl nɨ̀ ɨ̀tu asas a ndo ɨ bè sɨ̂ àŋena na, “Yì visi ghèsɨ̀ gamtɨ zɨ bàʼlɨ̀ ndô Fɨyini bòm ta ghès nɨn boŋ koʼsɨ̂ kɨmɨ Fɨyini fifɨ ta zɨ, ma ghèsɨ ti meyn nà sɨ fu tɨ̀fu sɨ̂ nfeynfɨ sɨ zɨ̀tɨ kɨ ɨtuʼ nɨ̀ Esahadòn ɨ fòyn Àsilìyà, ɨvzɨ̂ a wu n-læ li gvi nɨ̀ ghès afêyn. ³Mɨtì Zèlobàbêl nɨ̀ Joshwà nɨ̀ ɨ̀tu asas a ndo ghɨ li a Isìlæ̀ ɨ bèynsɨ̀ na, “Yi n-kelɨ wi awu ifèl nɨ̀ ghès sɨ bàʼlɨ ndo sɨ̂ Fɨyini feyfɨ. A n-bâʼlɨ̀ kɨ ghès ndo àteyn sɨ̂ Bôbo Fɨyini, ɨ Fɨyini fɨ ghelɨ Isìlæ̀ kɨ ighel ta fòyn Saylùs ɨ fòyn Besìyà tî fu sɨ isaʼ sɨ̂ ghès.”

⁴Àŋena taŋi tì mɨlvɨ gha, ghelɨ ghì a àŋena nɨn læ kasi kfa ghɨ ndù ilaʼ, ɨ lù ɨ nà jêl nî tɨ̀kfâʼtɨ̀ tɨ ghelɨ Judàtɨ boli-à, fî fâynsɨ̀ àŋena ta ka àŋena faŋ tɨ̀ fì tɨ̀ bàʼlɨ̀. ⁵Àŋena nɨn læ meyn fi yuyntɨ ghelɨ ghì a ghɨ nà n-felɨ̀ sɨ̂ fòyn Bèsiyà na ghɨ fu ngeʼ sɨ̂ ghelɨ Isìlæ̀ ɨ̀ tàysɨ̀ ɨ̀tu Saylùs ɨ fòyn Besìyà, nô ɨ̀ jɨ̀m ɨ koʼ chem ɨtuʼ nɨ̀ Dalìyùs, ɨ fòyn Besìyà .

Ghɨ faŋ nà tâysɨ̀ kɨ taysɨ na ka ghɨ baʼlɨ ndô Fɨyini

⁶A nà ghɨ kɨ ta fòyn Zekzès koʼ achɨ, ghɨ nyàʼ ŋwàʼlɨ̀ ànkaŋ atu nɨ̀ ghelɨ Judà ghì a ghɨ nà n-chi a Jèlusalèm.

⁷A nà ghɨ kɨmɨ ɨtuʼ nɨ̀ Atazezès, ɨ fòyn Besìyà, Bishlàm nɨ̀ mitledàt nɨ̀ Tabìl baʼsɨ̂ nɨ̀ ghelɨ ghɨ li ghì a ŋêyn àŋena nà n-felɨ̀ amoʼ ɨ nyàʼ ŋwàʼlɨ̀ sɨ̂ Àtazezès. Àŋena nɨn læ nyaʼ ŋwàʼlɨ̀ nâ yèyn itaŋi nɨ̀ ghelɨ Alàm. ⁸Wùl ɨ̀ saʼnɨ vzɨ̀ a ghɨ nà n-toŋtɨ na Lehùm baʼsɨ̂ nɨ̀ Shimshày ɨ wul ɨ̀ nyaʼnɨ nɨ̀ ŋweyn ɨ nyàʼ ŋwàʼlɨ̀ atu nɨ̀ ghelɨ Jèlusalèm ɨ tum sɨ̂ Àtazezès yi ghɨ a dzɨ ghâyn tèyn:

