Exodus 36

¹Yi ti n-dyêyn na Bèzalèl ŋêyn Oholìyàb baʼsɨ̂ nɨ̀ ghelɨ ghɨ li ghì nô ghɨ̀ jɨ̀m ta Bôbo Fɨyini fu itof na ghɨ na kya sɨ bàʼlɨ fɨ̀ndo fɨ Bôbo Fɨyini nɨn fèlɨ̀ kɨ ighel ta Bôbo Fɨyini bè.”

Mosìs ɨ bè na ka ghɨ fî fu.

²Mosìs nɨ̂n tàŋi tî ɨ tum jàŋ Bèzalèl ŋêyn Oholìyàb nɨ̀ ghelɨ ghì a Bôbo fu itof na ghɨ na faytɨ̂ felà baʼsɨ̂ nô mɨ nɨ̀ nda ɨ̀ lvɨ̀ vzɨ̂ a wù n-kôŋ sɨ gvì sɨ ni ifêl ateyn. ³Mosìs ɨ fu ɨfwo vzɨ̀ a ghelɨ Isìlæ̀ gvì nɨ̀ ɨŋweyn na ghɨ baʼlɨ fɨ̀ndo fɨ Bôbo Fɨyini ateyn sɨ̂ àŋena nô ɨ̀ jɨ̀m. Ghelɨ ɨ faŋ ɨ nà sɨ fì bɨsɨ gvî kfeysɨ̂ nɨ̀ ɨ̀fwo sɨ̂ ŋweyn kɨ̀ mɨchi ɨ̀n jɨ̀m. ⁴Nô mɨ ɨlvɨ gha, ghelɨ ghì a Bôbo Fɨyini fu itof na àŋena na fèlɨ̀ a fɨndo nɨ̀ ŋweyn ɨ visi ìfêl ⁵ɨ gvi bè sɨ̂ Mosìs na, “Ghelɨ gvi meyn nɨ̀ ɨ̀fwo wu na sɨ dvɨ̂ chwô ìfêl zɨ̀ a Bôbo Fɨyini bè na ghɨ ni.”

⁶Mosìs ɨ chwòsɨ̀ ìsaʼ na ghɨ be sɨ̂ ghelɨ ghɨ̀ jɨ̀m alèʼ ghè a ghɨ bɨ̀ ateyn na, “Ka wùl ɨ wi kèsa ɨ lûmnɨ̀ fî gvì nɨ̀ afo na ghɨ baʼlɨ fɨ̀ndo fɨ Bôbo Fɨyini ateyn.” Mosìs ɨ taŋi tì, ɨ tuynsɨ na ka wùl fî gvì nɨ̀ àfo a, ⁷bòm ta ghelɨ ghɨ felɨnɨ nà n-sɨ kelɨ ɨ̀fwo ɨ felɨnɨ wu dvɨ̂ chwô ìfêl.

