Deuteronomy 5

Tɨsaʼ tɨ Fɨyini ìvɨm

¹Mosìs nɨn læ meyn jàŋtɨ̀ ghelɨ Isìlæ̀ nô ghɨ̀ jɨ̀m ɨ bè sɨ̂ àŋena na,

Zɨ̀ ghelɨ Isìlæ̀, yì yvɨtɨ iyeʼi yèynì nɨ̀ tɨ̀saʼ tèyntɨ̀ a mɨ n-fu sɨ̂ zɨ̀ layn. Yì yeʼi tɨsaʼ tɨ ateyn, nà chî kɨ ta tɨ n-bê.

²Bôbo Fɨyini, ɨ fɨyini fɨ ghesɨ̀nà nɨn læ meyn yɨ mɨkâyn ghesɨ̀na nɨ̀ ŋweyn a kfɨ̂yn Holèb. ³Bôbo Fɨyini nɨn bu læ yɨ mɨkâyn mɨ̀ ateyn kɨ̀ ŋêyn ghɨ̀bo ghesɨ̀na, wu n-læ yɨ kɨmɨ ŋêyn ghesɨ̀nà nô ghɨ̀ jɨ̀m ta ghɨ n-ghɨ afêyn layn bu chi-à. ⁴Bôbo Fɨyini nɨ̀n læ nà taŋî gvîsɨ̀ sɨ̂ zɨ̀ kɨ̀ nô sɨ a ŋweyn a ngeŋ antêynɨ̀ ɨ̀vɨ̀s atû kfɨ̀yn, yi yvɨtɨ-à. ⁵(A n-læ nà ghɨ achi nâ ghè, a nà ti mà asɨ nɨ̀ Bôbo Fɨyini, yi ti a ma ibàm bòm ta yi nà n-fâyn ɨvɨs ɨ leʼ na yi n-koʼ wi atû kfɨ̀yn. Mɨ n-læ timi tî sɨ nà bê baynsɨ iwo zɨ̀ a Bôbo nɨn bê sɨ̂ zɨ̀.) Bôbo Fɨyini ɨ bè na:

⁶“À n-ghɨ mà Bôbo Fɨyini, ɨ Fɨyini fifɨ fìfɨ̀ a fɨ n-læ fvɨ̀sɨ zɨ sɨ a ndo àkòs a Ijìb.”

⁷“Ka wùl nɨ̂n læ̀ nà koʼsɨ̂ fɨyini fɨ lifɨ a bu kɨ mà.”

⁸“Ka wùl nɨn læ̀ fàytɨ ànfèʼsɨ̀ kɨ fɨsɨ̂ àfo kɨ ghɨ iyvɨ kèsa kɨ n-ghɨ a nse kèsa kɨ n-ghɨ a jvâ. ⁹Ka wùl nɨn læ̀ ngvɨ̀mlɨ fɨyini fɨ lifɨ, ka wùl nɨ̂n læ̀ kòʼsɨ fɨyini fɨ lifɨ bòm ta mà Bôbo Fɨyini ɨ Fɨyini fifɨ nɨn kôŋ wì na yì na koʼsɨ̂ fɨyini fɨ lifɨ a bu kɨ mà. À n-ghɨ mà Bôbo Fɨyini ɨ Fɨyini fifɨ. Mɨ n-zɨ̂tɨ̀ sɨ fu ngeʼ sɨ̂ woyn bòm mbɨsɨ ghɨ̂bo àŋena, ma læ fu sɨ̂ woyn ɨ fu sɨ̂ woyn woyn nɨ̀ woyn woyn woyn, ¹⁰mɨtì dyêyn ìkôŋ i mɨ̂kàyn nɨ̀ mà sɨ̂ woyn woyn ghelɨ ghì a ghɨ n-kôŋ ma fî lêm tɨ̀saʼ temtɨ, dyêyn ìkôŋ ateyn sɨ̂ woyn àŋena ghɨ taŋ lê ɨ̀tu.”

¹¹“Ka wùl nɨn læ̀ jàŋ ìzɨyn i Bôbo Fɨyini, ɨ Fɨyini fifɨ sɨ a ànkaŋ, bòm ta à jàŋ nô mɨ ndà sɨ a ànkàŋ, Bôbo Fɨyini bû faŋ tɨ̀ fù ngeʼ sɨ̂ ŋweyn.”

