Deuteronomy 33
Ŋwàlɨ̀ Ditòlonomì
Mosìs ɨ jèm sɨ̂ ghelɨ Isìlæ̀
1Iyeynì nɨn ghɨ ìjêm zɨ̀ a Mosìs, ɨ nfèʼtɨ̀ i ghaʼnɨ nɨ̀ Fɨyini fɨ nɨn læ jèm sɨ̂ ghelɨ Isìlæ̀ jæ ta ka wù kfɨ. 2Wu n-læ bè na,
“Bôbo Fɨyini nɨn læ gvì sɨ̂ ghesɨ̀nà a kfɨ̂yn Sinày,
ɨ salɨ têyn ta ɨchfɨ̂-iyvɨ a ghesɨ̀nà atu a Edòm,
lû a kfɨ̂yn Balàn, bayn suʼî atu nɨ̀ ghelɨ ŋweyn ta chue.
Wù n-læ gvì ŋêyn nchìsɨ ŋweynsɨ nkamsɨ ìvɨm,
ɨvɨs ɨ balî a ŋweyn awu.
3Samoʼ wà n-kôŋ ghelɨ̀ ghya a Bôbo Fɨyini,
ghelɨ̀ ghya nɨn ghɨ kɨ a wa ital awu.
Àŋena nɨn tɨm àlvɨ a wa asɨ, koʼsɨ̂ và,
jelɨ̀ kɨ ta wà n-kɨŋ.
4À n-læ nà ghɨ ta ghelɨ Isìlæ̀ yvɨ̀ŋtɨ̀, ma fu tɨsaʼ tɨ Fɨyini sɨ̂ àŋena,
à ghɨ kɨ nô àfo ato-a kì a ghelɨ Isìlæ̀ nɨn kelɨ.
5Bôbo Fɨyini nɨn læ nà ghɨ fòyn ghelɨ Isìlæ̀,
ɨtuʼ ta àŋena yvɨ̀ŋtɨ̀,
baʼsɨ̂ nɨ̀ ghelɨ ghɨ tisɨnɨ nɨ̀ àŋena.
6“Mɨ n-jêm na ka ghelɨ Lubèn læ̂ mæ̀,
jêm na ka àŋena n-læ̀ dvɨ̀ chwò.”
7Wu n-læ meyn jem kɨmɨ sɨ̂ ghelɨ Judà ɨ bè na,
“Yvɨ ijêm i ghelɨ Judà a Bôbo Fɨyini,
ni, ŋêyn woynà àŋena na ti ɨchfɨ̂ ɨ̀mòʼ.
Gàmtɨ, àŋena a Bôbo,
àŋena tɨm yɨ mbàynɨ̀sɨ àŋena.”
8Mosìs nɨ̀n jem meyn sɨ̂ ghelɨ ndo nɨ̀ Levì ɨ bè na,
“Wa n-læ meyn fu Yùlîm nɨ̀ Tùmîm sɨ̂ ghelɨ ndo nɨ̀ Levì,
a ghɨ ghelɨ yvɨnɨ và fî felɨ̀ sɨ̂ và.
Wa n-læ meyn mòm àŋena a Masà,
ɨ mòm a Melibà.
9Àŋena nà n-yvɨnɨ và chwô ta àŋena nɨn yvɨnɨ ghɨ̀bo àŋena nɨ̀ ghɨ̀na àŋena, nɨ̀ woynà àŋena.
Àŋena nà n-lêm tɨ̀saʼ tɨ mɨ̂kàyn mzɨ̀ a wa n-yɨ zɨ̂ àŋena.
10Àŋena nɨn yeʼî ghelɨ Isìlæ̀ nɨ̀ ìwo ì zæ,
yeʼî àŋena nɨ̀ tɨ̀saʼ tyatɨ
Àŋena nɨn nyôʼ ìleŋ asɨ nɨ̀ và,
fu tɨ̀fu tɨ nyoʼnɨtɨ sɨ̂ và abaŋ ifu.
11Boysɨ ghelɨ ndo nɨ̀ Levì a Bôbo Fɨyini,
ɨ boysɨ ìfêl iwu nɨ̀ àŋena.
Zuetɨ ghelɨ ghì a ghɨ làlì nà choʼ àvɨ a àŋena,
ɨ zuetɨ mbàynɨ̀sɨ àŋena nô sɨ̀ jɨ̀m ka wâ n-vìsi nô ìmòʼ.”
