2 Samuel 3

¹Ghelɨ fòyn Sôl ŋêyn ghelɨ fòyn Devìt nɨ̀n tɨm meyn ìwoŋ nô sɨ a ndyèyn ìdyà. Ghelɨ ghì a ghɨ nà n-tôʼ Devìt ɨ nà dvɨ̂tɨ̀ ndû kɨ asɨ, ɨghî a ghɨ nà n-tôʼ wâyn Sôl ɨ lætɨ̂ ndû kɨ ndu.

²A nà n-ghɨ ta Devìt nɨ̀n chi a ntèʼ Heblòn tì, ghɨ̀ki ŋweyn ɨ bzɨ woyn sɨ̂ ŋweyn afu ntufa. Wayn ɨlwema nà n-ghɨ Amnòn, nà ŋweyn ghɨ Ahinòm ma wù fvɨ̀ a ntèʼ Jezlèl,

³ànkûmtɨ̀-à ɨ ghɨ Kilèb, nà ŋweyn ɨ ghɨ Abigèl. Abigèl nâ wèyn nà n-ghɨ wî nkfɨ Nabàl ta Devìt nɨn kasi mala. Wu nà n-ghɨ ma wù fvɨ̀ a ntèʼ ighaʼnɨ afî a ghɨ n-toŋtɨ na Kamèl.

Ɨlvɨ̀ ɨ ghɨ Absalòm, nà ŋweyn ɨ ghɨ Makà. Makà nâ wèyn nà n-ghɨ wâyn fòyn Talmày vzɨ̀ a wu nà n-saʼ abâs a Geshù.

⁴Wâyn ŋweyn ɨ̀lvɨ nà n-ghɨ Adonijà, nà ŋweyn ɨ ghɨ Hagìt.

Ɨ̀lvɨ̀ ɨ ghɨ Shefatìya, nà ŋweyn ɨ ghɨ Abitàl.

⁵Àngòʼsɨ̀ a wayn nɨ̀ Devìt ɨ ghɨ Itlìm, nà ŋweyn ɨ ghɨ Eglà a ghɨ kɨmɨ wî Devɨ̀t ɨlvì.

À ti woyn Devìt ghì a wu n-bzɨ a Heblòn.

Abnà ɨ dyàŋsɨ̀ abàs nɨ̀ Devìt

⁶À nà n-ghɨ ta ghelɨ Devìt ŋêyn ghelɨ Sôl nɨn nû tî, Abnà ɨ fvɨ̀ koʼ abàs nɨ̀ Sôl sɨ a wul ɨ tisɨnɨ. ⁷A nà n-ghɨ tì ma Sôl nɨ̀n læ meyn nà kelɨ wî ŋweyn ɨ̀lvì izɨyn i ŋweyn ɨ ghɨ Lizbà ɨ wâyn Ayì-à. A nà ghɨ achi a li-a Ishboshèt ɨ nà ghâm Abnà bɨf nâ bòm ghà ta wù n-chi nɨ̀ Lizbà ɨ wî bo vzɨ a. ⁸Abnà ɨ yvɨ tî iwo ateyn i yaf ŋweyn nô sɨ a ŋaŋ, wu bɨf sɨ̂ Ishboshèt nâ, “Wà n-kfâʼ na mɨ n-ghɨ bɨ a Judà ta ka wà na nî sɨ̂ mà têyn ma? Ma chuʼ meyn sɨ̂ bò vâ Sôl, kàsi chùʼ sɨ̂ woynà ŋweyn nɨ̀ suynsɨ ŋweynsɨ fì nù sɨ gàmtɨ̀ na ka sugèyʼsɨ Devìtsɨ̀ ghal vâ, wà kasi lvɨ̂yn nà ghâm mà kûm ìwo i wul ɨ wi. ⁹Mɨ n-jêm na Fɨyini fɨ̀ fu ngeʼ sɨ̂ mà ɨlvɨ ta mà faŋ tɨ̀ gàmtɨ Devìt na wù keli afo kì a Fɨ̀yini fɨ nɨn læ chfɨ̀nɨ̀ sɨ̂ ŋweyn. ¹⁰Fɨyini fɨ̀ nɨn læ meyn chfɨ̀nɨ̀ na Fɨ n-fsɨ ɨfôyn sɨ̂ Sôl ɨ̀ fù sɨ̂ Devìt a wù na saʼ Isìlæ̀ nɨ̀ Judà sɨ zɨtɨ kɨ a ntèʼ Dan sɨ kàlì sɨ chem a ntèʼ Beshebà. ¹¹Wu n-taŋi tî Ishboshèt ɨ faŋ tɨ̀ fì tɨ̀ fɨ̀ysɨ̀ bòm ta wu na n-fâyn Abnà nô sɨ ŋaŋ.

