Deuteronomy 32

¹Iyvɨ i yvɨtɨ iwo zɨ̀ a ka ma be:

Nse yvɨtɨ iwo zɨ̀ a ka yi fvɨ a ma ɨchfɨ̀.

²Mɨ n-jêm na iyeʼi ì yemi na suʼî tèyn ta iyvɨ,

awo a na kuŋ a ma ɨchfɨ̀ tèyn ta amyâʼ,

myêʼlɨ̀ tèyn ta iyvɨ i myèʼlɨ̀ atû àfùʼ a bola,

susà tèyn ta iyvɨ i to i atû àfùʼ.

³Mà na koʼsɨ̂ Bôbo Fɨyini.

Yì na koʼsɨ̂ Bôbo Fɨyini ɨ Fɨyini fɨ ghesɨ̀nà, fêʼtɨ̀ àdyaʼ a bemnɨ-a nɨ̀ ŋweyn.

⁴Bôbo Fɨyini nɨn ghɨ àbâʼ a yi atu, wù nî nô mɨ ghà, yi nà ghɨ kɨ a jûŋ

dzɨsɨ ŋweynsɨ nɨn ghɨ dzɨsɨ àtì-ati.

Wù n-ghɨ Fɨyini bê nô mɨ na ghɨ nî kɨ tì, kelɨ wi njas,

Fɨyini nɨn ghɨ Fɨyini fɨ àtì-ati, saʼ fyeʼtɨ̂ wì iwo.

⁵Mɨtì, yi ni meyn mbɨ asɨ nɨ̀ Bôbo Fɨyini,

yì bu fì ghɨ wi woyn ŋweyn bòm àwo a bɨ-a nɨ̀ zɨ̀,

yì sɨ ghɨ ma yi befɨ meyn, yì sɨ lɨsɨ̂ kɨ ghelɨ.

⁶A ti ta ka yì laʼ Bôbo Fɨyini a?

Ɨ̀ngù ghelɨ̀ tèyn ta zɨ

À n-ghɨ ŋweyn bò vzɨ, ghɨ mbom zɨ,

ma à bòm ŋweyn bòm zɨ, ɨ̀ nì na yì na ghɨ ìlaʼ.

⁷Yì kasi bètɨ̀ mɨchi ɨ̀n chwonɨ̂,

yì kfaʼtɨ ajâŋ a chwonɨ-a.

Yì bɨf sɨ̂ ghɨ̀bo ghi a ka àŋena feʼtɨ sɨ̂ zɨ̀,

Yì bɨf sɨ̂ ghɨ̀lema, a ka àŋena faytɨ̂ fèʼtɨ̀ sɨ̂ zɨ̀.

⁸Fɨyini fɨ ngaŋtɨnɨfɨ nɨn læ meyn gwò nse sɨ̂ tɨ̀laʼtɨ,

ɨ choʼnɨ ɨ̀lwêʼ vzɨ̀ a ka nô mɨ ghelɨ ilaʼ ì kà na chi ateyn,

ɨ lèm tɨ̀ghami tɨ àŋena

kɨ ighel ta akôyn a woyn Isìlæ̀ nɨn ghɨ.

⁹Mɨtì Bôbo Fɨyini nɨ̀ ngeŋ ŋweyn nɨn ghɨ Fɨyini fɨ ghelɨ Isìlæ̀.

Woyn Jàkôb nɨn ghɨ ghelɨ ŋweyn ghì a wù chòʼ meyn.

¹⁰Wu n-læ yeyn ghelɨ Isìlæ̀, a nse iyum,

ghelɨ ɨ chî wì ateyn.

Wu n-læ meyn faytɨ ghalɨ àŋena ɨ tòʼnɨ̀ nɨ̀ àŋena,

ɨ ghalɨ àŋena ta wù ghàl iwum i ngvɨ.

¹¹Wu, n-læ ku àŋena têyn ta awumawuma ni kɨ ku wayn,

tôʼnɨ̀ nɨ̀ ŋweyn na ka wù chem,

yeʼî ŋweyn na wù na kya sɨ tàyn,

Bôbo Fɨyini lum gvɨ̀tɨ̀ kɨ sɨ ghalɨ ghelɨ ŋweyn ka ghɨ fe.

