Deuteronomy 8

Ka yi n-læ̀ lèsɨ̀ Bôbo Fɨyini

¹Yì toʼnɨ sɨ nà lem tɨsaʼ tèyntɨ̀ a mɨ n-fu sɨ̂ zɨ̀ layn tèyn nô tɨ̀ jɨ̀m. Yì kæ sɨ nà lêm tɨ̀saʼ tɨ ateyn, a yi na chi-à ɨ̀ bzɨ ɨ̀ dvɨ̀ ɨ̀ læ̀ zɨ lì ilaʼ nâ yèynì ɨ̀ nà kelɨ-a. À n-ghɨ ìlaʼ zɨ̀ a Bôbo Fɨyini nɨn læ chfɨ̀nɨ ɨ yɨ mɨkâyn sɨ fu sɨ̂ ghɨ̀bo ghi. ²Ka yi n-læ̀ lèsɨ̀ ta Bôbo Fɨyini ɨ Fɨyini fifɨ nɨ̀n læ lì zɨ, yi tî jèlɨ̀ kɨ̀ têyn sɨ a bèŋsɨ̀ ghâyn mɨ̀vɨm ɨ̀n kæ̀ ɨ̀ tòynɨ nse iyum. Wù n-læ visi yi toynɨ a ngeʼsɨ tî, mômsɨ̀ zɨ̀ sɨ yeʼi zɨ na yì na yvɨnɨ ŋweyn ta ka wù keli ikfâʼtɨ̀ ì zɨ-i nà kya na yì na yvɨnɨ̂ tɨ̀saʼ tɨ ŋweyn ma yì na yvɨnɨ̂ wì-a. ³Wu n-læ meyn visi jèŋ ɨ yafɨ zɨ yi yeʼi ìwo, wu jæ yɨsɨ zɨ. Wu n-yɨ̀sɨ zɨ nɨ̀ manà, a ghɨ ɨ̀fwo ɨ yɨnɨ bula zɨ̂ ghɨ̀bo ghi timi nà kya. Wu nà n-nî tì ta ka yì yeʼi nà kya na wùl nɨ̀n chî wì kɨ bòm àfo a yɨnɨ-a, mɨtì chî bòm nô mɨ ìwo ì kà ta Bôbo Fɨyini bè. ⁴À n-læ nà ghɨ ta yi n-ghɨ a nse iyum nâ ghè sɨ a bèŋ mɨ̀vɨm ɨ̀n kæ̀, ndzɨsɨ nɨn bu læ bàytɨ sɨ a yi ɨwùyn, ɨvɨ ɨ̀ vzɨ nɨn bu læ mùytɨ. ⁵Yì na kya samoʼ na Bôbo Fɨyini nɨ̀n tisɨ̂ zɨ̀ kɨ̀ ighel ta wùl nî wu nà tisɨ̂ wâyn ŋweyn.

⁶Yì na yvɨnɨ̂ læ̂ tɨ̀saʼ tɨ Bôbo Fɨyini ɨ Fɨyini fifɨ, jelɨ̀ ta wù n-kɨŋ, fî ngvɨmlɨ̂ ŋweyn. ⁷Bôbo Fɨyini ɨ Fɨyini fifɨ nɨn lî zɨ̀ sɨ ndu nɨ̀ zɨ̀ ilaʼ yi jofà, ɨfwo ɨ yɨnɨ ɨ koʼ ateyn nô a jûŋ. Ilaʼ ateyn i nɨn kelɨ mɨ̀chɨm nɨ̀ jvasɨ sɨ kalì a kfɨynsɨ kalì a mɨ̂fòŋlɨ. ⁸Wît nɨ̀n koʼ ilaʼ nâ ghè, asaŋ a balì-à ɨ koʼa, ɨ̀nkàʼ mɨ̀ fiksɨ̀ nɨ ɨmzɨ̂ gɨ̀lêbsɨ̀ kɨ̀mɨ nɨ̀ ɨ̀nkàʼ mɨ̀ bòmeglanèt ɨ koʼa, ɨ̀nkàʼ mɨ̀ olìfsɨ̀ ɨ boŋ koʼa, ɨ̀lû ɨ ghɨ kɨmɨ afu. ⁹À n-ghɨ ìlaʼ ɨfwo ɨ yɨnɨ ɨ dvɨ̂ kɨ ateyn tèyn, ghɨ wutɨ̂ wì afo afu. À n-ghɨ ìlaʼ akas a ɨ dvɨ̂ ndû kɨ ateyn ta ngòʼsɨ̀, wa tɨmtɨ̂ àlêʼ a kfɨyn a fvɨ̂ kɨ ìdyayn.

