2 Samuel 7

Ichfɨ̂nɨ̀ i Fɨyini sɨ̂ Devìt

¹A nà n-ghɨ ta Bôbo Fɨyini gàmtɨ fòyn Devìt, wù tɨm yɨ mbàynɨ̀ sɨ ŋweyn nô sɨ̀ jɨ̀m ɨ̀ nà sɨ boynɨ̂ chî a ŋweyn a ntoʼ, ²ɨtuʼ layn achi a li-a wu bè sɨ nfèʼtɨ̀ Natàn na, “A n-ghɨ mà têyn, chî a ntoʼ ma ghɨ bàʼlɨ̀ nɨ̀ ɨ̀nkâʼ mɨ̀ Sedà mɨtì àntayntayn a mɨ̂kàyn nɨ̀ Bôbo ɨ chî a fɨ̂twòtɨ̂.

³Natàn ɨ bè sɨ̂ ŋweyn na, “Ndu nî nô mɨ ghà ta wà n-kfâʼtɨ̀ sɨ nì bòm ta Bôbo Fɨyini nɨn ghɨ zɨ̂ ŋweyn.”

⁴A ni kfa nà ghɨ nɨ̀ntuʼ achi nâ ghè Bôbo Fɨyini ɨ taŋi sɨ̂ Natàn ɨ bè na,

⁵“Ndu bè sɨ̂ wul ɨ̀ felɨnɨ nɨ̀ mà ɨ Devìt na, Bôbo Fɨyini bè na, ‘À n-ghɨ wi vâ sɨ bàʼlɨ ndo na mà na chî ateyn. ⁶Ma bû tìmi ɨ̀ chi a ndo ta ghɨ bàʼlɨ̀ sɨ zɨ̀tɨ̀ sɨ achi ta mà lì fvɨ̀ nɨ̀ ghelɨ Isìlæ̀ sɨ a Ijìb sɨ koʼ sɨ chem layn. Mà tî nà chî kɨ a fɨ̂twotɨ̂, jêl chwô kɨ àlêʼ nɨ̀ àleʼà ghesɨ̀ ghelɨ Isìlæ̀. ⁷À ti nà ghɨ ta ghesɨ̀ ghelɨ Isìlæ̀ nɨn jêl chwô bula ma timi bɨ̀f sɨ̂ fòyn àŋena ɨ̀lvì ta mà choʼ na wù na tisɨ̂ ghelɨ̀ ghem nâ, “Bòm ghà ta wà bû bàʼlɨ̀ ndo nɨ̀ ɨ̀nkâʼ mɨ̀ sedà sɨ̂ mà a?” ’

⁸“Mɨ n-bê sɨ̂ và lvɨ̂yn na wà be sɨ̂ wul ɨ̀ felɨnɨ nɨ̀ mà ɨ fòyn Devìt na, ‘Iyeynì nɨn ghɨ ìwo zɨ̀-i a Bôbo ɨ bò Ɨ̀dwaʼ Ɨ̀jɨ̀m bè na mà be sɨ̂ và.’ Mà tî lì fvɨ̀ nɨ̀ và ɨtwaʼ wa chî nyamsɨ afu ɨ̀ lèm và na wà na saʼ ghelɨ Isìlæ̀ nɨ̀ mà. ⁹Ma ti meyn nà ghɨ ghesɨ̀và nô mɨ wo ta wà ndù ɨ̀ nì wà tɨm yɨ mbàynɨ̀ shyasɨ nô sɨ̀ jɨ̀m. Mɨ n-nî lvɨ̂yn a ɨzɨyn ì zæ na ngaŋtɨ̂ kɨmɨ ta azɨyn a ghelɨ ghɨ ngaŋtɨnɨ ghɨli a mbzɨ. ¹⁰Mɨ n-fu àlêʼ a ghelɨ̀ Isìlæ̀ nɨ̀ mà na chî ateyn, faytɨ̂ kelɨ kɨ nô àlêʼ a ngeŋ nɨ̀ àŋena, wùl ɨ bu tâysɨ̀ wi àŋena. Ghelɨ ghɨ bɨ læ̀ nà bu yeʼtɨ̂ wi àŋena ta ghɨ tî nà yeʼtɨ sɨ asɨ, ¹¹kɨ sɨ ɨtuʼ ta mà chòʼtɨ ghelɨ ghɨ tisɨnɨ a zɨ̀ antêynɨ̀. Mɨ fì nì-à a yì keli mbôynɨ̀ a mbàynɨ̀ sisɨ na bu fu wi ngeʼ sɨ̂ zɨ̀.

