Exodus 5

Mosìs ŋêyn Alòyn ɨ ndù asɨ nɨ̀ Fòyn Ijìb

¹À nà n-ghɨ ta Mosìs ŋêyn Alòyn tàŋi meyn sɨ̂ chyeʼsɨ Isìlæ̀sɨ̀, àŋena ndù ɨ yeyn fòyn Ijìb ɨ bè sɨ̂ ŋweyn na, “Bôbo Fɨyini, ɨ Fɨyini fɨ Isìlæ̀ bè na, ‘Visi ghelɨ̀ ghem àŋena ndu ɨ̀ yɨ achi a ghaʼnɨ-a a nse ìyum ɨ̀ ngvɨ̀mlɨ mà.’”

²Fòyn Ijìb ɨ bɨf na, “Bôbo Fɨyini nâ vzɨ̀ nɨ̀n ghɨ ndà sɨ bè na mà visi ghelɨ Isìlæ̀ ghɨ lu a? Mɨ n-kya wi Bôbo Fɨyini nâ vzɨ̀ ghɨ wi sɨ yvɨ iwo zɨ̀ a wù bè sɨ visi na ghelɨ Isìlæ̀ lu.”

³Mosìs ŋêyn Alòyn ɨ bè sɨ̂ fòyn Ijìb na, “Fɨyini fɨ ghelɨ Hibɨ̀lù fɨ ti meyn fvɨ̀ a ghès ikèʼ, ghèsɨ na chwotɨ̂ a mbæ̀ na wà visi ghès lu. Ghès nɨn ndù a nse ìyum ɨ̀ fù tɨfu sɨ̂ Bôbo Fɨyini, ɨ Fɨyini feyfɨ. Ghès kæ faŋ tɨ̀ ndù, a wù ni a tɨkoʼi tɨ zuetɨ ghes, fàŋ tî a wù ni a ghèsɨ̀ seʼ iwoŋ a wùl faŋ tɨ̀ fì tɨ̀ kfa. Ijêl ì yesi nɨn lì mɨchi ɨ̀n tal.”

⁴Fòyn Ijìb ɨ bɨf na, “Mosìs, Alòyn, bòm ghà ta yi n-tâysɨ̀ ghelɨ na ka àŋena na fèl a? Yì kasi ndù nà felà.” ⁵Wù n-fi meyn bè na, “Ghelɨ Hibɨ̀lù sɨ dvɨ̂ chwô ghelɨ ilaʼ afêyn. Bòm ghà ta yi n-tâysɨ̀ na ka àŋena na fèl a?”

⁶À nà n-ghɨ kɨmɨ achi nâ ghè, fòyn Ijìb ɨ chwòsɨ̀ ìsaʼ na, ka ghelɨ ghì a ghɨ n-kâyntɨ̀ na ghelɨ Isìlæ̀ na fèl fɨ̀koli nɨ̀ ghelɨ Isìlæ̀ ghì a ghɨ n-tisɨ ifêl ateyn, ⁷fî fu ɨ wi na ghelɨ Isìlæ̀ na taynɨ̂ àchaʼ ateyn boma, na à na ndû kɨŋ kɨ àŋena ɨ wi ateyn. ⁸Fòyn Ijìb nɨ̀n be meyn kɨmɨ na ghɨ kayn àŋena na bom kɨ àkôyn achaʼ kì a àŋena tî nà bom achi, ka ghɨ n-fàbtɨ̀. Wù n-fi meyn bè na àŋena nɨn bê na ghɨ visi àŋena ndu fu tɨfu sɨ̂ Fɨyini fɨ àŋena fɨ kɨ bòm ta àŋena nɨn yoli. ⁹Fòyn Ijìb nɨn be meyn kɨmɨ na àŋena nɨn kelɨ sɨ nà fêl nô sɨ a ŋaŋ, chwô ta àŋena tî nà felà, ta ka àŋena na kelɨ wi ɨlvɨ sɨ nà yvɨtɨ̂ ànkaŋ kì a ghɨ n-wam sɨ̂ àŋena.

