Exodus 38
Ŋwàʼlɨ̀ Exodus
Abaŋ ifu i nyoʼnɨ-i
1Bèzalèl nɨn læ meyn bayn abaŋ ifu i nyoʼnɨ-i nɨ̀ fɨ̀kâʼ fɨ àkasìyà fɨ̀, kɨ kelɨ ɨ̀byâs ɨ̀ kfæ̀ wu ghɨ kɨ ighel ighel, njetɨ̂ chem ndû ntàm nɨ̀ àbeʼ a dyêf chem ndû ntàmsɨ̀ bò nɨ̀ àbeʼ a, ghaʼ chem ndû kɨmɨ ntàmsɨ̀ bò nɨ̀ àbeʼ a. 2Wù n-bayn tî, ɨ faytɨ mɨ̀choʼ a tɨ̂ghaŋ tɨ ateyn tɨ̀ kæ̀ mɨ ghɨ tèyn ta ndoŋsɨ nyâm, ghɨ kɨ sɨ afo àmòʼ nɨ̀ àbaŋ nâ kì-à, ɨ yoʼ nɨ̀ ìdyayn i. 3Wu n-faytɨ ɨfwo abaŋ nâ vzɨ̀ nô ɨ̀ jɨ̀m kɨ nɨ̀ ìdyayn i, ɨ ntòyn sîsɨ̀ a ka ghɨ na tafî àbvɨ ichɨ ateyn, nɨ̀ fɨsɨ àtì-atisɨ sɨ nà komi abaŋ nâ kì ateyn kɨ̀mɨ nɨ̀ ɨ̀ntwàs vzɨ̂ a ghɨ n-chuʼ njwò ateyn baʼsɨ̂ nɨ̀ ɨ̀kfaŋ vzɨ̀ a ghɨ n-wê ɨkfêtɨ̀ ɨvɨ̀s ateyn, nɨ̀ ɨ̀kfaŋ vzɨ̀ a ghɨ n-we mu ateyn ghɨ nà mɨsì-à. 4Wu n-læ meyn faytɨ àfo nɨ̀ ìdyayn i kɨ ghɨ ta nchèkèlèʼ ɨ we kɨ suʼi ɨ tèmnɨ kɨ temnɨ antêynɨ̀ àbaŋ nâ ghè. 5Wu n-nì tî, ɨ buŋsɨ ìdyayn ɨ faytɨ mɨ̀nchaʼ ɨ we a tɨ̂ghaŋ tɨ afo afî tɨ̀ kæ̀ a kɨ n-ghɨ ta nchèkèlèʼ tì ta ka mɨ̀ ghal mbàŋ sìsɨ̀ a mbæ̀sɨ abaŋ. 6Bèzalèl nɨn læ meyn kom mbàŋsɨ̀ nɨ̀ fɨ̀kâʼ fɨ àkasìyà fɨ̀, ɨ yoʼ nɨ̀ ìdyayn i, 7ɨ tuŋtɨ mbàŋsɨ ateyn a mɨnchaʼ afî ɨwùyn abaŋ nâ ghè ghɨ nà ghal châʼsɨ àbaŋ nâ kì ateyn. Àŋena nɨn læ faytɨ abaŋ ateyn nɨ̀ ɨ̀byâŋ ɨnkàʼ, ɨ visi kɨ àzɨ̀ azɨ.
Akaŋ a ghaʼnɨ-a ma ghɨ faytɨ nɨ̀ ìdyayn i
8Bèzalèl nɨn læ meyn faytɨ àkaŋ a ghaʼnɨ-a baʼsɨ̂ nɨ̀ àfo kì a kɨ n-ti atû àteyn nɨ̀ ìdyayn i nɨ̀ ɨ̀nkfi vzɨ̀ a ghɨ̀kì ghî a ghɨ nà n-felɨ̀ a ɨchfɨ fɨndo nɨ̀ Bôbo Fɨyini nà n-ki akêʼ ateyn ma ghɨ faytɨ nɨ̀ ìdyayn i.