¹²A n-læ nà tisɨ̂ kɨ Bôbo Fɨyini tisɨ̂ ghelɨ ŋweyn,

fɨyini fɨ lifɨ nɨn bu læ gàmtɨ ŋweyn.

¹³Wu n-ni meyn àŋena nà saʼ ɨlwêʼ ɨ ngaŋtɨnɨ,

ɨ yɨsɨ àŋena nɨ̀ ɨ̀fwo ɨ yɨnɨ wu fvɨ̂ a gvêynsɨ̀.

Wu n-læ meyn fu fɨ̀dyòŋ sɨ̂ àŋena ma fɨ fvɨ̀ iwu,

ɨ fu mɨvɨl sɨ̂ àŋena, ma ghɨ faytɨ nɨ̀ mɨ̀tam mɨ̀ olìfsɨ̀ mɨ lemâ a tɨ̂wù.

¹⁴Wu n-læ meyn fu igheyn i nyâm mbòloʼ baʼsɨ̂ nɨ̀ ìgheyn i bzɨ-i sɨ̂ àŋena,

ɨ fu bzɨsɨ njɨ̀ sɨ jûŋsɨ̀, nɨ̀ bzɨsɨ ndoŋsɨ,

nɨ̀ ɨ̀ywaʼ ɨ jûŋ ma wu lù a Bashàn àŋena kfɨl.

Wu n-læ meyn fu asaŋ a wît a juŋà sɨ̂ àŋena,

ɨ fu mɨlûʼ ɨ̀n jùŋ ma ghɨ kam nɨ̀ mɨ̀tam mɨ̀ gɨ̀lêbsɨ̀ sɨ̂ àŋena.

¹⁵Ghelɨ Isìlæ̀, nɨn læ meyn ghaʼ, ɨ nà sɨ to nɨ̀ àtu a,

ɨ yɨ kul nô mɨ ɨlvɨ gha, iwuyn i àŋena ɨ dɨ̀l,

àŋena mo Fɨyini, ɨ Fɨyini fìfɨ̀ a fɨ bòm àŋena,

ɨ chas mbœ̀sɨ̀ àŋena, a ghɨ àlêʼ a leytɨnɨ-a nɨ̀ àŋena.

¹⁶Àŋena nɨn læ meyn nà koʼsɨ̂ mɨyini ɨn lì, ɨtoŋ Bôbo Fɨyini ɨ yaf,

ɨtoŋ ŋweyn nɨn læ meyn yaf bòm ɨ̀nfyèʼsɨ ɨnyelɨnɨ nɨ̀ àŋena nâ vzɨ̀.

¹⁷Àŋena nɨn læ meyn nà fu tɨ̀fu sɨ̂ ɨ̀vɨ̂ŋ, a ghɨ wi sɨ̂ Fɨyini fɨ,

sɨ̂ mɨyini bula àŋena timi nà kya,

sɨ̂ mɨyini, ma àŋena yeyn kɨ̀ yeyn

sɨ̂ mɨyini, bula ghɨ̀bo àŋena timi nà nà koʼsɨ-à.

¹⁸Àŋena nɨn læ meyn visi Fɨyini, a ghɨ àbâʼ a àŋena atu,

ɨ lèsɨ̀ Fɨyini, ma à bom ŋweyn bom àŋena.

¹⁹Bôbo Fɨyini ɨ yeyn, ɨ mo àŋena,

bòm ta woyn ŋweyn nì ɨtoŋ ŋweyn yaf.

²⁰Wu n-be meyn na, “Mɨ n-bèyn jɨm sɨ̂ àŋena lvɨ̂yn”

ɨ̀ yeyn na àŋena nɨn n-jèlɨ̀ ti a.

Bòm ta àŋena nɨn ghɨ àjâŋ a bɨ-a,

chî wì nchînɨ̀ àtì-ati.

