2 Samuel 23

Devìt ɨ taŋi ɨ gòʼsɨ̀

¹Akeynà nɨn ghɨ àwo kì a Dèvìt nɨn læ taŋi ɨ gòʼsɨ̀.

“Itaŋi i Devìt ɨ wâyn Jesì.

Devìt nà n-ghɨ ma Fɨyini fɨ ngaŋtɨnɨ fɨ ni meyn wù na ngaŋtɨ-à.

Wu nà n-ghɨ ma Fɨyini fɨ Jàkôb fɨ̀ nɨn læ meyn yisi ŋweyn sɨ a fòyn.

Wu nà n-ghɨ wul ɨ̀ njàŋsɨ̀ a Isìlæ̀.

²“Ayvɨs a Bôbo Fɨyini nɨn taŋi meyn ɨ toynɨ a ma,

ɨ fèʼtɨ̀ àwo kì a ka mà be.

³Fɨyini fɨ Isìlæ̀ fɨ̀ nɨn taŋi meyn,

ɨ Fîfɨ̀ a fɨ n-ghɨ têyn ta iwu sɨ̂ ghelɨ Isìlæ̀ nɨn be meyn sɨ̂ mà na,

‘Wul nɨn se sɨ saʼ ghelɨ a dzɨ àtì-ati,

saʼa fâyn Fɨyini,

⁴wu nà ghɨ tèyn ta ɨchfɨ-iyvɨ ɨlvɨ ta yi bɨs ɨ̀ sal

mbàʼsɨ faŋ tɨ̀ kɨ̀ŋtɨ̀,

fî ghɨ tèyn ta chue a yì n-bayn ɨlvɨ ta ivɨ i sùʼi ɨ̀ chwò,

ɨfwo na lemâ.’

⁵Fɨyini fɨ nɨn boysɨ ghelɨ ndo nɨ̀ mà,

wù yɨ meyn mɨ̀kâyn ghesɨ̀ ŋweyn kɨ̀ samoʼ.

Mɨ̀kâyn mɨ̀ àteyn ɨ ghɨ ma wùl kàʼ wu bû kfɨ̀nɨ.

Fɨ n-nì gâmtɨ̀ mà,

ɨ̀ fù nô mɨ ghà ta mɨ n-kɨŋ.

⁶Mɨtì ghɨ sɨ maʼi ghelɨ ghɨ bɨ nô ghɨ̀ jɨ̀m kɨ̀ ta ghɨ n-nî ghɨ màʼì sùnjonjoŋsɨ,

bula ghɨ ghal nɨ̀ àwu a.

⁷A n-se sɨ ghal nô mɨ ndà ɨ sùnjonjoŋsɨ,

wu ghal nɨ̀ afo ma ghɨ faytɨ nɨ̀ àkasa kèsa nɨ̀ ɨ̀fyayn iwòŋi,

ɨ nyoʼ kɨ alèʼ ghè a sɨ n-ghɨ ateyn.”

Ghelɨ iwòŋ ghɨ to nɨ̀ Devìt

⁸Akeynà nɨn ghɨ azɨyn a ghelɨ iwòŋ ghɨ to nɨ̀ Devìt.

Josheb-Bashebèt ɨ wul ɨ̀ Takemòn nà n-ghɨ àtu sɨ̂ ghelɨ iwòŋ ghɨ to nɨ̀ Devìt ghɨ̀tal. Wù n-læ meyn nù achi a li-a ɨ zuetɨ ghelɨ ighɨ nfama kɨ nɨ̀ ìwoŋ i ŋweyni.

⁹Ànkumtɨ̀-à nà n-ghɨ Èlezà ɨ wâyn Dodày ɨ wul ɨ̀ Ahò, a ghɨ wul ɨ̀mòʼ antêynɨ̀ nɨ̀ ghelɨ ghɨ to nâ ghì ghɨ̀tal. A nà n-ghɨ ta Devìt bèyntɨ sugèyʼsɨ Fìlisìyà ta sɨ gvì yvɨ̀ŋtɨ̀ nà kɨŋ sɨ nù a ntèʼ Bas Damìm wu timi ŋêyn ŋweyn ghelɨ Isìlæ̀ ghɨli ɨ leʼnɨ. ¹⁰Àŋena nɨn lèʼnɨ tî, wu faŋ ɨ nà zuetɨ̂ kɨ zuetɨ Sugèyʼsɨ Fìlisìyà nô ta ka ɨkœ ŋweyn nî yvanɨ ɨ̀ tàl dzɨ nà bu ghɨ wi ta ka wù visi ifo zɨ̀ a yi nà n-ghɨ a ŋweyn awu. Bôbo Fɨyini nɨn læ meyn nì àŋena yɨ iwoŋ ateyn i nô a dzɨ ikayni achi nâ ghè. Sugèyʼsɨ Isìlæ̀ sɨ lisɨ sìsɨ̀ ɨ ni kasi gvì alèʼ ghè a Èlezà nà n-ghɨ ateyn kɨ̀ sɨ choʼtɨ ɨfwo iwòŋ sɨ iwùyn nɨ̀ sugèyʼ sìsɨ̀ a wù zuètɨ.

