Daniel 3

Nèbùkànezà ɨ chwòsɨ̀ ìsaʼ na ghelɨ na koʼsɨ̂ ànfèʼsɨ̀.

¹Fòyn Nèbùkànezà nɨn læ meyn bè ghɨ faytɨ ànfèʼsɨ̀ nɨ̀ àso ɨkwo a baŋnɨ-a kɨ dyef chem ntàmsɨ̀ mɨ̀vɨm bò njvàsɨ̀ nsòmbo, ghaʼ chem ndù ntàmsɨ̀ tal. Ghɨ n-fàytɨ tî, wu bè ghɨ tom ibal i Dulà abàs a Babilòn. ²Ghɨ n-tom tî fòyn ɨ jàŋtɨ̀ ghelɨ ghɨ felɨnɨ ilaʼ nɨ̀ ŋweyn na àŋena gvi chɨ̀yntɨ̀ lèm ànfèʼsɨ̀ ateyn sɨ a nyɨŋ. Wu n-jàŋtɨ ghelɨ ghì a ghɨ n-saʼ ɨbyâs ilaʼ ɨ ghaʼlɨnɨ, nɨ̀ ɨghî a ghɨ n-saʼ ɨbyâs ilaʼ ɨtwelâ, nɨ̀ ghɨ̀bo ntèʼ kɨ̀mɨ nɨ̀ ghelɨ ghì a ghɨ tebtɨ ghelɨ ghɨ saʼnɨ, nɨ̀ ghelɨ ghì a ghɨ n-lêm ɨkwo. Wu n-jaŋtɨ meyn kɨmɨ ghelɨ ghì a ghɨ nsaʼ nsaʼsɨ nɨ̀ ɨ̀tu ghelɨ ghɨ saʼnɨ baʼsɨ̂ nɨ̀ ghelɨ ghɨ felɨnɨ ghɨ li ɨbyàs ilaʼ nɨ̀ ŋweyn nô ɨ̀ jɨ̀m. ³Ghelɨ ghɨ felɨnɨ nâ ghèyn nô ghɨ̀ jɨ̀m ɨ yvɨ̀ŋtɨ̀ sɨ lem ànfèʼsɨ̀ kì sɨ a nyɨŋ a fòyn Nèbùkànezà tom, ɨ timi asɨ ateyn.

⁴Ntum fòyn ɨ kæ byal sɨ bè na, “Ghelɨ ghɨ̀ jɨ̀m yì yvɨtɨ, kèsa wà lù ilaʼ ìkà, kèsa wà lù abàs ilaʼ àkà, taŋî nô mɨ ìtaŋi ilaʼ ìkà, fòyn bè na: ⁵Yi yvɨ nô mɨ ɨlvɨ gha ta ghɨ n-toŋ isoŋ, toŋ ndoŋ buʼ iluŋ nɨ̀ ìndeladèlà-ì, toŋ ànfuŋ nɨ̀ ɨ̀fwo ɨ buʼnɨ ɨlvɨ, yi fe ɨ kfɨsɨ àkêʼ a nse ɨ koʼsɨ ànfèʼsɨ̀ kì a fòyn Nèbùkànezà tom ma ghɨ fàytɨ nɨ̀ aso ɨkwo abaŋnɨ-a. ⁶À kæ faŋ mɨ ndà tɨ̀ fe sɨ kfɨsɨ ikêʼ a nse sɨ koʼsɨ ànfèʼsɨ̀ nâ kèynà a ghɨ maʼ ŋweyn ɨvɨ̀s ɨbemnɨ.”

⁷A nà ghɨ ta ghɨ tòŋ isoŋ, toŋ ndoŋ buʼ iluŋ nɨ̀ ìndeladèlà-ì, toŋ ànfuŋ nɨ̀ ɨ̀fwo ɨ buʼnɨ ɨlvɨ, ghelɨ tɨlaʼ kèsa ghɨ lù ilaʼ ìkà, kèsa ghɨ lù abàs ilaʼ àkà, taŋî nô mɨ ìtaŋi ilaʼ ìkà ɨ fe kfɨsɨ àkêʼ a nse ɨ koʼsɨ ànfèʼsɨ̀ kì a fòyn Nèbùkànezà fàytɨ nɨ̀ àso ɨkwo abaŋnɨ-a.

