Exodus 37

Ghɨ bayn àntayntayn a mɨ̂kàyn nɨ̀ Bôbo Fɨyini

¹Bèzalèl nɨ̀n bayn meyn àntayntayn a mɨ̂kâyn nɨ̀ Bôbo Fɨyini nɨ̀ fɨkâʼ fɨ àkasìyà fɨ̀ kɨ dyêf chem ndû ntàm nɨ̀ àbeʼ a, ghaʼ chem ndû ntàm ìmòʼ, njetɨ̂ chem ndû kɨmɨ ntàm ìmòʼ. ²Wu n-bayn tî, ɨ yoʼ antêynɨ̀ ateyn baʼsɨ̂ nɨ̀ jɨm àteyn nɨ̀ àso ɨkwo a baŋnɨ-a kɨ kelɨ wi ilɨŋ, ɨ memtɨ ɨ jɨŋ kal kɨmɨ nɨ̀ àso ɨkwo a baŋnɨ-a. ³Wù n-buŋsɨ meyn àso ɨkwo a baŋnɨ-a ɨ faytɨ mɨ̀nchaʼ ateyn ɨ baysɨ afyeyn a antayntayn nâ ghè à kæ̀. Mɨ̀nchaʼ ɨ̀m bò ɨ nà ghɨ abàs àmòʼ, ɨ̀m bò ɨ ghɨ abàs a li-a. ⁴Wù n-kom meyn mbàŋsɨ̀ nɨ̀ fɨkâʼ fɨ àkasìyà fɨ̀ ɨ yoʼ nɨ̀ àso ɨkwo a baŋnɨ-a, ⁵ɨ tuŋtɨ ɨ zɨsɨ a mɨnchaʼ afî a mbæ̀sɨ antayntayn ta ka ghɨ na ghal châʼsɨ̀ ateyn.

⁶Wù n-læ faytɨ nchɨl àteyn kɨ nɨ̀ àso ɨkwo a baŋnɨ-a kɨ kelɨ wi ilɨŋ, yi dyêf chem ndû ntàm nɨ̀ àbeʼ a, ghaʼ chem ndû ntàm ìmòʼ. ⁷Wù n-læ meyn leŋ mamtɨ àso ɨkwo a baŋnɨ-a ɨ faytɨ chelùb sɨ̀ bò a tɨghaŋ tɨ nchɨl nâ ghàyn. ⁸À ti n-ghɨ na wù n-læ faytɨ chelùb ìmòʼ ighaŋ i nchɨl ìmòʼ ɨ faytɨ ì lì a ighaŋ i nchɨl i li. Chelùb nâ sèynsɨ̀ nɨ̀ nchɨl àteyn nà n-ghɨ kɨ sɨ afo àmòʼ. ⁹Wù n-læ faytɨ tɨwô tɨ chelùb nâ sèynsɨ̀ tɨ làli ɨ koʼ iyvɨ ɨ chɨytɨ nchɨl àteyn. Chelùb nâ sèynsɨ nà n-ghɨ ma sɨ kèʼnɨ̀ keʼnɨ ki suʼsɨ̂ nɨ̀ nchɨl àteyn.

