Deuteronomy 7

Ghelɨ Isìlæ̀ nɨn ghɨ ghelɨ Fɨyini

¹Bôbo Fɨyini ɨ Fɨyini fifɨ læ̀ lî zɨ̂ nɨ̀ zɨ̀ ilaʼ afî a wù n-kɨŋ sɨ fu sɨ̂ zɨ̀ na yì na kelɨ-a ɨ̀ sàŋ fvɨ̀sɨ̀ ghelɨ tɨlaʼ ghì a ghɨ n-chi ateyn lvɨ̂yn. Wù læ̀ sâŋ fvɨsɨ̀ ghelɨ Hît nɨ̀ ghelɨ Gilgà nɨ̀ ghelɨ Amò nɨ̀ ghelɨ Kenàn kɨ̀mɨ nɨ̀ ghelɨ Belìz nɨ̀ ghelɨ Hîv baʼsɨ̂ nɨ̀ ghelɨ Jebùs. Tɨlaʼ tɨ ateyn tɨ nɨn chɨ̂yntɨ̀ ghɨ nsòmbo, kelɨ ghelɨ ghɨ dvɨ-à, fî to chwò zɨ̀. ²Bôbo Fɨyini ɨ Fɨyini fifɨ læ̂ fu tɨlaʼ nâ tèyntɨ̀ a yi awu, yi zuetɨ ghelɨ ateyn nô ghɨ̀ jɨ̀m. Ka yi n-læ̀ kòynsɨ isuyn sɨ̂ àŋena, ka yi n-læ̀ yɨ mɨkâyn zɨ̂ àŋena. ³Ka yi n-læ̀ màla ghelɨ ilaʼ nâ ghì. Ka wùl nɨn læ̀ fù wâyn ŋweyn sɨ a wi ilaʼ nâ ghè. Ka wùl nɨn læ̀ bɨ̀mi wâyn ŋweyn ɨ lûmnɨ̀ li wâyn wùl ìlaʼ nâ ghè sɨ a wi. ⁴Yì kæ visi woyn ghi na malâ ghelɨ ilaʼ nâ ghì, a àŋena buʼsɨ woyn ghi a ghɨ na bu koʼsɨ̂ wì ma kwo koʼsɨ̂ kɨ mɨyini mɨ̀ àŋena. Yì kæ visi woyn ghi na malâ ghelɨ tɨ̂laʼ nâ ghì a ɨtoŋ baŋ ma Bôbo Fɨyini a mà zuetɨ zɨ tɨ̀ mɨ̀ytɨ̀ isɨ. ⁵Iyeynì nɨn ghɨ ìwo zɨ̀ a ka yì ni sɨ̂ àŋena ɨlvɨ ta yì zɨ afu: Yi n-bɨ̀ytɨ̀ ɨ̀bwaŋ ifu nɨ̀ àŋena ɨ̀ zuèlɨ ngòʼ sìsɨ̀ a àŋena nɨn koʼsɨ. Yi n-kòs nô mɨ àtôʼ à kà ta àŋena tom bòm fɨyini fɨ kifɨ nɨ̀ àŋena fìfɨ̀ a àŋena nɨn toŋtɨ na Ashelà tì. Yi n-nyòʼ ɨ̀nfyèʼsɨ àŋena ɨvɨ̀s. ⁶Yi n-kelɨ sɨ bebsɨ ɨfwo nâ vzɨ̀ bòm ta yi n-ghɨ ghelɨ laynɨ nɨ̀ Bôbo Fɨyini ɨ Fɨyini fifɨ, ma wù chòʼ zɨ antêynɨ̀ ghelɨ tɨlaʼ tɨ mbzɨ tɨ̀ jɨ̀m ɨ̀ lèm na yì na ghɨ ghelɨ ŋweyn sɨ a nyɨŋ.

⁷Bôbo Fɨyini nɨn bu læ kòŋ zɨ̀ ɨ choʼ zɨ bòm ta yi nà n-dvɨ chwo ghelɨ tɨlaʼ tɨ litɨ. À nà n-kwo læ̂ gôʼsɨ̀ zɨ̀ antêynɨ̀ nɨ̀ ghelɨ tɨ̀laʼ nô tɨ̀ jɨ̀m a mbzɨ. ⁸Bôbo Fɨyini nɨn læ fvɨ̀sɨ zɨ sɨ a ndo àkòs afî a yi nà n-felɨ̀ sɨ̂ Fòyn Ijìb ɨ bœ̀sɨ̀ zɨ̀ nɨ̀ àdyaʼ a bemnɨ-a kì a wù n-kelɨ ma wù ti yuyn atu à ki-a bòm ta wù nà n-koŋ zɨ, fî kɨŋ sɨ luynsɨ mɨkâyn mzɨ̀ a wu n-læ yɨ ŋêyn ghɨ̀bo ghi. ⁹Yi ti n-ndyêyn na yi n-kelɨ sɨ nà kya na à n-ghɨ kɨ Bôbo Fɨyini ɨ Fɨyini fifɨ ghɨ Fɨyini samoʼ, bê nô mɨ na gha nî kɨ tì sɨ̂ zɨ̀, dyêyn ìkôŋ i mɨ̂kàyn nɨ̀ ŋweyn sɨ̂ ghelɨ ghì a ghɨ n-kôŋ ŋweyn yvɨnɨ̂ tɨ̀saʼ tɨ ŋweyn ŋêyn woyn àŋena baʼsɨ̂ nɨ̀ woyn woyn ghɨ taŋ lê ɨ̀tu. ¹⁰Wù n-kôŋ ghelɨ ŋweyn mɨtì

