Exodus 15

Mosìs ŋêyn Meliyàm ɨ yem njàŋ ɨ koʼsɨ Fɨyini.

¹À nà n-ghɨ ta Bôbo Fɨyini zuètɨ ghelɨ Ijìb a Jvâ ì Baŋnɨ, Mosìs ŋêyn ghelɨ Isìlæ̀ ɨ nà yem koʼsɨ̂ Bôbo Fɨyini bê na:

“Mà na yem njàŋ koʼsɨ̂ Bôbo Fɨyini

bòm ta adyaʼ a ŋweyn a nɨn ngaŋtɨ̂ chwô nô mɨ àdyaʼ à kà.

Wù maʼ meyn nyam kfaŋ a jvâ i ghaʼnɨ baʼsɨ̂ nɨ̀ wùl vzɨ̀ a wù n-ghɨ atu àteyn.”

²Bôbo Fɨyini nɨn ghɨ àdyaʼ à kema, mà na yem njàŋ koʼsɨ̂ ŋweyn.

Wù bœsɨ meyn mà.

Wù n-ghɨ Fɨyini femfɨ, mà na koʼsɨ̂ ŋweyn.

Wù n-ghɨ Fɨyini fifɨ̀ a bò wom nà n-koʼsɨ, mà na bemsɨ̂ ŋweyn.

³Bôbo Fɨyini nɨn ghɨ ìzɨyn i ŋweyn.

Wù n-ghɨ bò ndo ìwòŋ.

⁴Wù maʼ meyn mɨ̀nchaʼ mɨ̀ fòyn Ijìb bàʼsɨ nɨ̀ sugèyʼsɨ ŋweynsɨ a jvâ ighaʼnɨ.

Wù ni meyn sugèyʼsɨ tosɨ nɨ̀ fòyn Ijìb leŋ a Jvâ ì Baŋnɨ.

⁵Jva isœnɨ lɨmsɨ meyn àŋena, àŋena sœ kàli isas i jvâ ta ngòʼsɨ.

⁶Ô Bôbo Fɨyini, ɨkœ ɨ two nɨ̀ và nɨn kelɨ àdyaʼ a bemnɨ-a.

Ô Bôbo Fɨyini, ɨkœ ɨ two nɨ̀ và nɨn chêytɨ̀ mbàynɨ̀.

⁷Wà tɨm meyn ɨ̀ yɨ̀ ghelɨ ghì a ghɨ tî nà choʼ avɨ à kya nɨ̀ àdyaʼ a bemnɨ-a nɨ̀ và.

Wà ti meyn dyèyn ɨ̀toŋ ɨ yafɨnɨ nɨ̀ và,

wu kfɨl àŋena têyn ta ɨvɨs nɨn nî wu kfɨl ɨwi.

⁸Wà tî tɨm kɨ azuê à kya,

mu timi koʼ a jvâ ìghaʼnɨ.

Wà ni meyn jva yi tɨm ɨ̀wuyn, yì timi koʼ kɨ̀ têyn ta azɨ a ndo,

mu tosɨ a itòŋ i jvâ ighaʼnɨ.

⁹“Mbàynɨ̀ tî nà ghaŋsɨ̂ taŋi-à bê na,

‘Mɨ n-nyɨŋ ibàm nɨ̀ àŋena, ɨ̀ ghàytɨ àŋena.

Mɨ n-fsɨtɨ̂ ɨ̀fwo àŋena ɨ̀ gwò.

Mɨ n-fsɨ nô mɨ ghà sɨ̂ àŋena ta mɨ n-kôŋ.

Mɨ n-choʼ ìfô ì yemi, ɨ̀ zuètɨ àŋena kɨ̀ nô nɨ̀ àwu à kema.’

¹⁰Mɨtì wà zuêsɨ̀ kɨ̀ zuesɨ a jvâ ighaʼnɨ,

yì lɨmsɨ àŋena.

Àŋena sœ kàlì ateyn ta ngòʼ ighaʼnɨ.”

¹¹“Ô Bôbo Fɨyini, mɨyini ɨ̀n lì nɨn ghɨ wi têyn ta vâ.

Ilayn ì zæ nɨ̀ ìŋwâʼ ì zæ nɨn koʼ kfeynɨ-à, wa nî àwo ɨchfɨ̀ ɨyumnɨ.

¹²Wà tî nàysɨ̀ kɨ̀ naysɨ awu ɨkœ ɨ two nɨ̀ và,

nse mzɨ kɨ mzɨ mbàynɨ̀ seysɨ.

¹³Wà tisɨ meyn ghelɨ ghì a wà tî bœ̀sɨ̀ nɨ̀ ìkôŋ ì zæ zɨ̀ a yi lum mæ̀ wi.

Wà tisɨ meyn àŋena nɨ̀ àdyaʼ à kya ɨ̀ lì ndù nɨ̀ àŋena alèʼ a laynɨ-a nɨ̀ và.

¹⁴Tɨlaʼ tɨ litɨ yvɨ meyn ìwo zɨ̀ a wà nì, nà chɨŋtɨ̂ faynà.

Ghelɨ Fìlisìyà yvɨ meyn, ɨ̀ kfɨ sayn.

¹⁵Ifayn i ku meyn tɨ̀fôyn tɨ Edòm,

chyeʼsɨ Mowàbsɨ na chɨŋtɨ̂ faynà,

ghelɨ kfɨ sayn a Kenàn nô ghɨ̀ jɨ̀m.

