2 Samuel 10

Devìt ɨ tɨm yɨ ghelɨ Amòn

¹A nà n-ghɨ ta fòyn ghelɨ Amòn lè, ghɨ yisi wâyn ŋweyn Hanùn sɨ a fòyn. ²Fòyn Devìt ɨ lèm na yi n-dyèyn ìkôŋ sɨ̂ Hanùn kɨ̀ ighel ta bò ŋweyn Nahàsh nɨn læ dyèyn sɨ̂ zɨ̀ Devìt ɨ tum ghelɨ na ghɨ ndu tòŋtɨ Hanùn sɨ ikfɨ nɨ̀ bò ŋweyn.

A nà ghɨ ta ghelɨ ghì a wù tum ndù chem, ³chyeʼsɨ Amònsɨ̀ ɨ bè sɨ̂ Hanùn ɨ fòyn àŋena na, “Ka wà na kfâʼ na Devìt tùm ghelɨ ghèyn na ghɨ gvi chàmlɨ ɨ̀wuyn ikfɨ nɨ̀ bò vâ. Wù tùm na ghɨ gvi kùŋlɨ ki ɨlwêʼ a ntèʼ afêyn ta ka wù keli sɨ tɨm sɨ yɨ.” ⁴Àŋena nɨn taŋi tî, Hanùn ɨ bè ghɨ ghal ghelɨ ateyn ɨ nà kom nô mɨ ìdyel i nda kɨ abâs àmòʼ, fî sɨ choʼ ndzɨsɨ ŋweyn kɨ̀ ɨbuyn asas. Ghɨ n-nì tî ɨ sàŋ àŋena ghɨ lù.

⁵A nà n-ghɨ ta Devìt yvɨ iwo ateyn wu tum ɨ bè na àŋena faŋ kɨ̀ a Jèlikò sɨ chem ta ka adyel a àŋena kasi chɨl àŋena kæ kasi sɨ gvì a Jèlusalèm. A nà n-ghɨ tì àŋena wumî nô sɨ a ŋaŋ bòm dzɨ zɨ̀ a ghɨ n-wùmsɨ àŋena ateyn.

⁶Ghelɨ Amòn nɨn keli na iwo zɨ̀-ì a àŋena mòm ni meyn fòyn Devìt na nyôʼsɨ̀ ɨ̀toŋ nô sɨ a ŋaŋ, àŋena tas iwoŋ ɨ làʼ sugèyʼsɨ̀ a ntèʼ Bet Lehòb a Alàm nɨ̀ Zobà nkam mɨ̀vɨm ɨ̀m bò. Fòyn Makà ɨ tsɨynsɨ sugèyʼsɨ̀ nkam, sɨ lisɨ ɨ gvì ma sɨ lù a Tôb nkam njvàsɨ̀ bò.

⁷Fòyn Devìt ɨ yvɨ iwo ateyn ɨ tum Jowàb ŋêyn sugèyʼsɨ̀ nô sɨ̀ jɨ̀m na àŋena ndu nù ghelɨ Amòn. ⁸Sugèyʼsɨ Amònsɨ̀ ɨ fvɨ timi ɨ nà gvɨ̂tɨ̀ ɨchfɨ ayisi nɨ̀ àŋena. Sugèyʼ sìsɨ̀ a sɨ n-fvɨ̀ a ntèʼ Zobà nɨ̀ Lehòb nɨ̀ Tôb nɨ̀ Makà ɨ timi kɨ sɨ a nyɨŋ ɨ nà gvɨ̂tɨ̀ a gvêynsɨ̀.