Abaŋ abayn a laynɨ-a

¹⁰Bèzalèl nɨn læ meyn faytɨ àbaŋ abayn a laynɨ-a nɨ̀ fɨ̀kâʼ fɨ àkasìyà fɨ̀ kɨ nà dyêf chem ndû ntàm ìmòʼ, ghaʼ chem ndû àbeʼ a ntàm, njetɨ̂ chem ndû ntàm ìmòʼ, ¹¹ɨ yoʼ nɨ̀ àso ɨkwo a baŋnɨ-a kɨ kelɨ wi ilɨŋ ɨ memtɨ jɨŋ kal kɨmɨ nɨ̀ àso ɨkwo a baŋnɨ-a a mbæ̀sɨ ateyn. ¹²Wu n-bayn meyn kal nɨ̀ afo-a a mbæ̀sɨ ateyn kɨ ghaʼ ghɨ ta awu a wûl, ɨ memtɨ ɨ jɨŋ kal nɨ̀ àso ɨkwo a baŋnɨ-a atu ateyn. ¹³Wù n-læ meyn faytɨ mɨ̀nchaʼ ɨ̀n kæ̀ nɨ̀ àso ɨkwo a baŋnɨ-a ɨ wesɨ a tɨghaŋ tɨ abaŋ nâ ghè tɨ̀ kæ̀, ɨlwèʼ ghè a afyeyna nɨn ghɨ ateyn. ¹⁴Wu n-nì tî, ɨ kom mbàŋsɨ̀ ɨ tuŋtɨ a mɨnchaʼ afî a mbæ̀sɨ̀ ta ka ghɨ na ghal châʼsɨ̀ àbaŋ ateyn. ¹⁵Wù n-læ meyn kom mbàŋ sìsɨ̀ a ka ghɨ na châʼsɨ̀ àbaŋ nâ kì ateyn nɨ̀ fɨ̀kâʼ fɨ àkasìyà fɨ̀ ɨ yoʼ nɨ̀ àso ɨkwo a baŋnɨ-a. ¹⁶Wù n-faytɨ meyn ɨ̀kfaŋ ɨ lelinɨ nɨ̀ ɨ̀kfaŋ ɨ mbvɨktɨnɨ nɨ̀ ɨ̀kfaŋ ɨ ghaʼlɨnɨ nɨ̀ ngɨ̀sɨ̀ ta ka ghɨ na wê mɨ̀lûʼ mɨ̀ ìfu ateyn. Ghɨ n-fàytɨ ɨfwo nâ wèyn kɨ nɨ̀ àso ɨkwo a baŋnɨ-a ki kelɨ wi ilɨŋ.

Afo kì a ghɨ n-tomtɨ lâmsɨ̀ atû àteyn

¹⁷Bèzalèl nɨn lî meyn àso ɨkwo a baŋnɨ-a kɨ kelɨ wi ilɨŋ ɨ leŋ, ɨ faytɨ àfo kì a ghɨ n-tomtɨ lâmsɨ̀ ateyn, ɨ faytɨ ìsas ateyn nɨ̀ ɨ̀wuyn ateyn nɨ̀ ɨ̀lwêʼ vzɨ̀ a ka ghɨ na tomtɨ̂ lâmsɨ̀ ateyn wu ghɨ tèyn ta flawà ɨlvɨ ta yì bùs. Nsaynsɨ ateynsɨ nɨ̀ ɨ̀lwêʼ vzɨ̀ a ka ghɨ na tomtɨ̂ lâmsɨ̀ ateyn ɨ ghɨ kɨ sɨ afo àmòʼ, ¹⁸akœ ɨ fvɨ̂ ɨwùyn ateyn ntufa ɨbyâs ɨ̀ bwò, nô mɨ àbâs à kà ɨ kelɨ àkœ à tal. ¹⁹Wù n-faytɨ meyn bom sɨ̀ tal sɨ̀ tal, nô mɨ ɨkœ ɨ̀ kfà, sɨ ghɨ tèyn ta flawà fɨ̀kàʼ fɨ almòn nɨ̀ tɨ̀nchoʼ tɨ ateyn tɨ ɨlvɨ ta fɨ bùs. Yi ti n-dyêyn na akœ nâ kèynà ntufa ɨwuyn afo nâ ghàyn nà n-kelɨ bom sɨ̀ tal sɨ̀ tal nô mɨ ɨkœ ɨ̀ kfà. ²⁰Afo ateyn a nà n-kelɨ bom sɨ̀ kæ̀ ɨwùyn ateyn sɨ ghɨ tèyn ta flawà fɨ̀kàʼ fɨ almòn nɨ̀ tɨ̀nchoʼ tɨ ateyn tɨ ɨlvɨ ta fɨ bùs. ²¹À nà n-ghɨ isas i akœ à bò a kɨ asɨ-a ta kɨ n-fvɨ̂ ɨwùyn afo nâ ghè a ghɨ n-tomtɨ lâmsɨ̀ ateyn, ìnchoʼ i flawà ɨ ghɨ ateyn, ìnchoʼ i ɨ ghɨ isas a ànkùmtɨ̀ ɨkœ, fî ghɨ isas i akœ a goʼsɨnɨ-a. Yi ti n-dyêyn na akœ ateyn a nà n-nchɨ̂yntɨ̀ ghɨ ntufa. ²²Tɨ̀nchoʼ tɨ ateyn tɨ nɨ̀ àkœ ateyn a nà n-ghɨ kɨ sɨ afo àmòʼ nɨ̀ àfo kì a ghɨ n-tomtɨ lâmsɨ̀ ateyn ma ghɨ fàytɨ nɨ̀ àso ɨkwo a baŋnɨ-a ta ghɨ leŋ màmtɨ kɨ kelɨ wi ilɨŋ.