²¹Àŋena nɨn koʼsɨ̂ mɨyini ɨ̀n lù, a ghɨ wi ma, ɨtôŋ wom yafɨ meyn,

ɨtôŋ wom yafɨ meyn bòm ɨ̀ywafà ɨfwo nɨ̀ àŋena nâ vzɨ̀.

Mɨ n-ni à, a ilaʼ i boli jel avɨ a àŋena lvɨ̂yn.

Mɨ ni-à a ilaʼ i ɨ̂ngù i ni a ɨtoŋ àŋena yaf lvɨ̂yn.

²²Ɨtoŋ ɨ yafɨnɨ nɨ̀ mà nɨn balî kɨ ta ɨvɨs,

nyoʼ nô mɨ ghà atû nse, zɨ̂ chem nô isas i nse.

Wu n-nyòʼ nse bàʼsɨ nɨ̀ ɨ̀fwo vzɨ̀ a wu n-koʼ ateyn,

ɨ̀ nyòʼ kfɨynsɨ a sɨ suʼi.

²³Mɨ n-màʼ ngeʼsɨ a àŋena atu, a sɨ faŋ kɨ̀ faŋ,

ɨ̀ màʼ ngeʼsɨ a àŋena atu kɨ tɨ̀nki tɨ̀ jɨ̀m.

²⁴Mɨ nì-à a jèŋ ku àŋena,

ɨ̀ nì a ɨfwo ɨ bɨ kfɨl ɨ̀ bèbsɨ ɨ̀fwo ɨ yɨnɨ nɨ̀ àŋena, ɨ̀ màʼ tɨ̀koʼi tɨ bɨtɨ a àŋena ɨwùyn.

Mɨ n-tum nyamsɨ bɨsɨ a sɨ lumlɨ àŋena,

ɨ̀ tum mbamsɨ bɨsɨ a sɨ lumlɨ àŋena.

²⁵Ghɨ na zuetɨ̂ woyn àŋena a dzɨ,

ifayn ì ɨ zuetɨ̂ àŋena a ndosɨ.

Ngòynsɨ̀ nɨ̀ tɨ̀kuŋtɨ nɨn kfɨtɨ à,

a woyn ghɨ bolɨ nɨ̀ ghɨ̀lema kfɨtɨ.

²⁶Mɨ nà n-kâʼ a mà sas àŋena,

ɨ̀ chyèʼsɨ àŋena sɨ a mbzɨ afêyn,

²⁷mɨtì ma nà kôŋ wì na mbàynɨ̀sɨ àŋenasɨ na dyala,

kôŋ wì na àŋena na bè na ghɨ tɨm meyn yɨ ghelɨ̀ ghem,

na àŋena to meyn chwò ghelɨ̀ ghem,

kôŋ wì na àŋena na bè na à zuètɨ àŋena ɨ̀ zuètɨ ghelɨ̀ ghem, a ghɨ wi ma, Bôbo Fɨyini.

²⁸Mɨtì Isìlæ̀ ɨ ghɨ ìlaʼ, kelɨ wi itof,

yeyn kelî wì iwo.

²⁹Àŋena nà n-tofɨ, ma àŋena ti mèyn yeyn kèli,

na ngòʼsɨ àŋena baʼsɨ meyn.

³⁰Wùl ɨ̀mòʼ ti kàʼ wu tɨm yɨ tɨ anôyn a ghelɨ Isìlæ̀ nkam a?

Ghelɨ ghɨ̀bo ti kàʼ ghɨ tɨm yɨ ti anôyn a ghelɨ Isìlæ̀ nkamsɨ ìvɨm a?

A bu kɨ na ngàmtɨ̀ àŋena vìsi àŋena,

à bu kɨ na Bôbo Fɨyini bèyn jɨm sɨ̂ àŋena.

³¹Mɨ̀yìnì mɨ̀ àŋena nɨn chem wi ta ngàmtɨ̀ ghesɨ̀nà,

mbàynɨ̀sɨ àŋenasɨ nɨn kya na mɨyini mɨ̀ àŋena nɨn chem wi ta Fɨyini fɨ Isìlæ̀.

