Deuteronomy 15

Bèŋ zɨ̀ a ghɨ n-chyeʼsɨ̂ ikwo ateyn

¹Mosìs nɨ̀n bê meyn sɨ̂ ghelɨ Isìlæ̀ na, bèŋsɨ̀ na chwò ntufa, à na ghɨ a bèŋsɨ̀ nsòmbo, yi chyeʼsɨ nô mɨ ìkwo i nda ta wù n-kelɨ sɨ làʼ sɨ̂ zɨ̀. ²À ti ta yi n-kelɨ sɨ nà chyeʼsɨ ikwo ì zɨ-i. Nô mɨ wul ɨ̀ Isìlæ̀ ɨ̀ kfà ta wù sàmsɨ ɨkwo sɨ̂ waynà ŋweyn, wu chi ɨ̀ zɨ (chèm) a bèŋsɨ̀ nsòmbo, nɨn kelɨ sɨ chyeʼsɨ ikwo ateyn. Wùl àteyn nɨn kelɨ wi sɨ fì sɨ fsɨ ɨkwo ateyn bòm ta à n-ghɨ bèŋ zɨ̀ a Bôbo Fɨyini lèm na ghɨ na chyeʼsɨ̂ ìkwo ateyn. ³Wùl àtum na kelɨ ìkwo ì zɨ-i yi bɨf, mɨtì à na kelɨ wâynà vzɨ, yi visi ndù. ⁴Wùl ɨ̀ ànfɨf nɨn kelɨ wi sɨ na ghɨ a yi antêynɨ̀ bòm ta Bôbo Fɨyini ɨ Fɨyini fifɨ nɨn boysɨ̂ zɨ̀ ilaʼ nâ ghàyn a wù n-fu sɨ̂ zɨ̀ têyn, ⁵ɨlvɨ ta yi n-yvɨnɨ ŋweyn, lêm tɨ̀saʼ tèyntɨ̀ nô tɨ̀ jɨ̀m a mà fù sɨ̂ zɨ̀ layn. ⁶Bôbo Fɨyini ɨ Fɨyini fifɨ læ̀ boysɨ̂ zɨ̀ kɨ̀ ighel ta wu n-læ chfɨ̀nɨ. Tɨlaʼtɨ læ̀ nà gvî kɨ sɨ idvɨ̀, sam ɨ̀kwo sɨ̂ zɨ̀. Mɨtì a yì læ̂ faŋ tɨ̀ sam afo sɨ̂ wùl. Yì læ̀ saʼ tɨ̀laʼ kɨ̀ sɨ idvɨ̀, a nô ìlaʼi læ̂ faŋ tɨ̀ saʼ zɨ.

⁷Wùl ɨ̀ Isìlæ̀ kæ nà ghɨ wul ànfɨf a ntèʼsɨ ilaʼ nâ ghè a Bôbo Fɨyini ɨ Fɨyini fifɨ nɨn fu sɨ̂ zɨ̀, ka yî n-kfɨ̀tɨ̀ ghàʼ sɨ gàmtɨ ŋweyn. ⁸Mɨtì, wâynà vzɨ na sam nô mɨ ghà sɨ̂ zɨ̀, yi fu nô mɨ ghà sɨ̂ ŋweyn ta wù n-kɨŋ. ⁹Wâynà vzɨ na se sɨ sam afo sɨ̂ zɨ̀ ka yî n-lèʼ sɨ fu, kɨ bòm ta yi n-fayn na bèŋsɨ̀ nsòmbo nɨn kfeyna, a ghɨ chyeʼsɨ ikwo. Ka yî n-vìsi na iwo i bzɨ-i nâ yèynì zɨ faŋ a yi a tɨ̂kfàʼtɨ̀. Wâynà vzɨ kæ sam afo sɨ̂ zɨ̀ yi faŋ tɨ̀ fu, wù dzɨ̂ sɨ̂ Bôbo Fɨyini, a à na ghɨ ma yi nî meyn mbɨ. ¹⁰Wâynà vâ sam àfo sɨ̂ và, wà se sɨ fu ka wà na ghêʼnɨ̀-à ta ka Bôbo Fɨyini ɨ Fɨyini fifɨ boysɨ vâ nô mɨ a gha ta wà n-nî. ¹¹Mɨ n-bê sɨ̂ zɨ̀ na ɨwu ɨ̀vzɨ nɨn kelɨ sɨ nà fvɨ̂ sɨ̂ ghelɨ ghɨ fɨfâ bòm ta achi a nɨn ghɨ wi a wùl ànfɨf læ̀ bula a yi antêynɨ̀.

