Esther 8

Fòyn Zekzès ɨ chwòsɨ̀ ìsaʼ na ghɨ gamtɨ ghelɨ Jûsɨ̀.

¹À nà n-ghɨ kɨ achi nâ ghè a ghɨ shɨ̀sɨ̀ŋ Hamàn, fòyn Zekzès ɨ fu ɨfwo ɨ Hamàn ɨ mbàynɨ̀ ghelɨ Jûsɨ̀ sɨ̂ Està ɨ wî ntoʼ. Està nà ghɨ ma wù feʼtɨ meyn sɨ̂ fòyn na Mòdèkayà nɨ̀n ghɨ wâynà ŋweyn. Wu n-fèʼtɨ nô mɨ ɨlvɨ gha fòyn ɨ tum jàŋ Mòdèkayà wu gvì a ŋweyn asɨ. ²Fòyn nɨn choʼ meyn fɨ̀nchaʼ a ŋweyn awu a ghɨ fɨ̀nchaʼ fɨ ŋweyn fìfɨ̀ a wù n-kasi fsɨ sɨ̂ Hamàn ɨ fu sɨ̂ Mòdèkayà, Està ɨ lèm Mòdèkayà na wù na tôʼnɨ̀ nɨ̀ ɨ̀fwo Hamàn.

³Està ɨ kæ fe ɨvɨ̀ nɨ̀ fòyn nɨ̀ ìdzɨ-ì chwotɨ̂ na wù bebsɨ iwo i bzɨ-i zɨ̀ a Hamàn ɨ wul ɨ̀ Agàg tî bàʼtɨ kûm ghelɨ Jûsɨ̀. ⁴Fòyn ɨ nàysɨ̀ ɨ ndù nɨ̀ mbàŋ tɨ̀fòyn nɨ̀ ŋweyn zɨ̀ a ghɨ lom nɨ̀ àso ɨkwo a baŋnɨ-a tî sɨ̂ Està, wu kùm ɨ làlì ɨ timi asɨ nɨ̀ fòyn.

⁵Wu n-timi tî ɨ bè na, “Yi kæ sɨ nà kfeynɨ̂ sɨ̂ và a mbæ̀, wa kôŋ mà, iwo zɨ̀ a mɨ n-bê ɨ ghɨ àti ati wa chwòsɨ̀ isaʼ yi yeʼtɨ izɨ-ì a Hamàn ɨ wâyn Hamedatà ɨ wul ɨ̀ Agàg tî bàʼtɨ ɨ̀ nyàʼ na ghɨ zuetɨ ghelɨ Jûsɨ̀ ɨbyàs ilaʼ nɨ̀ và nô ɨ̀ jɨ̀m. ⁶A mà ti kàʼ a mà dùʼi kɨ duʼi ɨ nà ki ta ghɨ zuetɨ ghelɨ̀ ghem a? Mà kàʼ ma bû duʼì kɨ̀ tî na ki ta ghɨ zuetɨ ghelɨ̀ ghem.

⁷Fòyn Zekzès ɨ kæ be sɨ̂ Està ɨ wî ntoʼ ŋêyn Mòdèkayà ɨ wul ɨ̀ Jûsɨ̀ na, “Ma shɨŋsɨ meyn Hamàn a fɨ̂kfɨ̀s ghè a wù tî yɨ̀s ɨ̀ fu ɨ̀fwo ŋweyn sɨ̂ Està bòm ta wù tî kèʼ ghelɨ Jûsɨ̀. ⁸Yì nyaʼ ìsaʼ i li lvɨ̂yn izɨyn nɨ̀ fòyn kûm ghelɨ Jûsɨ̀ kɨ̀ ta yi n-jôf sɨ̂ zɨ̀, ɨ̀ chwæ̀ nɨ̀ nchwæ fɨ̀nchaʼ fɨ awu nɨ̀ fòyn. Nô mɨ ŋwàʼlɨ̀ ìkà ta ghɨ nyàʼ ìlaʼ afêyn izɨyn nɨ̀ fòyn, chwæ̀ nɨ̀ nchwæ fɨ̀nchaʼ fɨ awu nɨ̀ ŋweyn nɨn ghɨ ma wùl kàʼ wu bû kfɨ̀nɨ ìwo zɨ̀ a yi n-ghɨ ateyn.”

