Esther 7

Ghɨ shɨ̀ŋsɨ̀ Hamàn

¹Fòyn ŋêyn Hamàn nɨn ndû meyn sɨ yɨ ɨfwo ɨ yɨnɨ vzɨ̀ a wî ntoʼ Està kfè. ²A nà ghɨ ta àŋena nɨn nyvɨtɨ mɨlûʼ a ànkùmtɨ̀ achi nâ ghàyn, fòyn ɨ fi bɨf sɨ̂ wî ntoʼ ɨ Està na, “Wà n-kɨŋ na mà ni gha sɨ̂ và a? Mɨ n-fu nô mɨ ghà vzɨ̂ a wà bɨf. Wà n-kɨŋ na mà ni gha sɨ̂ và a? Wà bɨ̀f nô mɨ àbâs ilaʼ a mà fu sɨ̂ và.”

³Està ɨ wî ntoʼ ɨ bèynsɨ̀ na, “Wà kæ nà kôŋ ma, yi kfeynɨ̂ na wà yvɨ iwo zɨ̀ a mɨ n-bê a mbæ wa visi ghesɨ̀ ghelɨ ghem na chi-à. À ti iwo zɨ̀ a mɨ n-kɨŋ. ⁴Mɨ n-bê tèyn bòm ta ghɨ beyʼlɨ meyn mà bàʼsɨ nɨ̀ ghelɨ̀ ghem na ghɨ zuetɨ ghes nô ghɨ̀jɨ̀m ilaʼ afêyn. À nà n-ghɨ na ghɨ beyʼlɨ ghes kɨ̀ sɨ a ɨ̀kôs ɨki nɨ̀ ɨlûmnɨ̀ ma mà chìmi kɨ̀ moŋ. Ngeʼ zɨ̀ a ghès na yeyn ta ɨkôs kàʼ yi bû nì na mà fu ngeʼ sɨ̂ fòyn. ⁵Fòyn Zekzès ɨ bɨf sɨ̂ Està ɨ wî ntoʼ na, “À bèyʼlɨ nda zɨ a? Wùl ɨ̀ vzɨ̀ a wù mòmsɨ̀ sɨ ni ìnkì iwo nâ yèynì nɨn ghɨ wo?”

⁶Està ɨ bè na, “Mbàynɨ̀ zɨ̀ a yì n-choʼ avɨ à kesa nɨn ghɨ Hamàn ɨ wul ɨ bɨ wèyn.”

Hamàn ɨ yvɨ iwo ateyn ifâyn i bemnɨ-i ɨ ku ŋweyn asɨ nɨ̀ fòyn ŋêyn wî ntoʼ. ⁷Ɨtoŋ fòyn nɨn yafɨ meyn wu làlì ɨ visi mɨ̀lûʼ mzɨ̀ a wù nà nyvɨ ɨ fvɨ ndù ɨ nà ghaynɨ̂ a gvêyn a mbæ̀ ntoʼ. Mɨtì a nà ghɨ ta Hamàn yeyn kèli na fòyn sɨ ghɨ ma wù choʼnɨ meyn ìwo zɨ̀ a ka wù ni sɨ̂ ŋweyn, wu faŋ a ndo ɨ nà chwotɨ Està ɨ wî ntoʼ na wù gamtɨ ŋweyn.

⁸A nà ghɨ ta fòyn lù abe nà zɨ̂ gvî a ndo ghè a ghɨ nà n-yɨ ateyn, Hamàn ɨ nyiŋi ndû achɨ afî a Està nà n-duʼ ateyn.

Fòyn ɨ leŋ ɨkfɨfi ɨ bɨf na, “A yi chem meyn aleŋ na wù na kûmlɨ̀ wî ntoʼ kɨ̀ nô a ma asɨ a.?” Fòyn nɨn læ nà bê mesì gvî kɨ nɨ̀ ìwo nâ yèynì têyn, ghɨ kul kɨ kul ikêʼ i Hamàn. ⁹Habonà ɨ wul ɨ̀felɨnɨ nɨ̀ fòyn ɨlvɨ̀ ɨ bè na, “Fɨkfɨ̂s fɨ lifɨ nɨn ti a ngùŋ ndo nɨ̀ Hamàn dyêf chem ntàmsɨ̀ mɨ̀vɨm ɨ̀m bò nɨ̀ ntàm sɨ̀ tâyn ma wù tî bè na ghɨ yɨs ɨ̀ shɨ̀ŋsɨ̀ Mòdèkayà ateyn. Modèkayà nà ghɨ wulɨ vzɨ̀ a wù n-læ nì ghɨ bœ̂sɨ̀ fòyn.”

Fòyn ɨ yvɨ tî ɨ bè na, “Yì shɨŋsɨ ŋweyn ateyn.” ¹⁰Ghɨ kæ sɨ shɨ̀ŋsɨ Hamàn a fɨkfɨ̀s afî a wù tî bè ghɨ yɨ̂s sɨ shɨ̀ŋsɨ Mòdèkayà ateyn, atem a fòyn a ɨ kæ yvɨ̀tɨ̀.