⁸À nà ghɨ ɨlvɨ nâ ghè, ghelɨ ghɨ tofɨnɨ ghɨ li a Babilòn ɨ ndu timi asɨ nɨ̀ fòyn ɨ bè àwo abɨ-a kûm ghelɨ Jûsɨ̀. ⁹Àŋena nɨn læ fvɨ timi asɨ nɨ̀ fòyn Nèbùkànezà ɨ bè na, “ Chi faŋ a Mbæ̀.” ¹⁰Mbæ̀, wà chwosɨ meyn isàʼ na nô mɨ ndà yvɨ ta ghɨ tòŋ ndoŋ buʼ iluŋ nɨ̀ ìndeladèlà-ì, toŋ ànfuŋ nɨ̀ ɨ̀fwo ɨ buʼnɨ ɨlvɨ, wu fe ɨ kfɨsɨ ikêʼ a nse ɨ koʼsɨ ànfèʼsɨ̀ kì a ghɨ fàytɨ nɨ̀ àso ɨkwo a baŋnɨ-a tî, ¹¹ma a fàŋ nô mɨ ndà sɨ fe a nse sɨ kfɨsɨ ikêʼ sɨ koʼsɨ ànfèʼsɨ̀ nà kèynà a ghɨ maʼ ŋweyn ɨvɨ̀s ɨbemnɨ̀. ¹²Mɨtì Shadɨ̀làk ŋêyn Meshàk nɨ̀ Àbednegò ɨ ghelɨ Jûsɨ̀ ghì a fòyn lèm na àŋena na tisɨ̂ àbâs a Babilòn, nɨn yvɨnɨ̂ wì isaʼ ì zæ. Àŋena nɨn koʼsɨ̂ wi mɨ̀yini myâ, koʼsɨ wi ànfèʼsɨ̀ kì a ghɨ fàytɨ nɨ̀ àso ɨkwo a baŋnɨ-a tî.”

¹³A nà ghɨ ta fòyn yvɨ iwo ateyn ɨtoŋ ŋweyn ɨ yaf nô sɨ a ŋaŋ, wu bè na ghɨ ndu lì gvì nɨ̀ Shadɨ̀làk ŋêyn Meshàk nɨ̀ Abednegò. Ghɨ li gvì nɨ̀ àŋena asɨ nɨ̀ fòyn, ¹⁴fòyn ɨ bɨf sɨ̂ Shadɨ̀làk ŋêyn Meshàk nɨ̀ Àbednegò na, “A yi ti n-ghɨ samoʼ na yi n-koʼsɨ̂ wi mɨyini mêm, koʼsɨ̂ wi ànfèʼsɨ̀ kì a mà fàytɨ nɨ̀ àso ɨkwo a baŋnɨ-a tom na ghɨ na koʼsɨ a? ¹⁵Yì kæ yvɨ lvɨ̂yn ta ghɨ tòŋ isoŋ, toŋ ndoŋ buʼ iluŋ nɨ̀ ìndeladèlà-ì, toŋ ànfuŋ nɨ̀ ɨ̀fwo ɨ buʼnɨ ɨlvɨ yi fe kfɨsɨ àkêʼ a nse ɨ koʼsɨ ànfèʼsɨ̀ kì a mà lèm na ghɨ na koʼsɨ-à. Mɨtì ma yì kæ faŋtɨ̀ kòʼsɨ ànfèʼsɨ̀ ateyn, a ghɨ maʼ zɨ ɨvɨ̀s wu bem kɨ tèyn, a mà yeyn fɨyini fìfɨ̀ a ka fɨ fɨsɨ zɨ.”