¹²Abnà nɨn taŋi tî ɨ kæ tum ghelɨ na ghɨ ndu ɨ̀ bè sɨ̂ Devìt na yi n-kɨŋ na ŋêyn ŋweyn yɨ mɨkâyn yì gamtɨ ɨ̀ nì ghelɨ Isìlæ̀ kasi nà tôʼ Devìt bòm ta yi n-kya na à n-kelɨ kɨ ŋweyn kelɨ ìlaʼ ìjɨm.

¹³Devìt ɨ bɨmi sɨ yɨ mɨkâyn ŋêyn ŋweyn mɨtì ɨ bè na iwo i nɨn ghɨ kɨ ìmòʼ na ka yi n-yèyn ŋweyn bula Mikàl ɨ wâyn Sôl. ¹⁴Devìt nɨn taŋi tî ɨ tum bè sɨ̂ Ishboshèt ɨ wâyn Sôl na: “Kasi fu wî wom Mikàl, mɨ n-læ fu afo a ŋweyn atu nɨ̀ ghelɨ Fìlisìyà ɨvɨ ta mà zuètɨ ɨ̀ sɨ inwam àŋena gvì dyeyn sɨ Sôl.”

¹⁵Ishboshèt ɨ yvɨ tî ɨ tum na ghɨ ndu ɨ̀ lì Mikàl sɨ a ndo nɨ̀ lum ŋweyn Baltiyèl, ɨ wâyn Layìsh. ¹⁶Ghɨ ndù ɨ lì Mikàl ɨ se sɨ lù Baltiyèl ɨ nà sɨ dzɨ̀ ndû kɨ a ŋweyn ibam ɨ ndu chem a ntèʼ Bahulìm, Abnà ɨ bè sɨ̂ ŋweyn na “kasi wa kfâ.” Wu kasi kɨ kasi ɨlvɨ nâ ghè.

¹⁷A nà n-ghɨ tì ma Abnà taŋi meyn ŋêyn chyeʼsɨ ilaʼ i Isìlæ̀ ɨ̀ bè sɨ̂ àŋena na “Ba yi n-læ meyn nà kɨŋ na Devìt na ghɨ fòyn vzɨ? ¹⁸Lvɨ̂yn nɨ̀n ghɨ ɨ̀lvɨ ɨ jûŋ ta ka wù na ghɨ fòyn. Bôbo Fɨyini nɨn læ chfɨ̀nɨ ɨ bè na, “Mà læ̀ bœ̂sɨ̀ ghelɨ̀ ghem sɨ awu nɨ̀ ghelɨ Fìlisìyà nɨ̀ mbàynɨ̀sɨ àŋena nô sɨ̀ jɨ̀m toynɨ̂ a wul ɨ̀ felɨnɨ nɨ̀ ma ɨ Devìt.”