Dzɨ̀ zɨ̂ a ka ghɨ na visî ghelɨ ghɨ felɨnɨ ateyn

¹²Mosìs nɨn bê meyn kɨmɨ sɨ̂ ghelɨ Isìlæ̀ na, “Wâynà vâ ɨ wi kèsa ɨ lûmnɨ̀ kæ beyʼlɨ ngêŋ ŋweyn, nà felɨ̀ sɨ̂ và sɨ akòs, ɨ̀ fèlɨ̀ sɨ a bèŋsɨ̀ ntufa, à na ghɨ a bêŋsɨ̀ nsòmbo, wa visi ŋweyn wù lu./ Wùl Hibɨ̀lù ɨ wi kèsa ɨ lûmnɨ̀ kæ beyʼlɨ ngêŋ ŋweyn sɨ̂ wùl ɨ̀ Hibɨ̀lù, nà felɨ̀ sɨ̂ ŋweyn sɨ akòs, ɨ̀ fèlɨ̀ sɨ a bèŋsɨ ntufa, à na ghɨ a bêŋsɨ̀ nsòmbo, wu visi ŋweyn wù lu. ¹³Wù se sɨ lù, ka wâ n-vìsi na wù lu nɨ̀ ɨ̀wu ɨ yum, ¹⁴fu nyam shya sɨ lisi sɨ̂ ŋweyn, nɨ̀ ɨfwo ɨ yɨnɨ, baʼsɨ̂ nɨ̀ mɨ̀lùʼ. Wà se sɨ fu, wa fu kɨ ighel ta Bôbo Fɨyini bòysɨ vâ. ¹⁵Yì na kya na yi n-læ nà ghɨ ɨ̀kôs a Ijìb, Bôbo Fɨyini ɨ Fɨyini fifɨ ɨ bœ̀sɨ̀ zɨ̀. À ti iwo zɨ̀ a mɨ n-fu isaʼ nâ yèynì sɨ̂ zɨ̀ layn.”

¹⁶Mɨtì, wùl ɨ̀ fèlɨnɨ nɨ̀ và kæ sɨ bè na, wù n-kôŋ wì sɨ lù bòm ta wù n-koŋ vâ, fî kôŋ ghelɨ̀ ghya, kelɨ wi ngeʼ ì lì, ¹⁷wa bè wù lem yèʼsɨ atuŋlɨ a ŋweyn a ɨchfɨ ndo, wà chuʼ bùʼ, ta ka wù faŋ kɨ̀ sɨ a wul ɨ̀ fèlɨnɨ nɨ̀ và, kèsa à n-ghɨ wul ɨ̀ wi, ma wul ɨ̀ lûmnɨ̀ a.

¹⁸Ɨlvɨ kfeyn ta ka wà visi wul ɨ̀ felɨnɨ nɨ̀ và wù na sɨ ghɨ sɨ a ngeŋ, ka wâ n-ghèʼnɨ̀ bòm ta ifêl zɨ̀ a wù nì sɨ̂ và sɨ a bèŋsɨ̀ nsòmbo nɨn dvɨ̂ chwô izɨ-ì a wà nà n-lâʼ laʼ wul a wù ni. Wà nì tî, a Bôbo ɨ Fɨyini fyafɨ, boysɨ vâ, a awo à kya à jɨ̀mà na jèlɨ̀ kɨ a jûŋ.

Ifu i woyn nyâmsɨ̀ ɨ sɨ asɨsɨ

¹⁹Mosìs nɨn læ meyn bè sɨ̂ ghelɨ Isìlæ̀ na, “Nyàm mbòloʼ, kèsa njɨ̀ na bzɨ̂ wayn ɨ lûmnɨ̀ ɨwû àsɨ, yi choʼ ɨ lèm sɨ a nyɨŋ sɨ̂ Bôbo Fɨyini ɨ Fɨyini fifɨ, ka yî n-læ̀ kom iwî ateyn. ²⁰Yì na fvɨ̀ nô mɨ a bêŋ ì kà zɨ̂ ghelɨ ndo nɨ̀ zɨ ɨ lì nyamsɨ ateyn ɨ ndù alèʼ ghè a Bôbo Fɨyini choʼ na ghɨ na koʼsɨ̂ ŋweyn ateyn ɨ sɨ afu, ɨ nyòʼ ɨ kfɨl. ²¹Nyàm na kelɨ nseʼi, kèsa yì ngesɨ ngesɨ, kèsa yì fèfɨ̀ fefɨ, kèsa yì n-kelɨ nô mɨ ìnkì i ngeʼ ì kà, ka yi n-læ̀ mòm sɨ fu sɨ̂ Bôbo Fɨyini ɨ Fɨyini fifɨ. ²²Yì na lì nyam yi kelɨ nseʼi, yi kfe kɨ ta yì kfè fɨ̀chue, kesa ngwo a, ɨ kfɨl kɨ a ndo. Yi se sɨ kfɨl, nà koŋà yi fu nô mɨ ndà a yi a ntèʼ, kèsa wùl àteyn nɨn layn ta isaʼi nɨn dyêyn ma wù n-layn wi-a. ²³Yi sɨ ìnki nyâm nâ zɨ̀ sɨ kfɨl, ka yi n-kfɨl mɨluŋ mɨ̀ àteyn, yi sfɨ̀s ɨ màʼì.”