Exodus 2

Ghɨ bzɨ Mosìs

¹À nà n-ghɨ kɨmɨ ɨtuʼ nâ ghè wùl ɨ̀ntweŋ ndo nɨ̀ Levì ɨ̂lvì ɨ ndù wi kɨ̀mɨ ɨntweŋ ndo nâ ghè. ²Wùl ɨ̀ wi àteyn ɨ timi ɨlvâ ɨ bzɨ wayn ɨ̀ lûmnɨ̀ ɨ yeyn na wù n-jofà ɨ lèytɨ̀ wayn àteyn sɨ a njoŋsɨ̀ tal. ³A nà ghɨ ta wù yèyn na yì kàʼ yi bû fì lèytɨ̀ ŋweyn, wu lì ìfûʼ ma ghɨ bo nɨ̀ ɨ̀nfûʼ ɨ̀n lì mɨ lemâ a mbæ̀ jvà Nâyl ɨ lètɨ̀ ìfûʼ ateyn nɨ̀ àle a. Wu n-lètɨ tî ɨ we wayn àteyn a ifùʼ nâ ghè ɨ ndu ɨ lèm antêynɨ̀ ɨ̀yol afî a wu n-lema antêynɨ̀ mù a mbæ̀ jvà Nâyl. ⁴Wu n-lèm tî jêmtɨ̀ wàyn nâ vzɨ̀ ɨ timi kɨ sɨ a nje ɨ nà ki sɨ yeyn nâ a ngàyn ghà sɨ̂ ŋweyn a.

⁵A nà ghɨ ta wâyn ntôʼ Ijìb ɨ wi ɨ̀lvì ndù sɨ sù ɨwuyn a jvâ, ghelɨ ghɨ felɨnɨ nɨ̀ ŋweyn ɨ nà ghaynɨ̂ kɨ a mbæ̀ jvà. Wâyn ntoʼ àteyn ɨ yeyn ifûʼ zɨ̀ antêynɨ̀ ɨ̀yòl ɨ tum wul ɨ̀ felɨnɨ nɨ̀ ŋweyn ɨ wi ɨ̀lvì wu ndu lì ɨ gvì nɨ̀ ìnyeyni. ⁶Wùl ɨ̀ felɨnɨ nɨ̀ ŋweyn ɨ li gvì nɨ̀ ìfûʼ ateyn i, wu choʼ ɨ yeyn wayn ɨ̀ lûmnɨ̀ wu dzɨ-à ɨ nà koynsɨ̂ ìsuyn sɨ̂ ŋweyn ɨ bè na, “Ɨwêyn nɨ̀n ghɨ wâyn wùl ɨ̀ Hibɨ̀lù ɨ̀lvì têyn.”

⁷Jêmtɨ̀ wàyn nâ vzɨ̀ ɨ yvɨ tî ɨ bɨf na, “Mà ndu ɨ̀ kìni wul ɨ̀ wî Hibɨ̀lù wù na tôʼnɨ̀ nɨ̀ wayn àteyn sɨ̂ và a?”

⁸Wâyn ntoʼ ɨ̀ wi nâ vzɨ̀ ɨ bèynsɨ̀ sɨ̂ ŋweyn na, “Ndù-a.” Wâyn ɨ̀ wi àteyn ɨ ndù ɨ li gvì nɨ̀ nà wàyn nâ vzɨ̀. ⁹Nà wayn àteyn ɨ gvì. Wâyn ntoʼ nâ vzɨ̀ ɨ bè sɨ̂ ŋweyn na, “Lì wayn wèyn ɨ nà tôʼnɨ̀ nɨ̀ ŋweyn mà læ̂ làʼ và.” Ta wù bè tî, nà wàyn nâ vzɨ̀ ɨ lì wayn àteyn ɨ ndu nà sɨ tôʼnɨ̀ nɨ̀ ŋweyn. ¹⁰Wayn àteyn ɨ læ lema, wu lì ɨ ndu ɨ fu sɨ̂ wâyn ntoʼ nâ vzɨ̀, wu lì sɨ a ŋweyn a wayn, ɨ chfɨ̀ ìzɨyn i ŋweyn na Mosìs bê na, “Mà tî fvɨ̀sɨ̀ ŋweyn a jvâ.”