¹⁶Shadɨ̀làk ŋêyn Meshàk nɨ̀ Abednegò ɨ bèynsɨ̀ ɨ bè sɨ̂ fòyn Nèbùkànezà na, “Ghès nɨn kelɨ wi iwo i li sɨ be sɨ̂ và kûm ìwo yèynì a wà bè têyn a Mbæ̀. ¹⁷Ghɨ kæ màʼ ghes ɨvɨ̀s ɨbemnɨ nâ ghè a Fɨyini fìfɨ̀ a ghès nɨn koʼsɨ na kelɨ àdyaʼ sɨ fvɨsɨ ghes sɨ ateyn, ghɨ sɨ fì sɨ bœ̀sɨ ghes sɨ a wa awu a mbæ̀. ¹⁸Mɨtì ma Fɨyini fɨ̀ fàŋ mɨ tɨ̀ fvɨ̀sɨ ghes a Mbæ̀, wa nà kya na ghès nɨn kòʼsɨ̂ wi mɨyini myâ ghɨ wi sɨ koʼsɨ ànfèʼsɨ̀ kì a wà fàytɨ nɨ̀ aso ɨkwo abaŋnɨ-a ɨ tom na ghɨ na koʼsɨ̂ tì.”

¹⁹Àŋena nɨn taŋi tî ɨtoŋ fòyn Nèbùkànezà ɨ yaf nô sɨ a ŋaŋ wu tàŋsɨ̀ ìkêʼ sɨ̂ Shadɨ̀làk ŋêyn Meshàk nɨ̀ Abednegò, ɨ bè na ghelɨ ghɨ felɨnɨ nɨ̀ ŋweyn kwo ɨvɨs wu na lùm chwô ta ghɨ ni-a kwo wu nà lumà ìngal nsòmbo. ²⁰Ghɨ kwò, fòyn ɨ bè na sugèyʼ sɨ ŋweyn sìsɨ̀ a sɨ n-kelɨ adyaʼ nò sɨ a ŋaŋ kul Shadɨ̀làk ŋêyn Meshàk nɨ̀ Àbednegò ɨ̀ màʼ ɨvɨ̀s ɨbemnɨ nâ ghè. ²¹Sugèyʼ nâ sìsɨ̀ ɨ kul àŋena ɨ màʼ ɨvɨ̀s ɨbemnɨ nâ ghè àŋena ghɨ kɨ nɨ̀ dàla sìsɨ̀ a àŋena nà n-kelɨ ɨwùyn, nɨ̀ ɨ̀nkul ɨtu nɨ̀ tòlàsîsɨ̀ kɨ̀mɨ nɨ̀ ndzɨsɨ lisɨ. ²²Fòyn nà ghɨ ma wu nyòʼsɨ meyn ɨ̀toŋ ɨ̀ bè ghɨ kwo ɨvɨs wu na lùm nô sɨ ŋaŋ. Sugèyʼ sisɨ̀ ɨ lì Shadɨ̀làk ŋêyn Meshàk nɨ̀ Àbednegò ɨ sesɨ màʼ ɨvɨ̀s, ilemi ɨvɨ̀s nâ zɨ̀ ɨ zuetɨ àŋena. ²³Mɨtì ghelɨ nâ ghì ghɨ̀ tal a ghɨ kùlɨ tî ɨ fe antêynɨ̀ ɨvɨ̀s ɨbemnɨ nâ ghè.

²⁴Fòyn Nèbùkànezà ɨ yeyn iwo i ɨchfɨ̂ ŋweyn ɨ yum wu sàʼ làlì ɨ timi iyvɨ ɨ bɨf sɨ̂ ghelɨ ghì a ghɨ n-tebtɨ ŋweyn na, “Ba ghesɨ̀nà nì kul ɨ̀ màʼ ghelɨ ghɨ̀ tal ɨvɨ̀s?”