¹²“Ka wùl nɨ̂n læ̀ fèl ìwo Achi a Bamnɨ-a nɨ̀ mà. Yì na faytɨ̂ lêm àchi ateyn sɨ a nyɨŋ. À bè mà Bôbo Fɨyini ɨ Fɨyini fifɨ. ¹³Yi n-kelɨ mɨ̀chi ntufa ɨwe sɨ nà felɨ awo à ki-a ateyn nô à jɨ̀m. ¹⁴Mɨtì à na ghɨ a mɨchi nsòmbo yi nà kya na à n-ghɨ Àchi a Bamnɨ-a nɨ̀ Bôbo Fɨyini ɨ Fɨyini fifɨ. À na gvì achi nâ ghàyn ka wùl sɨ̂ zɨ̀ nɨ̂n fèl àfo. Ka wâyn lûmnɨ̀ nɨ̀ zɨ̀ nɨ̂n fèl àfo kèsa wâyn wi. Ka wùl ɨ̀ felɨnɨ nɨ̀ zɨ̀ ɨ lûmnɨ̀ nɨ̂n fèl àfo kèsa wul ɨ̀ felɨnɨ nɨ̀ zɨ̀ ɨwi. Ka mbòŋ wùl nɨ̂n fel àfo, ka njàkâs wùl nɨ̂n fèl àfo. Ka nô mɨ nyàm zɨ ì lì nɨ̂n fèl àfo. Ka ghelɨ ɨtum ghì a ghɨ n-chi a yi a ntèʼsɨ nɨ̂n fèl àfo. À na gvî achi nâ ghàyn, ka wùl sɨ̂ zɨ̀ nɨ̂n fèl àfo ta ka ghelɨ ghɨ felɨnɨ nɨ̀ zɨ̀ ghɨ lûmnɨ̀ nɨ ghɨki bôŋ yvɨ̀tɨ̀. ¹⁵Ka yi n-lèsɨ̀ na yi n-læ nà ghɨ ɨ̀kôs a Ijìb, Bôbo Fɨyini ɨ Fɨyini fifɨ ɨ læ lì ɨ fvɨ̀ nɨ̀ zɨ̀ nɨ̀ àdyaʼ a bemnɨ-a nɨ̀ ŋweyn a. À ti iwo zɨ̀ a mà Bôbo Fɨyini fù sɨ a isaʼ na yì na yvɨ̂tɨ̀-à Achi a bamnɨ-a nɨ̀ mà nâ ghàyn.”

¹⁶“Wa ngvɨmlɨ̂ bò vâ nɨ̀ nà vâ kɨ̀ ighel ta Bôbo Fɨyini ɨ Fɨyini fifɨ bè sɨ̂ zɨ̀ ta ka awo à jɨ̀mà na jelɨ̀ kɨ a jûŋ sɨ̂ và, a mɨ̀chi myâ fî dyèbtɨ̀ ilaʼ ghè a Bôbo Fɨyini ɨ Fɨyini fifɨ nɨn fu sɨ̂ zɨ̀.”

¹⁷“Ka wùl nɨn læ̀ zuè wul.”

¹⁸“Ka wùl nɨn læ̀ chi nɨ̀ wî wùl kèsa ŋêyn lûm wùl.”

¹⁹“Ka wùl nɨn læ̀ choŋ.”

²⁰“Ka wùl nɨn læ̀ tìmi nchwò nsaʼ ànkaŋ atu nɨ̀ wâynà ŋweyn.”

²¹“Ka wùl nɨ̂n læ̀ sèmtɨ wî wùl. Ka wùl nɨ̂n læ̀ sèmtɨ ɨ̀fwo ɨ ndo nɨ̀ wùl kèsa alêʼ a nse nɨ̀ wùl. Ka wùl nɨ̂n læ̀ sèmtɨ wul ɨ̀ felɨnɨ nɨ̀ wùl, kèsa à n-ghɨ wul ɨ̀ felɨnɨ ɨ lûmnɨ̀ a kèsa à n-ghɨ wul ɨ̀ felɨnɨ ɨ wi a. Ka wùl nɨ̂n læ̀ sèmtɨ nyam yi felɨ̀ sɨ̂ wùl ɨ wûlù kèsa à n-ghɨ mbòŋ a kèsa à n-ghɨ njàkâs a. Ka wùl nɨ̂n læ̀ sèmtɨ nô mɨ àfo a li-a, a kelɨ wul ɨ wûlù.”

²²À ti tɨsaʼ tìtɨ̀ a Bôbo Fɨyini nɨn læ fu sɨ̂ zɨ̀ nô ghɨ̀ jɨ̀m. Wù n-læ nà taŋî gvîsɨ̀ sɨ̂ zɨ̀ nô nɨ̀ gyà i to antêynɨ̀ ɨ̀vɨ̀s atû kfɨ̂yn Holèb, ma mbàʼsɨ chɨlɨ meyn, ɨlweʼ na fɨ̂m kɨ tèyn tìk. Wù n-bû læ fi kfeynsɨ iwo atû tɨ̀saʼ nâ ghàyn. Wù n-læ taŋi tî ɨ nyàʼ tɨ̀saʼ tɨ ateyn atû ɨ̀byàŋ ɨ ngòʼsɨ̀ ɨ̀ bwò ɨ fu sɨ̂ mà.