²³Wu n-fàytɨ lâmsɨ ateyn nsòmbo, nɨ̀ àfo kì a ghɨ n-bâʼ lisì abvɨ a nkfɨ̀ lâm ateyn ɨlvɨ ta yì fɨ nɨ̀ àfo kì a ghɨ n-wê abvɨ ateyn nɨ̀ àso ɨkwo a baŋnɨ-a kɨ kelɨ wi ilɨŋ. ²⁴Wù n-læ lì aso ɨkwo a baŋnɨ-a kɨ dɨ̂l chem ndû kilùsɨ̀ mɨ̀vɨm ɨ̀n tal njvàsɨ̀ kæ̀ kelɨ wi ilɨŋ ɨ faytɨ àfo kì a ghɨ n-tomtɨ lâmsɨ̀ ateyn baʼsɨ̂ nɨ̀ ɨfwo ateyn nô ɨ̀ jɨ̀m.

Abaŋ kì a ghɨ nyôʼ ileŋ ateyn

²⁵Bèzalèl nɨn bayn meyn àbaŋ nɨ̀ fɨ̀kâʼ fɨ àkasìyà fɨ̀ na ghɨ nà nyôʼ ìleŋ ateyn, ɨbyâs ateyn ɨ̀ kfæ̀ nà n-ghɨ kɨ ighel ighel, kɨ dyêf chem ndû àbeʼ a ntàm, ghaʼ chem ndû kɨmɨ àbeʼ a ntàm, njetɨ̂ chem ndû ntàm ìmòʼ, nɨ̀ mɨ̀chôʼ a tɨ̂ghaŋ tɨ ateyn tɨ̀ kæ̀, mɨ ghɨ tèyn ta ndoŋsɨ nyâm, ghɨ kɨ sɨ afo àmòʼ nɨ̀ abaŋ ateyn a. ²⁶Wu n-faytɨ, ɨ yoʼ atu ateyn, ɨ yoʼ mbæ̀sɨ ateyn baʼsɨ̂ nɨ̀ mɨ̀choʼ mzɨ̀ a mɨ̀ n-ghɨ a tɨ̂ghaŋ tɨ ateyn tì ta ndoŋsɨ nyâm nɨ̀ àso ɨkwo a baŋnɨ-a kɨ kelɨ wi ilɨŋ ɨ memtɨ ɨ kal kɨmɨ nɨ̀ àso ɨkwo a baŋnɨ-a a mbæ̀sɨ ateyn. ²⁷Wù n-faytɨ meyn mɨ̀nchaʼ ɨ̀m bò nɨ̀ àso ɨkwo a baŋnɨ-a, ɨ we isas alèʼ ghè a ghɨ mèmtɨ kàl tî, mɨ kèʼnɨ kèʼnɨ ta ka ghɨ tuŋ mbàŋsɨ̀ ateyn, nà ghal châʼsɨ̀ àbaŋ nâ kì ateyn, ²⁸ɨ kom mbàŋsɨ̀ ateyn nɨ̀ fɨkâʼ fɨ àkasìyà fɨ̀ ɨ yoʼ nɨ̀ àso ɨkwo a baŋnɨ-a.

²⁹Bèzalèl nɨn faytɨ meyn kɨmɨ mɨ̀vɨl mzɨ̀ a ghɨ n-yisi ngàŋsɨ ndô Fɨyini ateyn, nɨ̀ ìleŋ i yi lɨ̂mtɨ̀ foma. Wu n-fàytɨ mɨvɨl mɨ̀ àteyn kɨ̀ nô ta ghelɨ ghì a ghɨ n-faytɨ mɨyisi ɨ̀n lɨ̀mtɨnɨ̂.