⁹Ŋwàʼlɨ̀ yèyn lù sɨ̂ Lehùm ɨ wul ɨ̀ saʼnɨ nɨ̀ Shimshày ɨ wul ɨ̀ nyaʼnɨ baʼsɨ̂ nɨ̀ ghelɨ ghɨ li ghì a ŋêyn àŋena nɨn felɨ̀ ta ghelɨ ndô nsaʼsɨ nɨ̀ ghelɨ ghɨ felɨnɨ ghɨ li ghì a ghɨ lù a Elèk nɨ̀ Babilòn nɨ̀ Susà a ilaʼ i Elàm, ¹⁰nɨ̀ ghelɨ ghɨ li ghì a Ashubanibàl ɨ mbæ wes ɨ ngaŋtɨnɨ nɨn læ li lu nɨ̀ àŋena sɨ a àŋena tɨlaʼ ɨ gvi lèm na ghɨ na chî ntèʼ Sàmalìyà nɨ̀ ntèʼ sɨ lisɨ injɨyn i jvâ Yuflèt i yeynì.

¹¹(À n-ghɨ sɨ a ŋwàʼlɨ̀ nâ ghè tèyn a àŋena nɨn læ tum sɨ̂ ŋweyn).

Sɨ̂ fòyn Àtazezès,

ŋwàʼlɨ̀ yèyn lù sɨ̂ ghelɨ ghɨ felɨnɨ nɨ̀ và ghì a ghɨ n-chi injɨ̀yn i jvâ Yuflèt:

¹²Ghès nɨn kɨŋ sɨ fèʼtɨ sɨ̂ và a mbæ̀ na ghelɨ ghì a wà tî tum na ghɨ gvi nà chî a ghès antêynɨ̀ tì ti meyn gvì a Jèlusalèm nà sɨ kasî bâʼlɨ̀ ntèʼ zɨ̀ a ghelɨ ghɨ bɨ ghì a ghɨ n-to nɨ̀ ɨ̀tu tî nɨn chi ateyn. Àŋena nɨn kasî bâʼlɨ̀ mbàynsɨ̀ ateyn fî kasî wê mɨ̀chɨ mɨ̀ ndo.

¹³Mbæ̀, ghès nɨn kɨŋ kɨmɨ na wà na kya na àŋena kæ sɨ kasi bàʼlɨ mèsi ntèʼ nâ yèyn nɨ̀ mbàynɨ̀sɨ ateynsɨ, a àŋena na bu lâʼ wì tâksɨ̀ sɨ̂ và, a dzɨ nâ ghàyn tèyn a ɨkwo ilaʼ nɨ̀ và mæ. ¹⁴Bòm ta ghès nɨn chî kɨ bòm và a mbæ̀, yi fî jofɨ̀ wì na ghès chimi kɨ̀ moŋ nà ki ta ghɨ n-wumsɨ vâ, à ti iwo zɨ̀ a ghès nɨn tum ŋwàʼlɨ̀ yèyn sɨ fèʼtɨ iwo ateyn sɨ̂ và. ¹⁵Ta ka ghɨ kàʼ a ghɨ kɨŋ a ŋwàʼlɨ̀sɨ̀ afî a tɨfôyn tɨ asɨ tɨ nà n-nyâʼ lêm awo ateyn. Wà kæ sɨ ki ŋwàʼlɨ̀ nâ sèynsɨ̀ a wà yeyn ateyn na ntèʼ nâ yèyn nɨn to nɨ̀ àtu a, fu ngeʼ sɨ̂ tɨ̀fôyntɨ̀, nɨ̀ tɨ̀laʼtɨ, a ghɨ ntèʼ lum kesɨ̂ kɨ kesɨ tɨfôyn nô sɨ ɨtuʼ ta ghɨ n-læ ku ɨ̀nyeyn. À ti iwo zɨ̀ a ghɨ n-læ bebsɨ ntèʼ àteyn bòm ìnyeyni. ¹⁶Ghès nɨn fêʼtɨ̀ sɨ̂ và a mbæ̀ na ghɨ kæ sɨ kasi bàʼlɨ ntèʼ nâ yèyn baʼsɨ̂ nɨ̀ mbàynɨ̀sɨ ateynsɨ, wa bû læ̀ fì kèli àfo injɨyn i jvâ Yuflèt nâ ghàyn.

