Exodus 13

Ifu i woyn ghɨ lûmnɨ̀ ɨ ghɨ asɨ nɨ̀ ghelɨ Isìlæ̀

¹Bôbo Fɨyini nɨ̀n bê meyn sɨ̂ Mosìs na, ²“Yì na fu woyn ghɨ lûmnɨ̀ ɨ ghɨ asɨ nɨ̀ zɨ̀ sɨ̂ mà nô ghɨ̀ jɨ̀m. À n-kelɨ mà nô mɨ wayn ɨ̀ lûmnɨ̀ ɨ̀kfà ta ghɨ bzɨ sɨ asɨ antêynɨ̀ nɨ̀ zɨ̀, kèsa à n-ghɨ wayn wùl, kèsa à n-ghɨ wayn nyàm.”

³Bôbo Fɨyini ɨ taŋi tì, Mosìs ɨ bè sɨ̂ ghelɨ Isìlæ̀ na, “Ka yi n-læ̀ lèsɨ̀ àchi nâ kèynà bòm ta à n-ghɨ àchi kì a Bôbo Fɨyini nɨn læ fvɨ̀sɨ zɨ ateyn sɨ a ndo àkòs a Ijìb nɨ̀ àdyaʼ a bemnɨ-a nɨ̀ ŋweyn a. Yi se sɨ yɨ achi nâ kèynà ka yi n-yɨ afo ma ghɨ we meyn fɨ̀shɨ̀k ateyn. ⁴Yi n-lû layn sɨ a Ijìb, achi a kɨ asɨ-a a njôŋ Abìb. ⁵Bôbo Fɨyini nî lì zɨ nɨ̀ zɨ̀ ilaʼ nɨ̀ ghelɨ Kenàn nɨ̀ ghelɨ Hît nɨ̀ ghelɨ Amò nɨ̀ ghelɨ Hîv ŋêyn ghelɨ Jebùs, ilaʼ ghè a wu n-læ chfɨ̀nɨ nɨ̀ mɨ̀kàyn, sɨ fu sɨ̂ ghɨ̀bo ghi, a ghɨ ìlaʼ kelɨ nse ì jùŋ, ɨfwo ɨ yɨnɨ koʼ ateyn, yi nà yɨ àchi nâ kèynà a njoŋ nâ ghàyn kɨ bèŋ sɨ̀ jɨ̀m. ⁶À na ghɨ ɨlvɨ ta yi n-kɨŋ sɨ yɨ ayɨ nâ kèynà, yi nà yɨ àbayn bula fɨ̀shɨ̀k ateyn sɨ a mɨchi nsòmbo. À na ghɨ achi a goʼsɨnɨ-a, yi yɨ ayɨ sɨ koʼsɨ Bôbo Fɨyini. ⁷Yi n-kelɨ sɨ nà yɨ abayn bula fɨ̀shɨ̀k ateyn sɨ a mɨchi nâ ghàyn nsòmbo. Ka ghɨ n-yeyn afo a yi a ndo nɨ̀ fɨ̀shɨ̀k fɨ̀ ateyn. Ka ghɨ n-yèyn mɨ yeyn fɨ̀shɨ̀k alèʼ ghè a yi n-chi ateyn. ⁸Achi nâ kèynà na gvî kfeyn a, yi faytɨ ɨ fèʼtɨ̀ sɨ̂ wôyn ghi na, yi n-yɨ àyɨ nâ kèynà têyn bòm ìwo zɨ̀ a Bôbo Fɨyini nɨn læ ni sɨ̂ zɨ̀, ɨ fvɨ̀sɨ̀ zɨ̀ sɨ a Ijìb. ⁹Ayɨ nâ kèynà na lum ghɨ kɨ ta nchwæ ɨwu nɨ̀ zɨ̀, fî ghɨ ta nchwæ ɨchfɨ atu nɨ̀ zɨ̀ sɨ nà bêtɨ̀ na isaʼ i Bôbo Fɨyini na ghɨ kɨ ghɨ ɨchfɨ̀ nɨ̀ zɨ̀ bòm ta Bôbo Fɨyini nɨn læ fvɨ̀sɨ zɨ sɨ a Ijìb nɨ̀ adyaʼ a bemnɨ-a nɨ̀ ŋweyn a. ¹⁰Yi n-kelɨ sɨ nà lem isaʼ nâ yèynì kɨ bèŋ sɨ̀ jɨ̀m nô mɨ ɨlvɨ gha ta mɨ̀chi nâ mèyn gvì chem. ¹¹Bôbo Fɨyini lî zɨ nɨ̀ zɨ̀ ilaʼ nɨ̀ ghelɨ Kenàn ɨ̀ fu ilaʼ ateyn sɨ̂ zɨ̀ kɨ̀ ighel ta wù n-læ chfɨ̀nɨ sɨ̂ ghɨ̀bo bo ghi, ¹²yi fu woyn ghɨ lûmnɨ̀ ɨ ghɨ asɨ nɨ̀ zɨ̀ nô ghɨ̀ jɨ̀m nɨ̀ woyn nyâm sɨ lûmnɨ̀ ɨsɨ asɨ nɨ̀ zɨ̀ nô sɨ̀ jɨ̀m sɨ̂ Bôbo Fɨyini bòm ta à n-kelɨ ŋweyn. ¹³Njàkâs bzɨ wayn àsɨ, ka yi n-fù sɨ̂ Fɨyini fɨ, yi fu wâyn njɨ̀ atu àteyn. Yi na ghɨ wi sɨ fu wâyn njɨ̀, yi kòl ɨ̀mzɨ̂ ɨ wâyn njàkâs àteyn. Yi n-kelɨ sɨ nà bzɨ nô mɨ wayn ɨ lûmnɨ̀ ɨwû àsɨ ɨ̀kfà, yi yuyn atu a ŋweyn nɨ̀ wâyn njɨ̀.

