2 Samuel 5

Ghɨ yisi Devìt sɨ a Fòyn a Isìlæ̀

¹A nà n-ghɨ ta awo nâ kèynà gàyn koʼ, a nà ghɨ achi a li-a, ghelɨ ghɨ tisɨnɨ a ntèʼsɨ Isìlæ̀ nô sɨ̀ jɨ̀m ɨ gvi yeyn Devìt a Heblòn ɨ bè sɨ̂ ŋweyn na, “Ghesɨ̀nà nɨn ghɨ tèyn ghɨ kɨ woyn wûl ɨ̀moʼ. ²À ti nà ghɨ ta Sôl nɨ̀n ghɨ fòyn ghesɨ̀nà, a seʼ và nɨ̀ sugèyʼsɨ Isìlæ̀sɨ̀ ɨtwaʼ iwòŋ, ma Bôbo Fɨyini nɨn læ meyn chfɨ̀nɨ̀ na, wà læ̀ nà ghɨ fòyn sɨ̂ ghelɨ Isìlæ̀ tisɨ̂ àŋena.

³À nà n-ghɨ ta chyeʼsɨ Isìlæ̀sɨ̀ gvì yeyn fòyn Devìt ŋêyn àŋena ɨ yɨ mɨkâyn asɨ nɨ̀ Bôbo Fɨyini a Heblòn. Àŋena yisi Devìt sɨ a fòyn Isìlæ̀.

⁴Ghɨ n-læ yisi Devìt sɨ a fòyn wu ghɨ bèŋ mɨ̀vɨm ɨ̀n tal, wu saʼ sɨ a bèŋsɨ̀ mɨ̀vɨm ɨ̀n kæ̀. ⁵Wù nà n-chî a Heblòn, saʼ ghelɨ Judà ɨ saʼ sɨ a bèŋsɨ̀ nsòmbo nɨ̀ abeʼa. A nà ghɨ ta wù n-chî a Jèlusalèm chɨ̂yntɨ̀ saʼ Judà nɨ̀ Isìlæ̀ ɨ saʼ sɨ a bèŋ mɨ̀vɨm ɨ̀n tal njvàsɨ̀ tal.

Devìt ɨ tɨm yɨ Jèlusalèm

⁶À n-læ nà ghɨ achi a li-a, fòyn Devìt ɨ lì sugeyʼsɨ ŋweyn ŋêyn àŋena ɨ koʼ sɨ nu ghelɨ Jebùs ghì a ghɨ nà n-chi a Jèlusalèm. Ghelɨ Jebùs nâ ghì ɨ bè sɨ̂ ŋweyn na, “Wa kaʼ wà kàʼ wa bû zɨ a ntèʼ afêyn. Nô mɨ ɨ̀nfyèf nɨ̀ mɨ̀ngês nɨn kfeynɨ̂ sɨ saŋ vâ.” Àŋena nà n-kya wi na sugèyʼsɨ Devìtsɨ̀ kàʼ a sɨ nu àŋena. ⁷Mɨtì Devìt ŋêyn sugèyʼsɨ ŋweynsɨ ɨ nù ɨ fsɨ ntèʼ Zayòn, yi ghɨ antêynɨ̀ mbàyn ighaʼnɨ ghɨ nà sɨ toŋtɨ̂ na, Ntèʼ Devìt.

⁸A nà n-ghɨ achi ghè a ka àŋena nu ghelɨ Jebùs ateyn, Devìt ɨ bè sɨ̂ sugèyʼsɨ ŋweynsɨ na, wùl kæ nà ghɨ sɨ nù sɨ yɨ ghelɨ Jebùs nâ ghèyn, a wù toynɨ dzɨ afoŋlɨ afî a ghɨ tɨm mu na chwô ateyn isas i nse tì. Ghɨ kæ toynɨ dzɨ ateyn, a ghɨ tɨm yɨ mingês nâ mzɨ̀ nɨ̀ ɨ̀nfyefɨ̀. Mɨ n-bâyn àŋena fu kɨ sɨ̂ ikfɨ-i.” À ti iwo zɨ̀ a yi n-læ ni ghɨ nà mô ngàyn î lì na, “Mɨ̀ngês nɨ̀ ɨ̀nfyèfɨ̀ læ̀ zɨ̂ wì a ntoʼ.”

⁹A nà n-ghɨ ta àŋena nù fsɨ ntèʼ àteyn, Devìt ɨ ndù ɨ nà sɨ chi afu ɨ kfɨnɨ ìzɨyn ateyn ɨ nà sɨ toŋtɨ̂ na Ntèʼ Fòyn Devìt. Ntèʼ àteyn nà n-ghɨ ma ghɨ tɨm meyn mbàyn jɨ̀ŋ kal. Devìt ɨ bàʼlɨ̀ ɨ koʼsɨ nɨ̀ mbæ̀sɨ ateynsɨ kɨ̀ sɨ zɨ̀tɨ̀ ɨlwèʼ ghè a ghɨ n-kfɨ̀ysɨ̀ kfɨysɨ sɨ zɨ sɨ ndù antêynɨ̀. ¹⁰Adyaʼ a Devìt à ɨ nà kfeynsɨ̂ ndu kɨ ndu sɨ zɨ̀tɨ ɨtuʼ nâ ghè bòm ta Bôbo Fɨyini ɨ Bò Ɨdwaʼ Ɨjɨ̀m nà n-tôʼnɨ̀ nɨ̀ ŋweyn.