12Mosìs nɨn læ jèm sɨ̂ ghelɨ Benjamìn ɨ bè na,
“Mɨ n-jêm na Bôbo Fɨyini kɨŋtɨ ghelɨ ghèyn a wù n-kôŋ sɨ a nyɨŋ tèyn,
wù n-kɨ̂ŋtɨ̀ àŋena kɨ̀ mɨchi ɨ̀n jɨ̀m,
ghɨ ŋêyn àŋena kɨ̀ mɨlvɨ ɨ̀n jɨ̀m.”
13Wù n-læ jèm sɨ̂ woyn woyn Josèf ɨ bè na,
“Mɨ n-jêm na Bôbo Fɨyini boysɨ nse zɨ,
ɨ̀ nì àmyâʼ a juŋà na suʼî ateyn,
jvasɨ ɨ fvɨ̂ koʼ a nse.
14Mɨ n-jêm na chuè na ni-à ɨfwo ɨ yɨnɨ ɨ faytɨ̂ koʼ a yi a gvêynsɨ̀,
ɨfwo ɨ yɨnɨ ɨ jûŋ ɨ bisɨ̂ kɨ ɨlvɨ.
15Mɨ n-jêm na Fɨyini fɨ boysɨ zɨ nɨ̀ ɨ̀fwo ɨ jûŋ vzɨ̀ a wu n-læ nà ghɨ a kfɨynsɨ nô sɨ ɨtuʼ ɨ mu,
ɨfwo vzɨ̀ a wu n-ghɨ a kfɨynsɨ ma sɨ faŋ meyn kɨ̀ samoʼ.
16Ni nse àŋena na kelɨ ɨ̀fwo ɨ yɨnɨ ɨ jûŋ kɨ tɨ̀nki tɨ̀ jɨ̀m,
ni àŋena keli iboysɨ i Fɨyini fifɨ̀ a fɨ n-læ taŋi gvìsɨ̀ sɨ̂ àŋena antêynɨ̀ ɨ̀vɨ̀s a kfɨyn tî.
Mɨ n-jêm na tɨboysɨ nâ tèyntɨ̀ faŋ sɨ̂ woyn Josèf,
bòm ta a n-læ nà tisɨ ŋweyn tisɨ̂ woynà ŋweyn.
17Woyn Josèf nɨn kelɨ àdyaʼ ta nyam mbòloʼ i lûmnɨ̀,
Ghelɨ ghɨ to a Eflèm nɨ̀ Mànasè nɨn ghɨ ta ndoŋsɨ mbòŋ ɨ̀twaʼ.
Wù n-nû ghelɨ tɨlaʼ tɨ litɨ nɨ̀ ɨ̀nseynsɨ.
Wù n-tsɨyn mbàynɨ̀sɨ àŋena, sɨ ndu nô a ndyèyn.”
18Wù n-jêm meyn sɨ̂ ghelɨ Zebulòn nɨ̀ ghelɨ Isakà ɨ bè na,
“Mɨ n-jêm na ghelɨ Zebulòn na lemâ a mbêyʼlɨ̀ afî a àŋena nɨn nî a jvâ ìghaʼnɨ,
jêm na ghelɨ Isakà na kelɨ ìghaʼ kɨ̀ a àŋena ndosɨ.
19Mɨ n-jêm na àŋena læ̂ nà jâŋtɨ̀ woynà àŋena,
ŋêyn àŋena koʼ fu tɨ̀fu tìtɨ̀ a tɨ nkfeynɨ sɨ̂ Bôbo Fɨyini alèʼ i koʼsɨ,
Na àŋena læ nà kelɨ ìghaʼ yi fvɨ̂ a jva ìghaʼnɨ,
kelɨ ìghaʼ yi fvɨ̂ asese a mbæ̀ jvà.”
20Mosìs nɨn jèm sɨ̂ ghelɨ Gâd ɨ bè na,
“Ikoʼsɨ-i nɨn ghɨ sɨ̂ Fɨyini fɨ bòm ta wu fu ilaʼ ighaʼnɨ-i sɨ̂ ghelɨ Gâd.
Ghelɨ Gâd læ̀ nà chi-à, gvɨ̂tɨ̀ kɨ sɨ nu ta bzɨ̀kem,
sɨ lum sɨ sàs ɨkœ ɨ mbàynɨ̀, sɨ bàs atu a ŋweyn.