Ghɨ bàʼlɨ̀ fɨ̀ndo fɨ Bôbo Fɨyini

⁸Ghelɨ ghì a ghɨ nà n-faytɨ kya ifêl antêynɨ̀ nɨ̀ ghelɨ ghɨ felɨnɨ nô ghɨ̀ jɨ̀m ɨ faytɨ fɨ̀ndo fɨ Bôbo Fɨyini nɨ̀ ɨ̀byâs ɨ ndzɨsɨ ìvɨm ma ghɨ faytɨ meyn tɨm nɨ̀ àmbyeyn a fyeynɨ-a kɨ nyêm nyêm nɨ a li-a kɨ nyêm bâŋ ndû ndu nɨ a li-a kɨ bɨ̂ylɨ̀ bâŋ baŋ. Ndzɨ nâ sèynsɨ nà n-ghɨ ma à tɨ̀m ghelɨ faytɨ̂ kya ìfêl, ɨ̀ se sɨ tɨm ɨ̀ we chèlùbsɨ̀ ateyn. ⁹Ɨbyâs ɨ ndzɨsɨ nâ vzɨ nà n-ghɨ kɨ ɨfyêʼ ɨ̀mòʼ. Nô mɨ àbâs à kà ɨ dyêf chem ndû ntàmsɨ̀ njvàsɨ̀ bò nɨ̀ àbeʼ a, ghaʼ chem ndû ntàmsɨ̀ bò. ¹⁰Àŋena lì ɨ̀byâs ɨlvɨ ɨ̀ twâyn ɨ tas ɨ yuŋ kɨ sɨ afo àmòʼ, ɨ fi lì ɨlvɨ vzɨ̀ ɨ̀ twâyn ɨ tas ɨ yuŋ kɨmɨ tì, ¹¹ɨ lì ɨ̀byâs ɨ ndzɨsɨ ɨ nyemnɨ ɨ faytɨ mɨ̀tôŋnɨ̀ ateyn ɨ we achfɨ̀ a ndzɨsɨ ghê a àŋena tas yùŋtɨ̀ tî, ɨ ni kɨmɨ tì nɨ̀ abâs a li-a kì. ¹²Àŋena nɨn faytɨ meyn mɨ̀tôŋnɨ̀ mɨ̀vɨm ɨ̀n tâyn ɨ we achfɨ̀ abàs a ndzɨsɨ a yuŋtɨnɨ-a afî ɨ faytɨ kɨmɨ mɨ̀tôŋnɨ̀ mɨ̀vɨm ɨ̀n tâyn ɨ we achfɨ̀ abàs a ndzɨsɨ a li-a mɨ kèʼnɨ̀ keʼnɨ. ¹³Àŋena nɨ̂n nì tî, ɨ faytɨ ɨ̀nghòf mɨ̀vɨm ɨ̀n tâyn nɨ̀ àso ɨkwo a baŋnɨ-a ɨ ghal ɨbyâs ɨ ndzɨsɨ nâ vzɨ̀ a ghɨ ghàŋsɨ ta ka fɨ̀ndo fɨ Bôbo Fɨyini nâ fèynfɨ̀ na ghɨ kɨ sɨ afo àmòʼ.

¹⁴Àŋena nɨn læ meyn faytɨ ɨ̀byâs ɨ ndzɨsɨ nɨ̀ ìwî i bzɨ-i ɨ chɨl fɨ̀ndo fɨ Bôbo Fɨyini nâ fìfɨ̀ ateyn. ¹⁵Ɨbyâs ɨ ndzɨsɨ ɨ ghaŋsɨnɨ nâ wèyn nà n-ghɨ kɨ ɨfyêʼ ɨ̀mòʼ nô mɨ à kà ɨ dyêf chem ntàmsɨ̀ mɨ̀vɨm ɨ̀n tal ghaʼ chem ntàmsɨ̀ kæ̀. ¹⁶Àŋena lì ɨ̀byâs ɨ ndzɨsɨ ɨ̀ twâyn ɨ tas ɨ yùŋtɨ̀ kɨ sɨ afo àmòʼ, ɨ lì ɨlvi vzɨ̀ ntufa ɨ tas ɨ yùŋtɨ kɨmɨ sɨ afo àmòʼ. ¹⁷Àŋena tas tî ɨ we mɨ̀tôŋnɨ̀ mɨ̀vɨm ɨ̀n tâyn achfɨ̀ a ndzɨsɨ afî a ghɨ yùŋtɨ̀ tî sɨ̀ tâyn, ɨ we kɨmɨ tì achfɨ̀ a ndzɨsɨ a ghaŋsɨnɨ-a afî a ghɨ yùŋtɨ̀ tî ntufa. ¹⁸Àŋena nɨn faytɨ meyn ɨ̀nghòf mɨ̀vɨm ɨ̀n tâyn nɨ̀ ìdyayn i ɨ ghal ɨtwo nâ wèyn ateyn wu nà ghɨ kɨ sɨ afo àmòʼ. ¹⁹Àŋena yoʼ gvɨ àyaʼ yi nà bâŋ baŋ, ɨ faytɨ àfo ɨ chɨytɨ fɨ̀two nâ fèynfɨ̀ ateyn ɨ faytɨ a li-a nɨ̀ gvɨ nyàm ì lì yi chî a jvâ ɨ chɨl atû àteyn.

