Deuteronomy 16

Ayɨ Iyaʼsɨ

¹Mosìs nɨ̀n læ meyn bè sɨ̂ ghelɨ Isìlæ̀ na, “À na ghɨ achi a kɨ asɨ-a a njôŋ Abìb nô mɨ a bêŋ ì kà, yi yɨ ayɨ iyaʼsɨ sɨ koʼsɨ Bôbo Fɨyini ɨ Fɨyini fifɨ bòm ta a nà n-ghɨ nɨ̀ntuʼ achi a li-a a njoŋ nâ ghàyn, wu fvɨ̀sɨ̀ zɨ̀ sɨ a Ijìb. ²À na ghɨ ɨlvɨ ayɨ nâ ghàyn, yi ndu sɨ nyam àyɨ nɨ̀ zɨ̀ alèʼ ghè a Bôbo Fɨyini ɨ Fɨyini fifɨ choʼ na yì na koʼsɨ̂ ŋweyn ateyn. Nyàm àteyn na ghɨ nyam mbòloʼ kèsa njɨ̀ ma yì fvɨ̀sɨ̀ inòyn i nyâmsɨ̀ nɨ̀ zɨ̀. ³Yi se sɨ kfɨl nyam àyɨ nâ zɨ̀, yi nà yɨ àbayn bula ghɨ we fɨ̀shɨ̀k ateyn. Yi n-kelɨ sɨ yɨ abayn bula ghɨ we fɨ̀shɨ̀k ateyn sɨ a mɨchi nsòmbo, kɨ̀ ta yi n-læ yɨ ɨtuʼ ta yi nà n-luŋ luŋ sɨ leʼ sɨ fvɨ a Ijìb alèʼ ghè a ghɨ nà n-nyablɨ nɨ̀ zɨ̀ afu tì. Yì na yɨ àbayn nâ kèyn nô mɨ ɨlvɨ gha (ta ka yì) yi nà kfàʼtɨ̀ ɨ̀tuʼ vzɨ̀ a yi n-læ leʼ fvɨ̀ a Ijìb ateyn. /Yi se sɨ yɨ ɨfwo ɨ yɨnɨ ayɨ nâ wèyn, yi yɨ abayn bula fɨ̀shɨ̀k sɨ a mɨchɨ nsòmbo kɨ̀ ta yi n-læ yɨ ɨtuʼ ta yi nà n-luŋ luŋ sɨ leʼ sɨ fvɨ a Ijìb alèʼ ghè a ghɨ nà n-nyablɨ nɨ̀ zɨ̀ afu tì. Yì na yɨ àbayn nâ kèyn nô mɨ ɨlvɨ gha (ta ka yì) yi nà kfàʼtɨ̀ ɨ̀tuʼ vzɨ̀ a yi n-læ leʼ fvɨ̀ a Ijìb ateyn. ⁴À na ghɨ a mɨchi nâ ghàyn nsòmbo, ka ghɨ n-yèyn mɨ yeyn fɨ̀shɨ̀k a wùl a ndo a yi ilaʼ. Yi sɨ nyam (aleŋ ɨlvɨ ikfa) achi a kɨ asɨ-a a njoŋ nâ ghàyn, yi kfɨl kɨ ì jɨ̀m ka ɨtuʼ nɨn layn kòli nô fɨ̀lêʼnɨ̀ ateyn.”

⁵Ka yi n-læ̀ sɨ nyam àyɨ nâ yèyn a ntèʼ afî a Bôbo Fɨyini ɨ Fɨyini fifɨ fu na yì na chî ateyn, ⁶a bu kɨ alèʼ ghè a Bôbo Fɨyini choʼ na ghɨ na koʼsɨ̂ ŋweyn ateyn. Yì na sɨ nyam àteyn kɨ̀ aleŋ ɨlvɨ ikfa ɨlvɨ ghê a ghɨ̀bo ghi nɨn læ fvɨ̀ sɨ a Ijìb ateyn. ⁷Yi na sɨ nyam àteyn, yi kfe kfɨl kɨ alèʼ ghè a Bôbo Fɨyini ɨ Fɨyini fifɨ choʼ na yì na koʼsɨ̂ ŋweyn ateyn, ɨtuʼ layn, yi kasi ɨ kfa sɨ a yi a mɨ̂twò. ⁸Yi n-kelɨ sɨ nà yɨ abayn bula fɨ̀shɨ̀k ateyn sɨ a mɨchi ntufa, à na ghɨ a mɨchi nsòmbo yi yvɨ̀ŋtɨ̀, ɨ koʼsɨ Bôbo Fɨyini ɨ Fɨyini fifɨ, ka yi n-fèl ìwo achi nâ ghè.