⁹Fòyn nɨn bè tî ghɨ tum jàŋtɨ̀ ghelɨ ghɨ nyaʼnɨ nɨ̀ ŋweyn a mɨchi mɨ̀vɨm ɨ̀m bò njvàsɨ̀ tal a njoŋsɨ tal ɨ njôŋ Sivàn, àŋena nyàʼ tɨ̀saʼ tìtɨ̀ a Mòdèkayà fu nô tɨ̀ jɨ̀m. Ghɨ n-nyàʼ tɨsaʼ tɨ ateyn ɨ tum sɨ̂ ghelɨ Jûsɨ̀ nɨ̀ chyeʼsɨ nɨ̀ ɨ̀tu vzɨ̀ a wu n-tisɨ ɨbyâs ilaʼ ɨvɨ nɨ̂ ɨ̀byâs ilaʼ mɨ̀vɨm ɨ̀m bò njvàsɨ̀ nsòmbo, sɨ zɨ̀tɨ̀ a Indìyà sɨ ndù sɨ chem a Itobìyà. Ghɨ nà nyâʼ nô mɨ sɨ̂ àbâs ilaʼ àkà kɨ̀ itaŋi nɨ̀ ghelɨ nâ ghì ɨ nyàʼ kɨmɨ ìlì sɨ̂ ghelɨ Jûsɨ̀ kɨ̀ itaŋi ilaʼ nɨ̀ àŋena. ¹⁰Mòdèkayà nɨn læ nyàʼ ŋwàʼlɨ̀ sɨ ateyn izɨyn nɨ̀ fòyn Zekzès ɨ chwæ̀ nɨ̀ nchwæ fɨ̀nchaʼ fɨ awu nì fòyn, ɨ tum ŋwàʼlɨ̀ sɨ ateyn sɨ̂ ghelɨ ntum ghɨ nyɨŋ nyàmsɨ̀ kfaŋ sɨ nyɨŋ nô sɨ a ŋaŋ a ghɨ nyamsɨ a lum nyɨŋ kɨ fòyn atu.

¹¹Isaʼ zɨ̀ a fòyn nɨn læ chwòsɨ nɨn fu meyn àdyaʼ sɨ̂ ghelɨ Jûsɨ̀ nô mɨ a ntèʼ ì kà na àŋena timi ɨchfɨ̂ ɨ̀mòʼ ɨ̀ nù zuetɨ nô mɨ ghelɨ ilaʼ ì kà kèsa nô mɨ nɨ̀ ghelɨ abàs ilaʼ àkà ta ghɨ kèʼ àŋena. Aŋena nà n-kelɨ sɨ zuetɨ ghɨ̀ki nɨ̀ woyn àŋena sɨ ghàytɨ sɨ fsɨ ɨfwo mbàynɨ̀sɨ àŋena. ¹²Achi kì a ghɨ n-læ choʼ na ghelɨ Jûsɨ̀ ni iwo nâ yèynì ateyn ɨbyàs ilaʼ nɨ̀ fòyn Zekzès nô ɨ̀ jɨ̀m nà n-ghɨ a mɨchi njvàsɨ̀ tal a njoŋsɨ njvàsɨ̀ bò ɨ njôŋ Adà. ¹³Ghɨ nà n-kelɨ sɨ jàŋ sɨ fèʼtɨ̀ isaʼ nâ yèynì nô mɨ abàs ilaʼ à kà ta ka ghelɨ tɨlaʼ tɨ̀ jɨ̀m yvɨ, a ghelɨ Jûsɨ̀ na gvɨ̂tɨ̀ sɨ sɨ̀sɨ mbàynɨ̀ sɨ àŋena achi nâ ghè.

¹⁴Fòyn nɨn bê meyn ghelɨ ntum ghì a ghɨ nà n-nyɨŋ atû nyamsɨ kfaŋ nɨ̀ fòyn ɨ nyàŋsɨ ndu nɨ̀ ŋwàʼlɨ sɨ ateynsɨ kɨ̀ ɨbyâs ilaʼ ɨ̀jɨ̀m. Ghɨ n-jaŋ meyn fèʼtɨ̀ kɨmɨ ìsaʼ ateyn a ntèʼ ì ghaʼnɨ a Suzà.

¹⁵Mòdèkayà nɨ̀n læ lù asɨ nɨ̀ fòyn ma wù mâʼ meyn dzɨsɨ sɨ fɨfɨ-fɨfɨ nyêm ta dzɨsɨ tɨ̂fòyn, ɨ sù àfol ma ghɨ fàytɨ nɨ̀ àso ɨkwo abaŋnɨ-a ɨ ghàŋsɨ àwaf kɨ bâŋ nyêm ndû ndu. Ghelɨ ntèʼ Suzà nɨn n-læ meyn nà n-saŋlɨ̂ nô sɨ a ŋaŋ kûm ìsaʼ nâ zɨ̀ a ghɨ jàŋ. ¹⁶Ghelɨ Jûsɨ̀ nà n-saŋlɨ̂ nô sɨ a ŋaŋ, ghelɨ fî ngvɨmlɨ̂ àŋena. ¹⁷Ghɨ nà n-jàŋ ìsaʼ zɨ̀ a fòyn chwòsɨ̀ nô mɨ àbàs ilaʼ à kà, jàŋ nô mɨ a ntèʼ ì kà ghelɨ Jûsɨ̀ nà saŋlɨ-à yɨ-a, dyala. Ghelɨ tɨlaʼ tɨ litɨ nɨn kasi meyn sɨ a ghelɨ Jûsɨ̀ bòm ta àŋena nà n-fâyn ghelɨ Jûsɨ̀.