³²Mbàynɨ̀sɨ àŋenasɨ nɨn ghɨ ta gveyn mɨ̀tam mɨ gɨ̀lebsɨ̀ a Sodòm

ghɨ tèyn ta gvêyn mɨ̀tam mɨ̀ gɨ̀lebsɨ̀ a Gòmolà.

Mɨ̀tam mɨ̀ gɨ̀lêbsɨ̀ nɨ̀ àŋena nɨn ghɨ nlef,

ɨ̀ntam mɨ̀ àteyn nɨn lue-à.

³³Mɨ̀lùʼ mɨ̀ àŋena nɨn ghɨ ta ghɨ faytɨ nɨ̀ ìsoŋ i mbam i.

Isoŋ i mbam i bemnɨ-i.

³⁴Bôbo Fɨyini nɨn læ meyn bè na, “Iwo zɨ̀ a mà bàʼtɨ sɨ nì sɨ̂ ghelɨ Isìlæ̀, ɨ̀ baʼtɨ sɨ ni sɨ̂ mbàynɨ̀sɨ àŋena sɨ bu ghɨ kɨ a nlèytɨ,

àŋena bu duʼ tɨ̀ nà kya.

³⁵Achi kì a ka mà sɨsɨ mɨkfɨ̂ sɨ̂ mbàynɨ̀sɨ̀ ateyn nɨn koʼ gvì-à.

Àŋena læ̀ na leynlɨ̂ felɨ-à

Achi a ngeʼ nɨ̀ àŋena nɨn koʼ gvì-à

na i yi àŋena mæ.”

³⁶Bôbo Fɨyini ɨ nì kòynsɨ ìsuyn sɨ̂ ghelɨ ghɨ felɨnɨ nɨ̀ ŋweyn,

ɨ̀ saʼ fu nsaʼ ghelɨ ŋweyn,

ɨlvɨ ta adyaʼ a àŋena mæ̀

wùl ɨ̀ na bu fì ghɨ wi, nô mɨ àkosà ɨ bu ghɨ wi.

³⁷Bôbo Fɨyini læ̀ bɨf sɨ̂ ghelɨ ŋweyn na,

“À gàyn ghà nɨ̀ mɨyini mzɨ̂ mzɨ̀ a yì tî nà samsɨ sɨ̂ ɨ̀mêyn a?

³⁸Yì tî nà fu ìfu, yi fu ɨlwêʼ ɨ njwò ɨ jûŋ sɨ̂ ɨ̀mêyn,

ɨ fu mɨlûʼ ɨ̀n jùŋ sɨ̂ ɨ̀mêyn.

Yì be mɨ̀ gvi gàmtɨ̀ zɨ̀ lvɨ̂yn!

Yì be mɨ̀ gvi kɨ̀ŋtɨ̀ zɨ̀ lvɨ̂yn!”

³⁹“Yì na kya na, à n-ghɨ kɨ ma Fɨyini,

fɨyini fɨ lifɨ bu fì ghɨ wi sɨ baʼsɨ sɨ̂ mà.

À n-nî mà na wùl ɨ̀ kfɨ, a nî mà na wùl ɨ̀ na chi-à.

À n-nî mà wùl ɨ kelî àlemtɨ, a chuʼ mà alemtɨ a wûl.

Wùl nɨ̀n ghɨ wi a wù kàʼ a wù fsɨ wul sɨ a ma awu.

⁴⁰Mɨ n-lâysɨ̀ àwu à kema ma chfɨ̀nɨ̀ na,

Samoʼ ta mɨ n-chi,

⁴¹Mɨ n-se ìfô ì yemi, a yi na njêyntɨ̀ kɨ tèyn,

ɨ̀ ghàl a ma awu nà saʼ fu nsaʼsɨ ghêl.

Mɨ n-zuetɨ̂ mbàynɨ̀ semsɨ,

ɨ̀ fù ngeʼ sɨ̂ wùl ɨ̀ vzɨ̀ a wù n-bâyn ma.