Ayɨ ɨlvɨ ta ghɨ ghayn ɨfwo ɨ yɨnɨ

⁹Mosìs nɨn læ meyn bè sɨ̂ ghelɨ Isìlæ̀ na, yì na kòl ìsaŋ i yi asɨ-i nô mɨ achi à kà, yi taŋ tɨwe nsòmbo zɨ̂tɨ̀ kɨ achi nâ ghè. ¹⁰Yi taŋ tɨwe nsòmbo ndù gòʼsɨ̀ nô mɨ achi à kà, yi yɨ ayɨ sɨ koʼsɨ Bôbo Fɨyini ɨ Fɨyini Fifɨ, nô mɨ ndà ɨ fu ìfu zɨ̀ a wù chòʼnɨ kɨ̀ ighel ta Bôbo Fɨyini bòysɨ ŋweyn. ¹¹À na gvì achi nâ ghè, yi nà yɨ-a, saŋlɨ-à zɨ̂ woyn ghi, nɨ̀ ghelɨ ghɨ felɨnɨ nɨ̀ zɨ̀ ghɨki nɨn ghɨ lûmnɨ̀ alèʼ ghè a Bôbo Fɨyini choʼ na ghɨ na koʼsɨ̂ ŋweyn ateyn. Yi na se sɨ yɨ, ka yi n-lèsɨ̀ ghelɨ ndo nɨ̀ Levì ghì a ghɨ n-chi zɨ̂ àŋena, baʼsɨ̂ nɨ̀ ɨ̀tum, nɨ̀ ghɨ̀ki nkfɨ nɨ̀ woyn nkfɨ. ¹²Yi n-kelɨ sɨ nà lem tɨsaʼ nâ tèyntɨ̀ nô tɨ̀ jɨ̀m a mɨ n-fu sɨ̂ zɨ̀ têyn. Ka yi n-læ lèsɨ̀ na yi n-læ nà ghɨ ɨ̀kôs a Ijìb, Bôbo Fɨyini ɨ Fɨyini fifɨ ɨ bœ̀sɨ̀ zɨ̀.

Ayɨ ibàʼlɨ̀ i mɨ̂twò

¹³Mosìs nɨ̀n be meyn kɨmɨ sɨ̂ ghelɨ Isìlæ̀ na, “Yì na nì-à chyeʼ mèsì àsaŋ, ɨ̀ kam mèsì gɨ̀lebsɨ̀, yi yɨ ayɨ a mɨ̂twò sɨ a mɨchi nsòmbo. ¹⁴À na gvì achi nâ ghè, yi nà yɨ-a, saŋlɨ-à zɨ̂ woyn ghi, nɨ̀ ghelɨ ghɨ felɨnɨ nɨ̀ zɨ̀ ghɨki nɨn ghɨ lûmnɨ̀ alèʼ ghè a Bôbo Fɨyini choʼ na ghɨ na koʼsɨ̂ ŋweyn ateyn. Yi na se sɨ yɨ, ka yi n-lèsɨ̀ ghelɨ ndo nɨ̀ Levì ghì a ghɨ n-ghɨ a yi a ntèʼsɨ, baʼsɨ̂ nɨ̀ ɨ̀tum, nɨ̀ ghɨ̀ki nkfɨ nɨ̀ woyn nkfɨ. ¹⁵Yì na yɨ àyɨ nâ kèynà sɨ a mɨchi nsòmbo, koʼsɨ̂ Bôbo Fɨyini ɨ Fɨyini fifɨ kɨ̀ alèʼ ghè a wù n-choʼ na ghɨ na koʼsɨ̂ ŋweyn ateyn. Achi ateyn a na gvì chema, yi nà saŋlɨ-à bòm ta à bòysɨ Bôbo Fɨyini ɨ Fɨyini fifɨ bòysɨ zɨ̀, ɨ̀ nì ɨfwo ɨ yɨnɨ koʼ sɨ̂ zɨ̀, fì bòysɨ nô mɨ gha ta yi n-nî.”

