Deuteronomy 6

Isaʼ zɨ̀ a yi to chwò tɨsaʼ tɨ̀ jɨ̀m

¹Mosìs nɨn fi meyn taŋi sɨ̂ ghelɨ Isìlæ̀ ɨ bè na, “Ɨtêyntɨ̀ nɨn ghɨ tɨ̀saʼ tìtɨ̀ nô tɨ̀ jɨ̀m nɨ̀ ìyeʼi zɨ̀ a Bôbo Fɨyini ɨ Fɨyini fɨ ghesɨ̀nà nɨn læ bè na mà fu sɨ̂ zɨ̀ yì na chî ta tɨ n-bê ilaʼ afî a yi n-ndû sɨ lì injɨyn i jvâ Jodàn sɨ nà kelɨ-a. ²Yì yeʼi nà lêm tɨsaʼ nâ tèyntɨ̀ ta ka zɨ̂ woyn ghi nɨ̀ woyn àŋena keli sɨ nà fâyn Bôbo Fɨyini ɨ Fɨyini fifɨ. Yì yeʼi nà lêm tɨ̀saʼ nâ tèyntɨ̀ a mɨ n-fu sɨ̂ zɨ̀ nô tɨ̀ jɨ̀m sɨ yaʼi ta yì bu chi ta ka mɨ̀chi mzɨ̂ dyebtɨ. ³Yì toʼ yvɨ̀tɨ tɨ̀saʼ nâ tèyntɨ̀ a ghelɨ Isìlæ̀ ɨ̀ nà nî kɨ ta tɨ n-bê, ta ka awo a na ndû kɨ a jûŋ sɨ̂ zɨ̀, a yì fî bzɨ ɨ̀ dvɨ̀ nô sɨ a ŋaŋ ilaʼ i juŋì nâ ghè kɨ̀ ighel ta Bôbo Fɨyini ɨ Fɨyini fɨ ghɨ̀bo ghi nɨn læ chfɨ̀nɨ sɨ̂ zɨ̀.”

⁴“Yì toʼ yvɨ̀tɨ a ghelɨ Isìlæ̀! Bôbo Fɨyini ɨ Fɨyini fɨ ghesɨ̀nà nɨn ghɨ kɨ fɨ̀ mòʼ, fɨlifɨ bu ghɨ wi. ⁵Yi n-kelɨ sɨ nà koŋ Bôbo Fɨyini ɨ Fɨyini fifɨ nɨ̀ àtem à ki-a à jɨ̀mà nɨ̀ àyvɨs à ki-a à jɨ̀mà nɨ̀ àdyaʼ à ki-a à jɨ̀mà. ⁶Yi na bêtɨ̀ kɨ betɨ tɨsaʼ nâ tèyntɨ̀ a mɨ n-fu sɨ̂ zɨ̀ layn tèyn. ⁷Yì faytɨ yèʼi tɨ̀saʼ nâ tèyntɨ sɨ̂ woyn ghi. Yi na duʼ mɨ a ndo, yi nà yeʼî kɨ yeʼi, nà jelɨ̀ ndû mɨ a dzɨ, yi nà yeʼî kɨ yeʼi, nà nyɨŋ mɨ ɨkuyn, yi nà yeʼî kɨ yeʼi ɨ̀ làlì mɨ lali yi nà yeʼî kɨ yeʼi tɨsaʼ nâ tèyntɨ̀ sɨ̂ àŋena. ⁸Yì nyaʼ tɨsaʼ tɨ ateyn ɨbyàs ɨfwo ɨ̀ chfɨŋ a yi akœ sɨ a nchwæ ɨ̀ bàysɨ ɨlvɨ a yi achfɨ̀ atu ta ka yì na bêtɨ̀ kɨ betɨ awo kì a tɨ n-bê. ⁹Yì nyaʼ tɨsaʼ tɨ ateyn a yi achfɨ a ndosɨ ɨ̀ nyàʼ a yi achfɨ̀ a mbàynsɨ̀.”

¹⁰“Bôbo Fɨyini ɨ Fɨyini fifɨ nɨn lì ndû nɨ̀ zɨ̀ ilaʼ ghè a wu n-læ chfɨ̀nɨ̀ sɨ fu sɨ̂ ghɨ̀bo ghi ɨ Abɨ̀làhâm ŋêyn Yisàk nɨ̀ Jàkôb. Ilaʼ ateyn i nɨn kelɨ ntèʼsɨ sɨ ghaʼlɨ̂ kɨ tèyn fî joblɨ̀-à bula à bâʼlɨ̀ zɨ. ¹¹Ndosɨ nɨn ghɨ afu ma ɨfwo ɨ jûŋ luyn meyn ateyn kɨ tɨ̀nkì tɨ̀ jɨ̀m bula à lêm zɨ̀. Tɨ̀bɨ tɨ mutɨ nɨn ghɨ afu bula à tɨm zɨ̀. Gveynsɨ gɨ̀lêbsɨ̀ nɨ̀ gveynsɨ olìfsɨ̀ nɨn ghɨ afu bula à yel zɨ̀. Yi læ̂ zɨ ilaʼ afu, nà yɨ kfeyn kɨ ta yi n-kôŋ, ¹²yi nà tôʼnɨ̀-à ka yi n-lèsɨ̀ na à n-læ fvɨ̀sɨ Bôbo Fɨyini ɨ fvɨ̀sɨ̀ zɨ̀ sɨ a ndo àkòs a Ijìb.”

