Esther 6

Ghɨ wumsɨ Hamàn asɨ nɨ̀ Mòdèkayà.

¹A n-læ meyn kfa nà ghɨ nɨ̀ntuʼ achi nâ ghè, mbunisɨ ɨ teyna sɨ asɨ nɨ̀ fòyn wu bè na ghɨ gvi nɨ̀ ŋwàʼlɨ̀ mɨ̀tɨtɨ̂, ɨ ŋwàʼlɨ̀ àwo zɨ̀ ghɨ nyàʼ lèm kɨ̀ sɨ a ɨtuʼ ta wù nsaʼ ɨ̀ jàŋ wù yvɨtɨ. ²Ghɨ yeyn ma ghɨ nyaʼ meyn ateyn ta Mòdèkayà nɨ̀n læ bɨ̀s isas i ghelɨ ghɨ felɨnɨ nɨ̀ fòyn ɨ Bigtanà ŋêyn Telèsh ghì a ghɨ nà n-chî ɨchfɨ mbàyn ntoʼ ta àŋena nɨn læ baʼtɨ sɨ zue fòyn Zekzès.

³Fòyn ɨ bɨf na, “Ghɨ n-nì nô ghà sɨ̂ Mòdèkayà sɨ màʼtɨ ŋweyn sɨ a iwo nâ ghàyn a?”

Ghelɨ ghɨ felɨnɨ nɨ̀ ŋweyn ɨ bèynsɨ̀ na, “Ghɨ bû nì nô ìwo sɨ̂ ŋweyn.”

⁴Fòyn ɨ bɨf na, “À n-duʼ ndà abe a?” À nà n-ghɨ tì ma Hamàn zɨ gvì kɨ̀ ɨwe njaŋ ɨlvɨ nâ ghè sɨ taŋi sɨ̂ fòyn kûm na wù be ghɨ shɨŋsɨ Mòdèkayà a fɨ̂kfɨ̀s afî a wù yɨ̀s.

⁵Ghelɨ ghɨ felɨnɨ nɨ̀ fòyn ɨ bèynsɨ̀ na, “Hamàn nɨ̀n ti abe.” Fòyn ɨ bè na, “Yì jaŋ wù zɨ gvì.”

⁶A nà ghɨ ta Hamàn zɨ gvì, fòyn ɨ bɨf sɨ̂ ŋweyn na, “Mɨ n-kɨŋ sɨ lem wul alèʼ a ngaŋtɨnɨ-a, mà kaʼ a mà ni gha sɨ̂ ŋweyn a.?” Fòyn nɨn bɨf tî Hamàn ɨ kfàʼtɨ kɨ sɨ a ŋweyn a ngeŋ na, “À ti n-fî ghɨ nô ndà a fòyn nɨn kɨŋ sɨ lèm alèʼ a ngaŋtɨnɨ-a a bu kɨ mà a?” ⁷Wu kfàʼtɨ̀ tì ɨ bèynsɨ̀ ɨ be sɨ̂ fòyn na, “Fòyn na kôŋ sɨ lem wul alèʼ a ngaŋtɨnɨ-a, ⁸wu bè ghɨ gvi nɨ̀ dàla tɨ̀fòyn ma fòyn maʼ meyn nɨ̀ nyàm kfaŋ ma wù nyɨŋ meyn, ma ghɨ chwæ meyn àtu ateyn nɨ̀ nchwæ ntoʼ. ⁹Ghɨ gvî ghɨ fu sɨ̂ àtu a gheli ghɨtisɨnɨ a ntoʼ wù maʼ ɨwùyn nɨ̀ ŋweyn. Wù mâʼ wu jèlɨ chwò nɨ̀ ŋweyn a dzɨsɨ tosɨ antêynɨ̀ ntèʼ jâŋ bê na, “À ti iwo zɨ̀ a ghɨ n-nì sɨ̂ wùl ɨ̀ vzɨ̀ a fòyn nɨ̀n kôŋ sɨ fu alêʼ a ngaŋtɨnɨ-a sɨ̂ ŋweyn.”

¹⁰Fòyn ɨ bè sɨ̂ Hamàn na, Ndu kɨ lvɨ̂yn ɨ lì dàla àteyn nɨ̀ nyam kfaŋ àteyn ɨ ni kɨ ta wà bè sɨ̂ Mòdèkayà, ɨ wul ɨ̀ Jûsɨ̀ vzɨ̀ a wù n-nduʼ ɨchfɨ ntoʼ. Ka wa n-faŋ tɨ̀ ni nô ìwo ìmòʼ antêynɨ̀ àwo ghàyn a wà bè.”

¹¹Hamàn ɨ ndu lì dàla tɨ̀fòyn ɨ màʼ ɨwùyn nɨ̀ Mòdèkayà ɨ koʼsɨ ŋweyn atû nyàm kfaŋ ɨ nà jèl jâŋ bê a dzɨ sɨ tosɨ a ntèʼ na, “À ti iwo zɨ̀ a ghɨ n-nì sɨ̂ wùl ɨ̀ vzɨ̀ a fòyn nɨ̀n kôŋ sɨ fu alêʼ a ngaŋtɨnɨ-a sɨ̂ ŋweyn.”

¹²Mòdèkayà ɨ kasi ndù ɨchfɨ ntoʼ mɨtì Hamàn ɨ lù ɨ shɨf ɨ kfa a ndo ma wù befɨ meyn, ¹³ɨ fèʼtɨ̀ nô mɨ ghà ta yi gàyn sɨ̂ wî ŋweyn ɨ Zelèsh nɨ̀ ghelɨ ijèl nɨ̀ ŋweyn nô ghɨ̀ jɨ̀m.

Ghelɨ ijèl nɨ̀ ŋweyn nɨ̀ wî ŋweyn ma à ti Zelèsh ɨ bè sɨ̂ ŋweyn na, “Wa n-fe-à bòm ta Mòdèkayà vzɨ̀ a wà zɨ̀tɨ̀ sɨ fe bòm ŋweyn nɨn ghɨ wul ɨ̀ Jûsɨ̀, wà kàʼ wa bû to chwò ŋweyn.”

¹⁴À nà n-ghɨ ta ghɨ bu taŋi kɨ taŋi sɨ̂ ŋweyn, ghelɨ ghɨ felɨnɨ nɨ̀ fòyn ɨ zɨ gvì a ndo ɨ lumtɨ ŋweyn na wù ndu alèʼ ɨfwo ɨ yɨnɨ afî a Està kfè.