¹⁶Ghɨ̀lûmnɨ Isìlæ̀ nɨn kelɨ sɨ nà koʼsɨ Bôbo Fɨyini ìngal ì tal a bêŋ, kɨ̀ alèʼ ghè a Bôbo Fɨyini ɨ Fɨyini fifɨ choʼ na ghɨ na koʼsɨ ŋweyn ateyn. Àŋena na koʼsɨ̂ ŋweyn achi ayɨ iyaʼsɨ, koʼsɨ̂ achi ayɨ ɨlvɨ ta ghɨ ghayn ɨfwo ɨ yɨnɨ, nɨ̀ àchi ayɨ ibàʼlɨ̀ i mɨ̂twò. Nô mɨ wùl ɨ lûmnɨ̀ ɨ̀ kfà ɨ kelɨ sɨ gvi nɨ̀ ìfu i. ¹⁷Nô mɨ ndà a yi antêynɨ̀ nɨn kelɨ sɨ nà gvî nɨ̀ ìfu i kɨ̀ ighel ta Bôbo Fɨyini ɨ Fɨyini fifɨ bòysɨ ŋweyn.

Dzɨ̀ zɨ̂ a ghɨ na saʼ nsaʼsɨ ateyn

¹⁸Mosìs nɨn læ̀ meyn bè sɨ̂ ghelɨ Isìlæ̀ na, “Yì choʼtɨ ghelɨ ghɨ tisɨnɨ nɨ̀ chyeʼsɨ nô mɨ isas i ndo ì kà a ntèʼsɨ ghê a Bôbo Fɨyini ɨ Fɨyini fifɨ nɨn fu sɨ̂ zɨ̀. Ghelɨ ateyn nɨn kelɨ sɨ nà saʼ ghelɨ kɨ àtì-ati. ¹⁹Ka yì na saʼ nsaʼ àbàs àmòʼ. Ka wùl nɨn læ̀ bɨ̀mi na ghɨ yuyntɨ ŋweyn jæ ta ka wù ni iwo bòm ta ghɨ n-yuyntɨ̂ wul wù bû fì yèyn samoʼ, wu nà saʼ yeʼtɨ̂ ghelɨ àtì-ati. ²⁰Yi na kòŋ sɨ li ilaʼ zɨ̀ a Bôbo Fɨyini ɨ Fɨyini fifɨ nɨn fu sɨ̂ zɨ̀ na yì faŋ nà chî kɨ chi ateyn, yi na nî àwo kì a kɨ n-ghɨ àtì-ati, nî kɨ ta isaʼ i nɨn bê.”

Mosìs ɨ taŋi kûm Mɨ̀yìnì ɨ̀n lì

²¹Mosìs nɨ̀n læ meyn be kɨmɨ sɨ̂ ghelɨ Isìlæ̀ na, Yì faytɨ abaŋ ifu nɨ̀ Bôbo Fɨyini ɨ Fɨyini fifɨ, ka yi n-mòm sɨ yɨ̀s atôʼ, sɨ baʼsɨ a ngùŋ àbaŋ nâ ghè na kɨ na fɨsɨ̂ fɨyini fɨki fìfɨ̀ a ghɨ n-toŋtɨ̂ na Ashelà. ²²Ka yi n-læ̀ mòm sɨ tom ngòʼ alèʼ sɨ nà koʼsɨ-à bòm ta Bôbo Fɨyini ɨ Fɨyini fifɨ nɨn kôŋ wì sɨ nà yeyn ìnkì ɨfwo nâ zɨ̀.