¹⁹Abnà nɨn taŋi meyn kɨmɨ ŋêyn ghelɨ isas indo nɨ̀ Benjamìn ɨ kæ ndù sɨ yeyn Devìt a Heblòn sɨ feʼtɨ sɨ̂ ŋweyn na, ghelɨ Isìlæ̀ nɨ̀ ghelɨ isas i ndo nɨ̀ Benjamìn nô ghɨ̀ jɨ̀m bɨmi meyn sɨ timi a ŋweyn ibàm. ²⁰A nà ghɨ ta Abnà gvì ŋêyn ghelɨ mɨ̀vɨm ɨ̀m bò a Heblòn sɨ yeyn Devìt, wu kfè ɨ̀fwo ɨ yɨnɨ sɨ̂ àŋena. ²¹Abnà ɨ ni se sɨ kasi sɨ lù ɨ bè sɨ̂ Devìt na, “Visi mà ndu ɨ̀ yvɨ̀ŋtɨ̀ ghelɨ Isìlæ̀ nô ghɨ̀ jɨ̀m àŋena yɨ mɨkâyn na wà na ghɨ bô, ghɨ fòyn sɨ̂ àŋena kɨ ighel ta wà tî nà kɨŋa. Wu taŋi tì Devìt ɨ kæ visi na wù lu kɨ nɨ̀ mbôynɨ̀. ²²A nà ghɨ ta Abnà lù, ghɨ mùtɨ kɨ têyn Jowàb ŋêyn sugèyʼsɨ Devìt sɨ lisɨ ta sɨ nà n-ghɨ ɨtwaʼ iwòŋ ɨ kasi kfa nɨ̀ ɨfwo wu dvɨ̂ kɨ tèyn ta ghɨ ghal fsɨ̀tɨ. ²³Àŋena nɨn kfa tî Jowàb ɨ yvɨ na Abnà ɨ wâyn Nê kùʼtɨ̀ lù kɨ̀ têyn ta wù gvì yeyn fòyn, fòyn visi wù lû kɨ nô nɨ̀ mbôynɨ̀. ²⁴Jowàb nɨn yvɨ tî ɨ shɨŋ ndu bɨf sɨ̂ fòyn nâ: “Wà mòm ghà teyn a? Abnà gvì yèyn vâ, wà jelɨ̀ ti sɨ visi na wù lù a? ²⁵Ba wà n-kya Abnà ɨ wâyn Nê nâ wèyn, wù nì gvì kɨ̀ sɨ kuŋlɨ sɨ ki na wa n-jêl ti-a?”

²⁶Jowàb nɨn taŋi tî ɨ lù ɨ ndu ntum ghelɨ na ghɨ nyɨŋ ibàm nɨ̀ Abnà ɨ̀ bè na wù kàsi gvì tì. Ghɨ nyɨŋ koli ŋweyn a ngùŋ ìbɨ̀ i mu afî a yi nà n-ghɨ a ntèʼ Silà ɨ kasi gvì nɨ̀ ŋweyn. Yi nà n-gâyn tì Devìt ɨ kya wi. ²⁷A nà ghɨ ta Abnà kàsi gvì a Heblòn, Jowàb ɨ gùbtɨ̀ ŋweyn ɨchfɨ mbàyn, kêʼ tèyn ta wu n-kɨŋ na ŋêyn ŋweyn besɨ iwo. Àŋena kɨŋtɨ ndù wu sù fɨ̀nyuè ɨlvà nɨ̀ Abnà wù kfɨ. Wu n-nì tî, sɨ sɨ̀sɨ̀ ikfɨ i wâynà ŋweyn Asahèl.

²⁸Devìt ɨ ni yvɨ iwo zɨ̀ a yi gàyn ɨ bè na, “Bôbo nɨn kya na ghesɨ̀ ghelɨ ilaʼ nɨ̀ mà nɨn kelɨ wi awu ikfɨ nɨ̀ Abnà ɨ wâyn Nê. ²⁹Mɨ n-jêm na ngeʼ àteyn fe kɨ̀ atu nɨ̀ Jowàb ŋêyn isas i ndo nɨ̀ ŋweyni. À na koʼ nô mɨ àjâŋ à kà kɨ nà kelɨ wul nɨ̀ àdzɨ̀-à kèsa ànsàsì. Bùla tì wu nà kelɨ àngvɨ̀, kèsa ànkfɨ̀s, bula tì wu kfɨ iwòŋ kèsa wu nà loyn loyn ɨfwo yɨnɨ sɨ jæ sɨ yɨ.

