Exodus 14

¹Ghelɨ Isìlæ̀ nà n-bu ghɨ kɨ a Etàm, Bôbo Fɨyini ɨ bè sɨ̂ Mosìs na, ²“Bè sɨ̂ ghelɨ Isìlæ̀ na àŋena kasi ndù bɨ̀ a ngùŋ Bi Halilòt a nfaynɨsɨ nɨ̀ Migdòl nɨ̀ jva ìghaʼnɨ. Àŋena nɨn kelɨ sɨ bɨ̀ a mbæ̀ jvà ìghaʼnɨ injɨyn i Bal Zefòn. ³Yi n-ndû afu tì a fòyn Ijìb yvɨ, nà kfâʼtɨ̀ na yi ndu meyn kùʼ a nse ìyum ɨ̀ nà sɨ jɨ̂ŋ kala, kya wi na yi n-ndû wo dzɨ a, ⁴a mà tosɨ atem a ŋweyn ɨ̀ nì a wù lali nà nyɨŋ a yi ibàm. Ghelɨ ɨ nì nà koʼsɨ̂ mà bòm ìwo zɨ̀ a ka mà ni sɨ̂ fòyn Ijìb ŋêyn sugèyʼsɨ ŋweynsɨ nô sɨ̀ jɨ̀m, a ghelɨ Ijìb kæ keli na à n-ghɨ mà Bôbo Fɨyini.” Ghelɨ Isìlæ̀ ɨ ni kɨ ta Bôbo Fɨyini bè.

⁵A nà ghɨ ta fòyn Ijìb yvɨ na ghelɨ Isìlæ̀ leʼ meyn lù, ŋêyn chyeʼsɨ ŋweynsɨ ɨ kfɨnɨ ìkfâʼtɨ̀ i àŋena ɨ nà sɨ bɨf kɨ sɨ a àŋena ngeŋsɨ na, “Ghesɨ̀nà ti nì ghà teyn a, ɨ̀ vìsi na ghelɨ Isìlæ̀ ghèyn lu a? Àŋena na bu fèlɨ̀ wì sɨ̂ ghesɨ̀nà.” ⁶Fòyn Ijìb ɨ kæ bè na ghɨ baʼtɨ mɨ̀nchaʼ mɨ̀ ìwòŋ nɨ̀ ŋweyn. ⁷Wu n-lu nɨ̀ mɨ̀nchaʼ mɨ̀ ìwoŋ ɨn jùŋ ighɨ ntufa baʼsɨ̂ nɨ ɨmzɨ̂ mɨ̀ ghelɨ Ijìb, nô mɨ fɨ̀kà fɨ kelɨ àtu a sugèyʼ ta kɨ n-gufɨ̀. ⁸Bôbo Fɨyini ɨ tosɨ àtem a fòyn Ijìb wu làlì ɨ nà nyɨŋ ibàm nɨ̀ ghelɨ Isìlæ̀ ma àŋena fvɨ meyn, ɨ̀ lù nà dêŋsɨ̀ jelɨ̀ ndu-à fâyn wì afo. ⁹Sugèyʼsɨ Ijìb sìsɨ̀ a sɨ nà n-nyɨŋ atû nyamsɨ kfaŋ nɨ ɨsîsɨ̀ a sɨ nà n-nyɨŋ atû mɨ̀nchaʼ, baʼsɨ̂ nɨ ɨsîsɨ̀ a sɨ nà n-jelɨ nɨ̀ ɨ̀vɨ, ɨ nyɨŋ ibam nɨ̀ ghelɨ Isìlæ̀ ɨ ndu koli àŋena ma ghɨ bɨ meyn a mbæ̀ jvà, a ngùŋ Bi Halilòt, injɨyn i Bal Zefòn.

¹⁰Ghelɨ Isìlæ̀ ɨ se sɨ ki sɨ ndùsɨ̀ ɨ yeyn ta fòyn Ijìb ŋêyn sugèyʼsɨ ŋweynsɨ nɨn gvî, àŋena kfɨ sayn ɨ nà sɨ dzɨ̀ sɨ̂ Bôbo Fɨyini. ¹¹Àŋena nà n-dzɨ̂ tì bɨf sɨ̂ Mosìs na, “À tî bùla tɨ̀sê a Ijìb na wà lî gvì nɨ̀ ghès, ghesɨ̀ kfɨtɨ a nse ìyum afêyn ma? Wà ti mòm ghà sɨ̂ ghès têyn ɨ̀ lì fvɨ̀ nɨ̀ ghes sɨ a Ijìb a? ¹²Ghèsɨ ti meyn bè sɨ̂ và a Ijìb na wà laynsɨ vìsi ghèsɨ̀ faŋ nà felɨ̀ kɨ sɨ̂ ghelɨ Ijìb. Yi tî nà kwo jôf na ghès faŋ kɨ̀ sɨ a ɨkòs a Ijìb, chwô ta ka ghèsɨ̀ gvi ɨ̀ kfɨ̀tɨ a nse ìyum!”

