Deuteronomy 9

Iwo zɨ̀ a Bôbo Fɨyini nɨn gàmtɨ ghelɨ Isìlæ̀ sɨ ateyn

¹Ghelɨ Isìlæ̀, yì yvɨtɨ! Ɨlvɨ kfeyn meyn ta ka yì dyaŋ jvâ Jodàn ɨ̀ sàŋ fvɨ̀sɨ̀ tɨ̀laʼ tɨ to chwo zɨ̀, dvɨ̂ chwô zɨ̀, chî a ntèʼsɨ sɨ ghaʼlɨ̂ kɨ tèyn, ghɨ antêynɨ̀ mbàynsɨ̀ sɨ dyêblɨ̀ kɨ tèyn. ²Ghelɨ tɨlaʼ nâ ghì nɨn to àdyaʼ, dyêblɨ̀ kɨ tèyn, ɨ woyn Anàk. Yi yvɨ meyn ta ghɨ n-bɨfɨ nâ, “A wùl ɨ̀ ti n-ghɨ a wù kàʼ a wù tɨm yɨ̀ wul ɨ̀ Anàk iwòŋ a?” ³Mɨtì, yi n-yeyn layn ta Bôbo Fɨyini ɨ Fɨyini fifɨ na ndù a yi asɨ ta ɨvɨs abùm/lûm, bebsɨ̂ ndû nɨ̀ tɨ̀laʼ tɨ ateyn tɨ ta ka yì saŋ fvɨ̀sɨ̀ ghelɨ ateyn, ɨ̀ nyàŋsɨ̀ zuètɨ àŋena kɨ̀ ighel ta Bôbo sɨ ghɨ ma wu n-læ meyn chfɨ̀nɨ̀.

⁴Bôbo Fɨyini sâŋ fvɨ̀sɨ̀ àŋena, ka yi n-kfɨ̀yn fɨ̀dyòʼ bè na Bôbo Fɨyini fù tɨlaʼ tɨ ateyn sɨ̂ zɨ̀ bòm ìwo i juŋì i li ta yì nì. Yi n-ghɨ wi tî. À n-ghɨ bòm àwo a bɨ-a nɨ̀ ghelɨ nâ ghì. ⁵Bôbo Fɨyini ɨ Fɨyini fifɨ nɨn sàŋ fvɨsɨ̀ ghelɨ ateyn a yi asɨ sɨ luynsɨ mɨkâyn mzɨ̀ a wu n-læ yɨ ŋêyn ghɨ̀bo ghi, ɨ Abɨ̀làhâm nɨ̀ Yisàk nɨ̀ Jàkôb. Yi n-tɨm yɨ wi ghelɨ nâ ghì bòm ta yi n-ghɨ ghelɨ ghɨ jûŋ kèsa ghelɨ àtì-ati. Yi n-tɨm yɨ àŋena bòm nchînɨ̀ sɨ bɨsɨ nɨ̀ àŋena. ⁶Yì na kya na Bôbo Fɨyini ɨ Fɨyini fifɨ nɨn fu wi tɨlaʼ tɨ jûŋ nâ tèyntɨ̀ sɨ̂ zɨ̀ bòm ta yi n-ghɨ ghelɨ àti-ati, yi n-ghɨ kɨ nô ghelɨ ghɨ bɨ, to nɨ̀ àtu a.

Ghelɨ Isìlæ̀ ɨ faytɨ ànfèʼsɨ̀ a wâyn nyâm mbòloʼ nɨ̀ àso ɨkwo a baŋnɨ-a

⁷Mosìs nɨn læ meyn bè sɨ̂ ghelɨ Isìlæ̀ na, “Ka yi n-læ̀ lèsɨ̀ na yi n-læ meyn nì ɨtoŋ Bôbo Fɨyini ɨ yaf a nse iyum. Kɨ̀ sɨ zɨ̀tɨ̀ sɨ achi ta yi n-læ lù a Ijìb sɨ koʼ sɨ chem layn, yì lum to kɨ to nɨ̀ àtu a sɨ̂ Bôbo Fɨyini. ⁸Yi n-læ meyn nì ɨtoŋ Bôbo Fɨyini ɨ yaf a Sinày nô sɨ a ŋaŋ, wu nà kɨŋ sɨ zuetɨ zɨ. ⁹À nà n-ghɨ ta mà kòʼ a Kfɨyn sɨ fsɨ ɨbyâŋ ɨ ngòʼsɨ̀ vzɨ̂ a ghɨ n-nyàʼ tɨsaʼ tɨ mɨ̂kàyn mzɨ̀ a Bôbo Fɨyini nɨ̂n yɨ zɨ̂ àŋena, ma chi atu kfɨ̀yn nâ ghè sɨ a mɨchi mɨ̀vɨm ɨ̀n kæ̀, chî kɨ tèyn lalì yisi-à, yɨ wi afo, nyvɨ wi mu. ¹⁰Bôbo Fɨyini ɨ Fɨyini fifɨ nɨ̂n fu ɨbyâŋ ɨ ngòʼsɨ̀ ɨ̀ bwò sɨ̂ mà, ma à nyàʼ kɨ̀ nô ŋweyn nyàʼ tɨ̀saʼ ateyn. Tɨsaʼ nâ tìtɨ̀ nà n-ghɨ àwo kì a wu n-læ nà taŋî gvîsɨ̀ sɨ̂ zɨ̀ antêynɨ̀ ɨ̀vɨ̀s achi ghè a yi n-læ yvɨ̀ŋtɨ isas i kfɨ̂yn Sinày.”

