Exodus 3

Bôbo ɨ jàŋ Mosìs

¹À n-læ nà ghɨ ta Mosìs nɨn kinî bzɨsɨ bò wi nɨ̀ ŋweyn ɨ Jetɨ̀lò, ɨtuʼ ɨ layn achi a li-a wu lì ɨ ndu nɨ̀ nseynsɨ ɨ chem ighaŋ i nse ìyum i li a Holèb a kfɨyn nɨ̀ Fɨyini fɨ. Jetɨ̀lò nà n-ghɨ ngàŋ ndô Fɨyini a Midìyàn. ²Nchì Bôbo Fɨyini ɨ fvɨ̀ ikèʼ nɨ̀ ŋweyn afu tèyn ta ilemi ɨvɨ̀s antêynɨ̀ ɨ̀twaʼ. Mosìs ɨ nà ghɨ nɨ̀ ìkayni sɨ yeyn na ɨvɨs nɨn balî ɨtwaʼ wu fɨ wi. ³Wu n-yèyn tî ɨ kfàʼtɨ̀ sɨ a ŋweyn a ngeŋ na, “Mɨ n-ndù baʼsɨ̂ afu ɨ̀ yeyn iwo ikaynɨ-i na ɨvɨs nɨn balî ɨtwaʼ wu fɨ wi a.”

⁴A nà ghɨ ta Bôbo Fɨyini yèyn na Mosìs nɨ̀n kɨŋtɨ̂ gvi-à sɨ yeyn na à n-gâyn ghà a, wu jàŋ ɨ gvìsɨ̀ antêynɨ̀ ɨ̀twaʼ nâ ghè na, “Mosìs, Mosìs.” Mosìs ɨ bè na, “Mà wèyn afêyn.”

⁵Fɨyini fɨ bè sɨ̂ ŋweyn na, “Ka wa n-fì kɨ̀ŋtɨ gvì. Choʼtɨ gvɨ̂ shyasɨ bòm ta alêʼ kì a wà n-ti ateyn nɨn ghɨ àlêʼ a laynɨ-a.” ⁶Wù n-be meyn kɨmɨ sɨ̂ ŋweyn na, “À n-ghɨ mà ɨ Fɨyini fɨ bò vâ, ɨ Fɨyini fɨ Abɨ̀làhâm, ɨ Fɨyini fɨ Yisàk ɨ Fɨyini fɨ Jàkôb.” Mosìs ɨ yvɨ ɨ nà fâyn sɨ ki Fɨyini ɨ buʼsɨ ìkêʼ i ŋweyn.

⁷Bôbo Fɨyini nɨ̀n bê meyn kɨ̀mɨ sɨ̂ ŋweyn na, “Ma yeyn meyn kɨ̀ nô samoʼ na ghelɨ̀ ghem nɨn jɨŋà ilaʼ i Ijìb. Ma yvɨ meyn ta àŋena nɨn dzɨ̂ ɨwu nɨ̀ ghelɨ ghì a ghɨ n-kâyntɨ̀ àŋena felɨ̀ fɨ̀koli, nà kɨŋ sɨ gàmtɨ àŋena. ⁸Ma gvi meyn sɨ fvɨ̀sɨ àŋena sɨ a ɨwu nɨ̀ ghelɨ Ijìb sɨ koʼ nɨ̀ àŋena ilaʼ yi ghaʼa, kelɨ nse ɨfwo ɨ yɨnɨ koʼ ateyn nô a jûŋ, nô mɨ ghà ɨ̀ jùŋ ɨ ghɨ ateyn. Ghelɨ Kenàn nɨ̀ ghelɨ Hêt nɨ̀ ghelɨ Amò kɨ̀mɨ nɨ̀ ghelɨ Belìz baʼsɨ̂ nɨ̀ ghelɨ Hît nɨ̀ ghelɨ Jebùs nɨn chî ilaʼ nâ ghè. ⁹Ma yvɨ meyn ìdzɨ̂ i ghelɨ Isìlæ̀ ɨ̀ fì yeyn kɨ̀ nô samoʼ ta ghelɨ Ijìb nɨn nyâblɨ̀ nɨ̀ àŋena. ¹⁰Mɨ n-tum và lvɨ̂yn sɨ̂ fòyn Ijìb a wà ndu fvɨ̀sɨ̀ ghelɨ̀ ghem ɨ ghelɨ Isìlæ̀ sɨ a Ijìb.”

Mosìs ɨ nà tisɨ̂ tɨ̀ntweŋ

¹¹Mɨtì Mosìs ɨ bè sɨ̂ Fɨyini fɨ na, “Mà ti n-ghɨ nô ndà sɨ ndù sɨ̂ fòyn Ijìb sɨ fvɨ̀sɨ ghelɨ Isìlæ̀ sɨ a Ijìb a?”

¹²Fɨyini fɨ bèynsɨ̀ ɨ bè sɨ̂ ŋweyn na, “Mà na ghɨ ghesɨ̀và. À n-ghɨ àchfɨytɨ tèyn sɨ dyèyn na ma tum meyn và. Wa nì lî fvɨ̂ nɨ̀ ghelɨ ateyn sɨ a Ijìb a zɨ̂ àŋena gvi kòʼsɨ mà a kfɨyn afêyn.”

