Deuteronomy 31

Joshwà ɨ lì àlêʼ a Mosìs

¹À nà n-ghɨ ta Mosìs fu mèsì tɨsaʼ nâ tèyntɨ̀ sɨ̂ ghelɨ Isìlæ̀, ²wu bè na, “Mà sɨ ghɨ bèŋ ɨvɨ nɨ̀ bèŋsɨ̀ mɨ̀vɨm ɨ̀m bò, yi sɨ ghaʼ mà sɨ nà tisɨ zɨ, ma Bôbo Fɨyini be meyn na mɨ n-dyàŋ wì jvâ Jodàn. ³A ndyàŋ kɨ nô Bôbo Fɨyini ɨ̀ dyàŋ jvâ Jodàn a yi asɨ ɨ̀ bèbsɨ tɨ̀laʼ tìtɨ̀ a tɨ n-ghɨ injɨyn i jvâ ta ka yì zɨ ɨ̀ lì ìlaʼ ateyn. Joshwà na tisɨ̂ zɨ̀, kɨ ta Bôbo Fɨyini bè. ⁴Bôbo Fɨyini nɨn nì kɨ ìwo zɨ̀ sɨ̂ àŋena, a wu n-læ ni sɨ̂ Sihòn ŋêyn Ôg, ɨ tɨfôyn tɨ Amò tìtɨ̀ a wu n-læ zuetɨ, ɨ bebsɨ tɨ̀laʼ tɨ àŋena tî. ⁵Bôbo Fɨyini nɨn fu àŋena a yi awu, a yì na kelɨ sɨ ni kɨ iwo zɨ̀ sɨ̂ àŋena a mà bè na yì ni. ⁶Yì na kelɨ àtem ato-a, ka àŋena nɨ̂n fàynsɨ̀ zɨ̀, bòm ta Bôbo Fɨyini, ɨ Fɨyini fifɨ nɨn ghɨ zɨ̂ àŋena amoʼ. Wù læ̀ visî wì zɨ, ɨ̀ læ̀ faŋ tɨ̀ màʼi zɨ.”

⁷Mosìs nɨn læ taŋi tî ɨ jàŋtɨ̀ Joshwà asɨ nɨ̀ ghelɨ Isìlæ̀ ɨ bè sɨ̂ ŋweyn na, “Ka n-fàyn àfo, wa kelɨ àtem ato-a bòm ta wà n-kelɨ sɨ zɨ nɨ̀ ghelɨ ghèyn a ilaʼ afî a Bôbo Fɨyini nɨn læ chfɨ̀nɨ sɨ̂ ghɨ̀bo ghi na wù læ̀ fu sɨ̂ ghelɨ Isìlæ̀. Wà n-kelɨ sɨ nì na àŋena keli ilaʼ nâ zɨ̀. ⁸À na ndû kɨ nô Bôbo Fɨyini a wa asɨ, ghɨ zɨ̂ àŋena amoʼ. Wa kelɨ àtem ato-a, ka n-fàyn bòm ta wù læ̀ visî wì zɨ, læ̀ faŋ tɨ̀ màʼi zɨ.”