²³À n-læ nà ghɨ ta yì yvɨ̀ gyâ ŋweyn antêynɨ̀ ɨ̀vɨ̀s nâ ghè a wu nà n-bali atû kfɨ̀yn ɨlwêʼ ɨ fɨ̂m tì, chyeʼ sisɨ nɨ̀ ghelɨ ghɨ tisɨnɨ nɨ̀ zɨ̀ ɨ gvi baʼsɨ sɨ̂ mà, ²⁴ɨ kæ bè na, “Bôbo Fɨyini, ɨ Fɨyini fɨ ghesɨ̀nà fɨ dyeyn meyn ìŋwâʼ i ŋweyn, nɨ̀ àdyaʼ a ŋweyn a sɨ̂ ghesɨ̀nà. Ghèsɨ yvɨ meyn gyâ ŋweyn ta wù n-taŋi gvîsɨ̀ antêynɨ̀ ɨ̀vɨ̀s ɨ̀ yèyn layn na Fɨyini fɨ kàʼ a fɨ taŋi sɨ̂ wùl ɨ̀ mɨ̀sòŋ, a wù na bu chi-à. ²⁵Ghès nɨn kôŋ kɨ sɨ nà bu chi-à. Mɨtì ma ghès kæ fì yvɨ kɨ̀ yvɨ gyâ Bôbo Fɨyini ɨ Fɨyini feyfɨ, a ɨvɨs ɨ bemnɨ wèyn nyoʼ zuètɨ ghès. ²⁶Wùl ɨ̀ mɨ̀sòŋ nɨn bu læ yvɨ gyâ Fɨyini fìfɨ̀ a fɨ n-chi, yi fvɨ̂ gvî antêynɨ̀ ɨ̀vɨ̀s ta ghèsɨ̀ yvɨ̀ têyn ɨ̀ nà bu chi-à. ²⁷Ndu baʼsɨ ɨ yvɨtɨ àwo kì a Bôbo Fɨyini, ɨ Fɨyini fɨ ghesɨ̀nà nɨn bê nô à jɨ̀m ɨ gvi fèʼtɨ̀ sɨ̂ ghès. Wa n-fèʼtɨ̀-à a ghèsɨ̀ yvɨ nà nî kɨ ta wù bè.”

²⁸Yi n-læ taŋi tî Bôbo Fɨyini ɨ yvɨ iwo zɨ̀ a yì bè ɨ bè sɨ̂ mà na, “Ma yvɨ meyn ìwo zɨ̀ a ghelɨ ghèyn bè sɨ̂ và. Nô mɨ ghà ta àŋena bè nɨn ghɨ kɨ a jûŋ. ²⁹Mɨ̀tem mɨ̀ àŋena nà n-ghɨ kɨ têyn mɨlvɨ ɨ̀n jɨ̀m, àŋena fâyn mà, kôŋ sɨ nà yvɨnɨ tɨsaʼ temtɨ kɨ tɨ̀ jɨ̀m kɨ mɨlvɨ ɨ̀n jɨ̀m a nô mɨ ghà na jelɨ̀ kɨ a jûŋ sɨ̂ àŋena ŋêyn woyn àŋena nô ta ka ghɨ̀ læ ghɨ̀.”

³⁰“Ndu bè sɨ̂ àŋena na àŋena kasi zɨ sɨ a àŋena mɨ̂twò. ³¹Mɨtì wa n-faŋ kɨ afêyn ghesɨ̀và ta ka mà fu tɨsaʼ tɨ ateyn sɨ̂ và nô tɨ̀ jɨ̀m a wà ndu yèʼi sɨ̂ àŋena a àŋena na chî ta tɨ n-bê ilaʼ ghè a mɨ n-fu na àŋena na kelɨ-a.”

³²Mosìs ɨ kæ bè sɨ̂ ghelɨ Isìlæ̀ nà, “Yì toʼnɨ læ̂ sɨ nà nî iwo zɨ̀ a Bôbo Fɨyini ɨ Fɨyini fifɨ bè. Ka yi n-chas isaʼ i ŋweyn i li nô ìmòʼ.” ³³Yì na nì kɨ ta Bôbo Fɨyini ɨ Fɨyini fifɨ bè na yì na ni-à ta ka yì faŋ nà chi-à awo à ki-a ndû kɨ a jûŋ, a mɨ̀chi mzɨ̂ dyebtɨ ilaʼ afî a wù n-fu na yì na kelɨ-a.