¹³Mosìs ɨ bèynsɨ̀ ɨ bè sɨ̂ àŋena na, “Ka yi n-fàyn. Yì timi nà to kɨ to a ka yì yeyn dzɨ zɨ̀ a Bôbo nɨn bœ̀sɨ̀ zɨ ateyn layn. Ghelɨ Ijìb ghèyn a yi n-yeyn layn tèyn, yì læ̀ bu fì yeyn wi achi a li-a nô sakos. ¹⁴Bôbo nɨn tɨm ìwoŋ nâ yèynì sɨ̂ zɨ̀. Yì chimi kɨ̀ chimi a ka yì yeyn iwo zɨ̀ a ka Bôbo Fɨyini ni.”

¹⁵Bôbo Fɨyini ɨ bè sɨ̂ Mosìs na, “Bòm ghà ta wà n-dzɨ̂ sɨ̂ mà a? Bè sɨ̂ ghelɨ Isìlæ̀ na àŋena na n-ndû kɨ ndu. ¹⁶Làysɨ mbàŋ zyâ ɨ nàysɨ̀ atû jvà ìghaʼnɨ ɨ gwòsɨ̀ mu, ta ka ghelɨ Isìlæ̀ zɨ, ɨ̀ dyàŋ a ki jvà iyum. ¹⁷Sɨ̂ mà, mɨ n-tosɨ̂ mɨ̀tem mɨ̀ ghelɨ Ijìb a àŋena zɨ a yi ibàm, a ghelɨ na koʼsɨ̂ mà bòm ìwo zɨ̀ a ka mà ni sɨ̂ Fòyn Ijìb ŋêyn sugèyʼsɨ ŋweyn sìsɨ̀ a sɨ n-jêl a nse nɨ̀ ɨsîsɨ̀ a sɨ n-jêl atû mɨ̀nchaʼ, nɨ ɨsɨ̂sɨ̀ a sɨ n-jêl atû nyamsɨ kfaŋ. ¹⁸Ghelɨ Ijìb ɨ nì keli na mɨ n-ghɨ Bôbo Fɨyini ɨlvɨ ta ghelɨ kòʼsɨ ma bòm ìwo zɨ̀ a ka mà ni sɨ̂ fòyn Ijìb ŋêyn sugèyʼsɨ ŋweyn sìsɨ̀ a sɨ n-jelɨ̀ atû mɨ̀nchaʼ, nɨ ɨsɨ̂sɨ̀ a sɨ n-jelɨ̀ atû nyamsɨ kfaŋ.”

¹⁹Ta Bôbo Fɨyini tàŋi tî, nchì Fɨyini zɨ̀ a yi nà n-ndû asɨ nɨ̀ sugèyʼsɨ Isìlæ̀sɨ̀ tî, ɨ chwò ɨ nà sɨ gvî dzɨ a ibàm. Atuŋ a mbàʼsɨ̀ kî a kɨ nà n-ndû a àŋena asɨ tì ɨ boŋ chwò ɨ nà sɨ gvî dzɨ a àŋena ibàm, ²⁰antêynɨ̀ àntêynɨ̀ nɨ̀ ghelɨ Isìlæ̀ ŋêyn sugèyʼsɨ Ijìbsɨ̀. Ɨtuʼ ni jèl ɨ layn, atuŋ a mbàʼsɨ̀ nâ kì-à ɨ ni-à ɨlwêʼ ɨ fɨmà abàs nɨ̀ ghelɨ Ijìb mɨtì bayn abàs nɨ̀ ghelɨ Isìlæ̀. Àŋena faŋ kɨ afu, sugèyʼsɨ Ijìbsɨ̀ ɨ ndû baʼsɨ̂ wì sɨ̂ ghelɨ Isìlæ̀, ghelɨ Isìlæ̀ ɨ ndû baʼsɨ̂ wì sɨ̂ sugèyʼsɨ Ijìbsɨ̀ nô ta ka ɨtuʼ nî jèl layn.

²¹Mosìs ɨ nàysɨ̀ àwu a ŋweyn atû jvà, Bôbo Fɨyini ɨ nì afyef ato-a ɨ fvɨ̀ abàs ghè a ɨchfɨ-iyvɨ nɨn sal ateyn, ɨ chi chwo kɨ têyn ɨ gwòsɨ̀ jva, ki jvà ɨ nà sɨ ghɨ kɨ iyum. ²²Ghelɨ Isìlæ̀ ɨ zɨ ɨ dyàŋ a ki jvà iyum ma mu timi meyn koʼ ɨkœ nɨ̂nkœ̀ nɨ̀ àŋena ɨ̀ tìmi kòʼ ɨkœ ɨ two têyn ta mɨzɨ mɨ̀ ndo.

