Exodus 4

Fɨyini fɨ ɨ fu adyaʼ a kaynɨ-a sɨ̂ Mosìs

¹À nà n-ghɨ ta Bôbo Fɨyini tàŋi mèsì, Mosìs ɨ bèynsɨ̀ ɨ bè na, “Mà ti kæ sɨ ndù bè, àŋena faŋ tɨ̀ bɨ̀mi kèsa sɨ yvɨtɨ iwo zɨ̀ a mà bè, ɨ̀ bè na wà bu tî fvɨ̀ a ma ikèʼ, ma nì ghà?”

²Bôbo Fɨyini ɨ bɨf sɨ̂ ŋweyn na, “À n-ghɨ ghà a wa awu tì a?” Mosìs ɨ bèynsɨ̀ na, “À n-ghɨ mbàŋ.”

³Bôbo Fɨyini ɨ bè sɨ̂ ŋweyn na, “Maʼ mbàŋ àteyn a nse.” Wu màʼ yi kasi sɨ a mbam wu nà sɨ leʼa. ⁴Bôbo Fɨyini ɨ bè sɨ̂ ŋweyn na, “Ghal mbam àteyn a ɨ̂nkùyn.” Wu ghal ɨ̀nkùyn ateyn yi fi kasi sɨ a mbàŋ a ŋweyn awu. ⁵Bôbo Fɨyini ɨ bè sɨ̂ ŋweyn na, “Ndu ni iwo nâ yèynì a mà dyèyn sɨ̂ và tèyn ta ka ghelɨ Isìlæ̀ bɨmi na Bôbo Fɨyini ɨ Fɨyini fɨ ghɨ̀bo àŋena, ɨ Fɨyini fɨ Abɨ̀làhâm, ɨ Fɨyini fɨ Yisàk, ɨ Fɨyini fɨ Jàkôb, ti meyn fvɨ̀ ikèʼ nɨ̀ và.”

⁶Bôbo Fɨyini nɨ̀n fi meyn bè sɨ̂ ŋweyn na, “Tuŋ awu à kya a wa ndzɨsɨ.” Kɨ̀ têyn, wu tuŋ awu a ŋweyn a ndzɨsɨ ɨ se sɨ fvɨ̀sɨ̀ kɨ ma ànsàsì-a ku meyn kɨ na fɨfɨ tèyn ta awœ.

⁷Ta yi gàyn tî, Bôbo Fɨyini ɨ bè sɨ̂ ŋweyn na, “Kasi tuŋ awu ateyn a antêynɨ̀ ndzɨsɨ nɨ̀ và.” Kɨ̀ têyn, wu tuŋ ɨ se sɨ fvɨ̀sɨ̀ kɨ kasî ghɨ kɨ tèyn ta kɨ nì nà ghɨ.

⁸Bôbo Fɨyini ɨ kæ be sɨ̂ ŋweyn na, “Mbàŋ zyâ ti kæ kasi sɨ a mbam àŋena faŋ tɨ̀ bɨ̀mi, a àŋena bɨmi ànkùmtɨ̀ a nchwæ nâ kèynà. ⁹Mɨtì wà kæ sɨ dyèyn nchwæ nâ sèynsɨ̀ sɨ̀ bò àŋena faŋ tɨ̀ bɨ̀mi kèsa sɨ yvɨtɨ iwo zɨ̀ a wà bè, wa sef mu a jvâ Nâyl ɨ sfɨ̀s alèʼ a nse a yuma a ka mɨ̀ kasi sɨ a mɨ̂lùŋ.”

Alòyn ɨ gvì sɨ gàmtɨ Mosìs

¹⁰Mosìs ɨ bè sɨ̂ Bôbo Fɨyini na, “Ô Bôbo ma bû tìmi nà faytɨ̂ kya sɨ taŋi. Mɨ n-ghɨ tèyn ɨchfɨ̂ wom dɨlà, ma kya wi sɨ taŋi.”