⁹Jowàb ɨ yeyn na sugèyʼsɨ̀ nɨn gvî a ŋweyn asɨ, sɨ lisɨ gvî a ŋweyn ibàm. Wu choʼtɨ sugèyʼsɨ ŋweyn sɨ̀sɨ̀ a sɨ nà n-faytɨ kya sɨ tɨm iwoŋ ɨ tum na sɨ ndu ɨ̀ nù sugèyʼ sìsɨ̀ a sɨ lù a Alàm. ¹⁰Wù n-choʼ meyn wâynà ŋweyn Abishà na wù na tisɨ̂ sugèyʼ sîsɨ̀ a sɨ faŋ ɨ tum na àŋena ndu nù ɨsîsɨ̀ a sɨ lù a Amòn. ¹¹Jowàb nɨ̂n bè na, “Yi ndu, mà kæ yeyn na sugèyʼsɨ Alàmsɨ̀ nɨn kɨŋ sɨ to sɨ chwo ghes a mà jaŋ zɨ a yì gvi ɨ̀ gàmtɨ̀, ma sugèyʼsɨ Amònsɨ̀ kæ nà kɨŋ sɨ to sɨ chwo zɨ a ghèsɨ̀ gvi a ghesɨ̀nà chɨyntɨ nù àŋena. ¹²Mɨ n-kɨŋ na yì na to, ghesɨ̀nà nu kɨ nô nɨ̀ àdyaʼa ɨ̀ gàmtɨ ghelɨ ghesɨ̀nà nɨ̀ ntèʼsɨ Fɨyini nɨ̀ ghesɨ̀nàsɨ. Bôbo Fɨyini nɨn nî kɨ izi-ì a yi n-kfeynɨ sɨ̂ ŋweyn.”

¹³Jowàb nɨn taŋi tî ŋêyn sugèyʼsɨ ŋweynsɨ ɨ lu ɨ ndù sɨ nu sugèyʼsɨ Alàm, sɨ leʼnɨ. ¹⁴A nà n-ghɨ ta sugèyʼsɨ Amònsɨ̀ yèyn ta sugèyʼsɨ Alàmsɨ̀ nɨn leʼnɨ, àŋena boŋ leʼnɨ zɨ a ntèʼ ta ghɨ yèyn ta Abishà nɨn gvî ŋêyn sugyeʼsɨ̀ ŋweynsɨ. Yi n-gàyn tî Jowàb ɨ kasi kfa a Jèlusalèm sɨ iwòŋ afî a wu na n-tɨm ŋêyn sugèyʼsɨ Amònsɨ̀.

¹⁵A nà ghɨ ta ghelɨ Alàm yèyn na Isìlæ̀ tɨm meyn yɨ àŋena, àŋena kasi yvɨ̀ŋtɨ̀ ngeŋsɨ àŋena. ¹⁶Fòyn Hàdadezà ɨ tum jàŋ sugèyʼsɨ Alàm sìsɨ̀ a sɨ nà n-ghɨ injɨyn i jvâ, Shobàk ta wu nà n-ghɨ atu a sugèyʼsɨ̀ sɨ̂ fòyn Hàdadezà ɨ li gvì nɨ̀ nseynsɨ a ntèʼ Helàm.

¹⁷A nà ghɨ ta fòyn Devìt yvɨ iwo zɨ̀-ì a yi n-gâyn, wu yvɨ̀ŋtɨ̀ sugèyʼsɨ Isìlæ̀ nô sɨ̀ jɨ̀m, ŋêyn ɨ̀nseynsɨ ɨ dyàŋ jvâ Jodàn ɨ zɨ a ntèʼ Helàm. Sugèyʼsɨ Alàmsɨ̀ ɨ baʼtɨ ɨ zɨ̀tɨ̀ sɨ nu sugèyʼsɨ Isìlæ̀. ¹⁸Ghɨ se sɨ nù, sugèyʼsɨ Alàmsɨ̀ ɨ lèʼnɨ, Devìt ɨ zuetɨ sugèyʼ sìsɨ̀ a sɨ nà n-kelɨ mɨ̀nchaʼ ighɨ nsòmbo, nɨ ɨsîsɨ̀ a sɨ na n-jêl nɨ̀ ɨ̀vɨ nkam mɨ̀vɨm ɨ̀n kæ̀. Wù n-læ meyn tɨm kɨmɨ Shobàk ta wu nà n-ghɨ atu a Sugyèyʼsɨ Alàm wu kfɨ kɨ afu. ¹⁹A nà ghɨ ta tɨfôyn tìtɨ̀ a tɨ nà n-ghɨ isas nɨ̀ fòyn Hàdadezà yeyn na sugèyʼsɨ Isìlæ̀sɨ yɨ meyn iwòŋ, àŋena chwotɨ fòyn Devìt sɨ nà ghɨ isas isaʼ nɨ̀ ŋweyn.

Yi n-gàyn tî, ghelɨ Alàm ɨ nà sɨ fâyn sɨ nà fî gâmtɨ̀ ghelɨ Amòn.