¹⁴“Wôyn ghi kæ læ̀ nà bɨf sɨ̂ zɨ̀ na, ‘Iwo nâ yèynì nɨn dyêyn na gha a,’ yi bè sɨ̂ àŋena na, ‘Bôbo Fɨyini nɨn læ fvɨ̀sɨ ghesɨ̀nà sɨ a ndo àkòs ilaʼ i Ijìb nɨ̀ adyaʼ a bemnɨ-a nɨ̀ ŋweyn a. ¹⁵À nà n-ghɨ ta fòyn Ijìb to nɨ̀ àtu a ɨ̀ leʼ na wu n-visî wì na ghesɨ̀nà lu, Bôbo Fɨyini ɨ zuetɨ woyn ghɨ lûmnɨ̀ ɨ ghɨ asɨ nɨ̀ ghelɨ Ijìb nô ghɨ̀ jɨ̀m, baʼsɨ̂ nɨ̀ woyn nyamsɨ ɨsɨ asɨ nô sɨ̀ jɨ̀m. À ti iwo zɨ̀ a ghɨ n-bzɨ nô mɨ wayn ɨ lûmnɨ̀ ɨwû àsɨ ɨ̀kfà ghɨ yuyn atu a ŋweyn nɨ̀ wâyn njɨ̀.’ ¹⁶Iwo nâ yèynì na ghɨ ta nchwæ ɨwu nɨ̀ ghesɨ̀nà, fî ghɨ ta nchwæ ɨchfɨ atu nɨ̀ ghesɨ̀nà bòm ta Bôbo Fɨyini nɨn læ fvɨ̀sɨ ghesɨ̀nà sɨ a Ijìb nɨ̀ adyaʼ a bemnɨ-a nɨ̀ ŋweyn a.”

Ghelɨ Isìlæ̀ ɨ dyàŋ Jvâ ì Baŋnɨ

¹⁷À nà n-ghɨ ta fòyn Ijìb vìsi ghelɨ Isìlæ̀ àŋena lû, Fɨyini fɨ faŋ tɨ̀ vìsi na àŋena ndu tòynɨ dzɨ a ilaʼ i Fìlisìyà nô mɨ ta dzɨ àteyn nà n-tɨmsɨ. À nà n-ghɨ tì ma Fɨyini fɨ be meyn na, “Mbàynɨ̀sɨ̀ kæ sɨ fvɨ̀ sɨ nu àŋena, a àŋena kfɨnɨ ikfâʼtɨ̀ i àŋena ɨ̀ kàsi ndù a Ijìb.” ¹⁸Fɨyini fɨ ɨ kæ sɨ nì na àŋena ngal ndù dzɨ a nse ìyum abàs ghè a Jvâ ì Baŋnɨ nɨn ghɨ ateyn. Ghelɨ Isìlæ̀ nɨn læ fvɨ̀ ɨ koʼ sɨ a Ijìb ta sugèyʼsɨ̀, gvɨ̂tɨ̀ sɨ nù.

¹⁹Àŋena nɨn læ se sɨ lu sɨ a Ijìb Mosìs ɨ lì ɨ̀vɨf ɨ Josèf bòm ta Josèf nɨ̀n læ meyn nì woyn Isìlæ̀ ɨ chfɨ̀nɨ̀ na àŋena læ̀ se sɨ lù ɨ̀ lì ɨ̀vɨf ɨ ŋweyn. Josèf nɨn læ bè sɨ̂ àŋena na, “Mɨ n-kya samoʼ na Fɨyini fɨ læ̀ tôʼnɨ̀ nɨ̀ zɨ̀ a yì kasi fvɨ̀ sɨ a ilaʼ afêyn. Wù læ̂ gàmtɨ̀, yi se sɨ lù, yi lì ɨ lù nɨ̀ ɨ̀vɨf ɨ̀ wom sɨ a ilaʼ nâ ghàyn.”

²⁰A nà sɨ ghɨ ta ghelɨ Isìlæ̀ lù sɨ a Sukòt, àŋena ndu bɨ̀ a Etàm kɨ̀ ta ghɨ fvɨ̀ mèsì nse ìyum. ²¹À nà n-ghɨ nɨ̀nchuè, Bôbo Fɨyini ɨ nà n-ndû a àŋena asɨ a nseŋ mbàʼsɨ̀ sɨ ghɨ tèyn ta atuŋ, dyêyn ndû nɨ̀ dzɨ̀ sɨ̂ àŋena. Ɨtuʼ nî jɨ wu nà n-ndû asɨ nɨ̀ àŋena ɨvɨ̀s wu ghɨ tèyn ta atuŋ, kâʼsɨ̀ ndû nɨ̀ àŋena ta ka àŋena na jelɨ̀ nɨ̀nchuè jelɨ̀ nɨ̀ntuʼ. ²²Atuŋ a mbàʼsɨ̀ nâ kì-à nɨ̀ àtuŋ ɨvɨ̀s a, nà n-lû wì sɨ àŋena asɨ nɨ̀nchuè nɨ̀ntuʼ.