2 Samuel 8

Devìt ɨ tɨm yɨ mbàynɨ̀ sɨ ghelɨ Isìlæ̀

¹A nà n-ghɨ ta Devìt nɨn ghɨ fòyn, wu tɨm yɨ ghelɨ Fìlisìyà ɨ lì àbâs ilaʼ nɨ̀ àŋena kì a ghɨ nà n-toŋtɨ na Meteg Amà, ghelɨ Fìlisìyà ɨ nà bu kelɨ wi iwo sɨ nì nɨ̀ àbâs ilaʼ nâ kì. ²Devìt nɨn fi meyn tɨm yɨ ghelɨ Mowàb ɨ kàyn sugèyʼsɨ ateynsɨ ɨ nyiŋi tala a nse ghɨ̀ tal ghɨ̀ tal, wu nà zue ghɨ̀ bo visî ɨ̀mòʼ. Ghelɨ Mowàb ghì a ghɨ n-faŋ ɨ nà sɨ fêl isas isaʼ nɨ̀ fòyn Devìt, nyâŋsɨ̀ fu nô mɨ ghà sɨ̂ ŋweyn ta wù n-kɨŋ.

³Devìt nɨn fi meyn tɨm yɨ Hàdadezà ta wu nà n-ghɨ fòyn Zobà. Hàdadezà nâ wèyn nà n-ghɨ wâyn Lehòb. Devìt nɨ̀n læ tɨm yɨ Hàdadezà ta wù nà n-ndû sɨ kasi sɨ ghal sɨ sfɨ abâs a njvâ Yuflèt kì a kɨ nà n-ghɨ abàs ikuè. ⁴Devìt nɨn yɨ iwoŋ ateyn ɨ ghal fsɨ mɨ̀nchaʼ nkam nɨ̀ sugeyʼ sìsɨ̀ a sɨ nà n-gûf mɨ̀chaʼ mɨ̀ àteyn nkamsɨ nsòmbo ɨ fi ghaytɨ ɨsîsɨ̀ a sɨ nà n-jêl nɨ̀ ɨ̀vɨ nkamsɨ mɨ̀vɨ̂m mbò. Wù n-fi meyn bè ghɨ kòytɨ afyeyn a nyâm sìsɨ̀ a sɨ nà n-gûf mɨ̀nchaʼ a faŋ kɨ nyamsɨ ɨvɨ.

⁵A nà n-ghɨ ta sugèyʼsɨ̀ Alàmsɨ̀ lù a Dàmascùs ɨ̀ gvì sɨ gàmtɨ Hàdadezà ɨ fòyn Zobà, Devìt ɨ zuetɨ sugyeʼsɨ àŋena nkamsɨ mɨ̀vɨm ɨ̀m bò njvâsɨ̀ bò. ⁶Fòyn Devìt ɨ lèm ìnôyn i sugèyʼsɨ̀ a ntèʼ Alàm a Dàmascùs. À ti iwo zɨ̀ a yi n-læ nì ghelɨ Sylìyà ɨ bɨmi sɨ nà ghɨ isas isaʼ nɨ̀ fòyn Devìt, fu nô mɨ ghà ta wù n-kɨŋ. Bôbo Fɨyini nɨn ni meyn Devìt ɨ nà tɨm mɨ ìwoŋ ì kà yɨ kɨ yɨ.

⁷Sugèyʼsɨ Devìtsɨ̀ nɨn ghal meyn fsɨtɨ nkyàsɨ iwòŋ nɨ̀ chyeʼsɨ Hàdadezàsɨ̀ ma ghɨ fàytɨ nɨ̀ àso ɨkwo abaŋɨ-a ɨ lu ndù nɨ̀ nseynsɨ a Jèlusalèm. ⁸Àŋena nɨn gvi meyn kɨmɨ nɨ̀ ìdyani a Jèusalèm yi dvɨ̂ kɨ tèyn ma ghɨ lì a ntèʼ Tebà nɨ̀ ntèʼ Bèlotày. Ntèʼ nâ sèynsɨ̀ nɨn læ nà ghɨ a saʼ Hàdadezà.