¹¹Shamà ɨ wâyn Agì ɨ wul ɨ̀ Halà nà n-ghɨ kɨmɨ wul ɨ̀mòʼ antêynɨ̀ nɨ̀ ghelɨ iwòŋ ghɨ to nɨ̀ Devìt ghì ghɨ̀tal. A n-læ nà ghɨ ta sugèyʼsɨ Fìlisìyàsɨ̀ gvì yvɨ̀ŋtɨ̀ a gvêyn àghas ìlì, sugèyʼsɨ Isìlæ̀sɨ ɨ yeyn ɨ nyɨŋnɨ. ¹²Mɨtì Shamà ɨ timi kɨ itòŋ i gvêyn nâ ghè ɨ zuetɨ ghelɨ Fìlisìyà nâ ghì. Bôbo Fɨyini ɨ nì wu yɨ iwoŋ ateyn a dzɨ i kaynɨ.

¹³A nà n-ghɨ ta ghɨ n-kfî asaŋ, sugèyʼ sɨ̀ tal antêynɨ̀ ɨ̀tu sugèyʼsɨ̀ mɨ̀vɨm ɨ̀n tal ɨ kàlì ɨ yeyn Devìt ifò i Adulàm, a ghɨ tì ma anôyn a sugèyʼsɨ Fìlisìyà a li-a ndu meyn bɨ̀ Afoŋlɨ a Lefèm. ¹⁴Devìt nà n-ghɨ ma wù leytɨ meyn ifò, anôyn a sugèyʼsɨ Fìlisìyàsɨ̀ ɨ ghɨ a Betɨ̀lèhêm. ¹⁵Ɨtoŋ mu læ yum Devìt achi a li-a, wu kfàʼtɨ̀ Betɨ̀làhêm ɨ bè na, “Ndà fu wul ɨ̀ ndà wù tu ɨ̀ fù ma nɨ̀ mu ibɨ imu afî ɨchfɨ mbàyn Betɨ̀làhêm a?” ¹⁶Wu n-bè tî, ghelɨ iwòŋ ghɨ to nɨ̀ ŋweyn ghì ghɨ̀tal ɨ ndù ɨ toynɨ ɨ chwò antêynɨ̀ sugèyʼsɨ Fìlisìyà kɨ̀ sɨ adyaʼ ɨ tu mu ibɨ i mu nâ ghè ɨ gvi fu sɨ̂ ŋweyn. Ghɨ n-fu tî, wu leʼ na yi nyvɨ wi ɨ kwo sfɨ̀s a nse sɨ a ifu sɨ̂ Bôbo Fɨyini. ¹⁷Wù n-se sɨ sfɨ̀sɨ tî ɨ bè na, “Yi n-jôf wì na mà nyvɨ mu mèyn a Bôbo, mɨ̀ n-ghɨ ma ghelɨ ndù tu alèʼ ma ghɨ nà n-kâʼ a ghɨ zuetɨ àŋena afu. Mà nyvɨ a yi na kêʼ kɨmɨ tèyn ta mɨ nyvɨ mɨ̀luŋ mɨ̀ ghelɨ nâ ghèyn.

Iyeyn nâ yèynì nɨn n-ghɨ ìwo i to i ili zɨ̀-i a ghelɨ iwòŋ ghɨ to nɨ̀ fòyn Devìt nâ ghèyn nɨn læ ni.

¹⁸Abishà ɨ wâynà Jowàb ɨ wâyn Zèluwà nà n-ghɨ àtu sɨ̂ ɨ̀tu sugèyʼ sɨli sìsɨ̀ mɨ̀vɨm ɨ̀n tal. Abishà nɨn læ meyn nù ɨ zuetɨ ghelɨ ighɨ ìtal kɨ nɨ̀ ìwoŋi. À ti iwo zɨ̀-ì a yi n-læ nì ghɨ nà kya ŋweyn kɨ̀ ta ghɨ nà n-kya sugèyʼsɨli sìsɨ̀ sɨ̀ tal. ¹⁹Wu nà n-ghɨ nô mɨ ndà ɨ kya ŋweyn antêynɨ̀ sugèyʼ nâ sìsɨ̀ mɨ̀vɨm ɨ̀n tal, mɨtì wu koʼ chem wi ɨfyèʼ nɨ̀ ghelɨ iwòŋ ghɨ to ghì ghɨ̀tal.