⁴²Awoŋ à kema na bàŋ kɨ mɨ̀luŋ mɨ̀ mbàynɨ̀ semsɨ,

ifô ì yemi kaʼlɨ̂ kɨ kaʼlɨ mbàynɨ̀ semsɨ,

a chem kɨ fɨ̀luŋ sɨ̂ àŋena

mɨ n-visî wì wul ma mà ghàl ɨtwaʼ iwòŋ nô ɨ̀mòʼ.”

⁴³Mosìs nɨn læ meyn bè na, ghelɨ, tɨlaʼ tɨ̀ jɨ̀m na koʼsɨ̂ Bôbo Fɨyini,

bòm ta wù n-sɨ̀sɨ̀ mɨ̀luŋ mɨ̀ ghelɨ ghɨ felɨnɨ nɨ̀ ŋweyn,

ghɨ sɨ sɨ̀sɨ̀ ikfɨ i àŋena sɨ̂ mbàynɨ̀ sɨ ŋweynsɨ,

sɨ lèsɨ̀ sɨ fu mbɨsɨ ghelɨ ŋweyn.

⁴⁴Mosìs ŋêyn Joshwà, ɨ wâyn Nûn, nɨn læ meyn ndu taŋ awo kì a ghɨ nyàʼ a njàŋ nâ ghàyn nô à jɨ̀m ghelɨ Isìlæ̀ ɨ yvɨtɨ-à. ⁴⁵A nà n-ghɨ ta Mosìs taŋ mèsi awo a njàŋ nâ kèynà sɨ̂ ghelɨ Isìlæ̀, ⁴⁶wu bè sɨ̂ àŋena na, “Ka yî n-læ̀ lèsɨ̀ àwo kì a njàŋ yèyn a mà fèʼtɨ̀ layn tèyn nɨn bê. Yì na bzɨ̂ woyn yeʼî sɨ̂ àŋena, ta ka àŋena na faytɨ̂ yvɨnɨ̂ tɨ̀saʼ tɨ Bôbo Fɨyini nô tɨ̀ jɨ̀m. ⁴⁷Ka yi n-dɨm nɨ̀ tɨ̀saʼ nâ tèyntɨ̀ bu tì a yì kfɨtɨ. Yì kæ yvɨnɨ tɨsaʼ tɨ ateyn, a mɨ̀chi mzɨ̂ dyebtɨ a ilaʼ nâ ghàyn a yi n-dyâŋ ndû sɨ li têyn.”

Fɨyini fɨ fèʼtɨ̀ sɨ̂ Mosìs na wu n-kfɨ-a a kfɨ̂yn Nebò

⁴⁸A n-læ nà ghɨ kɨmɨ achi nâ ghè, Bôbo Fɨyini ɨ bè sɨ̂ Mosìs na, ⁴⁹“Ndù a kfɨynsɨ Abalìm afi, ɨ koʼ atû kfɨ̂yn Nebò afî a yì n-ghɨ a Mowàb, a injɨyn i Jèlikò tì, ɨ timi ɨ ki dyàŋsɨ, a ka wà yeyn ilaʼ i Kenàn zɨ̀ a mɨ n-fu sɨ̂ ghelɨ Isìlæ̀ na àŋena na kelɨ-a ⁵⁰Wa n-koʼ atû kfɨ̀yn nâ ghè, ɨ̀ kfa ndù yeyn ghɨ̀bo ghya, kɨ̀ ta wâynà vâ Alòyn nɨn læ koʼ a kfɨ̂yn Hôl, ɨ kfa yeyn ghɨ̀bo ŋweyn. ⁵¹Yi n-ghɨ tèyn bòm ta zɨ̂ Alòyn nɨn læ meyn kòl ìsaʼ ì yemi asɨ nɨ̀ ghelɨ Isìlæ̀ a mbæ̀ jvà Melibà, a kadèsh a nse ìyum, a Zîn. Yi n-læ meyn chasɨ ma asɨ nɨ̀ ghelɨ Isìlæ̀. ⁵²À ti iwo zɨ̀ a wa n-zɨ wi ilaʼ nâ ghàyn, a mɨ n-fu sɨ̂ ghelɨ Isìlæ̀ tèyn, wa n-ki ndùsɨ̀ kɨ ndusɨ nɨ̀ ìnyeyni.”