⁹A nà ghɨ ta Tû ɨ fòyn Hamàt yvɨ na Devìt tɨm meyn yɨ sugèyʼsɨ Hàdadezà nô sɨ̀ jɨ̀m, ¹⁰wu tum wâyn ŋweyn Jolàm na wù ndu tòŋtɨ Devìt ɨ̀ bèmsɨ ŋweyn ta wu tɨm yɨ fòyn Hàdadezà, ma ŋêyn ŋweyn nɨn læ meyn nà nû-à. Jolàm ɨ ndù nɨ̀ tɨ̀futɨ sɨ̂ Devìt ma ghɨ fàytɨ nɨ̀ àso ɨkwo abaŋɨ-a nɨ a fɨfâ nɨ̀ idyani.

¹¹Wu n-fu ɨfwo ateyn, fòyn Devìt ɨ lèm sɨ a ɨfwo ifèl nɨ̀ Bôbo Fɨyini kɨ ighel ta wu n-læ lèm aso ɨkwo a baŋnɨ-a nɨ̀ a fɨfâ kì a wu n-sfɨtɨ a tɨ̂laʼ afî a wù n-tɨm yɨ sɨ asɨ. ¹²Tɨlaʼ tìtɨ̀ a wu n-tɨm yɨ sɨ asɨ nà n-ghɨ Edòm nɨ̀ Mowàb nɨ̀ ghelɨ Amòn, nɨ ɨ ghɨ Fìlisìyà nɨ̀ Amalèk. Wù n-lem meyn kɨmɨ ɨ̀fwo vzɨ̀ a wu n-sfɨ sɨ̂ Hàdadezà ɨ wâyn fòyn Lehòb ta wu nà n-ghɨ fòyn Zobà sɨ a ɨfwo ifèl nɨ̀ Bôbo Fɨyini.

¹³Devìt nɨn læ ndù ɨ tɨm zuètɨ ghelɨ Edòm nkam njvàsɨ̀ nfama a Afoŋlɨ a Fɨ̂ngvaŋ ɨ kasi kfa, izɨyn i ŋweyn ɨ fi ngaŋtɨ ndu kɨ asɨ.

¹⁴Wu n-se sɨ kasi sɨ lù ɨ lèm ìnôyn i sugeʼsɨ̀ kɨ̀ ɨlwèʼ ɨlweʼ a Edòm, ghelɨ Edòm ɨ nà sɨ ghɨ a ŋweyn isas isaʼ. Bôbo Fɨyini ɨ nì Devìt ɨ nà nû nô mɨ ìlaʼ ì kà yɨ kɨ yɨ.

Ghelɨ ghɨ felɨnɨ nɨ̀ Devìt

¹⁵Devìt nà n-saʼ Isìlæ̀ ì jɨ̀m, nî nô mɨ gha kɨ̀ ighel ta isaʼi nɨn kɨŋ sɨ̂ ghelɨ ŋweyn kɨ ghɨ̀ jɨ̀m. ¹⁶À nà n-ghɨ ta Devìt nɨ̀n ghɨ fòyn, Jowàb ɨ wâyn Zèluwà ɨ ghɨ àtu a sugèyʼsɨ̀ nɨ̀ Devìt. Jèhoshafàt ɨ wâyn Ahilùd ɨ ghɨ wul ɨ vzɨ̀ a wù n-fêʼtɨ̀ nô mɨ ghà ta Devìt nɨn kɨŋ sɨ̂ ghelɨ. ¹⁷Zadòk ɨ wâyn Ahitùb ŋêyn Ahimelèk ɨ wâyn Abìyatà ɨ ghɨ ngàŋsɨ ndô Fɨyini, Selìyà ɨ ghɨ wul ɨ̀ nyaʼnɨ. ¹⁸Benayà ɨ wâyn Jèhoyidà nà n-ghɨ àtu sɨ̂ nchì sìsɨ̀ a sɨ n-kini Devìt, woyn Devìt ɨ ghɨ chyeʼsɨ ntoʼ.