¹¹Bôbo Fɨyini ɨ bèynsɨ̀ ɨ bɨf sɨ̂ ŋweyn na, “À n-fu ndà ɨchfɨ̂ sɨ̂ wùl a? À n-nî ndà na wùl na yvɨ wi awo kèsa taŋî wì a? À n-nî ndà na wùl na yeyn ɨlwêʼ a? À n-nî ndà na wùl na ghɨ ànfèf a? Ba à n-nî kɨ mà Bôbo Fɨyini nî awo nâ kèynà nô à jɨ̀m? ¹²Wa ndu-à, mɨ n-gàmtɨ̀ và, a wà faytɨ̂ tàŋi. Mɨ n-fèʼtɨ ìwo zɨ̀ a ka wà ndu bè.”

¹³Mɨtì Mosìs ɨ bè na, “Mɨ n-chwotɨ̂ a Bôbo tum wul ɨ wûlù.”

¹⁴Nô mɨ ɨlvɨ gha, ɨtoŋ Bôbo Fɨyini ɨ yaf nô sɨ a ŋaŋ wu bɨf sɨ̂ ŋweyn na, “Wà n-kfâʼ na gha kûm wâynà vâ Alòyn ɨ wul ɨ̀ ndo nɨ̀ Levì vzɨ̀ a? Mɨ n-kya na wù n-faytɨ̂ taŋi-à. Wù n-ghɨ a dzɨ lvɨ̂yn gvî sɨ yeyn vâ. Wu n-yeyn và nà saŋlɨ-à. ¹⁵Wu n-gvì-à a wà feʼtɨ awo kì a ka wù be, a mà gamtɨ zɨ a yì faytɨ tàŋi ɨ̀ yèʼi zɨ̀ nɨ̀ àwo kì a ka yì ni. ¹⁶Alòyn ɨ nì nà taŋi sɨ̂ ghelɨ Isìlæ̀ a wa alèʼ. Wu nì nà bê kɨ ìwo zɨ̀ a wà n-kɨŋ sɨ bè. Wà na ghɨ tèyn ta Fɨyini sɨ̂ ŋweyn, fêʼtɨ̀ ìwo zɨ̀ a ka wù be. ¹⁷Ndu kɨ nɨ̀ mbàŋ zɨ̀ a wa awu tì. Wa ndù nî àwo a kaynɨ-a nɨ̀ ɨ̀nyeyn.”

Mosìs ɨ kasi ndù a Ijìb.

¹⁸Fɨyini fɨ nɨ̂n tàŋi tî Mosìs ɨ kasi kfa ɨ ndu bè sɨ̂ Jetɨ̀lò ɨ bò wi nɨ̀ ŋweyn na, “Mɨ n-chwotɨ̂ và, visi mà kasi ɨ̀ ndù a Ijìb ɨ̀ yèyn na ghelɨ̀ ghem bu ghɨ a. Jetɨ̀lò ɨ bɨmi ɨ bè sɨ̂ ŋweyn na wù jel kɨ̀ a jûŋ.” ¹⁹À nà n-ghɨ tì ma Bôbo Fɨyini be meyn sɨ̂ Mosìs a Midìyàn na, “Kasi ndù a Ijìb bòm ta ghelɨ ghì a ghɨ tî nà kɨŋ sɨ zue vâ tì kfɨtɨ meyn nô ghɨ̀ jɨ̀m.” ²⁰Mosìs ɨ koʼsɨ wî ŋweyn nɨ̀ woyn ghɨ lûmnɨ̀ nɨ̀ ŋweyn atû njàkâs ŋêyn àŋena ɨ lù ɨ nà sɨ kasî ndû a Ijìb. Wu lu kɨ nɨ̀ mbàŋ zɨ̀ a Fɨyini fɨ̀ nì bè na wù li tî a ŋweyn awu.