¹⁷Fòyn ɨ tum ibêynsɨ̀ yèynì têyn:

Ŋwàʼlɨ̀ yèyn nɨ̀n ndû sɨ̂ Lehùm ɨ wul ɨ̀ saʼnɨ nɨ̀ Shimshày ɨ wul ɨ̀ nyaʼnɨ nɨ̀ ghelɨ ghɨ li ghì a ŋêyn àŋena nɨn felɨ̀ amoʼ ghɨ chî a Sàmalìyà nɨ̀ ntèʼ sɨ lisɨ a injɨ̀yn i jvâ Yuflèt.

Mɨ n-toŋtɨ̂ zɨ̀

¹⁸Ghɨ n-jaŋ meyn ŋwàʼlɨ̀ zɨ̀ a ghɨ tî tum sɨ̂ ghès tî ɨ̀ bèynsɨ̀ itaŋi ilaʼ nɨ̀ ghès kɨ̀ nô a ma asɨ. ¹⁹Ma ti meyn chwòsɨ̀ ìsaʼ na ghɨ kɨŋ iwo kûm ntèʼ nâ yèyn a ŋwàʼlɨ̀sɨ̀ ghɨ kɨŋ yeyn na yì lum dyêyn kɨ àtu a tonɨ-a sɨ̂ tɨ̀fôyntɨ̀ nô mɨ sɨ ɨtuʼ gha, ghelɨ ateyn ɨ ghɨ lum to kɨ to nɨ̀ àtu a, kesɨ̂ tɨ̀fôyn. ²⁰Tɨfôyn tɨ saʼ meyn a Jèlusalèm kelɨ àdyaʼ, saʼ ìnjɨyn i Yuflèt zɨ̀-ì nô ì jɨ̀m ghɨ lâʼ tâksɨ̀ sɨ̂ àŋena. ²¹Yì chwosɨ isaʼ sɨ̂ ghelɨ nâ ghì kɨ̀ lvɨ̂yn tèyn àŋena faŋ tɨ̀ fì tɨ̀ fèl ta ka ghɨ faŋ tɨ kasi sɨ bàʼlɨ ntèʼ nâ yèyn nô sɨ chem ta ka à læ̂ kàsi fù ma adyaʼ na ghɨ baʼlɨ. ²²Ka yi n-faŋ tɨ̀ nì iwo nâ yèynì nô mɨ a dzɨ ì kà bu tî a anlè-à zɨ a ma bo.

²³A nà n-ghɨ ta ghɨ jàŋ mèsì gvì nɨ̀ ŋwàʼlɨ̀ zɨ̀ a fòyn Àtazezès tum sɨ̂ Lehùm nɨ̀ Shimshày ɨ wul ɨ̀ nyaʼnɨ nɨ̀ ghelɨ ghì a ŋêyn àŋena nɨn felɨ̀, àŋena lu kɨ ɨlvɨ nâ ghè ɨ ndu yeyn ghelɨ Jûsɨ̀ a Jèlusalèm ɨ kàyn na ka àŋena fî fèl.

Ghɨ kasi zɨ̀tɨ̀ ifêl a ndô Fɨyini

²⁴A dzɨ nâ ghàyn tèyn ghɨ kàyn na ka ghɨ fî bàʼlɨ̀ ndô Fɨyini ghɨ visi yi faŋ kɨ tî sɨ chem a ànkùmtɨ̀ a bêŋ ta fòyn Dalìyùs nɨn læ koʼ achɨ a Besìyà.