¹⁰Yi zɨ ilaʼ afu ɨ̀ yɨ ɨ̀ kul, yi nà fu àyòŋnɨ̀ sɨ̂ Bôbo Fɨyini ɨ Fɨyini fifi ta fɨ fù ilaʼ i jûŋ nâ zɨ̀-ì sɨ̂ zɨ̀. ¹¹Yì na tòʼnɨ̀-à ka yi n-lèsɨ̀ Bôbo Fɨyini ɨ Fɨyini fifɨ nà bu yvɨnɨ̂ wì tɨsaʼ tɨ ŋweyn nô tɨ̀ jɨ̀m nɨ̀ ìyeʼi zɨ̀ a mɨ n-fu sɨ̂ zɨ̀ layn. ¹²Yì læ̀ yɨ kfeyn kɨ ta yi n-kôŋ ɨ̀ bàʼlɨ̀ ndosɨ jûŋsɨ̀ nà chî ateyn. ¹³Nyam sisɨ nɨ̀ bzɨ sisɨ læ̀ boŋ dvɨ̀-à, a yì fî kèli àso ɨkwo a baŋnɨ-a nɨ̀ a fɨfâ nô sɨ idvɨ̀. Nô mɨ ghà ta yi n-kelɨ læ̀ nà dvɨ̂ ndû kɨ asɨ. ¹⁴Yi læ̂ kèli ɨ̀fwo nâ wèyn yi nà tôʼnɨ̀-à ka yì zɨtɨ sɨ nà ghaŋsɨ̂ ɨwuyn ɨ̀ lèsɨ̀ Bôbo Fɨyini ɨ Fɨyini fifɨ fìfɨ̀ a fɨ n-læ fvɨ̀sɨ zɨ sɨ a ndo àkòs a Ijìb. ¹⁵Wù n-læ meyn lì zɨ̀ ɨ jèl ɨ toynɨ nɨ̀ zɨ̀ a nse iyum, yi ghaʼa fî bema, mbamsɨ bɨsɨ ɨ ghɨ ateyn nɨ̀ ɨ̀nkfem ikfɨ, mu ɨ ghɨ wi sɨ nyvɨ, mɨtì wu nì mu ɨ fvɨ̀ iwu yi nyvɨ. ¹⁶Bôbo Fɨyini nɨn læ meyn fu manà sɨ̂ zɨ̀ a nse iyum, a ghɨ ɨ̀fwo ɨ yɨnɨ bula nô mɨ ghɨ̀bo ghi timi nà kya. Wù n-læ visi yi toynɨ a ngeʼsɨ nâ ghàyn sɨ yeʼi zɨ na yì na yvɨnɨ ŋweyn. Sɨ a ibàm ateyn, a awo a na ndû kɨ a jûŋ sɨ̂ zɨ̀. ¹⁷Yì na tòʼnɨ̀ læ̂ ka yi n-læ̀ nà kelɨ ìkfâʼtɨ̀ i li na à n-ghɨ bòm àdyaʼ à ki-a ta yì kèli ighaʼ nâ yèynì. ¹⁸Yì na kwo kfàʼtɨ̀ kɨ Bôbo Fɨyini ɨ Fɨyini fifɨ bòm ta à n-ghɨ ŋweyn vzɨ̀ a wù n-fu itof nɨ̀ àdyaʼa na yì fel ɨ̀ kèli ìghaʼ, fu tì luynsɨ̂ mɨ̀kâyn mzɨ̀ a wu n-læ yɨ ŋêyn ghɨ̀bo ghi kɨ̀ ta yi n-ghɨ layn.

¹⁹Yì kæ læ̀ vìsi Bôbo Fɨyini ɨ Fɨyini fifɨ ɨ̀ ndù nà koʼsɨ̂ mɨyini ɨn lì felɨ̀ sɨ̂ ɨ̀mêyn, yi nà kya na yì fì nì nô mɨ ghà a Bôbo Fɨyini ni a yì kfɨtɨ kɨ ghɨ̀ jɨ̀m kɨ̀ ighel ta mà bè sɨ̂ zɨ̀ layn tèyn. ²⁰Yì kæ læ̀ leʼ na yì na bu yvɨnɨ̂ wì Bôbo Fɨyini ɨ Fɨyini fifɨ a wù bebsɨ zɨ kɨ̀ ighel ta wu nì nà bebsɨ ndû nɨ̀ tɨlaʼ tìtɨ̀ a tɨ n-nì nà nû zɨ.