²⁰Àŋena nɨ̂n fàytɨ mɨ̀kfɨ̂s mɨ̀ fɨ̀ndo nɨ̀ Bôbo Fɨyini nâ fìfɨ̀ nɨ̀ fɨ̀kâʼ fɨ àkasìyà fɨ̀. ²¹Nô mɨ fɨ̀kfɨ̂s fɨ̀ kà fɨ ɨ dyêf chem ndû ntàmsɨ̀ kæ̀ nɨ̀ àbeʼa, ghaʼ chem ndû ntàm ìmòʼ, ²²ma ghɨ we meyn mɨ̀choʼ ɨ̀m bò ateyn, nô mɨ fɨ̀kàfɨ ɨ ti kɨ sɨ a nyɨŋ. Àŋena nɨn læ faytɨ mɨkfɨ̂s mɨ̀ fɨ̀ndo nɨ̀ Bôbo Fɨyini nâ mzɨ̀ nô ɨ̀n jɨ̀m kɨ̀ a dzɨ nâ ghàyn. ²³Àŋena nɨn læ faytɨ mɨkfɨ̂s mɨ̀vɨm ɨ̀m bò ɨ tomtɨ a fɨndo nâ ghàyn abàs itsɨyn, ²⁴ɨ faytɨ ɨ̀byâŋ ɨfwo mɨ̀vɨm ɨ̀n kæ̀ nɨ̀ àso ɨkwo a fɨfâ ɨ tòmtɨ mɨ̀kfɨ̂s mɨ̀ àteyn atû àteyn. Nô mɨ fɨ̀kfɨ̂s fɨ̀ kà fɨ kelɨ mɨ̀choʼ ɨ̀m bò nô mɨ fɨ̀choʼ fɨ̀ kà fɨ ɨ ti kɨ atû àbàŋ afo àmòʼ. ²⁵Àŋena ndù abàs ikuè a fɨndo nâ ghàyn ɨ faytɨ mɨ̀kfɨ̂s mɨ̀vɨm ɨ̀m bò, ²⁶ɨ faytɨ ɨ̀byâŋ ɨfwo vzɨ̀ a mɨ̀kfɨ̀s nɨn ti atû àteyn mɨ̀vɨm ɨ̀n kæ̀ nɨ̀ àso ɨkwo a fɨfâ, nô mɨ fɨ̀kfɨ̂s fɨ̀ kà fɨ ɨ ti atû ɨ̀byàŋ ɨfwo ɨ̀ bwò. ²⁷Àŋena ndù abàs ghè a kɨ fvɨ̀ gòʼsɨ̀ a fɨndo nâ ghè, abàs ghè a ɨchfɨ-iyvɨ nɨn sœ ateyn ɨ faytɨ mɨ̀kfɨ̂s ntufa, ²⁸ɨ tomtɨ mɨ̀kfɨ̂s ɨ̀m bò a tɨbvɨ afî a tɨ fvɨ̀ gòʼsɨ̀. ²⁹Àŋena nà n-baʼ baʼ mɨkfɨ̂s a tɨbvɨ nâ ghàyn tɨ̀ bò têyn zɨ̂tɨ̀ kɨ a nse koʼ chem iyvɨ, mɨ koʼ zɨ̂ kɨ abùʼ a fɨnchaʼ àmòʼ. Ghɨ n-læ faytɨ mɨkfɨ̂s nâ mèyn ɨ̀m bò kɨ̀ a dzɨ nâ ghàyn mɨ nà ghɨ kɨ ighel. ³⁰Yi ti n-dyêyn na mɨ̀kfɨ̂s nà n-ghɨ nfama, ɨbyâŋ ɨfwo vzɨ̀ a mɨ̀ n-ti atu ɨ ghɨ njvàsɨ̀ ntufa ma ghɨ faytɨ nɨ̀ àso ɨkwo a fɨfâ, nô mɨ fɨ̀kfɨ̂s fɨ̀ kà fɨ ɨ ti atû ɨ̀byàŋ ɨfwo ɨ̀ bwò.