²⁰Bènayà ɨ wâyn Jehòyidà ɨ wul ɨ̀ Kabzìl nà n-kelɨ àdyaʼ, nî àwo akayna. Wu n-læ meyn zuetɨ ghelɨ iwòŋ ghɨ to ghɨ̀bo ma ghɨ lù a Mowàb. Wù n-læ meyn fi zɨ ɨ kàli ibɨ achi a li-a ma awœ suʼi meyn ɨ zue bzɨ̀kem. ²¹Wu n-læ meyn zue kɨmɨ sugèyʼ Ijìb î lì yi bem kɨ tèyn nô mɨ ta yì nà n-kelɨ iwoŋ awu. Bènayà nɨn ndù sɨ nù ŋweyn kelɨ kɨ nkuna a ŋweyn awu ɨ jɨ̀f ɨ fsɨ iwoŋ i sugèyʼ nâ zɨ̀-ì ɨ kasi zue ŋweyn nɨ̀ ìnyeyni. ²²À ti awo a bemnɨ-a a li-a kì a Bènaya ɨ wâyn Jèhòyidà nɨn læ ni. Ghɨ nà n-kya ŋweyn kɨ ta ghɨ nà n-kya ghelɨ iwòŋ ghɨ to ghì ghɨ̀tal. ²³Wu nà n-koʼnɨ̂ chwô nô mɨ sugèyʼ ì kà antêynɨ̀ sugèysɨ̀ ghê mɨ̀vɨm ɨ̀n tal. Mɨtì ghɨ wi wul ɨ̀mòʼ antêynɨ̀ nɨ̀ ghelɨ ghɨ to ghì ghɨ̀tal. Fòyn Devìt ɨ lèm ŋweyn na wù na ghɨ àtu a sugèyʼ sîsɨ̀ a sɨ n-chî ŋweyn.

²⁴Akeynà nɨn ghɨ àzɨyn a sugèyʼ nâ sìsɨ̀ mɨ̀vɨm ɨ̀n tal. A nà n-ghɨ Asahèl ɨ wâynà Jowàb, nɨ̀ Elhanàn ɨ wâyn Dodò a ghɨ wul Betɨ̀lèhêm, ²⁵nɨ̀ Shamà ŋêyn Elikà ɨ ghelɨ Halòd. ²⁶Helèz ɨ wul ɨ̀ Bâl nɨ̀ Ilà ɨ wâyn Ikèsh ɨ wul ɨ̀ Tekowà, ²⁷kɨ̀mɨ nɨ̀ Abìyezà ɨ wul ɨ̀ Anatòt nɨ̀ Mebunày ɨ wul ɨ̀ Hushà. ²⁸Zalmòn nà n-ghɨ wul ɨ̀ Ahò, Màhalày ɨ ghɨ wul ɨ̀ Netofà, ²⁹nɨ̀ Helèd ɨ wâyn Banà ɨ wul ɨ̀ Netofà, kɨmɨ nɨ̀ Itày ɨ wâyn Libày ɨ wul ɨ̀ Gibìyà a ntèʼ Benjamìn. ³⁰Benayà ɨ wul ɨ̀ Bilatòn nà n-ghɨ kɨmɨ wul ɨlvì, nɨ̀ Hidày ɨ wul àfoŋlɨ a Gâsh, ³¹kɨ̀mɨ nɨ̀ Abi-Albòn ɨ wul Albà, nɨ̀ Azmavèt ɨ wul ɨ̀ Bahulìm, ³²nɨ̀ Elìyabà ɨ wul ɨ̀ Shalbòn nɨ̀ woyn Jashèn nɨ̀ Jonatàn. ³³Jonatàn nà n-ghɨ wâyn Shamà ɨ wul ɨ Halà, Ahîm ɨ ghɨ wâyn Shalà ɨ wul ɨ̀ Halà. ³⁴Elifelèt nà n-ghɨ wâyn Ahasbày ɨ wul ɨ̀ Makà, nɨ̀ Elìm ɨ wâyn Ahitofèl ɨ wul ɨ̀ Gilò, ³⁵kɨ̀mɨ nɨ̀ Hezlò ɨ wul ɨ̀ Kamèl nɨ̀ Balày ɨ wul ɨ̀ Albà, ³⁶nɨ̀ Igàl ɨ wâyn Natàn ɨ wul ɨ̀ Zobà nɨ̀ wâyn Hagli. ³⁷Zelèk ɨ wul ɨ̀ Amòn nà n-ghɨ kɨmɨ wul ɨ̀lvì, nɨ̀ Nahalày ɨ wul ɨ̀ Belòt vzɨ̀ wu nà n-beʼì ɨfwo iwòŋ nɨ̀ Jowàb ɨ wâyn Zèluwà, ³⁸baʼsɨ̂ nɨ̀ Ilà ŋêyn Galèb ɨ ghelɨ Itlì, ³⁹nɨ̀ Yulìyà ɨ wul ɨ̀ Hêt. Àŋena nà n-chɨyntɨ̀ ghɨ mɨ̀vɨm ɨ̀n tal njvàsɨ̀ nsòmbo.