Bôbo Fɨyini be meyn na, “Mɨ n-nì-à a tɨfôyntɨ̀ læ̂ nà fvɨ a wa ɨntweŋ. ¹²À læ̀ nà ghɨ ta mɨ̀chi myâ mæ̀, wà kfa ɨ̀ ndù yeyn ghɨ̀bo ghya, a mà choʼ wâyn vâ ɨ̀lvɨ sɨ a fòyn ɨ̀ nì a ɨfôyn ɨ ŋweyn na to. ¹³À n-ghɨ ŋweyn vzɨ̀ a wù læ̀ bâʼlɨ̀ ndo sɨ̂ mà Bôbo Fɨyini, a mà fî nì a ɨfôyn ŋweyn faŋ kɨ̀ samoʼ. ¹⁴Mà læ̀ nà ghɨ bæ̀ sɨ̂ ŋweyn wu ghɨ wayn sɨ̂ mà. Wù ni bebsɨ ma leŋ ŋweyn nɨ̀ ngvàlìsɨ̀ ta bò wayn nî wu leŋ. ¹⁵Mà læ̀ faŋ wi tɨ̀ nà kôŋ ŋweyn ta mɨ n-læ faŋ sɨ̂ Sôl ɨ nì wa lì àlêʼ a ŋweyn sɨ a fòyn. ¹⁶Ghelɨ ndo nɨ̀ và nɨn faŋa nà lum saʼ kɨ saʼ a Isìlæ̀, a ɨfôyn va faŋ kɨ̀ samoʼ.”

¹⁷À ti ta Nfèʼtɨ̀ Natàn nɨ̂n fèʼtɨ nô mɨ ghà vzɨ̂ a Bôbo Fɨyinì bè sɨ̂ Devìt.

Devìt ɨ Jèm

¹⁸Wu n-taŋi tî Devìt ɨ ndu zɨ a fɨ̂twòtɨ̀ nɨ̀ Bôbo Fɨyini ɨ bè na:

Ghesɨ̀ isas i ndo nɨ̀ mà nɨn kfeynɨ̂ wì awo afî a wà sɨ ghɨ ma wà nî meyn sɨ̂ ghès a Bôbo Fɨyini ɨ bò ɨ̀dwaʼ ɨ̀ jɨ̀m. ¹⁹Wà bu faŋ kɨ awo afi a wà sɨ ghɨ ma wà ni meyn. Wà fi meyn fèʼtɨ̀ àwo kì a kɨ læ̀ gâyn sɨ̂ ɨ̀jwâŋ vzɨ̀ a wu læ̀ koʼ ibàm isas i ndo nɨ̀ wùl ɨ̀ felɨnɨ nɨ̀ và. A wà ti n-nî kɨmɨ tèyn sɨ̂ ghelɨ a Bôbo, bò ɨ̀dwaʼ ɨ̀ jɨ̀m?

²⁰Iwo ili bu ghɨ wi a mà kaʼ a mà fî bè sɨ̂ và bòm ta wà n-kya mesì wul ɨ̀ felɨnɨ nɨ̀ và a Bôbo Fɨyini, bò ɨ̀dwaʼ ɨ̀ jɨ̀m. ²¹Wà nì àwo a ngaŋtɨnɨ-a kèynà sɨ yeʼi ma. Wà nì ta wà n-kɨŋ, kɨ ighel ta wà n-læ chfɨ̀nɨ sɨ̂ wùl ɨ̀ felɨnɨ nɨ̀ và.