ɨ̀ se sɨ bebsɨ ghelɨ ghì a ghɨ n-chasɨ ŋweyn, wu mèsi kɨ mesi àŋena.

À n-chasɨ mɨ ndà Bôbo Fɨyini, wù se sɨ laʼ ŋweyn wu mesi kɨ mesi ŋweyn tɨ̀ mɨ̀ytɨ̀ isɨ.

¹¹Yì na tòʼnɨ̀ læ̂ sɨ nà lem tɨsaʼ tɨ ŋweyn nɨ̀ ìyeʼi zɨ̀ a wù fu na mà fù sɨ̂ zɨ̀ layn kɨ tɨ̀ jɨ̀m.

¹²Yì kæ sɨ nà lêm tɨsaʼ nâ tèyntɨ̀ fî tôʼnɨ sɨ nà nî kɨ ta tɨ n-bê, a Bôbo Fɨyini ɨ Fɨyini fifɨ luynsɨ ikôŋ i mɨ̂kàyn nɨ̀ ŋweyn sɨ̂ zɨ̀ kɨ̀ ighel ta wu n-læ chfɨ̀nɨ sɨ̂ ghɨ̀bo ghi. ¹³Yì kæ nà lêm tɨ̀saʼ tɨ ateyn, a wù na kòŋ zɨ̀, ɨ̀ bòysɨ zɨ̀ ɨ̀ fù woyn sɨ̂ zɨ̀ kɨ̀ sɨ idvɨ̀ ɨ̀ fì nì a ɨfwo ɨ yɨnɨ na koʼ a yi a gvêynsɨ̀ nô a jûŋ, mɨ̀tam mɨ̀ gɨ̀lebsɨ̀ ɨ faytɨ̂ kolâ, yi kam mɨ̀lûʼ ateyn, ɨmzɨ̂ olìfsɨ̀ ɨ kolâ, yi kfê mɨ̀vɨl ateyn. Yì kæ nà lêm tɨ̀saʼ tɨ ateyn, a nyâm sisɨ nɨ̀ bzɨ sisɨ na fî faytɨ̂ bzɨ̂ ilaʼ nâ ghàyn a wù n-læ chfɨ̀nɨ sɨ̂ ghɨ̀bo ghi na yì læ̀ fu sɨ̂ zɨ̀. ¹⁴Yì kæ sɨ nà yvɨnɨ tɨsaʼ tɨ Bôbo Fɨyini nâ tèyntɨ̀, a wù boysɨ zɨ chwò nô ghelɨ ghɨ̀ jɨ̀m, a wùl sɨ̂ zɨ̀ læ̂ nà ghɨ wi akâyn, nyâm sisɨ bzɨ̂ kɨ sɨ jɨ̀m. ¹⁵Yì kæ nà lêm tɨ̀saʼ tɨ Bôbo Fɨyini nâ tèyntɨ̀, a wù fu ɨwuyn ɨtwo sɨ̂ zɨ̀ ɨ̀ faŋ tɨ̀ vìsi na tɨkoʼi tɨ bɨ tìtɨ̀ a yi n-læ yeyn a Ijìb tì ku zɨ, mɨtì ɨ̀ màʼ tɨ̀koʼi tɨ ateyn ɨwuyn nɨ̀ mbàynɨ̀ sisɨ nô sɨ̀ jɨ̀m. ¹⁶Yi n-kelɨ sɨ bebsɨ nô mɨ ghelɨ ilaʼ ì kà ta Bôbo Fɨyini ɨ Fɨyini fifɨ fù a yi awu. Ka yi n-læ̀ kòynsɨ ìsuyn sɨ̂ àŋena. Ka yi n-læ̀ nà koʼsɨ̂ mɨyini mɨ̀ àŋena bòm ta yì mòm, a yì li atam.

