Deuteronomy 17

¹Mosìs nɨn be meyn sɨ̂ ghelɨ Isìlæ̀ na, “Ka wùl sɨ̂ zɨ nɨn læ̀ fu njàkâs, kèsa bzɨ njɨ̀ sɨ̂ Bôbo Fɨyini ɨ Fɨyini fifɨ yi kelɨ nseʼi, bòm ta Bôbo Fɨyini nɨ̀n kôŋ wi ìnkì ifu nâ zɨ̀.”

²Wùl ɨ wi kèsa wul ɨ̀ lûmnɨ̀ kæ nà chî a ntèʼ ì lì antêynɨ̀ ntèʼsɨ ghè a Bôbo Fɨyini fù sɨ̂ zɨ̀, nî àwo Bôbo Fɨyini ɨ Fɨyini fifɨ ɨ kôŋ wì, yvɨnɨ̂ wì isaʼ i mɨkâyn mzɨ̀ a Bôbo Fɨyini yɨ̀ ŋêyn àŋena, ³koʼsɨ̂ mɨyini ɨn lì, felɨ̀ sɨ̂ ɨ̀mêyn, koʼsɨ̂ ɨ̀chfɨ̂ iyvɨ, koʼsɨ̂ njoŋ nɨ̀ mɨ̀njèyn, a ghɨ àwo ma isaʼ i Fɨyini i tuynsɨ meyn, ⁴yi faytɨ ki iwo ateyn. Yi kæ yeyn yi ghɨ samoʼ ma wùl ɨ̀ mom meyn ìnkì iwo nâ zɨ̀ a Isìlæ̀, ⁵yi lì ɨ ndù nɨ̀ wùl ɨ̀ àteyn kèsa à n-ghɨ wùl ɨ lûmnɨ̀ ma ɨwi a ɨchfɨ mbàyn ntèʼ, ɨ tɨmlɨ ɨ zuè ŋweyn afu nɨ̀ ngòʼsɨ̀. ⁶Nchwòsɨ nsaʼsɨ kæ nà ghɨ sɨ̀ bò kèsa sɨ̀ tal, a ghɨ na kelɨ sɨ zue wul àteyn, mɨtì ma nchwò nsaʼ kæ nà ghɨ kɨ ìmòʼ, ghɨ kâʼ ghɨ bû zuè wul àteyn. ⁷Wùl ɨ̀ kôl ìsaʼ, ghɨ na ghɨ sɨ tɨmlɨ sɨ zue ŋweyn, nchwò sɨ nsaʼ sìsɨ̀ a sɨ nì yèyn ta wù n-kôl isaʼ ateyn na kelɨ sɨ tɨm sɨ asɨ, jæ ta ka ghelɨ zɨtɨ sɨ nà tɨmlɨ-à. Yi n-kelɨ sɨ nà ni tî ta ka awo a bɨ-a mæ sɨ a yi antêynɨ̀.

Ngàŋsɨ ndô Fɨyini na saʼ nsaʼsɨ tosɨ

⁸Mosìs nɨn be meyn sɨ̂ ghelɨ Isìlæ̀ na, “Wùl ɨ̀ kæ zue wul, kèsa wù lèmsɨ wul, kèsa wù fsɨ afo a wûl sɨ adyaʼ, nsaʼ àteyn na to ghaʼ zɨ̀, yi ndù nɨ̀ ɨ̀nyeyn alèʼ ghè a Bôbo Fɨyini nɨn choʼ na ghɨ na koʼsɨ̂ ŋweyn ateyn. ⁹Yi na yeyn ìnki nsaʼ nâ zɨ̀, yi ndù nɨ̀ ɨ̀nyeyn sɨ̂ ngàŋsɨ ndô Fɨyinisɨ̀, ɨ ghelɨ ndo nɨ̀ Levì nɨ̀ wùl ɨ̀ saʼnɨ vzɨ̀ a wù n-felɨ̀ achi nâ ghè. Yi ndû, yi faytɨ ɨ fèʼtɨ̀ ìwo ateyn sɨ̂ ŋweyn ta ka wù saʼ ɨ̀ tèyn nsaʼ àteyn sɨ̂ zɨ̀. ¹⁰Yi ndû alèʼ ikoʼsɨ nâ ghè, ngàŋ ndô Fɨyini bê mɨ na gha, yi ni kɨ ta wù bè. ¹¹Àŋena bê nô mɨ na gha, yi ni kɨ ta ghɨ bè, ka yi n-kfɨ̀nɨ ìwo ateyn. ¹²À fàŋ nô mɨ ndà tɨ̀ ni iwo zɨ̀ a wul ɨ̀ saʼnɨ bè kèsa ngàŋ ndô Fɨyini zɨ̀ a yì n-felɨ̀ a ndô Fɨyini ɨlvɨ nâ ghè bè, a ghɨ na kelɨ sɨ zue ŋweyn. Yì kæ sɨ nà ni têyn, a awo a bɨ-a mæ sɨ a Isìlæ̀. ¹³Yi gàyn tî, a ghelɨ Isìlæ̀ yvɨ nô ghɨ̀ jɨ̀m, ɨ̀ se sɨ fàyn, a atu a tonɨ-a mæ sɨ a Isìlæ̀.”