Ɨwe Fɨ̂ndo nɨ̀ Bôbo Fɨyini
9Bèzalèl nɨn faytɨ ɨfwo ateyn tì, ɨ faytɨ ɨ̀we fɨndo nɨ̀ Bôbo Fɨyini, abâs itsɨyn a ɨ dyêf chem ndû ntàmsɨ̀ mɨ̀vɨm ɨ̀n kæ̀ njvàsɨ̀ ntufa, ɨ kɨ̀ŋtɨ̀ nɨ̀ ɨbyâs ɨ ndzɨsɨ ghaŋsɨnɨsɨ ma ghɨ faytɨ meyn tɨm nɨ̀ àmbyèyn a fyeynɨ-a. 10Mɨ̀kfɨ̀s mzɨ̀ a wu n-ghàŋsɨ ɨbyâs ɨ ndzɨsɨ nâ vzɨ̀ ateyn nà n-ghɨ mɨ̀vɨm ɨ̀m bò ma ghɨ faytɨ nɨ̀ ìdyayn i, ɨ̀ tòmtɨ atû ɨ̀byàŋ ɨfwo mɨ̀vɨm ɨ̀m bò ma ghɨ fàytɨ kɨ̀mɨ nɨ̀ ìdyayn i. Wù n-faytɨ meyn kɨmɨ ɨ̀nghòf nɨ̀ àso ɨkwo a fɨfâ, nɨ̀ mɨ̀bàynɨ̀ mɨ̀ ndzɨsɨ ma ghɨ faytɨ kɨ̀mɨ nɨ̀ àso ɨkwo a fɨfâ, ɨ̀ ghàŋsɨ a mɨ̂kfɨ̀s nâ ghè. 11Bèzalèl nɨn læ faytɨ abâs ikuè kɨ nà dyêf chem ndû kɨmɨ ntàmsɨ̀ mɨ̀vɨ̂m kæ njvàsɨ̀ ntufa, kelɨ kɨmɨ mɨ̀kfɨ̂s mɨ̀vɨm ɨ̀m bò nɨ̀ ɨfwo vzɨ̀ a ghɨ tòmtɨ atu àteyn kɨ̀mɨ mɨ̀vɨm ɨ̀m bò ma ghɨ faytɨ kɨ̀mɨ nɨ̀ ìdyayn i nɨ̀ ɨ̀nghòf ma ghɨ faytɨ nɨ̀ àso ɨkwo a fɨfâ, nɨ̀ mɨ̀bàynɨ̀ mɨ̀ ndzɨsɨ ma ghɨ faytɨ kɨ̀mɨ nɨ̀ àso ɨkwo a fɨfâ ɨ̀ ghàŋsɨ a mɨ̂kfɨ̀s nâ ghè.
