Deuteronomy 14

Awo kì a ghelɨ Isìlæ nɨn kelɨ wi sɨ nà ni alèʼ ikfɨ

¹Mosìs nɨn læ meyn bè sɨ̂ ghelɨ Isìlæ̀ na, “Yì na kya na yi n-ghɨ ghelɨ Bôbo Fɨyini ɨ Fɨyini fifɨ. Ka wùl sɨ̂ zɨ̀ nɨn læ̀ chàyntɨ ɨ̀wuyn, kèsa lòtɨ ɨ̀chfɨ̂ atu nɨ̀ ŋweyn bê na yi n-dzɨ̂ ɨ̀kfɨ i wûl. ²Yi n-ghɨ ghelɨ sɨ a nyɨŋ ma à chòʼ Bôbo Fɨyini ɨ Fɨyini fifɨ chòʼ zɨ antêynɨ̀ nɨ̀ ghelɨ mbzɨ, na yì na ghɨ ghelɨ ŋweyn, wu kôŋ zɨ̀.”

³“Ka yî n-læ̀ yɨ afo kɨ layn wi ta isaʼi nɨn ndyêyn. ⁴Yì kàʼ a yì kfɨlɨ nyam ta mbòŋ nɨ̀ bzɨ̂ njɨ̀ nɨ̀ bzɨ̂ ndoŋ, ⁵nɨ̀ fɨ̀chuefɨ nɨ̀ ngwo nɨ̀ fuŋsɨ kɨ tɨ̀nki tɨ̀ jɨ̀m. ⁶Yì kàʼ a yì kfɨl nô mɨ nyam ì kà ta yì n-kelɨ ntaʼ avɨ̀, yɨ ɨ̀fwo ɨ yɨnɨ, kasî koʼsɨ-à, chama. ⁷Mɨtì antêynɨ̀ nyàmsɨ̀ ghê a sɨ n-kfɨlɨ afûʼ, kasî koʼsɨ-à chama kèsa sɨ n-kelɨ ntaʼ avɨ̀, yi n-kelɨ wi sɨ kfɨl nyam ta kàmêl, nɨ̀ fɨ̀bàʼtùŋlɨfɨ nɨ̀ fɨ̀kfɨ̂ fɨ ɨtwaʼfɨ. Nyam nâ sèynsɨ̀ nɨn layn wi ta isaʼi nɨn dyêyn bòm ta sɨ n-kfɨl àfûʼ kasî koʼsɨ-à, chama mɨtì kelɨ wi ntaʼ avɨ̀. ⁸Nkfɨnyàm nɨ̀n layn kfeynɨ̂ wì ta ka yì na kfɨla nô mɨ ta yì n-kelɨ ntaʼ avɨ̀ mɨtì yɨ ɨ̀fwo ɨ yɨnɨ kasî koʼsɨ̂ wì. Ka yì na kfɨl tɨ̀nkì tɨ nyâm nâ tèyntɨ̀, kèsa kum nô mɨ kum ɨkfɨ ateyn bòm ta sɨ n-layn wi.”

⁹“Antêynɨ̀ nyamsɨ ghê a sɨ n-chi a jvâ, yì na kfɨl kɨ nyam na yì n-kelɨ ngaʼsɨ nɨ̀ tɨ̀wô tɨ samnɨtɨ. ¹⁰Ka wùl sɨ̂ zɨ̀ nɨn læ̀ kfɨl afo kɨ chî a jvâ, kelɨ wi tɨwô tɨ samnɨtɨ, nɨ̀ ngaʼsɨ. Ɨfwo nâ wèyn nɨn layn wi ta isaʼi nɨn dyêyn.”

¹¹“Yì kàʼ a yì kfɨl nô mɨ fɨ̀nyuyn fɨ̀kà ta fɨ n-layn ta isaʼi nɨn dyêyn. ¹²Yi n-kelɨ wi sɨ nà kfɨlɨ mbuʼ àwùmawum nɨ̀ àngùluŋ a, nô mɨ ìnki ì kà. ¹³Ka wùl nɨn læ̀ kfɨl fɨ̀nsù fɨ awumawum fɨ baŋnɨ fɨ nɨ fɨ fɨmnɨ fɨ, nô mɨ nɨ̀ ìnkì awumawum ì kà. ¹⁴Ka wùl nɨn læ̀ kfɨl àŋwòʼangumi, nô mɨ ìnki ì kà. ¹⁵Ka yi n-læ̀ kfɨl àngêynɨ̀ a bes, nɨ̀ àngêynɨ̀ a toŋnɨ-a, nɨ̀ ngvɨ̂ jvà ì ghaʼnɨ, nɨ̀ tɨ̀nkì tɨ awumawum kɨ tɨ̀ jɨ̀m, ¹⁶nɨ̀ àngêynɨ̀ a lænɨ-a, nɨ̀ ngvɨ̂ jvà ì lænɨ, nɨ̀ àngêynɨ̀ a ghaʼnɨ-a, ¹⁷nɨ̀ àngêynɨ̀ a fɨfâ, nɨ̀ àngêynɨ̀ a nse ìyum a, nɨ̀ ngvɨ jvà i fɨfâ, ¹⁸nɨ̀ mɨ̀nyuyn mzɨ̀ nô ɨ̀n jɨ̀m a mɨ̀ n-kelɨ afyeyn a dyâ nɨ̀ àchfɨ̂ a dyâ, nɨ̀ fɨnyuyn fɨ hubù fɨ̀ baʼsɨ̂ nɨ̀ njwo ifò.”