¹⁰Fòyn Ijìb ɨ taŋi tì, ghelɨ ghì a ghɨ n-kâyntɨ̀ na ghelɨ Isìlæ̀ na fêl fɨ̀koli nɨ ɨghî a ghɨ n-tisɨ ifêl ɨ fvɨ̀ ɨ ndu bè sɨ̂ ghelɨ Isìlæ̀ na, “Fòyn Ijìb bê meyn na, ‘Mà na bu fì fu wi ɨ wi sɨ̂ zɨ̀. ¹¹Yì na ndû kɨŋ ɨ̀wi ɨ̀vzɨ kɨ̀ sɨ a yi a ngeŋ nô mɨ awo ta yì kàʼ a yì yeyn. Mɨtì akôyn achaʼ kì a yì tî nà boma ɨ ghɨ wi sɨ fàbtɨ̀.’” ¹²Àŋena ndù ɨ bè nô mɨ ɨlvɨ gha ghelɨ Isìlæ ɨ gwòsɨ ndu kɨ ilaʼ i Ijìb ì jɨ̀m sɨ kɨŋ ɨ wi. ¹³Ghelɨ ghì a ghɨ n-kâyntɨ̀ na ghelɨ Isìlæ̀ na felɨ̀ fɨ̀koli ɨ faŋ nà bê kɨ na, “Yi n-kelɨ sɨ nà nî ìfêl ì zɨ-i nô mɨ achi à kà kɨ ighel ta ghɨ tî nà fu ɨ wi sɨ̂ zɨ̀ yi ni-à.” ¹⁴Ghelɨ fòyn Ijìb nâ ghì a ghɨ nà n-kâyntɨ̀ ghelɨ Isìlæ̀ ɨ felɨ fɨ̀koli tì ɨ nà sɨ leŋ ghelɨ Isìlæ̀ ghì a àŋena lèm na ghɨ na tisɨ̂ ìfêl bɨf sɨ̂ àŋena na, “Yi n-bom àchaʼ kɨ bu koʼ chem wi ta yì tî nà bom sɨ a asɨ bòm ghà?”

¹⁵Ghelɨ Isìlæ̀ ɨ ndu ɨ nà sɨ dzɨ̂ sɨ̂ fòyn Ijìb bɨf na, “Bòm ghà ta wà n-nyâblɨ̀ nɨ̀ ghelɨ ghɨ felɨnɨ nɨ̀ và têyn a? ¹⁶Ghɨ bu fì fu wi ɨ wi sɨ̂ ghès ta ghɨ tî nà fu-a mɨtì kâyn kɨ na ghès na bom àchaʼ. Ghɨ n-leŋ ghelɨ ghɨ felɨnɨ nɨ̀ và mɨtì ngeʼ àteyn ɨ lû kɨ sɨ̂ ghelɨ̀ ghya.”

¹⁷Àŋena taŋi tì fòyn Ijìb ɨ bè na, “Yi n-ghɨ kɨ nô ghelɨ ghɨ yolinɨ kôŋ wì sɨ nà felà. À ti iwo zɨ̀ a yì faŋ nà bê kɨ na, ‘Visi ghès ndu fu tɨfu sɨ̂ Bôbo Fɨyini.’ ¹⁸Yì nyaŋsɨ ndù nà felà. Ghɨ na bu fì fu wi ɨ wi sɨ̂ zɨ̀ mɨtì yi kelɨ sɨ nà bom kɨ akôyn achaʼ kì a yì tî nà boma.”

¹⁹Ghelɨ Isìlæ̀ ghì a ghɨ nà n-tisɨ ifêl ɨ yeyn na àŋena nɨn ghɨ a ngeʼ bòm ta ghɨ be meyn na àŋena nɨn kelɨ wi sɨ fàbtɨ̀ akôyn achaʼ kì a àŋena tî nà bom achi. ²⁰À nà n-ghɨ ta àŋena fvɨ̀ sɨ a ntoʼ nà sɨ kasî gvi-à, ɨ yeyn Mosìs ŋêyn Alòyn, ghɨ chîtɨ̀ àŋena, ²¹ɨ ku kɨ Mosìs ŋêyn Alòyn nɨ̀ ìyol ì ɨ bè na, “Bôbo Fɨyini yeyn meyn iwo zɨ̀ a yì nì, ghɨ sɨ fu ngeʼ sɨ̂ zɨ̀. Yi nî meyn na fòyn Ijìb ŋêyn ghelɨ ŋweyn na bâyn ghès. À fu kɨ̀ nô zɨ̀ fù ghes na àŋena zuetɨ.”

Mosìs ɨ dzɨ̀ sɨ̂ Bôbo Fɨyini

²²Mosìs ɨ kasi ndù ɨ dzɨ̀ sɨ̂ Bôbo Fɨyini ɨ bè na, “Ô Bôbo, wà nì na ghelɨ Isìlæ̀ ghèyn zɨ a ngeʼ bòm ghà? A ti iwo zɨ̀ a wà tî tùm ma afêyn sɨ ateyn? ²³Fòyn Ijìb nɨ̀n nyâblɨ̀ kɨ nyablɨ nɨ̀ ghelɨ ghya kɨ̀ sɨ zɨ̀tɨ̀ achi ta mà tî làʼi ntum zyâ sɨ̂ ŋweyn mɨtì wà bû nì nô ìwo i li sɨ gàmtɨ àŋena.”