Isaʼ kûm Fòyn Isìlæ̀

¹⁴Mosìs nɨ̀n fi meyn bè sɨ̂ ghelɨ Isìlæ̀ na, “À læ̀ nà ghɨ ta yì zɨ nà sɨ chî a ilaʼ ghè a Bôbo Fɨyini ɨ Fɨyini fifɨ nɨn fu sɨ̂ zɨ̀ ɨ̀ zɨtɨ nà bê na, ghesɨ̀na lem fòyn wù na saʼ ghesɨ̀nà kɨ̀mɨ ta tɨlaʼ tɨ litɨ,” ¹⁵yi nà tôʼnɨ̀-à ka yi n-chòʼ wul a ghɨ wi wul ɨ̀ Isìlæ̀. Yi n-kelɨ sɨ choʼ wul a ghɨ wul ɨ vzɨ̀ a Bôbo Fɨyini nɨn kɨŋ. Yi se sɨ choʼ wul, yi choʼ kɨ wâynà vzɨ. ¹⁶Ka fòyn Isìlæ̀ nɨ̂n læ̀ nà kelɨ nyamsɨ kfaŋ sɨ idvɨ̀. Ka wû n-læ̀ tùm ghelɨ Isìlæ̀ na ghɨ ndu yùyn nyamsɨ kfaŋ a Ijìb bòm ta Bôbo Fɨyini tuynsɨ meyn na ka wùl sɨ̂ zɨ̀ nɨn læ̀ kàsi ndù a Ijìb. ¹⁷Fòyn Isìlæ̀ nɨn kelɨ wi sɨ ndù ghɨ̀kì sɨ idvɨ̀, kelɨ wi sɨ nà kelɨ aso ɨkwo a baŋnɨ-a nɨ̀ a fɨfâ sɨ idvɨ̀, a bu tì a wù na bu koʼsɨ̂ wì Bôbo Fɨyini.

¹⁸Wù koʼ àchɨ nô mɨ ɨlvɨ gha, ghɨ fu ŋwàʼlɨ̀ ìsaʼ nɨ̀ Fɨyini fɨ yêyn a yì n-ghɨ sɨ̂ ghelɨ ndo nɨ̀ Levì têyn sɨ̂ ŋweyn, ma à ti ŋwàʼlɨ̀ ngàŋsɨ ndô Fɨyini. ¹⁹Ŋwàʼlɨ̀ ateyn nɨn kelɨ sɨ nà ghɨ kɨ sɨ̂ ŋweyn, wu jâŋ kɨ mɨchi ɨ̀n jɨ̀m, ta ka wù yeʼi nà yvɨnɨ tɨ̀saʼ tɨ Bôbo Fɨyini ɨ Fɨyini fɨ ŋweynfɨ nô tɨ̀ jɨ̀m. ²⁰Wù kæ nà jâŋ ŋwàʼlɨ̀ tɨ̀saʼ nâ zɨ, a yì gamtɨ ŋweyn a wù na kya na yi ngaŋtɨ̂ chwô wì ghelɨ Isìlæ̀ ghɨ li. Yi n-gàmtɨ̀ kɨmɨ ŋweyn na wù na ghaŋsɨ̂ wì ɨwuyn sɨ chas isaʼ i Bôbo Fɨyini sɨ nà nî awo kì a wù n-kôŋ, a ɨfôyn ŋêyn woyn ŋweyn, dyebtɨ a Isìlæ̀.