12Abâs ɨwe kì a ɨchfɨ-iyvɨ i nà n-sœ ateyn nà n-ghaʼ chem ndû ntàmsɨ̀ mɨ̀vɨm ɨ̀m bò njvàsɨ̀ tal ma ghɨ ghaŋsɨ meyn ɨ̀byâs ɨ ndzɨsɨ ateyn nɨ̀ mɨ̀kfɨ̀s ìvɨm, baʼsɨ̂ nɨ̀ ɨ̀byâŋ ɨfwo vzɨ̀ a mɨ̀kfɨ̀s mɨ̀ àteyn nɨn ti ateyn kɨ̀mɨ ìvɨm nɨ̀ mɨ̀bàynɨ̀ mɨ̀ ndzɨsɨ ma ghɨ faytɨ nɨ̀ àso ɨkwo a fɨfâ ɨ̀ ghàŋsɨ a mɨ̂kfɨ̀s nâ ghè. 13Abâs ɨwe kì a kɨ nà n-ghɨ abàs ghè a ɨchfɨ̂-iyvɨ i nɨn sal ateyn nà n-ghaʼ chem ndû kɨmɨ ntàmsɨ̀ mɨ̀vɨm ɨ̀m bò njvàsɨ̀ tal. 14Abâs ɨchfɨ ɨwe àmòʼ a nà n-kelɨ ɨbyâs ɨ ndzɨsɨ ɨ ghaŋsɨnɨ wu dyêf chem ndû ntàmsɨ̀ nsòmbo, nɨ̀ mɨ̀kfɨ̀s ɨ̀n tal, mɨ ti kɨmɨ atû ɨ̀byàŋ ɨfwo ɨ̀ twal. 15Abâs ɨchfɨ ɨwe a li-a nà n-kelɨ kɨmɨ ɨ̀byâs ɨ ndzɨsɨ ɨ ghaŋsɨnɨ wu dyêf chem ndû kɨmɨ ntàmsɨ̀ nsòmbo kɨ̀mɨ nɨ̀ mɨ̀kfɨ̀s ɨ̀n tal mɨ ti kɨmɨ atû ɨ̀byàŋ ɨfwo ɨ̀ twal. 16Bèzalèl nɨn læ faytɨ ndzɨsɨ ghaŋsɨnɨ nâ sìsɨ̀ nô sɨ̀ jɨ̀m a sɨ n-læ jɨŋ kali ɨwe tî nɨ̀ àbâs a ndzɨsɨ-a ma ghɨ faytɨ meyn tɨm nɨ̀ àmbyèyn a fyeynɨ-a. 17Ɨbyâŋ ɨfwo vzɨ̀ a mɨ̀kfɨ̀s mɨ̀ àteyn nà n-ti atû àteyn nà n-ghɨ ma ghɨ faytɨ nɨ̀ ìdyayn i. Nô mɨ̀kfɨ̂s ɨ̀n jɨ̀m ta mɨ n-jɨŋ kal ɨwe ateyn nà n-ghɨ ma ghɨ ghaŋsɨ meyn mɨ̀bâynɨ̀ mɨ̀ ndzɨsɨ ma ghɨ nyotɨ meyn nɨ̀ àso ɨkwo a fɨfâ nɨ̀ ɨ̀nghòf ma ghɨ faytɨ kɨ̀mɨ nɨ̀ àso ɨkwo a fɨfâ, ɨ̀ yoʼ ɨtu ateyn nɨ̀ àso ɨkwo a fɨfâ. À ti n-ghɨ na nô mɨ̀kfɨ̀s ɨ̀n jɨ̀m ta mɨ nà n-ghɨ ɨwe nâ ghè nà n-kelɨ mɨ̀bâynɨ̀ mɨ̀ ndzɨsɨ ma ghɨ nyotɨ meyn nɨ̀ àso ɨkwo a fɨfâ.
18Wù n-ghaŋsɨ meyn àbâs a ndzɨsɨ ɨchfɨ ɨwe fɨ̂ndo nɨ̀ Bôbo nâ ghè ma ghɨ tɨm nɨ̀ àmbyèyn a nyemnɨ-a, nɨ̀ a li-a kɨ nyêm bâŋ ndû ndu, nɨ a li-a kɨ bɨ̂ylɨ̀ bâŋ baŋ baʼsɨ̂ nɨ̀ àbâs a ndzɨsɨ-a ma ghɨ faytɨ meyn tɨm nɨ̀ àmbyèyn afyeynɨ-a kɨ̀ nô ta à tɨ̀m wul vzɨ̀ a wù n-tɨm ɨfwo. Kɨ nà n-dyêf chem ndû ntàmsɨ̀ bulamòʼ njetɨ̂ chem ndû ntàmsɨ̀ bò nɨ̀ àbeʼ a kɨ̀ têyn ta ɨbyâs ɨ ndzɨsɨ ɨ lvi vzɨ̀ a wu nà n-jɨŋ kal ɨwe. 19Mɨ̀kfɨ̀s nà n-ghɨ ɨchfɨ ɨwe nâ ghàyn ɨ̀n kæ̀, ti atû ɨ̀byàŋ ɨfwo ɨ̀ kfæ̀ ma ghɨ faytɨ nɨ̀ ìdyayn i, kelɨ ɨ̀nghòf nɨ̀ mɨ̀bâynɨ̀ mɨ̀ ɨ̀fwo ma ghɨ faytɨ nɨ̀ àso ɨkwo a fɨfâ. Ɨtu mɨ̂kfɨ̀s ateyn nà n-ghɨ ma ghɨ yoʼ meyn kɨ̀mɨ nɨ̀ àso ɨkwo a fɨfâ. 20Mɨ̀choʼ mɨ̀ fɨ̀twò nâ mzɨ̀ a fɨ̀ndo fɨ Bôbo Fɨyini fɨ nà n-ghɨ ateyn nɨ ɨmzɨ̂ ɨ̀wè mzɨ̂ a wu jɨ̀ŋ kal fɨ̀ndo fɨ ateynfɨ nô ɨ̀n jɨ̀m nà n-ghɨ ma ghɨ faytɨ nɨ̀ ìdyayn i.