³¹Àŋena nɨn faytɨ meyn kɨmɨ mbàŋsɨ dyaŋsɨnɨsɨ nɨ̀ fɨ̀kâʼ fɨ àkasìyà fɨ̀, ɨ tuŋtɨ ɨwuyn mɨ̂kfɨ̀s nâ ghè. Mbàŋsɨ ateynsɨ nà n-ghɨ sɨ̀ tâyn abàs a fɨ̂ndo nâ ghè àmòʼ, ³²ghɨ kɨmɨ sɨ̀ tâyn abàs a li-a, fî ghɨ kɨmɨ sɨ̀ tâyn sɨ̂ mɨ̀kfɨ̀s mzɨ̀ a mɨ̀ n-ghɨ abàs ghè a ɨchfɨ-iyvɨ i nɨn sœ ateyn abàs a fɨndo ghè a kɨ fvɨ̀ gòʼsɨ̀. ³³Àŋena nɨn faytɨ meyn mbàŋ ì dyaŋsɨnɨ antêynɨ̀ àntêynɨ̀ yi lû abàs àmòʼ dyêf ndu chem abàs a li-a antêynɨ̀ àntêynɨ̀ a mɨ̂kfɨ̀s nâ ghè. ³⁴Àŋena nɨn yoʼ meyn mɨ̀kfɨ̂s mɨ̀ ateyn nɨ̀ àso ɨkwo a baŋnɨ-a ɨ faytɨ mɨ̀nchaʼ kɨ̀mɨ nɨ̀ àso ɨkwo a baŋnɨ-a na mɨ̀ na ghal mbàŋ sɨ dyaŋsɨnɨ nâ sìsɨ̀ ɨ yoʼ kɨmɨ mbàŋ sɨ ateyn nɨ̀ àso ɨkwo a baŋnɨ-a.

³⁵Àŋena nɨn tɨm meyn abâs a ndzɨsɨ a ghaŋsɨnɨ-a nɨ̀ àmbyèyn a nyemnɨ-a, nɨ a li-a kɨ bâŋ nyêm ndû ndu, kɨ̀mɨ nɨ a li-a kɨ bɨ̂ylɨ̀ bâŋ baŋ, nɨ̀ àbâs a ndzɨsɨ-a ma ghɨ faytɨ meyn tɨm nɨ̀ àmbyèyn a fyeynɨ-a. A n-tɨm ghelɨ faytɨ̂ kya ìfêl, ɨ̀ tɨm we chelùbsɨ̀ ateyn. ³⁶Àŋena nɨn faytɨ meyn ɨ̀tôʼ ɨ̀ kfæ̀ nɨ̀ fɨ̀kâʼ fɨ àkasìyà fɨ̀ ɨ yoʼ nɨ̀ àso ɨkwo a baŋnɨ-a, ɨ faytɨ kɨmɨ ɨ̀nghòf nɨ̀ àso ɨkwo a baŋnɨ-a ɨ ghaŋsɨ ɨ̀byâs ɨ ndzɨsɨ vzɨ̀ ateyn, ɨ tom ɨtôʼ ateyn atû ɨ̀bwàŋ ɨfwo afî a ghɨ fàytɨ nɨ̀ àso ɨkwo a fɨfâ tî. ³⁷A nà ghɨ ɨchfɨ fɨ̂twò, àŋena faytɨ àbâs a ndzɨsɨ a ghaŋsɨnɨ-a nɨ̀ àmbyèyn a nyemnɨ-a nɨ a li-a kɨ nyêm bâŋ ndû ndu nɨ a li-a kɨ bɨ̂ylɨ̀ bâŋ baŋ, nɨ̀ àbâs a ndzɨsɨ-a ma ghɨ faytɨ meyn ɨ̀ tɨm nɨ̀ àmbyèyn a fyeynɨ-a, ma à fàytɨ wul tɨm ɨ̀fwo. ³⁸Àŋena nɨ̀n faytɨ meyn ɨ̀tôʼ ɨ̀ twâyn, ɨ we ɨ̀nghòf ma ghɨ faytɨ nɨ̀ àso ɨkwo a baŋnɨ-a ɨ ghaŋsɨ àbâs a ndzɨsɨ nâ kì ateyn, ɨ yoʼ ɨtu ɨtòʼ ateyn baʼsɨ̂ nɨ̀ ntèmsɨ ateynsɨ nɨ̀ àso ɨkwo a baŋnɨ-a ɨ faytɨ ɨ̀byâŋ ɨfwo vzɨ̀ a ka ɨtôʼ na ti ateyn nɨ̀ ìdyayn i.