2 Samuel 9

Devìt ŋêyn Mèfiboshèt

¹À n-læ meyn nà ghɨ achi a li-a, Devìt ɨ nà kayntɨ̂ nâ, “A nô wùl isas i ndo nɨ̀ Sôl ti bu ghɨ a? Mɨ n-kɨŋ sɨ gàmtɨ wul ìsas i ndo nɨ̀ Sôl bòm sûyn yem Jonatàn.”

²Wu n-kayntɨ tî ghɨ fèʼtɨ̀ na wul ɨ̀ felɨnɨ nɨ̀ Sôl ɨ̀lvì nɨn ghɨ izɨyn i ŋweyn ɨ ghɨ Zibà. Fòyn Devìt ɨ tum jàŋ ŋweyn, wu gvì. Fòyn ɨ bɨf sɨ̂ ŋweyn nâ, “À n-ghɨ và Zibà a?

Wu bɨmi ɨ bè na, “À n-ghɨ mà a mbæ̀.”

³Fòyn ɨ bɨf sɨ̂ ŋweyn nâ, “Wà n-kya wul isas i ndo nɨ̀ Sôl ta wù bu ghɨ a? Mɨ kɨŋ sɨ dyeyn ikôŋ i Fɨyini sɨ̂ ŋweyn.

Zibà ɨ bɨmi ɨ bè na “Mɨ n-kya wâyn Jonatàn ɨ̀lvì ta wù bu ghɨ ma wù lvɨŋ meyn.”

⁴Fòyn ɨ bɨf sɨ̂ ŋweyn na, “Wù ba a?”

Wu bèynsɨ̀ ɨ bè na, “Wu n-chî a ndo nɨ̀ Makì ɨ wayn Amèl a Lodebà.”

⁵Fòyn Devìt ɨ bè ghɨ ndu lì ɨ gvì nɨ̀ ŋweyn sɨ a ndo nɨ̀ Makì a Lodebà.

⁶A nà ghɨ ta ghɨ lì gvì nɨ̀ Mèfiboshèt ɨ wâyn Jonatàn ma à ti ɨ wâyn wâyn Sôl, wu gvi chem asɨ nɨ̀ fòyn ɨ ngvɨmtɨ sɨ beyn ŋweyn.

Fòyn Devìt ɨ toŋtɨ ŋweyn izɨyn na, “Mèfiboshèt,” wu bè na, “Mbæ̀, wul ɨ̀ felɨnɨ nɨ̀ và wêyn.”

⁷Fòyn ɨ bè sɨ̂ ŋweyn na, “Ka wa n-fàyn bòm ta mɨ n-tòʼnɨ nɨ̀ và bòm bò vâ Jonatàn. Mɨ n-kasî fu nse bòbò vâ Sôl sɨ̂ và kɨ ì jɨ̀m. Wà na yɨ ghesɨ̀và kɨ mɨlvɨ ɨ̀n jɨ̀m.”

⁸Wu n-taŋi tî Mèfiboshèt ɨ ngvɨmtɨ ndù a nse ɨ bè na, “Mà ti n-ghɨ nô ndà na wà na tòʼnɨ̀ nɨ̀ mà têyn, ma mà sɨ ghɨ kɨmɨ tèyn ta akfɨ a bɨ a?”

⁹Fòyn ɨ tum jàŋ Zibà ɨ wul ɨ̀ felɨnɨ nɨ̀ Sôl ɨ bè sɨ̂ ŋweyn na, “Ma fu meyn nô mɨ ghà ta bò ifèl nɨ̀ và ŋêyn ìsas i ndo nɨ̀ ŋweyni tî nà kelɨ-a sɨ̂ wâyn wayn ŋweyn Mèfiboshèt.” ¹⁰Zɨ̂ woyn ghya woyn ghɨ lûmnɨ̀ nɨ̀ ghelɨ ghɨ felɨnɨ nɨ̀ và na felɨ̀ a gvêynsɨ̀ nɨ̀ ŋweyn nâ ghè, kfɨ̂ gvî nɨ̀ ɨfwo ateyn ghɨ tôʼnɨ̀ nɨ̀ wâyn wayn bò ifèl nɨ̀ và ateyn. Mèfiboshèt nɨn faŋa nà yɨ kɨ ghesɨ̀ ŋweyn amoʼ.” A nà n-ghɨ tì Zibà ɨ kelɨ woyn woyn ghɨ lûmnɨ̀ njvàsɨ tâyn nɨ̀ ghelɨ ghɨ felɨnɨ mɨ̀vɨm ɨ̀m bò.

¹¹Wu taŋi tì Ziba ɨ bèynsɨ̀ ɨ bè na, “Mɨ n-ni nô mɨ ghà kɨ ighel ta wà bè a mbæ̀.” Sɨ zɨ̀tɨ̀ achi nâ ghè Mèfiboshèt ɨ nà sɨ lum yɨ kɨ ŋêyn fòyn kɨ̀ ta wâyn ntoʼ.

¹²Mèfiboshèt nà n-kelɨ wayn ɨ lûmnɨ̀ wu bu læ̂ ghɨ toŋtɨ̂ na Mikà. Ghelɨ ndo nɨ̀ Zibà nô ghɨ̀ jɨ̀m ɨ nà sɨ ghɨ kɨ ghelɨ ghɨ felɨnɨ sɨ̂ Mèfiboshèt. ¹³Mèfiboshèt ɨ nà sɨ chî kɨ a Jèlusalèm, yɨ ŋêyn fòyn kɨ̀ mɨlvɨ ɨ̀ jɨ̀m. Wu nà n-kya wi sɨ jèl bom ta wù nà n-ghɨ ma wù lvɨŋ meyn.