Ɨfwo vzɨ̀ a ghɨ n-læ bàʼlɨ fɨ̀ndo fɨ Bôbo Fɨyini ateyn
21Ɨwêyn nɨn ghɨ ɨ̀fwo vzɨ̀ a ghɨ n-læ bàʼlɨ fɨ̀ndo fɨ Bôbo Fɨyini ateyn, ɨ fɨ̀ndo fɨ mɨ̂kàyn fîfɨ̀ a Mosìs nɨn læ bè ghelɨ isas i ndo nɨ̀ levì ɨ nyàʼ ɨ lèm, a tisɨ̂ Itamà tisɨ̂ àŋena. Itamà nà n-ghɨ wâyn Alòyn ɨ ngàŋ ndô Fɨyini. 22Bèzalèl ɨ wâyn Yulì vzɨ̀ a à nà n-ghɨ wâyn Hûl ɨ wul ìsas i ndo nɨ̀ Judà nɨn læ meyn faytɨ nô ɨ̀fwo ɨ̀ jɨ̀m ta Bôbo Fɨyini nɨn læ bè sɨ̂ Mosìs. 23Oholìyàb ɨ wâyn Ahisamàk vzɨ̀ a à nà n-ghɨ wul ìsas i ndo nɨ̀ Dân nɨ̂n fèl ŋêyn Bèzalèl. Oholìyàb nà n-kya sɨ faytɨ ɨfwo nɨ̀ ɨwu ŋweyn fî kya sɨ kfàʼtɨ afo sɨ fèl sɨ fvɨ̀sɨ, fî kya sɨ tɨm ɨfwo nɨ̀ àmbyeyn a nyemnɨ-a nɨ a li-a kɨ nyêm bâŋ ndû ndu nɨ̀ a li-a kɨ bɨ̂ylɨ̀ bâŋ baŋ baʼsɨ̂ nɨ̀ ndzɨsɨ ma ghɨ faytɨ meyn tɨm. 24Aso ɨkwo a baŋnɨ-a kì nô à jɨ̀m a ghɨ n-læ fu sɨ a ifu ghɨ bàʼlɨ̀ fɨ̀ndo fɨ Bôbo Fɨyini ateyn nà n-chɨ̂yntɨ̀ ghɨ kilùsɨ̀ nkam kɨ ighel ta ɨfyêʼ ɨ fɨndo nɨ̀ Bôbo Fɨyini nà n-dyêyn.