¹³“Yì na fâyn Bôbo Fɨyini ɨ Fɨyini fifɨ, felɨ̀ kɨ sɨ̂ ŋweyn, yɨ mɨ̀kâyn kɨ̀ izɨyn nɨ̀ ŋweyn. ¹⁴Ka yi n-læ̀ kòʼsɨ nô fɨyini fɨ̀ mòʼ antêynɨ̀ mɨyini nɨ̀ ghelɨ ghì a ghɨ n-chi baʼsɨ sɨ̂ zɨ̀, ¹⁵bòm ta Bôbo Fɨyini ɨ Fɨyini fifɨ nɨn ghɨ zɨ̂ àŋena, kôŋ wì na yì na koʼsɨ̂ fɨyini fɨ lifɨ, a bu kɨ ŋweyn. Yì kæ mòm ɨ̀ kòʼsɨ fɨyini fɨ lûfɨ̀, a ɨtoŋ Bôbo Fɨyini yaf a wù mesi zɨ nô ghɨ̀ jɨ̀m sɨ atû nse. ¹⁶Ka yi n-læ̀ mòm Bôbo Fɨyini ɨ Fɨyini fifɨ ɨ̀ nà tsɨ̀yn tsɨyn ŋweyn na wù ni iwo sɨ̂ zɨ̀ ta yi n-læ ni a Masà. ¹⁷Yì toʼnɨ sɨ nà lêm tɨsaʼ tìtɨ̀ nɨ̀ ìyeʼi zɨ̀ a Bôbo Fɨyini ɨ Fɨyini fifɨ fù sɨ̂ zɨ̀. ¹⁸Yì na nî àwo kì a kɨ n-ghɨ àtì-ati fî jôf sɨ̂ Bôbo Fɨyini ta ka awo a na ndù kɨ a jûŋ sɨ̂ zɨ̀, a yì keli sɨ zɨ sɨ fsɨ ilaʼ i juŋì zɨ̀ a Bôbo Fɨyini nɨn læ chfɨ̀nɨ ɨ yɨ mɨkâyn sɨ fu sɨ̂ ghɨ̀bo ghi. ¹⁹Bôbo Fɨyini læ̀ fu àdyaʼ a yì saŋ fvɨ̀sɨ̀ mbàynɨ̀ sisɨ sɨ ilaʼ afu kɨ̀ ta wu n-læ chfɨ̀nɨ.”

²⁰Woyn ghi læ̂ kæ bɨf sɨ̂ zɨ̀ na, “Bôbo Fiyini nɨn læ bè na ghèsɨ̀ na yvɨnɨ̂ tɨsaʼ nâ tèyntɨ̀ bòm ghà?” ²¹Yi bè sɨ̂ àŋena na, “Ghesɨ̀nà nɨn læ nà ghɨ ɨ̀kôs sɨ̂ fòyn Ijìb. Bôbo Fɨyini ɨ dyèyn àdyaʼ a bemnɨ-a kì a wù n-kelɨ ɨ bœ̀sɨ̀ ghesɨ̀nà. ²²Bôbo Fɨyini nɨn læ meyn nì àwo sɨ̂ fòyn Ijìb ŋêyn ghelɨ ŋweyn kɨ bema ɨ fi dyèyn àwo ɨchfɨ̀ ɨ yumnɨ a li-a kɨ̀ nô a ghès asɨ. ²³Wu n-læ fvɨ̀sɨ ghesɨ̀nà sɨ a Ijìb sɨ gvì sɨ fu ilaʼ zɨ̀ a wu n-læ chfɨ̀nɨ sɨ̂ ghɨ̀bo ghesɨ̀nà ɨ yɨ mɨkâyn na wù læ̀ fu-a. ²⁴Bôbo Fɨyini nɨn læ meyn bè na ghesɨ̀nà na yvɨnɨ̂ tɨ̀saʼ nâ tèyntɨ̀ nô tɨ̀ jɨ̀m, fî fâyn Bôbo Fɨyini ɨ Fɨyini fɨ ghesɨ̀nà ta ka ghesɨ̀nà na chi-à, awo ndû kɨ a jûŋ sɨ̂ ghesɨ̀nà ta kɨ n-ndû layn tèyn. ²⁵Ghesɨ̀nà kæ nà faytɨ̂ yvɨnɨ̂ tɨ̀saʼ tɨ Bôbo Fɨyini ɨ Fɨyini fɨ ghesɨ̀nà nô tɨ̀ jɨ̀m, a ichi i ghesɨ̀nà i na ghɨ kɨ nô àtì-ati asɨ nɨ̀ Fɨyini fɨ̀.”