¹¹A nà ghɨ achi a li-a, Hilàm ɨ fòyn Tayà ɨ tum ghelɨ sɨ̂ Devìt nɨ̀ ɨ̀nkàʼ mɨ̀ Seda, baʼsɨ nɨ̀ ghelɨ ghì a ghɨ n-bom ndosɨ nɨ̀ ɨghî a ghɨ n-bayn, na àŋena ndu bàʼlɨ̀ ntoʼ sɨ̂ fòyn Devìt. ¹²Fòyn Devìt ɨ keli mèsì na Bôbo Fɨyini lem meyn ŋweyn sɨ a fòyn a Isìlæ̀ ɨ̀ nì na ɨfôyn ŋweyn ngaŋtɨ bòm ghelɨ ŋweyn.

¹³A nà n-ghɨ ta Devìt lù sɨ a Heblòn ɨ̀ ndù nà sɨ chi a Jèlusalèm tì, wu ndù ɨ kfeynsɨ ghɨ̀kì ɨ fi lì ghɨli ibàm ŋêyn àŋena ɨ bzɨ kfeynsɨ woyn ghɨ̂kì nɨ woyn ghɨ lûmnɨ̀. ¹⁴Akêynà nɨn ghɨ àzɨyn a woyn ghì a ghɨ n-læ bzɨ sɨ̂ ŋweyn afu. A nà n-ghɨ Shamùwà nɨ̀ Shobàb nɨ̀ Natàn ŋêyn Sòlomòn ¹⁵kɨ̀mɨ nɨ̀ Ibà nɨ̀ Elishwà ŋêyn Nefèg kɨ̀mɨ nɨ̀ Jafìyà ¹⁶nɨ̀ Elishamà nɨ̀ Eliyadà baʼsɨ̂ nɨ̀ Elifelèt.

Devìt ɨ tɨm yɨ ghelɨ Fìlisìyà

¹⁷A nà n-ghɨ ta ghelɨ Fìlisìyà yvɨ na ghɨ yisi meyn Devìt sɨ a fòyn Isìlæ̀, sugèyʼsɨ àŋenasɨ ɨ chɨ̀yntɨ koʼ sɨ ghal ŋweyn mɨtì Devìt ɨ yvɨ na àŋena nɨn gvi-à ɨ leʼ zɨ ɨ lèytɨ̀ afoŋlɨ. ¹⁸Sugèyʼ sɨ Fìlisìyàsɨ̀ ɨ gvì ɨ timi kal afoŋlɨ a Lefèm. ¹⁹Devìt ɨ bɨf sɨ̂ Bôbo Fɨyini nâ, “Mà fvɨ koʼ nù ghelɨ Fìlisìyà ghèyn a? Wa n-gàmtɨ̀ mà ta ka mà tɨm yɨ àŋena?”

Bôbo Fɨyini ɨ bèynsɨ̀ na, “Ndù a, mɨ n-nì-à a wà tɨm yɨ àŋena.”

²⁰Devìt ŋêyn sugèyʼsɨ ŋweynsɨ ɨ kæ sɨ lù sɨ ndù a Bal Bèlazìm sɨ tɨm sɨ yɨ àŋena. Devìt nɨ̀n bê meyn na, “Bôbo Fɨyini fvɨ̀ ta jva ɨlvɨ ta ghɨ kuʼ yì buʼa ɨ̀ lì lù nɨ̀ mbàynɨ̀ semsɨ.” Ghɨ nà sɨ toŋtɨ̂ àlêʼ nâ kì na Bal Bèlazìm. ²¹Ghelɨ Fìlisìyà ɨ leʼ màʼì mɨyini mɨ̀ àŋena, Devìt ŋêyn sugèyʼsɨ ŋweynsɨ ɨ kumtɨ ɨ lù nɨ̀ ɨ̀mêyn.

²²Ghelɨ Fìlisìyà nɨn leʼ tî ɨ ndù ɨ fi kasi gvì ɨ timi kal afoŋlɨ a Lefèm; ²³Devìt ɨ fi bɨf sɨ̂ Bôbo Fɨyini na yì ndu nù àŋena a? Fɨyini fɨ̀ ɨ bè na wu ndu ɨ̀ nù àŋena, mɨtì ka wu n-dù àtì ati, na wù ndu ɨ̀ jɨ̀ŋ kàli ɨ̀ kèʼ àŋena abas ghè a ɨnkàʼ mɨ̀ balsàm nɨn ghɨ ateyn. ²⁴Yi nî yvɨ ɨtu ɨnkàʼ ɨ ghas tèyn ta ɨvɨ ghêl ɨtu ɨnkàʼ mɨ̀ balsàm nô mɨ ɨlvɨ gha, yi nyaŋsɨ jèl bòm ta yi nì nà dyêyn na Bôbo Fɨyini ndu meyn sɨ asɨ sɨ nì na yì tɨm yɨ ghelɨ Fìlisìyà. ²⁵Devìt ɨ ni kɨ ta Bôbo Fɨyini bè ɨ tɨm yɨ ghelɨ Fìlisìyà sɨ zɨ̀tɨ a Gibìyòn sɨ ndù sɨ chem a Gezà.