²³Ghelɨ Ijìb ɨ nà sɨ nyɨŋ a àŋena ibàm. Nyamsɨ kfaŋ nɨ̀ fòyn Ijìb nô sɨ̀ jɨ̀m, nɨ̀ ghelɨ ghì a ghɨ nà n-nyɨŋ atû àteyn, baʼsɨ̂ nɨ̀ mɨ̀nchaʼ mɨ̀ ìwòŋ ɨ chɨ̀yntɨ̀ ɨ zɨ kɨ ibàm nɨ̀ ghelɨ Isìlæ̀ antêynɨ̀ jvà. ²⁴A nà ghɨ a nlayn ɨ̀tùʼ, Bôbo Fɨyini ɨ ki suʼsɨ nɨ̀ sugèyʼsɨ Ijìbsɨ̀, atuŋ a mbàʼsɨ̀ afî nɨ̀ àtuŋ ɨvɨ̀s a ɨ jɨ̀ŋsɨ̀ àŋena. ²⁵Bôbo Fɨyini nɨn ni meyn, akal a mɨnchaʼ mɨ̀ ìwoŋ nɨ̀ àŋena ɨ choʼtɨ àŋena nà sɨ wo sɨ gùf. Àŋena yeyn tî ɨ nà sɨ bê kɨ sɨ a àŋena ngeŋsɨ na, “Ghesɨ̀nà leʼ ɨ̀ kàsi sɨ a ibàm nɨ̀ ghelɨ Isìlæ̀ ghèyn. Bôbo Fɨyini nɨn nû ghesɨ̀nà alèʼ nɨ̀ àŋena.”

²⁶Bôbo Fɨyini ɨ kæ bè sɨ̂ Mosìs na, “Nàysɨ awu à kya atû jvà ighaʼnɨ ta ka mu kasi gvì ɨ̀ lɨ̀msɨ ghelɨ Ijìb nɨ̀ mɨ̀nchaʼ mɨ̀ ìwòŋ nɨ̀ àŋena baʼsɨ̂ nɨ̀ sugèyʼ sìsɨ̀ a sɨ n-jelɨ̀ atû nyàmsɨ kfaŋ.” ²⁷Mosìs ɨ nàysɨ̀ àwu a ŋweyn atû jvà ì ghaʼnɨ, ɨtuʼ nà layn gvî tèyn jvà ɨ kasi gvì ɨ chɨ̀yntɨ̀. Ghelɨ Ijìb ɨ nà sɨ ghɨ na ghɨ n-kasî leʼnɨ̂ fvɨ̂ fvɨ, ɨ kòynɨ kɨ nɨ̀ jvà. Bôbo Fɨyini ɨ nì jvà ɨ chɨytɨ àŋena nô ghɨ̀ jɨ̀m. ²⁸Jvà àteyn nɨn læ kasi gvi chɨ̀yntɨ̀, ɨ lɨmsɨ sugèyʼsɨ fòyn Ijìb sìsɨ̀ nô sɨ̀ jɨ̀m ta sɨ n-zɨ a jvâ ibàm nɨ̀ ghelɨ Isìlæ. Ɨsîsɨ a sɨ nà n-jelɨ̀ atû mɨ̀nchaʼ nɨ ɨsîsɨ̀ a sɨ nà n-jelɨ̀ atû nyamsɨ kfaŋ, nô wul ɨ̀mòʼ ɨ faŋ tɨ̀ fvɨ̀ antêynɨ̀ nɨ̀ àŋena.

²⁹Mɨtì ghelɨ Isìlæ̀ nà n-sɨ ghɨ ma ghɨ dyaŋ meyn a ki jvà iyum, mu ɨ ti ɨkœ ɨ two nɨ̀ àŋena, ti ɨkœ nɨ̂nkœ̀ tèyn ta mɨzɨ mɨ̀ ndo. ³⁰À ti ta Bôbo Fɨyini nɨn læ bœ̀sɨ ghelɨ Isìlæ̀ sɨ awu nɨ̀ ghelɨ Ijìb achi nâ ghàyn. Ghelɨ Isìlæ̀ ɨ yeyn ta tɨgvɨyntɨ ghelɨ Ijìbtɨ̀ nɨn nyɨŋ a mbæ̀ jvà. ³¹A nà ghɨ ta ghelɨ Isìlæ̀ yèyn meyn àdyaʼ a bemnɨ-a nɨ̀ Bôbo Fɨyini kì a wù dyèyn sɨ̂ ghelɨ Ijìb, àŋena nà sɨ fâyn Bôbo Fɨyini samsɨ̂ ŋweyn fî samsɨ̂ Mosìs ɨ wul ɨ̀ felɨnɨ nɨ̀ ŋweyn.