25Aso ɨkwo a fɨfâ kì a ghelɨ Isìlæ̀ nɨn læ fu ta ghɨ n-taŋ àŋena nà n-ghɨ kilùsɨ̀ nkamsɨ̀ tal nɨ̀ kilùsɨ̀ ighɨ ì kæ̀ nɨ̀ kilùsɨ mɨ̀vɨm ɨ̀n tal. 26Ghɨ nà n-taŋ nô mɨ ndà wu nà kelɨ sɨ fu kɨ fɨlêʼnɨ̀ fɨ shekèl kɨ̀ ighel ta ɨfyêʼ ɨ fɨndo nɨ̀ Bôbo Fɨyini nɨn dyêyn sɨ̂ ghelɨ ghì a ghɨ taŋ. Ghelɨ ghì a ghɨ lèma chem bèŋsɨ̀ mɨ̀vɨm ɨ̀m bò sɨ koʼ sɨ ndù asɨ nà n-chɨ̂yntɨ̀ ghɨ ghelɨ nkam ighɨ ntufa nɨ̀ ghelɨ nkamsɨ̀ tal nɨ̀ ghelɨ ighɨ ì kæ̀ nɨ̀ ghelɨ mɨ̀vɨm ɨ̀n tâyn. 27Ghɨ n-læ lì kilùsɨ aso ɨkwo a fɨfâ sìsɨ̀ nkamsɨ̀ tal nɨ̀ kilùsɨ̀ ighɨ ì kæ̀ ɨ buŋsɨ ɨ faytɨ ɨ̀byâŋ ɨfwo vzɨ̀ a mɨ̀kfɨ̀s mɨ̀ fɨ̀ndo nɨ̀ Bôbo Fɨyini nà n-ti atû àteyn, nô mɨ àbâŋ afo à kà ɨ ghɨ kilùsɨ̀ mɨ̀vɨm ɨ̀n tal njvàsɨ̀ kæ̀. 28Àŋena nɨn læ lì kilùsɨ aso ɨkwo a fɨfâ kɨ chem ndû mɨ̀vɨm ɨ̀m bò ɨ faytɨ ɨ̀nghòf vzɨ̀ a wu nà n-ghɨ ɨwuyn mɨ̂kfɨ̀s, ɨ yoʼ ɨtu ɨ mɨ̂kfɨ̀s ateyn ɨ nyòtɨ̀ mɨ̀bâynɨ̀ mɨ̀ ɨfwo mzɨ̀ ateyn.
29Idyayn zɨ̀ a ghelɨ Isìlæ̀ nɨn læ fu sɨ̂ Fɨyini fɨ nà n-ghɨ kilùsɨ̀ nkamsɨ̀ bò nɨ̀ kilùsɨ̀ ighɨ ì kæ̀ nɨ̀ kilùsɨ̀ mɨ̀vɨm ɨ̀m bò njvàsɨ̀ tâyn. 30Àŋena nɨn læ lì idyayn ateyn ɨ faytɨ ɨ̀byâŋ ɨfwo vzɨ̀ a mɨ̀kfɨ̀s mzɨ̀ a mɨ nà n-ghɨ ɨchfɨ ɨwe fɨndo nɨ̀ Bôbo Fɨyini nà n-ti atû àteyn, nɨ̀ àbaŋ ifu a baʼsɨ̂ nɨ̀ àfo ateyn kì a kɨ n-ghɨ ta nchèkèlèʼ tì, nɨ̀ ɨ̀fwo ɨfelɨnɨ ateyn nô ɨ̀ jɨ̀m. 31Àŋena nɨn læ meyn faytɨ kɨmɨ ɨ̀byâŋ ɨfwo vzɨ̀ a mɨ̀kfɨ̀s mzɨ̀ a mɨ̀ jɨ̀ŋ kal ɨwe fɨndo nɨ̀ Bôbo Fɨyini nà n-ti atû àteyn, nɨ̀ ɨmzɨ̂ a mɨ̀ nà n-ghɨ ɨchfɨ ɨwe nâ ghè, baʼsɨ̂ nɨ̀ mɨ̀chôʼ mɨ̀ ɨ̀twò nô ɨ̀n jɨ̀m nɨ ɨmzɨ̂ a mɨ̀ jɨ̀ŋ kal ɨwe fɨndo nɨ̀ Bôbo Fɨyini.