2 Samuel 4

Ghɨ zue Ishboshèt

¹A nà n-ghɨ ta Ishboshèt ɨ wâyn Sôl yvɨ na Abnà kfɨ meyn a Heblòn, iwo ateyn ɨ fu ngeʼ sɨ̂ ŋweyn nô sɨ a ŋaŋ, ghelɨ Isìlæ̀ nô ghɨ̀ jɨ̀m ɨ nà sɨ faynà. ²Ishboshèt nà n-kelɨ ghelɨ ghɨ̀ bò a ghɨ ɨ̀tu ɨ sugeyʼ sìsɨ̀ a sɨ nà n-fvɨ̂ nû ntèʼ sɨ lisɨ ghal fsɨtɨ̂ ɨ̀fwo kasi kfâ nɨ̀ ɨ̀ŋweyn. Azɨyn a àŋena nà n-ghɨ Banà nɨ̀ Lekàb, a ghɨ woyn Limòn ɨ wul ìsas i ndo nɨ̀ Benjamìn ma wù fvɨ̀ a ntèʼ Belòt. Ghɨ n-lî na Belòt nɨn ghɨ kɨmɨ ntèʼ ìlì a Benjamin, ³bòm ta ghelɨ ateyn nɨn læ leʼ leʼ ɨ ndu nà chî a ntèʼ Gitèm ta ghelɨ ɨtum sɨ koʼ sɨ chem layn.

⁴Jonatàn ɨ wâyn Sôl nà n-kelɨ wayn ɨ lûmnɨ̀ ghɨ toŋtɨ̂ na Mèfiboshèt ma wù lvɨ̂ŋ meyn kɨ̀ afyeyn à jɨ̀m. Sôl ŋêyn Jonatàn nɨn læ kfɨtɨ iwòŋ tî Mèfiboshèt ɨ ghɨ bèŋ sɨ̀ tâyn. A nà ghɨ ta n-lì Mèfiboshèt yvɨ̀ na Sôl ŋêyn Jonatàn kfɨtɨ meyn iwòŋ, wu lì Mèfiboshèt ɨ nà sɨ leʼ nɨ̀ ŋweyn. Wu n-se sɨ leʼ tî ɨ màʼ wayn wu fe ɨ lvɨŋ.

⁵Lekàb ŋêyn Banà ɨ lù achi a li-a ɨ nà ndû a ndo nɨ̀ Ishboshèt ɨ ndu chem a ntô nchuè Ishboshèt ɨ nyɨŋ buntɨ̂ bùntɨ. ⁶Àŋena zɨ ndù antêynɨ̀ ndo keʼ tèyn ta ghɨ n-kɨŋ sɨ lì asaŋ ɨ sù ŋweyn ɨlvà nɨ̀ fɨ̀nyuèfɨ ɨ kasi kuŋlɨ fvɨ̀ ɨ lù.

⁷Àŋena nɨn zɨ a ndo nɨ̀ Ishboshèt tì wu bunî bùni, àŋena chuʼ ɨ zue ŋweyn ɨ teyn atu a ŋweyn ɨ li lù nɨ̀ àkeyna. Àŋena nɨn lù tî ɨ chwò dzɨ a Alabà ɨ chi jelɨ kɨ nɨ̀ntuʼ, ⁸ɨ ndu chem a Heblòn ɨ dyèyn àtu ateyn sɨ̂ Devìt ɨ bè na, “Akeynà nɨn ghɨ àtu a Ishboshèt ɨ wâyn mbàynɨ̀ zyâ Sôl ta wu n-læ nà kɨŋ sɨ zue vâ. Bôbo Fɨyini sɨsɨ meyn ìwo zɨ̀ a Sôl ŋêyn woyn ŋweyn nɨn læ ni sɨ̂ và layn a bô.

⁹Devìt ɨ bè sɨ̂ Lekàb ŋêyn wâynà ŋweyn Banà ɨ woyn Limòn ɨ Belòt na, “Mɨ n-bê sɨ̂ zɨ̀ sɨ a izɨyn nɨ̀ Bobo Fɨyini fìfɨ̀ a fɨ n-chi ma fɨ bœsɨ meyn mà sɨ a ngeʼ sɨ̀ jɨ̀m, ¹⁰na à n-læ nà ghɨ ta wùl gvì bè sɨ̂ mà a Ziklàg na Sôl kfɨ meyn, kfâʼ na mɨ n-yvɨ ìwo ateyn nà saŋlɨ-a, ma ghal ɨ zue ŋweyn. À ti ta mɨ n-læ màʼtɨ ŋweyn bòm saʼgha nâ zɨ̀. ¹¹Mà ti kæ nà sɨ ghɨ ma ma ni meyn ìwo tèyn, ma jèl nô ti sɨ̂ ghelɨ ghɨ bɨ têyn ta zɨ ma ghɨ ndù meyn ɨ̀ ghal zuè wul wu kya wi iwo nyɨŋ a ŋweyn ɨkuyn bunî bùni-a? Yi n-làʼ mɨ̀luŋ mɨ̀ ŋweyn nɨ̀ àtu à ki-a.”

¹²Devìt nɨn taŋi tî ɨ bè sugèyʼsɨ ŋweynsɨ ɨ zuetɨ ghelɨ nâ ghì ghɨ̀bò ɨ tèyntɨ ɨ̀wu àŋena nɨ̀ ɨ̀vzɨ ɨ ghaŋsɨ ìwuyn i àŋena a mbæ̀ àchɨ̀m a Heblòn ɨ lì àtu a Ishboshèt kì ɨ gvɨ̀mi isè afî a ghɨ n-læ gvɨ̀mi Abnà ateyn a Heblòn.