¹³Mosìs ɨ bɨf sɨ̂ Fɨyini fɨ na, “Mà ti kæ ndù sɨ̂ ghelɨ Isìlæ̀ ɨ̀ bè sɨ̂ àŋena na, ‘Fɨyini fɨ ghɨ̀bo ghifɨ tum meyn mà sɨ̂ zɨ̀, àŋena bɨf sɨ̂ mà na, izɨyn i ŋweyni nɨn ghɨ ndà?’ Ma bè na gha?”

¹⁴Fɨyini fɨ ɨ bè sɨ̂ ŋweyn na, “À N-GHƗ MÀ VZƗ̂ A MƗ N-GHƗ Ɨ̀ŊWEYN. Wà ndû wa bè sɨ̂ àŋena na, ‘À tum ma vzɨ̀ a mɨ n-ghɨ ɨ̀ŋweyn tùm ma sɨ̂ zɨ̀.’”

¹⁵Wù n-be meyn kfeynsɨ sɨ̂ Mosìs na wù ndû wu bè sɨ̂ woyn Isìlæ̀ na, “À tùm Bôbo Fɨyini ɨ Fɨyini fɨ ghɨ̀bo ghi, ɨ Fɨyini fɨ Abɨ̀làhâm, ɨ Fɨyini fɨ Yisàk, ɨ Fɨyini fɨ Jàkôb tùm ma sɨ̂ zɨ̀. À ti izɨyn zɨ̀ a ka yì na toŋtɨ̂ mà ateyn nô ta ka ghɨ̀ læ̂ ghɨ̀. Nô mɨ àjâŋ à kà læ̀ nà koʼa kɨ nà toŋtɨ̂ mà ateyn.

¹⁶“Ndu yvɨ̀ŋtɨ chyeʼsɨ Isìlæ̀sɨ̀ ɨ bè sɨ̂ àŋena na, ‘Bôbo Fɨyini ɨ Fɨyini fɨ ghɨ̀bo ghi Abɨ̀làhâm nɨ̀ Yisàk nɨ̀ Jàkôb ti meyn fvɨ̀ a wa ikèʼ ɨ̀ bè na, wù ki meyn ɨ̀ yeyn ta ghelɨ Ijìb nɨn nyâblɨ nɨ̀ àŋena, ¹⁷ɨ̀ lèm na wu n-fvɨ̀sɨ̀ zɨ̀ sɨ a ngeʼ afî a ghɨ n-fu sɨ̂ zɨ̀ a Ijìb. Wu n-lî zɨ̀ ɨ̀ ndù lèm ilaʼ a chî ghelɨ Kenàn ateyn nɨ̀ ghelɨ Hît nɨ̀ ghelɨ Amò kɨ̀mɨ nɨ̀ ghelɨ Belìz baʼsɨ̂ nɨ̀ ghelɨ Hîv nɨ̀ ghelɨ Jebùs. Ilaʼ nâ yèynì ɨ ghɨ nô mɨ ghà ɨ̀ jùŋ ɨ ghɨ ateyn.’

¹⁸“Chyeʼsɨ Isìlæ̀sɨ̀ ɨ nì yvɨ ìwo zɨ̀ a wà bè, a zɨ̂ àŋena ndu ɨ̀ bè sɨ̂ fòyn Ijìb na, ‘Bôbo Fɨyini ɨ Fɨyini fɨ ghelɨ Hibɨ̀lù dyeyn meyn ngêŋ ŋweyn sɨ̂ ghès. Ghèsɨ na chwotɨ̂ na wà visi ghèsɨ̀ li mɨchi ɨ̀n tal ɨ̀ ndù a nse ìyum ɨ̀ fù tɨfu sɨ̂ Bôbo Fɨyini, ɨ Fɨyini feyfɨ.’ ¹⁹Mɨ n-kya kɨ nô na fòyn Ijìb ɨ nì visî wì na yì lu a bu kɨ na wù yeyn meyn na adyaʼ à kema chwo meyn akɨ ŋweyn a. ²⁰Mɨ n-dyèyn àdyaʼ à kema sɨ̂ ghelɨ Ijìb ɨ̀ fù ngeʼ sɨ̂ àŋena a achfɨ̂ a àŋena yum, a à na ghɨ ta mà dyèyn meyn a wù visi a yì lu.

²¹“Mɨ n-ni-à a yì na koʼnɨ-à asɨ nɨ̀ ghelɨ Ijìb ta ka yì læ se sɨ lù ɨ̀ faŋ tɨ̀ lù nɨ̀ ɨ̀wu ɨ yum. ²²Nô mɨ wùl ɨ wi ɨ̀ kfà læ̀ bê sɨ̂ wùl ɨ wî Ijìb vzɨ̀ a wù n-chi baʼsɨ sɨ̂ ŋweyn kèsa ɨvzɨ̂ a wù n-chi a ŋweyn a ndo na wù fu ɨfwo vzɨ̀ a ghɨ fàytɨ nɨ̀ àso ɨkwo a fɨfâ nɨ a baŋnɨ-a baʼsɨ̂ nɨ̀ ndzɨsɨ a yì labsɨ wôyn ghi ateyn. À ti ta yì læ̀ lû nɨ̀ ìghaʼ i Ijìb ì.”