Mosìs ɨ leʼ ndù a Midìyàn

¹¹Mosìs nɨn læ meyn lema ɨ nà sɨ ghɨ kɨ nô ànto a wûl. Ɨtuʼ ɨ layn achi a li-a, wu fvɨ ɨ ndù alèʼ ghè a woynà ŋweyn nà n-ghɨ ateyn ɨ yeyn dzɨ zɨ̀ a ghɨ n-kâyntɨ̀ àŋena felɨ̀ fɨ̀koli ateyn, ɨ fi yeyn wul ɨ̀ Ijìb wu leŋ wul ɨ̀ Hibɨ̀lù, ma à ti wâynà ŋweyn ɨ̀lvì. ¹²Mosìs ɨ ki asɨ ɨ ki ibam ɨ faŋ tɨ̀ yèyn têyn ta wùl nɨ̀n ki ŋweyn, wu zue wul ɨ̀ Ijìb àteyn ɨ gvɨ̀mì ŋweyn antêynɨ̀ àsèse. ¹³Ɨtuʼ ɨ layn a ànkùmtɨ̀ achi wu fvɨ ɨ yeyn ghelɨ Hibɨ̀lù ghɨ̀ bò ghɨ nu-à, wu bɨf sɨ̂ ɨvzɨ̂ a wù jas na, “Bòm ghà ta wà n-kasi leŋ kɨmɨ wâynà vâ ɨ wul ɨ̀ Hibɨ̀lù a?”

¹⁴Wùl àteyn ɨ bɨf sɨ̂ ŋweyn na, “À lèm ndà vâ na wà na saʼ ghès a?” Ba wà ti n-kɨŋ sɨ zue ma kɨ̀mɨ ta wà tî zue wul ɨ̀ Ijìb vzɨ̀ a? Mosìs ɨ nà sɨ faynà ɨ kfàʼtɨ kɨ sɨ a ŋweyn a ngeŋ na, “Ba à ti n-ghɨ na ghelɨ keli meyn ìwo zɨ̀ a mà tî nì.”

¹⁵Fòyn Ijìb ɨ yvɨ iwo ateyn ɨ nà sɨ mômsɨ̀ sɨ zue Mosìs mɨtì wu leʼ ndù sɨ nà chî a Midìyàn, ɨ ndu chem afu ɨ suʼi ɨ dùʼì a ngùŋ ìbɨ̀ imu i li. ¹⁶Ngàŋ ndô Fɨyini î li nà n-ghɨ a Midìyàn, kelɨ woyn ghɨ̂kì nsòmbo, àŋena gvì sɨ tu mu sɨ we a mɨ̂kɨ̀ na bzɨsɨ bò àŋenasɨ nyvɨ. ¹⁷Nchìsɨ bzɨsɨ lisɨ ɨ gvì kɨmɨ afu ɨ nà sɨ jûm àŋena mɨtì Mosìs ɨ gàmtɨ̀ àŋena ɨ tu fu mu bzɨsɨ bò àŋenasɨ nyvɨ.

¹⁸Woyn ghɨ̂kì nâ ghì ɨ kasi kfa, bò àŋena ɨ Luwèl ɨ bɨf sɨ̂ àŋena na, “Yì nyàŋsɨ̀ kfa ghà layn tèyn a?”

¹⁹Àŋena bè na, “À nì gàmtɨ̀ fsɨ̀ wul ɨ̀ Ijìb ɨ̀lvì ghes sɨ a awu nɨ̀ nchìsɨ bzɨsɨ ɨ̀ fì tu fù nô mu bzɨ̂ seysɨ nyvɨ.”

²⁰Luwèl ɨ bɨf sɨ̂ àŋena na, “Wùl àteyn bà? Yì nì faŋ tɨ bê na wù gvi yì kfa fu afo wù yɨ ɨ̀ vìsi ŋweyn bòm ghà? Yì jaŋ ŋweyn wù gvi yɨ afo.”

²¹Mosìs ɨ gvì ɨ bɨmi sɨ nà chî ŋêyn Luwèl, wu fu wâyn ŋweyn Zìbolà sɨ̂ Mosìs sɨ a wi. ²²Zìbolà ɨ læ bzɨ wayn ɨ̀ lûmnɨ̀ Mosìs ɨ chfɨ̀ ìzɨyn i wayn àteyn na Geshòm, ma wù ti n-bê na, “Ma gâyn meyn wul àtum ilaʼ atum.”

²³Mosìs nɨ̀n læ meyn chi afu nô sɨ a ndyèyn, fòyn Ijìb ɨ læ lè woyn Isìlæ̀ ɨ bu felɨ̀ kɨ àkôs a Ijìb. Àŋena nà sɨ dzɨ̀ nô sɨ a ŋaŋ, Fɨyini fɨ ɨ yvɨ idzɨ̂ i àŋena. ²⁴Fɨyini fɨ ɨ yvɨ ta àŋena dzɨ̀ chwòsɨ̀ ɨ kfàʼtɨ̀ mɨ̀kâyn mzɨ̀ a wu n-yɨ̀ ŋêyn Abɨ̀làhâm nɨ̀ Yisàk nɨ̀ Jàkôb. ²⁵Fɨyini fɨ nɨn yèyn tî ɨ keli ìkoynsɨ isuyn sɨ̂ ghelɨ Isìlæ̀ ɨ nà kɨŋ sɨ gàmtɨ àŋena.