Bèŋsɨ̀ nsòmbo na se sɨ mæ, ghɨ fvɨ ɨ jàŋ tɨ̀saʼ tɨ Bôbo Fɨyini

⁹Mosìs nɨn læ nyàʼ tɨsaʼ tèyntɨ̀ a ŋwàʼlɨ̀ ìsaʼ nɨ̀ Bôbo Fɨyini ɨ fu sɨ̂ ngàŋsɨ ndô Fɨyini, ɨ ghelɨ ndo nɨ̀ Levì ghì a ghɨ nà n-beʼi àntayntayn a mɨ̂kàyn nɨ̀ Bôbo Fɨyini, ɨ fi fu sɨ̂ ghelɨ ghɨ tisɨnɨ a Isìlæ̀ nô ghɨ̀ jɨ̀m. ¹⁰Wu n-fu tî ɨ chwòsɨ̀ sɨ a isaʼ na, “Bèŋsɨ̀ nsòmbo na se sɨ mæ nô mɨ ɨlvɨ gha, a ghɨ bèŋ zɨ̀ a ghɨ n-kelɨ sɨ chyeʼsɨ ikwo ateyn, wa fvɨ timi ɨ jàŋ tɨ̀saʼ nâ tèyntɨ̀ sɨ̂ ghelɨ Isìlæ̀, achi ayɨ a ibàʼlɨ̀ i mɨ̂twòtɨ̂. ¹¹Ghelɨ Isìlæ̀ na fvɨ̀ gvî alèʼ ghè a Bôbo Fɨyini nɨn choʼ na ghɨ na koʼsɨ̂ ŋweyn ateyn, wa nà jâŋ tɨ̀saʼ nâ tèyntɨ̀, àŋena yvɨtɨ-a. ¹²Ɨlvɨ ateyn na gvì kfeyna, wa yvɨ̀ŋtɨ̀ ghelɨ Isìlæ̀ nô ghɨ̀ jɨ̀m, ɨ ghɨ̀lûmnɨ̀, nɨ̀ ghɨ̀ki, nɨ̀ woynda baʼsɨ̂ nɨ̀ ɨ̀tum vzɨ̀ a wu n-chi a yi a ntèʼsɨ, ta ka àŋena yvɨ, ɨ̀ yèʼi sɨ nà koʼsɨ Bôbo Fɨyini, ɨ Fɨyini fifɨ, nî àwo kì a tɨsaʼ tɨ ŋweyn tɨ nɨn bê nô à jɨ̀m. ¹³Yì kæ sɨ nà ni tî, a à læ nà koʼ nô mɨ àjâŋ a woyn nɨ̀ zɨ̀ à kà, a ilaʼ nâ ghè a yi n-dyâŋ sɨ lì a injɨyn i Jvâ Jodàn tì, kɨ yvɨ isaʼi Bôbo Fɨyini, ɨ yeʼi sɨ nà chi ta yi n-bê.”

Bôbo Fɨyini ɨ fu isaʼ i goʼsɨnɨ sɨ̂ Mosìs

¹⁴Bôbo Fɨyini nɨn læ meyn bè sɨ̂ Mosìs na, “Mɨ̀chi myâ bu fì dvɨ̂ wì a nse. Jaŋ Joshwà, zɨ̂ ŋweyn gvi a fɨndo afî a ghesɨ̀nà nɨn kôynɨ̀ ateyn, mà feʼtɨ awo kì sɨ̂ ŋweyn a wù n-kelɨ sɨ nì.” Mosìs ɨ jàŋ Joshwà, ŋêyn ŋweyn ɨ ndù sɨ a fɨndo nɨ̀ Bôbo Fɨyini nâ ghè.

¹⁵Bôbo Fɨyini ɨ gvɨtɨ fvɨ̀ afu tèyn ta nseŋ mbàʼsɨ̀, ɨ timi a ɨchfɨ fɨndo nâ ghè, ¹⁶ɨ bè sɨ̂ Mosìs na, “Ɨlvɨ kfeyn meyn ta ka wà kfa ɨ̀ yeyn ghɨ̀bo ghya. Wà læ̀ lu-à, a ghelɨ ghèyn na bu yvɨnɨ̂ wì ma, ɨ̀ bèbsɨ mɨ̀kàyn mzɨ̀ a mà yɨ̀ ghesɨ̀ àŋena. Àŋena nɨn visî mà, ɨ̀ ndù nà koʼsɨ̂ mɨyini mɨ̀ ìlaʼ mzɨ̀ a àŋena nɨn ndû sɨ nà chi ateyn. ¹⁷Àŋena kæ læ̀ mòm, a ɨtoŋ ɨ̀ wom yaf, a mà beyn jɨm a ghɨ zuetɨ àŋena. Awo a læ̀ nà gâyn sɨ̂ àŋena bem kɨ tèyn, a ghɨ keli na kɨ n-gâyn tì bòm ta mà, Bôbo Fɨyini, bu ghɨ wi ghesɨ̀ àŋena amoʼ. ¹⁸Mà læ̀ bêyn jɨm sɨ̂ àŋena, ɨ̀ faŋ tɨ̀ gàmtɨ àŋena bòm ta àŋena nì mbɨ, nà koʼsɨ̂ mɨyini ɨn lì.