³⁰Yi ti n-dyêyn na Jowàb ŋêyn wâynà ŋweyn Abishà nɨn zue Abnà bòm ta wu n-zue wâynà àŋena Asahèl iwòŋ a ntèʼ Gibìyòn.

³¹Abnà nɨn kfɨ Devìt ɨ bè sɨ̂ Jowàb ŋêyn ghelɨ ghì a ŋêyn àŋena nà n-ghɨ amoʼ na, “Nô mɨ ndà baytɨ ndzɨsɨ ŋweyn ɨ̀ màʼ fɨ̀ntsɨ ɨ̀ nà dzɨ̂ ndû asɨ igvɨyn nɨ̀ Abnà.” Ghɨ bèʼì ìgvɨyn i Àbnà sɨ ndù sɨ gvɨ̀mi, nô Fòyn Devìt nɨ̀ ngêŋ ŋweyn ɨ nà ndû ibàm ateyn. ³²Ghɨ n-gvɨ̀mi Abnà a Heblòn, fòyn Devìt ɨ dzɨ̀ ɨchfɨ isè nô sɨ a ŋaŋ, nô ghelɨ ghì jɨ̀m ɨ boŋ dzɨ̀.

³³Devìt ɨ betɨ njàŋ ìkfɨ nɨ̀ Abnà bê na:

“Abnà bu ti nà kelɨ sɨ kfɨ ta wul ɨlvɨ ta ghɨ làŋ.

³⁴Ghɨ bu ti kul akœ à kya,

ɨ̀ faŋ tɨ̀ kul afyeyn à kya nɨ̀ nchaʼsɨ.

Ghɨ tî kul mɨ̀nàŋ ɨnbɨ̂ a wa atu ɨ̀ zuè vâ.”

Wu n-betɨ mèsi nô mɨ ɨlvɨ gha ghelɨ ghɨ̀ jɨ̀m ɨ fi bɨsa kɨ nɨ̀ ìdzɨ-i.”

³⁵A nà n-ghɨ ta ghɨ dzɨ̀ tî, ghelɨ ɨ gvì ɨ nà sɨ chwotɨ̂ Devìt na wù yɨ wu tuynsɨ bòmtà wù nà n-sɨ ghɨ ma wù ni meyn lèm sɨ ikàyntɨ̀ na yi n-yɨ wi afo nô ta ka ichfɨ iyvɨ nî sœ. Ma yi kæ sɨ yɨ, Fɨyini fɨ fu ngeʼ ìghaʼnɨ sɨ̂ zɨ̀.

³⁶Ghelɨ ghɨ̀ jɨ̀m nɨn yeyn meyn ìwo zɨ̀ a Devìt nɨn nì yi nà jôf sɨ̂ àŋena nô a jûŋ. Nô mɨ ghà ta fòyn Devit nɨn ni ɨ nà n-jôf kɨ jof sɨ̂ àŋena. ³⁷Nô ghelɨ ghɨ̀ jɨ̀m a Judà nɨ̀ Isìlæ̀ ɨ kæ keli achi nâ ghè na awu a fòyn Devit nɨn ghɨ wi ikfɨ nɨ̀ Abnà.

³⁸Fòyn Devit ɨ ni fi bɨf sɨ̂ ghelɨ ŋweyn nâ, “Yi bû yèyn na wâyn ntoʼ ɨtwo a Isìlæ̀ kfɨ meyn layn â? ³⁹Nô mɨ ta mɨ n-ghɨ fòyn ma à choʼ kɨ̀ nô Fɨyini, mɨ n-kelɨ wi atem ato sɨ ghal Jowàb ŋêyn wâynà ŋweyn Abishà. Woyn Zèluwà nâ ghèyn nɨn to ghaʼ mà, ma jem na Bôbo Fɨyini laʼ àŋena sɨ ifèl ibzɨ nɨ̀ àŋena nâ ghàyn.”