¹⁹“Nô mɨ ghà ta kɨ n-tâyn tayn, fî ŋâŋlɨ̀ a nse nɨn layn wi ta isaʼi nɨn dyêyn. Ka yì na kfɨlɨ ɨ̀fwo nâ wèyn. ²⁰Mɨtì yì kàʼ a yì kfɨl ɨfwo vzɨ̀ a wu n-kelɨ tɨwô layn ta isaʼi nɨn dyêyn.”

²¹“Ka wùl sɨ̂ zɨ̀ nɨn læ̀ kfɨl nyam, ma yì kfɨ̀ sɨ a ngeŋ. Nyàm kfɨ sɨ̂ zɨ̀ yi kâʼ a yì fu sɨ̂ ghelɨ ɨtum ghì a ghɨ n-chi a yi a ntèʼ kèsa bèyʼlɨ sɨ̂ àŋena, a ghɨ kfɨl. Yi n-ghɨ ghelɨ sɨ a nyɨŋ sɨ̂ Bôbo Fɨyini ɨ Fɨyini fifɨ.”

“Ka yi n-læ kfè wâyn bzɨ nɨ̀ igheyn i nà àteyn ta ghɨ kam.”

Isaʼ kûm ìfu afo àmòʼ antêynɨ̀ ɨ̀fwo ìvɨm

²²Mosìs nɨn læ meyn bè sɨ̂ ghelɨ Isìlæ̀ na, “Yì na fvɨ̀ mɨ a bêŋ ì kà, yi chɨ̀yntɨ̀ ɨ̀fwo vzɨ̀ a yì kfì a yi a gvêynsɨ̀ nô ɨ̀ jɨ̀m, ɨ gwòtɨ̀ ɨlwêʼ ìvɨm, ɨ lì àlêʼ àmòʼ àmòʼ ɨ fu sɨ̂ Bôbo Fɨyini. ²³Yi n-lì àlêʼ àmoʼ àmòʼ antêynɨ̀ ɨ̀fwo ɨ yɨnɨ ghè a yì kfì a yi a gvêynsɨ̀, nɨ̀ mɨ̀lùʼ ɨn fɨ nɨ̀ mɨ̀vɨ̂l mzɨ̀ a yì chuʼ, baʼsɨ̂ nɨ̀ woyn nyâmsɨ̀ ɨ ghɨ asɨ nɨ̀ zɨ̀, ɨ̀ ndù àlêʼ ghè a Bôbo Fɨyini ɨ Fɨyini fifɨ choʼ na ghɨ na koʼsɨ̂ ŋweyn ateyn, ɨ̀ chɨ̀yntɨ̀ ɨ̀ yɨ ɨfwo nâ vzɨ̀ afu. Yì na nî kɨ tì ta ka yì yeʼi nà lum ngvɨmlɨ̂ kɨ ngvɨmlɨ Bôbo Fɨyini ɨ Fɨyini fifɨ. ²⁴Alêʼ kì a Bôbo Fɨyini choʼ na ghɨ na koʼsɨ̂ ŋweyn ateyn kæ nà ghɨ dyefà, ma wùl kàʼ wu bû lì àfo àmòʼ antêynɨ̀ ɨ̀fwo ìvɨm sɨ ndù nɨ̀ ɨ̀ŋweyn afu, ²⁵wu beyʼlɨ ɨ̀fwo ateyn ɨ li ndù nɨ̀ ɨ̀kwo ateyn alèʼ ghè a Bôbo Fɨyini choʼ na ghɨ na koʼsɨ̂ ŋweyn ateyn. ²⁶Wù ndû, wu yuyn nô mɨ ghà ateyn ta wù n-kôŋ. Wù kàʼ a wù yuyn nyâm mbòloʼ, kèsa bzɨ̂ njɨ̀, kèsa mɨlûʼ ɨ̀n tô nô mɨ nɨ̀ ghà ta wù n-kôŋ sɨ yɨ, ɨ̀ chɨ̀yntɨ̀ nà yɨ-a, saŋlɨ-à ŋêyn ghelɨ ndo nɨ̀ ŋweyn asɨ nɨ̀ Bôbo Fɨyini ɨ Fɨyini fifɨ. ²⁷Yi se sɨ yɨ ɨfwo nâ vzɨ̀, ka yî n-lèsɨ̀ ghelɨ ndo nɨ̀ Levì ghì a ghɨ n-chi a yi a ntèʼsɨ, bòm ta àŋena nɨn kelɨ wi ɨlwêʼ ta zɨ.”

²⁸“Bèŋsɨ̀ na chwò sɨ̀ bò, à na ghɨ a bêŋ sɨ̀ tal, yi lì ɨ̀fwo vzɨ̀ a yì kfì nô ɨ̀ jɨ̀m a bêŋ nâ ghè, ɨ gwòtɨ̀ ɨlwêʼ ìvɨm, ɨ lì àlêʼ àmòʼ, ɨ lem kɨ a yi a ntèʼsɨ. ²⁹Yi n-kelɨ sɨ nà lem ɨvzɨ nâ vzɨ̀ ta ka ghelɨ ndo nɨ̀ Levì na yɨ-a, bòm ta àŋena nɨn kelɨ wi ɨlwêʼ. Ghelɨ ɨtum, baʼsɨ̂ nɨ̀ woyn nkfɨ, nɨ̀ ghɨ̀ki nkfɨ ghì a ghɨ n-chi a yi a ntèʼsɨ nɨn kelɨ sɨ nà boŋ yɨ kul a. Yì kæ nà ni têyn, a Bôbo Fɨyini, ɨ Fɨyini fifɨ, boysɨ zɨ kɨ̀ dzɨ sɨ̀ jɨ̀m.”