¹⁹“Mɨ n-kɨŋ na zɨ̂ Joshwà nyaʼ njàŋ yèyn a mɨ n-fu sɨ̂ zɨ̀, wà ndu yèʼi sɨ̂ ghelɨ Isìlæ̀, àŋena na yema, ta ka à læ̂ nà ghɨ nchwò nsaʼ sɨ̂ mà, achi ghè a mà bèyn jɨm sɨ̂ àŋena ateyn. ²⁰À læ̀ nà ghɨ ta mà lì zɨ nɨ̀ àŋena a ilaʼ nâ ghàyn a ɨfwo ɨ yɨnɨ nɨn koʼ ateyn sɨ a idvɨ̀ tèyn, ilaʼ zɨ̀ a mɨ n-læ chfɨ̀nɨ ɨ yɨ mɨkâyn sɨ fu sɨ̂ ghɨ̀bo àŋena, a àŋena yɨ ɨ̀ kfeyn kɨ̀ ta ghɨ n-kôŋ. Àŋena nɨn yɨ tì, ɨ̀ visi mà, ɨ̀ chàs isaʼ ì yemi, ndù nà koʼsɨ̂ mɨyini ɨ̀n lì.” ²¹Awo a bɨ-a n-læ̀ gâyn sɨ̂ àŋena, a ngeʼsɨ koli àŋena, a ghɨ se sɨ yem yem njàŋ nâ yèyn a à na ghɨ nchwò nsaʼ sɨ̂ mà, bòm ta woyn àŋena læ̀ bu fì lêsɨ̀ wi njàŋ àteyn. Mà sɨ kya ìwo zɨ̀ a àŋena nɨn kfâʼtɨ̀ sɨ nì bu duʼ tɨ̀ lì sɨ zɨ nɨ̀ àŋena a ilaʼ nâ ghàyn a mɨ n-læ chfɨ̀nɨ sɨ̂ ghɨ̀bo àŋena têyn. ²²Bôbo Fɨyini nɨn læ taŋi tî, Mosìs ɨ nyàʼ njàŋ àteyn kɨ̀ achi nâ ghè ɨ yeʼi sɨ̂ ghelɨ Isìlæ̀.

²³Bôbo Fɨyini nɨn læ taŋi sɨ̂ Joshwà, ɨ wâyn Nûn ɨ bè na, “Wa kelɨ àtem ato-a, ka wa n-fàyn, bòm ta a n-lì zɨ̂ và nɨ̀ ghelɨ Isìlæ̀ a ilaʼ afêyn a mɨ n-læ yɨ mɨkâyn, ɨ chfɨ̀nɨ̀ sɨ fu sɨ̂ àŋena têyn. Mà na ghɨ ghesɨ̀nà amoʼ.”

²⁴Mosìs nɨn læ meyn nyàʼ tɨ̀saʼ tɨ Bôbo Fɨyini nâ tèyntɨ̀ a ŋwàʼlɨ̀ nô tɨ̀ jɨ̀m, ²⁵ɨ bè sɨ̂ ghelɨ Levì ghì a ghɨ n-læ nà beʼi àntayntayn a mɨ̂kàyn nɨ̀ Bôbo Fɨyini na, ²⁶“Yì li ŋwàʼlɨ̀ ìsaʼ yèyn, ɨ̀ lèm a ngùŋ àntàyntayn a mɨ̂kàyn nɨ̀ Bôbo Fɨyini ɨ Fɨyini fifɨ, ta ka à læ nà ghɨ nchwò nsaʼ nô mɨ achi à kà ta yì chàsɨ̀ ma. ²⁷Mɨ n-kya na yi n-to nɨ̀ àtu a, yvɨnɨ̂ wì Bôbo Fɨyini. Yì ti lum to nɨ̀ àtu a sɨ̂ Bôbo Fɨyini kɨ̀ nô a ma asɨ, ma kæ kfɨ kfɨ, yi nà ghɨ nô ti a. ²⁸Mosìs nɨn læ taŋi tî ɨ kæ be sɨ̂ ghelɨ ndo nɨ̀ Levì na yì jaŋtɨ chyeʼ sisɨ nô sɨ̀ jɨ̀m baʼsɨ̂ nɨ̀ ghelɨ ghɨ tisɨnɨ nɨ̀ zɨ̀ ta ka mà na taŋi-à àŋena ɨ yvɨ-a. Mà na taŋî layn sɨ̂ àŋena, iyvɨ i nɨ̀ nse ɨ ghɨ nchwò nsaʼ sɨ̂ mà. ²⁹Mɨ n-kya na mɨ n-kfɨ nô mɨ ɨlvɨ gha, a ghelɨ leʼ kàsi sɨ a ibàm awo ghè a mà yèʼi sɨ̂ àŋena, nà sɨ nì kɨ àwo a bɨ-a, a ɨtuʼ læ̂ layn, a ngeʼ koli àŋena bòm ta àŋena ni meyn ɨtoŋ Bôbo Fɨyini bâŋ, bòm àwo a bɨ-a kì a àŋena nì.”

Bôbo Fɨyini ɨ bè Mosìs ɨ nyàʼ njàŋ

³⁰Mosìs nɨn læ taŋi tî, ɨ jàŋtɨ̀ ghelɨ Isìlæ̀ nô ghɨ̀ jɨ̀m, ɨ taŋ kàlì nɨ̀ àwo kì a njàŋ nâ zɨ̀ nɨ̀n bê nô à jɨ̀m, àŋena yvɨtɨ-à.