¹¹“A nà n-ghɨ ta mà chi meyn atu kfɨ̀yn nâ ghè sɨ a mɨchi mɨ̀vɨm ɨ̀n kæ̀, chî kɨ tèyn lalì yisi-à, Bôbo ɨ fu ɨbyâŋ ɨ ngòʼsɨ̀ nâ vzɨ̀ ɨ̀ bwò sɨ̂ mà a wù nyàʼ tɨsaʼ tɨ mɨ̂kàyn nâ tìtɨ̀ ateyn. ¹²A nà n-ghɨ ta Bôbo fu tɨsaʼ nâ tèyntɨ̀ sɨ̂ mà, wu bè sɨ̂ mà na, ‘Lu kɨ lvɨ̂yn ɨ nà nyâŋsɨ̀ kalì ndu-à, ghelɨ̀ ghì a wà tî lì fvɨ̀ nɨ̀ àŋena sɨ a Ijìb tì bu fì yvɨnɨ̂ wì ma, bu fì lêm wì tɨsaʼ tìtɨ̀ a mà tî fù sɨ̂ àŋena. Àŋena faytɨ meyn ànfèʼsɨ̀ nà koʼsɨ-à.’”

¹³Bôbo Fɨyini nɨn fi meyn be kɨmɨ sɨ̂ mà na, “Mɨ n-kya na ghelɨ nâ ghèyn nɨn faytɨ̂ to kɨ nô nɨ̀ àtu a. ¹⁴Visi mà zuetɨ àŋena nô ghɨ̀ jɨ̀m, ɨ̀ chyèʼsɨ ìzɨyn i àŋena sɨ a atû nse, wùl læ̂ nà bu kya wì wul sɨ ateyn. Mɨ n-zuetɨ̂ àŋena, ɨ̀ nì a woyn ghya koʼ sɨ ilaʼ dvɨ̂ chwô àŋena, to chwò àŋena.”

¹⁵Bôbo nɨn læ taŋi tî, ma kasi ɨ kàlì sɨ a kfɨyn nâ ghè a ɨvɨsɨ nà n-bali atu àteyn tì nɨ̀ ɨ̀byaŋ ngòʼsɨ̀ vzɨ̂ ɨ̀ bwò a tɨsaʼ tɨ mɨ̂kàyn tìtɨ nà n-ghɨ ateyn a ma awu. ¹⁶Mɨ n-læ se sɨ gvì ɨ yeyn ma yì sɨ ghɨ ma yi chasɨ meyn ìsaʼ i Bôbo Fiyini, ɨ Fɨyini fifɨ ɨ̀ fàytɨ ànfèʼsɨ̀ nɨ̀ àkas a, kɨ ghɨ ta wâyn nyàm mbòloʼ, nà sɨ koʼsɨ-à. ¹⁷Ma kæ lì ɨbwaŋ ngòʼsɨ̀ vzɨ̂ a mɨ nà n-kelɨ a ma ɨwu sɨ tɨm a nse a yi asɨ na wu beʼlɨ nà ghɨ kɨ ɨshwemlɨ ɨshwemlɨ/ɨbweʼlɨ ɨbweʼlɨ.