¹⁶Alɨmalɨm a nɨn bâytɨ̀ àŋena, ifâyn i bemnɨ-i fî ku àŋena.

Àŋena yeyn meyn àdyaʼ a bemnɨ-a nɨ̀ và, ɨ̀ tìmi nà ti kɨ alêʼ àmòʼ têyn ta ngòʼ,

nô ta ka ghelɨ ghya ghì a wà fvɨ̀sɨ̀ a ndo àkòs nî chwò.

¹⁷Ô Bôbo Fɨyini, wa nì lî zɨ̂ nɨ̀ ghelɨ̀ ghya ɨ̀ lèm, a àŋena na chî a kfɨyn nɨ̀ và, alèʼ ghè a wà chòʼnɨ sɨ nà ghɨ ateyn,

a ndo nɨ̀ và afî a wà bàʼlɨ̀ a Bôbo Fɨyini.

¹⁸Bôbo Fɨyini læ̀ saʼ ɨ̀fôyn ɨ ŋweyn,

kɨ̀ sɨ a mɨlvɨ ɨ̀n jɨ̀m.”

¹⁹À tî nà ghɨ ta nyamsɨ kfaŋ nɨ̀ fòyn Ijìbsɨ̀ nɨ̀ mɨ̀nchaʼ mɨ̀ ìwoŋ nɨ̀ ŋweyn, baʼsɨ̂ nɨ̀ sugèyʼsɨ ŋweyn sìsɨ̀ a sɨ n-jelɨ̀ atû nyamsɨ kfaŋ zɨ a jvâ, Bôbo Fɨyini nî jvà kasî chɨ̀yntɨ̀ ɨ̀ chɨl àŋena, ma ghelɨ Isìlæ̀ dyaŋ meyn a ki jvà ma mu yum meyn sɨ a ateyn. ²⁰Meliyàm ɨ nfèʼtɨ̀ ìghaʼnɨ, ɨ jêmtɨ̀ Alòyn, ɨ lì fɨ̀nchùm, ghɨ̀ki Isìlæ̀ ɨ boŋ lì ɨmzɨ̂ àŋena ɨ nà chêŋ ndû à ŋweyn ibàm. ²¹Meliyàm ɨ fu njàŋ ŋêyn àŋena nà yem koʼsɨ̂ Bôbo Fɨyini bê na:

“Yì yem ɨ̀ kòʼsɨ Bôbo Fɨyini

bòm ta adyaʼ a ŋweyn a nɨn ngaŋtɨ̂ chwô nô mɨ àdyaʼ à kà.

Wù maʼ meyn nyam kfaŋ a jvâ ighaʼnɨ baʼsɨ̂ nɨ̀ wùl vzɨ̀ a wù n-ghɨ atu àteyn.”

Ghelɨ Isìlæ̀ ɨ ndu chem a Malà nɨ̀ Elìm

²²À nà n-ghɨ ta ghelɨ Isìlæ̀ dyàŋ mèsì Jva ì Baŋnɨ, Mosìs ɨ lì àŋena ɨ ndù nɨ̀ àŋena a nse ìyum a Shû. Àŋena nɨn jèl sɨ a mɨchi ɨ̀n tal, yeyn wi nô àlêʼ a mu. ²³A nà ghɨ ta àŋena ndù chèm a Malà ɨ yeyn mu mɨ lue ghaʼ àŋena sɨ nyvɨ. À ti iwo zɨ̀ a ghɨ n-toŋtɨ alêʼ ateyn na Malà. ²⁴Ghelɨ Isìlæ̀ ɨ nà sɨ ghâm Mosìs bɨfɨ na, “Ghès ti n-lî wo mu lvɨ̂yn sɨ nyvɨ a?”

²⁵Mosìs ɨ dzɨ̀ sɨ̂ Bôbo Fɨyini, wu dyèyn àntɨ̀mlɨ a fɨ̂kàʼ sɨ̂ ŋweyn wu lì ɨ màʼ a jva nâ ghè, mu mɨ̀ ateyn ɨ nà bu luê wì.

Bôbo Fɨyini ɨ fu tɨsaʼ sɨ̂ àŋena afu, ɨ mòm àŋena sɨ yeyn nâ àŋena nɨn yvɨnɨ̂ ŋweyn a. ²⁶Wu n-bè sɨ̂ àŋena na, “Yì ti kæ sɨ nà faytɨ̂ yvɨtɨ̂ ìwo zɨ̀ a Bôbo Fɨyini, ɨ Fɨyini fifɨ nɨn bê, nî ìwo zɨ̀ a yi n-ghɨ àtì-ati, lêm tɨsaʼ tɨ ŋweyn nô tɨ̀ jɨ̀m, nî kɨ àwo kì a wù yèʼi zɨ nɨ̀ ànkeyna, ma bû læ̀ màʼ tɨ̀koʼi tìtɨ̀ a mɨ n-læ màʼ ɨwuyn nɨ̀ ghelɨ Ijìb a yi ɨwùyn. À n-ghɨ mà Bôbo Fɨyini fìfɨ̀ a mɨ n-chuʼ tɨkoʼi titɨ.”

²⁷Bôbo Fɨyini ɨ taŋi tì àŋena lù sɨ afu ɨ ndù ɨ bɨ̀ alèʼ a li-a a Elìm, asɨ a lɨmàlɨ̀mà ɨ ghɨ afu njvàsɨ̀ bò nɨ̀ àsom a mɨ̀vɨm nsòmbo.