Àŋena ɨ bèynsɨ̀ ɨ bè na, “Ghɨ nì nà ghɨ ghɨ̀ tal a mbæ̀.”

²⁵Fòyn ɨ bè na, “Yì yeyna, mɨ n-yeyn ghelɨ ghɨ̀ kæ̀ ta ghɨ n-jelɨ̀ kal antêynɨ̀ ɨ̀vɨ̀s bula ghɨ kul, bula ɨvɨsɨ nyôʼ àŋena, wùl ɨ̀ vzɨ̀ a wù kfèynsɨ na àŋena na ghɨ ghɨ̀ kæ̀ ɨ kêʼ ta nchì Fɨyini.”

²⁶Fòyn Nèbùkànezà ɨ kɨŋtɨ ndù àngùŋ ɨvɨs nâ ghè ɨ byal ɨ bè na, “Shadɨ̀làk, Meshàk Abednegò, ghelɨ ghɨ felɨnɨ nɨ̀ Fɨyini fìfɨ̀ a fɨ ngàŋtɨ chwò, yì fvɨ gvì afêyn.”

Àŋena ɨ kæ fvɨ sɨ ɨvɨ̀s nâ ghè. ²⁷Ghelɨ ghì a ghɨ n-tisɨ ɨbyâs ilaʼ ɨ ghaʼlɨnɨ nɨ̀ ɨghî a ghɨ n-tisɨ ɨbyâs ilaʼ ɨtwelâ nɨ̀ ghɨ̀bo nteʼ ɨ gvì yvɨ̀ŋtɨ̀ a ngùŋ nɨ̀ àŋena ɨ yeyn bula ɨvɨsɨ nyôʼ àŋena, faŋtɨ̀ nyoʼ ndzɨsɨ àŋena nô mɨ nɨ̀ nyuŋsɨ atu nɨ̀ àŋenasɨ, fɨleʼfɨ ɨ lɨ̂m wì nô mɨ lɨm a àŋena ɨwùyn.

²⁸Fòyn nɨn yeyn tî ɨ bè na, “Ghesɨ̀nà na koʼsɨ̂ Fɨyini fɨ Shadɨ̀làk ŋêyn Meshàk nɨ̀ Abednego, fɨ tum meyn nchì ŋweyn yì gvî bœ̀sɨ̀ ghelɨ ghɨ felɨnɨ nɨ̀ ŋweyn. Àŋena ti nà yeʼtɨ kɨ ɨwùyn nɨ̀ Fɨyini fɨ àŋenafɨ ɨ̀ faŋ tɨ̀ yvɨ̀nɨ isaʼ i fòyn, gvɨ̂tɨ̀ sɨ kfɨ chwô sɨ koʼsɨ fɨyini fɨ lûfɨ̀ a bu kɨ Fɨyini fɨ àŋena. ²⁹Mɨ n-chwôsɨ̀ ìsaʼ lvɨ̂yn na, nô mɨ ghelɨ ilaʼ ì kà, kèsa ghɨ taŋî nô mɨ ìtaŋi ilaʼ ì kà kæ be iwo i bzɨ-i kûm Fɨyini fîfɨ̀ a Shadɨ̀làk ŋêyn Meshàk nɨ̀ Àbednegò nɨn koʼsɨ a ghɨ kaʼtɨ àŋena kɨ̀ ɨ̀ntɨ̀mlɨ ɨ̀ntɨ̀mlɨ ɨ̀ bɨ̀ytɨ̀ bèbsɨ ndosɨ àŋena. Yi n-ghɨ tèyn bòm ta Fɨyini fɨ lifɨ nɨn ghɨ wi a fɨ kàʼ a fɨ bœsɨ wul ta fɨ bœ̀sɨ àŋena têyn.”

³⁰Wu n-taŋi tî ɨ lèm Shadɨ̀làk ŋêyn Meshàk nɨ̀ Àbednegò a mɨchɨ ɨngaŋtɨnɨ̂ abàs a Babilòn.