¹⁸Mɨ n-màʼ tî ɨ fe ɨ kfɨsɨ ìkêʼ ì yemi asɨ nɨ̀ Bôbo Fɨyini sɨ a mɨchi mɨ̀vɨm ɨ̀n kæ̀, chî kɨ tèyn lalì yisi-à, yɨ wi afo, nyvɨ wi mu. Mɨ n-læ nà nî tì bòm àwo a bɨ-a kì a yi n-læ mòm asɨ nɨ̀ Bôbo Fɨyini, ɨtoŋ ŋweyn ɨ yaf. ¹⁹Mɨ n-læ nà fâyn ɨ̀toŋ ɨ yafɨnɨ nɨ̀ Bôbo Fɨyini bòm ta wu n-læ meyn yaf ɨ chem aleŋ ta ka wù mesi kɨ̀ mesi zɨ, mɨtì wu yvɨ idzɨ̂ ì yemi. ²⁰Ɨtoŋ Bôbo Fɨyini nɨn læ meyn yaf kɨmɨ sɨ̂ Alòyn achi nâ ghè ɨ chem aleŋ, wu nà ghɨ sɨ mèsi kɨ mesi nɨ̀ ŋweyn, ma jem kɨmɨ sɨ̂ Alòyn. ²¹Mɨ n-læ meyn lì kɨmɨ ànfèʼsɨ̀ a nyâm nɨ̀ zɨ̀ nâ kì a yì fàytɨ nɨ̀ àso ɨkwo a baŋnɨ-a sɨ nà koʼsɨ-à tì ɨ màʼ ichɨ kɨ fɨ, ma gvà ɨ myèl abvɨ ateyn ɨ màʼ a jvâ ì lì a yi nà n-kalì a kfɨyn nâ ghè.

²²À n-læ meyn nà ghɨ kɨmɨ a Tabelà nɨ̀ Masà, nɨ̀ Kiblot Hatavà, yi nì ɨtoŋ Bôbo Fɨyini ɨ yaf.

²³Bôbo Fɨyini nɨ̀n bê meyn sɨ̂ zɨ̀ a Kadesh Banìyà na, “Yì kòʼ ndù lì ìlaʼ zɨ̀ a mà fù sɨ̂ zɨ̀.” Mɨtì yi to nɨ̀ àtu a, ɨ faŋ tɨ̀ yvɨ̀nɨ isaʼ i Bôbo Fɨyini ɨ Fɨyini fifɨ. Yi n-bu læ nà samsɨ̂ ŋweyn, yvɨnɨ̂ wì ŋweyn. ²⁴Kɨ̀ sɨ ɨtuʼ ta mɨ n-læ keli zɨ, yi yvɨnɨ̂ wì ìsaʼ i Bôbo Fɨyini.

²⁵Mɨ n-læ nyìŋi ɨ kfɨsɨ ìkêʼ asɨ nɨ̀ Bôbo Fɨyini sɨ a mɨchi mɨ̀vɨm ɨ̀n kæ̀, yisî kɨ tèyn kfa chi-à bòm ta Bôbo Fɨyini nà n-sɨ ghɨ ma wù be meyn na wu n-bebsɨ̂ zɨ̀. ²⁶Ma jèm sɨ̂ Bôbo Fɨyini ɨ bè na, “Bôbo Fɨyini ɨ Fɨyini fɨ ngaŋtɨnɨ fɨ, ka wa n-bèbsɨ ghelɨ̀ ghya, ɨ̀ ghelɨ ma a n-læ bœ̀sɨ vâ ɨ àŋena nɨ̀ àdyaʼ a bemnɨ-a nɨ̀ và, ɨ li fvɨ̀ nɨ̀ àŋena sɨ a Ijìb. ²⁷Ka wa n-lèsɨ̀ ghelɨ ghɨ felɨnɨ nɨ̀ và, ɨ Abɨ̀làhâm nɨ̀ Yisàk, nɨ̀ Jàkôb. Lèsɨ̀ fu atu a tonɨ-a nɨ̀ ghelɨ ghèyn, ɨ lèsɨ̀ ɨ fu nchînɨ̀ sɨ bɨsɨ nɨ̀ àŋena nɨ̀ mbɨsɨ àŋenasɨ a Bôbo. ²⁸Wà kæ faŋ tɨ̀ lèsɨ̀ sɨ fu awo a bɨ-a nɨ̀ àŋena, a ghelɨ Ijìb na chyeʼ ghès bê na, ‘Wa n-bu læ nà kôŋ àŋena, à ti iwo zɨ̀ a wà n-læ li fvɨ nɨ̀ àŋena sɨ a Ijìb, sɨ gvì sɨ zuetɨ a nse iyum.’ ²⁹Ghelɨ̀ nâ ghèyn nɨn ghɨ ghelɨ̀ ghya, ma à n-læ choʼ vâ, ɨ li fvɨ̀ nɨ̀ àŋena sɨ a Ijìb nɨ̀ àdyaʼ a bemnɨ-a nɨ̀ va.”