²²Bôbo Fɨyini, bò ɨ̀dwaʼ ɨ̀ jɨ̀m, wà ngaŋtɨ̂ kfeynâ wùl ɨlvɨ ɨ ghi wi ta vâ. Fɨyini fɨ lifɨ ɨ ghɨ wi a bu kɨ và, kɨ ighel ta ghɨ n-læ fèʼtɨ sɨ̂ ghès. ²³Ilaʼ ili nɨn ghɨ wi a mbzɨ ta Isìlæ̀. À n-ghɨ kɨ ìnyeyni zɨ̀ a wà n-læ yuyn teyn sɨ a ghêl nɨ̀ và. Wà n-ni meyn awo a bemnɨ-a nɨ̀ akayna ɨ̀ dyèyn àdyaʼ a kaynɨ-a ɨ̀ sàŋ fvɨ̀sɨ̀ ghelɨ tɨlaʼ tɨlûtɨ̀ nɨ̀ mɨyini mɨ̀ àŋena sɨ fu dzɨ sɨ̂ ghelɨ̀ ghya ta wa n-li fvɨ̀ nɨ̀ àŋena sɨ a Ijìb. ²⁴Wa n-læ meyn lèm na ghès Isìlæ̀ na ghɨ ghelɨ̀ ghya kɨ mɨlvɨ ɨ̀n jɨ̀m, wa ghɨ Fɨyini fɨ àŋena a Bôbo.

²⁵Mɨ n-jêm a Bôbo Fɨyini na wà ni kɨ ta wà sɨ ghɨ ma wà chfɨnɨ̀ meyn sɨ̂ wul ɨ̀ felɨnɨ nɨ̀ và ŋêyn isas i ndo nɨ̀ ŋweyni. Ni kɨ ta wà wà chfɨ̀nɨ̀. ²⁶Wà nì têyn a ghelɨ faŋ nà koʼsɨ̂ và kɨ̀ mɨlvɨ ɨ̀n jɨ̀m bê na, ‘Bôbo Fɨyini ɨ Bò Ɨdwaʼ ɨjɨ̀m nɨn ghɨ Fɨyɨ̀nì fɨ Isìlæ̀.’ Ghelɨ isas i ndo nɨ̀ Devìt faŋ meyn achɨ. ²⁷Bôbo Fɨyini, Bò Ɨ̀dwaʼ ɨjɨ̀m, Fɨ̀yini fɨ ghelɨ Isìlæ̀, wà dyeyn meyn bàynsɨ sɨ̂ mà wul ɨ̀ felɨnɨ nɨ̀ và na, wa nì-a a ghelɨ ndo nɨ̀ mà na lum saʼ kɨ saʼ a Isìlæ̀. À ti iwo zɨ̀ a yi nì ma keli adyaʼ sɨ jèm a dzɨ̀ ghâyn a mà jèm ateyn. ²⁸Bôbo Fɨyini, bò ɨ̀dwaʼ ɨ̀ jɨ̀m, wà n-ghɨ Fɨyini, wà n-chfɨ̂nɨ̀ nô mɨ ghà nî kɨ tì. Wà chfɨnɨ meyn àwo a jûŋ kèynà sɨ̂ wul ɨ̀ felɨnɨ nɨ̀ và. ²⁹Ma na sɨ bê a Bô na wà boysɨ isas i ndo nɨ̀ wùl ɨ̀ felɨnɨ nɨ̀ và yi faŋ nà lum saʼ kɨ saʼ. Wà n-kelɨ àdyaʼ atu awo ajɨ̀m a Bôbo Fɨyini, bò ɨ̀dwaʼ ɨ̀ jɨ̀m. Wà sɨ ghɨ ma wà taŋi meyn a Bôbo Fɨyini. Ta wà bè, mɨ n-kya na wa n-boysɨ̂ ìsas i ndo nɨ̀ wul ɨ̀ felɨnɨ nɨ̀ và kɨ̀ samoʼ.