21Àŋena nɨn læ meyn choʼ àlêʼ a nse a juŋà ɨ nà kelɨ-a,
alêʼ, a kelɨ ghelɨ ghɨ tisɨnɨ.
Ghelɨ ghɨ tisɨnɨ nɨ̂n yvɨ̀ŋtɨ a Isìlæ̀,
ghelɨ Gâd ɨ yvɨnɨ tɨ̀saʼ tɨ àtì-ati nɨ̀ Bôbo Fɨyini,
Àŋena nɨn nî àwo kì a Bôbo Fɨyini nɨn kɨŋ, saʼ Isìlæ̀ kɨ àtì-ati.”
22Mosìs nɨ̀n jem meyn sɨ̂ ghelɨ Dân ɨ bè na,
“Ghelɨ Dân læ̀ nà ghɨ ta woyn bzɨ̀kem,
Tum fvɨ̂ a Bashàn nû mbàynɨ̀sɨ àŋena.”
23Wù n-jem meyn sɨ̂ ghelɨ Naftalì ɨ bè na,
“Bôbo Fɨyini nɨn kôŋ ghelɨ Naftalì nô a jûŋ,
ma wù boysɨ meyn àŋena,
Ilaʼi àŋena læ̀ nà ghaʼ dyàŋ chem a injɨyn i ɨluè ɨ Galìlî, abàs itsɨyn.”
24Wù n-jêm meyn sɨ̂ ghelɨ Ashà ɨ bè na,
Mɨ n-jêm na Bôbo Fɨyini boysɨ ghelɨ Ashà sɨ a nyɨŋ,
kôŋ àŋena chwô ta wù n-kôŋ woynà ŋweyn,
gveynsɨ àŋena ɨ kelɨ mɨ̀tam mɨ̀ olìfsɨ̀ kɨ sɨ a idvɨ̀.
25Mɨ n-jêm na ɨbwâʼ ɨ mbàynɨ̀sɨ nɨ̀ àŋena na to kɨ tèyn, ma ghɨ faytɨ nɨ̀ àkas a,
na ka iwo i læ̂ gàyn sɨ̂ àŋena nô ta ka ghɨ̀ læ̂ ghɨ̀.
26Mosìs nɨn læ meyn bè sɨ̂ ghelɨ Isìlæ̀ na, “Yì na kya na fɨyini fɨ lifɨ nɨn ghɨ wi ta Fɨyini fɨ ghesɨ̀nà,
iŋwâʼ i ŋweyni ɨ jelɨ̀ iyvɨ,
suʼî kalì a mbàʼsɨ̀ sɨ gàmtɨ zɨ.
27Fɨyini fìfɨ̀ a fɨ fàŋ meyn samoʼ nɨn ghɨ àbâʼ a yi atu.
Yi n-ghɨ a ŋweyn ital awu kɨ̀ samoʼ
Wu n-sàŋ fvɨsɨ̀ mbàynɨ̀ sisɨ kɨ̀ nô a yi asɨ
bè na yì zuetɨ àŋena nô ghɨ̀ jɨ̀m.
28Afo a læ̀ fu wi ngeʼ sɨ̂ ghelɨ Isìlæ̀,
Woyn Jàkôb læ̀ nà chî kɨ nɨ̀ mbôynɨ̀,
chî a ilaʼ yi kelɨ ɨ̀fwo ɨ̀ yɨnɨ nɨ̀ mɨ̀lùʼ kɨ sɨ a idvɨ̀,
alèʼ, amyâʼ a suʼî ateyn yvɨ̂sɨ̀ ɨ̀lwêʼ.
29Atu à ki-a jofɨ meyn a ghelɨ Isìlæ̀!
Ilaʼ i li nɨn ghɨ wi a mbzɨ afêyn ta zɨ,
ɨ ghelɨ ma à bœ̀sɨ̀ Bôbo Fɨyini.
Wù n-ghɨ àbâʼ a yi atu, ghɨ gàmtɨ̀ zɨ,
ghɨ nkyàsɨ iwòŋ nɨ̀ zɨ̀
Mbàynɨ̀ sisɨ læ̀ gvî fê a yi asɨ nà chwotɨ̂ na yì koynsɨ isuyn sɨ̂ àŋena,
mɨtì a yì jeylɨ kɨ̀ jeylɨ àŋena nɨ̀ ɨ̀vɨ.”