²¹Bôbo Fɨyini ɨ bè sɨ̂ Mosìs na, “Wà kasi ndù a Ijìb wa nì àwo a kaynɨ-a kì a mà fu adyaʼ na wà ni asɨ nɨ̀ fòyn Ijìb nô à jɨ̀m. Mɨtì mɨ n-ni-à a wù tosɨ atem a ŋweyn, ɨ̀ faŋ tɨ̀ vìsi na ghelɨ Isìlæ̀ lu. ²²Wù tosɨ wa bè sɨ̂ ŋweyn na, ‘Bôbo Fɨyini be meyn na ghelɨ Isìlæ̀ nɨn ghɨ ta wâyn ɨ̀kuŋ sɨ̂ mà. ²³Ma ti meyn bè sɨ̂ và na wà visi wayn ɨ̀kuŋ nɨ̀ mà nâ wèyn wù ndu nà koʼsɨ̂ mà, wà faŋ tɨ̀ vìsi na wù lu. Yi ti n-dyêyn na mɨ n-zue wayn ɨ̀kuŋ nɨ̀ và.’”

Ɨtoŋ ɨ Bôbo ɨ yaf sɨ̂ Mosìs

²⁴À nà n-ghɨ ta àŋena lù ɨ̀ nà ndû a Ijìb ɨ bɨ̀ alèʼ a li-a sɨ yvɨ̀tɨ̀, Bôbo Fɨyini ɨ gvì ɨ nà sɨ kɨŋ sɨ zue Mosìs. ²⁵Mɨtì Zìbolà ɨ lì ɨ̀kfêm ɨ sɨ anam a wayn ateyn ɨ lì gvɨ àteyn ɨ kùmlɨ̀ ɨ̀vɨ Mosìs nɨ̀ ɨ̀nyeyn ɨ kæ bè na, “Ta mà sɨ̀ meyn ànam a wayn kèyn, ɨ̀ kùmlɨ̀ ɨ̀vɨ ɨ̀ va nɨ̀ mɨ̀luŋ mɨ̀ àteyn tèyn, yi ti n-dyêyn na wà sɨ ghɨ kɨ nô lûm wom samoʼ.” ²⁶Zìbolà nɨn bè sɨ̂ Mosìs tì na, “Wà sɨ ghɨ kɨ nô lûm wom samoʼ,” bòm ìsɨ anam nɨ̀ wàyn nâ zɨ̀, nô mɨ ɨlvɨ gha Bôbo Fɨyini ɨ faŋ tɨ̀ fì tɨ̀ zue Mosìs. ²⁷Bôbo Fɨyini ɨ bè sɨ̂ Alòyn na, “Lu ndu yeyn Mosìs a nse ìyum.” Wu ndù ɨ yeyn Mosìs a kfɨyn nɨ̀ Fɨyini fɨ ɨ baʼnɨ ŋweyn. ²⁸Wu n-bàʼnɨ ŋweyn tì ɨ fèʼtɨ̀ àwo kì a Bôbo Fɨyini tum na wù ndu bè a Ijìb sɨ̂ Alòyn nɨ̀ nchwæsɨ kaynɨ sìsɨ̀ a Bôbo Fɨyini fù adyaʼ na wù ndu dyèyn nô sɨ̀ jɨ̀m. ²⁹Mosìs ŋêyn Alòyn ɨ ndu yvɨ̀ŋtɨ̀ chyeʼsɨ Isìlæ̀ nô sɨ̀ jɨ̀m, ³⁰Alòyn ɨ fèʼtɨ̀ àwo kì a Bôbo Fɨyini tî bè sɨ̂ Mosìs nô à jɨ̀m ɨ fi dyèyn nchwæsɨ awo asɨ nɨ̀ àŋena. ³¹Chyeʼsɨ ateynsɨ ɨ bimi nô mɨ̀ ghà ta àŋena yvɨ fì yeyn. A nà sɨ ghɨ ta àŋena yvɨ na Bôbo Fɨyini yeyn meyn ànjɨ̀ŋ a àŋena ɨ̀ nà sɨ kɨŋ sɨ gàmtɨ̀, àŋena tfɨŋsɨ ɨ̀tu a nse ɨ koʼsɨ ŋweyn.