¹⁷Ka yi n-læ̀ nà kayntɨ̂ na tɨlaʼ nâ tèyntɨ̀ ti n-to chwò zɨ̀ têyn na yì saŋ fvɨ̀sɨ ti àŋena a. ¹⁸Ka yi n-læ̀ fàyn àŋena. Ka yi n-læ̀ lèsɨ̀ àwo kì a Bôbo Fɨyini ɨ Fɨyini fifɨ nɨn læ ni sɨ̂ fòyn Ijìb ŋêyn ghelɨ ŋweyn nô ghɨ̀ jɨ̀m. ¹⁹Yi n-læ meyn yeyn awo kì a Bôbo Fɨyini mòm sɨ̂ ghelɨ Ijìb kɨ̀ nô nɨ̀ àsɨ à ki-a. Yi n-læ meyn yeyn nchwæsɨ awo a kaynɨ-a nɨ̀ àwo ɨchfɨ̀ ɨ yumnɨ a li-a ta Bôbo Fɨyini ɨ Fɨyini fifɨ nì nɨ̀ àdyaʼ a bemnɨ-a kì a wù n-kelɨ ta ka yì fvɨ sɨ a ilaʼ nâ ghè. Bôbo Fɨyini ɨ Fɨyini fifɨ læ̀ nî kɨmɨ tì sɨ̂ ghelɨ tɨlaʼ ghì a yi n-fâyn lvɨ̂yn nô ghɨ̀ jɨ̀m. ²⁰Bôbo Fɨyini ɨ Fɨyini fifɨ læ̀ ni-à a ifâyn i ghaʼnɨ-i fî ku àŋena. Wù læ̀ tum tɨ̀kanakayn a tɨ chyalɨ nô mɨ ghelɨ ghì a ghɨ leʼ lèytɨ̀ ɨ̀ nà bu chi-à a àŋena fvɨ sɨ ɨlwèʼ ghè a àŋena lèytɨ̀ ateyn ɨ̀ boŋ kfɨ̀tɨ. ²¹Ka yi n-læ̀ fàyn àŋena bòm ta Bôbo Fɨyini ɨ Fɨyini fifɨ nɨn ghɨ zɨ̂ àŋena amoʼ, a ghɨ Fɨyini ngaŋtɨ-à, nî àwo achfɨ̀ a yumnɨ-a. ²²Yì na zɨ̂ ndû a ilaʼ nâ ghè Bôbo Fɨyini ɨ sâŋ fvɨsɨ̀ ghelɨ ateyn kɨ̀ sɨ ilæ sɨ ilæ. Yì kæ zuetɨ mèsi àŋena kɨ̀ ɨlvɨ ɨ̀mòʼ a nyamsɨ ɨtwaʼsɨ bzɨ chwòsɨ̀ nà fu ngeʼ sɨ̂ zɨ̀. ²³Bôbo Fɨyini ɨ Fɨyini fifɨ læ̀ wê mbàynɨ̀ sisɨ a yi awu ɨ̀ nì a ifâyn ì ku àŋena, a àŋena jɨŋi a yì zuetɨ mèsì àŋena. ²⁴Wù læ̀ wê tɨ̀fôyn tɨ àŋena a yi awu, a yì zuetɨ àŋena nô ghɨ̀ jɨ̀m a nô wùl læ nà bu kya wi iwo atû nse kûm àŋena. Nô wul ɨ̀mòʼ a àŋena antêynɨ̀ læ̀ nà kelɨ wi adyaʼ sɨ kèʼ zɨ. Yì læ̀ zuetɨ̂ àŋena kɨ ghɨ̀ jɨ̀m. ²⁵Yi n-kelɨ sɨ læ̀ sɨ nyoʼ mɨyini mɨ̀ àŋena nô ɨ̀n jɨ̀m ɨvɨ̀s. Ka wùl sɨ̂ zɨ̀ nɨn læ̀ sèmtɨ àso ɨkwo kì a ghɨ lom ɨwuyn ɨnfyèʼsɨ̀ nâ ghè kèsa à n-ghɨ àso ɨkwo a baŋnɨ-a kèsa a fɨfâ a. À kæ læ̀ sèmtɨ mɨ ndà ɨ̀ lì, a kɨ kasi sɨ atam sɨ̂ ŋweyn bòm ta ɨfwo nâ vzɨ̀ nɨn nchaʼnɨ̂ nô sɨ a ŋaŋ sɨ̂ Bôbo Fɨyini ɨ Fɨyini fifɨ. ²⁶Ka wùl nɨn læ̀ lì kfa nɨ̀ ɨ̀fwo ɨ chaʼnɨnɨ nâ wèyn a ŋweyn a ndo. Wùl ɨ̀ mòm a ndòyn zɨ̂ a yì n-ghɨ atû ɨ̀fwo nâ ghè na boŋ ghɨ a ŋweyn atu. Yi n-kelɨ sɨ nà bâyn ɨfwo ateyn nô sɨ a ŋaŋ fî nyasi-à bòm ta à n-ghɨ ɨ̀fwo, Bôbo Fɨyini ɨ ghɨ sɨ bebsɨ.