2 Samuel 24

Devìt ɨ taŋ sugèyʼsɨ̀

¹Bôbo Fɨyini nɨn fi meyn nyòʼsɨ̀ ɨ̀toŋ sɨ̂ ghelɨ Isìlæ̀ ɨ nì na Devìt ni iwo yi gvi nɨ̀ ngeʼ a àŋena atu. Wu n-bè sɨ̂ Devìt na, “Tum ghelɨ àŋena ndu taŋ ghelɨ Isìlæ̀ nɨ̀ ɨ ghɨ Judà.”

²Fòyn Devìt ɨ kæ bè sɨ̂ Jowàb ŋêyn ɨ̀tu sugèyʼsɨ̀ nɨ̀ ŋweyn na, “Yi jel ntèʼsɨ Isìlæ̀ nô sɨ̀ jɨ̀m ɨ̀ nyàʼ àzɨyn a ghêl, zɨ̂tɨ̀ kɨ a ntèʼ Dan sɨ kàlì sɨ chem a ntèʼ Beshebà, ta ka mà keli na à n-ghɨ ghelɨ ghɨ̀ seʼa a ghɨ kàʼ a ghɨ tɨm iwoŋ a.”

³Jowàb ɨ bè sɨ̂ ŋweyn na, “Mɨ n-jêm na Bôbo Fɨyini fyafɨ ni sugèyʼsɨ ateynsɨ dvɨ ghɨ na taŋ lè ɨ̀tu ta ka wà yeyn sɨ a wa ngeŋ. Mɨtì wà n-kɨŋ sɨ ni iwo nâ yèynì bòm ghà?”

⁴Fòyn ɨ bè kɨ sɨ̂ Jowàb ŋêyn ɨ̀tu sugèyʼ sɨ̀ na àŋena ni kɨ iwo zɨ̀ a wù bè. Àŋena kæ lù sɨ ndù sɨ taŋ ghelɨ ghì a ghɨ kàʼ a ghɨ nu a Isìlæ̀.

⁵A nà ghɨ ta àŋena dyàŋ jvâ Jodàn, àŋena bɨ̀ a ngùŋ ntèʼ Alowà yi ghɨ abàs itsɨyn afoŋlɨ a Gâd ɨ lù afu ɨ ndù a Jazà. ⁶Àŋena nɨ̀n ndu meyn kɨmɨ a ntèʼ Gilèd nɨ̀ àbâs ilaʼ kì a ghɨ nà n-toŋtɨ na Tatim Hodshì nɨ̀ ntèʼ Dan Jàn nɨ̀ ɨlwêʼ vzɨ̀ a wu nà n-baʼsɨ ndû a Sidòn. ⁷Àŋena lù sɨ afu ɨ ndù dzɨ a ntèʼ Tayà ta yi nà n-ghɨ antêynɨ̀ mbàyn ɨ ndu kɨmɨ a ntèʼ Hîv nɨ̀ ntèʼ Kenàn ɨ kæ ndù sɨ gòʼsɨ̀ a ntèʼ Beshebà abas a nse ìyum a Judà.

⁸A nà ghɨ ta àŋena jèl mesì ɨlwêʼ nâ wèyn, àŋena kasi kfa a Jèlusalèm ibàm i njoŋsɨ bula mòʼ nɨ̀ mɨchi mɨ̀vɨm ɨ̀m bò.

⁹Àŋena nɨn kasi kfa ndù Jowàb ɨ fèʼtɨ̀ àkôyn a ghêl kì a kɨ n-ghɨ sɨ̂ fòyn. Wu n-bè na, ghelɨ ghì a ghɨ kàʼ a ghɨ seʼ iwòŋ a Isìlæ̀ nɨn ghɨ nkam ighɨ nfama, ɨghî a ghɨ kàʼ a ghɨ seʼ a Judà ɨ ghɨ nkam ighɨ ì tâyn.

¹⁰A nà ghɨ ta ghɨ taŋ mèsì ghelɨ ateyn, Devìt i nà ghɨ nɨ̀ ìkumi iwùyni ɨ kæ jèm sɨ̂ Bôbo Fɨyini sɨ bè na, “Ma ni meyn mbɨ yi bem kɨ tèyn. Mɨ n-chwotɨ̂ và a Bôbo Fɨyini lèsɨ ɨ fu ma ɨ wul ɨ̀ felɨnɨ nɨ̀ và. Ma yeyn meyn na ma ni meyn kɨ̀ nô ìwo i àngù.”

¹¹Wu jèm tì ɨtuʼ se sɨ layn ma Bôbo Fɨyini tum meyn Gâd ɨ nfèʼtɨ̀ ighaʼnɨ zɨ̀ a yi nà n-yvɨ awo sɨ̂ Fɨyini fɨ fêʼtɨ̀ sɨ̂ Devìt. ¹²Fɨyini fɨ̀ nɨn tum na wu ndu bè sɨ̂ Devìt na, “Mɨ n-fu àwo àtal a wà choʼ imòʼ a mà ni sɨ fu ngeʼ sɨ̂ và bòm mbɨ zɨ a wà nì meyn.”

¹³Gâd ɨ ndu yeyn Devìt ɨ bɨf sɨ̂ ŋweyn na, “Wà n-kɨŋ na jèŋ ku ilaʼ ì zæ sɨ a bèŋsɨ̀ tal ma, wà n-kɨŋ na mbàynɨ̀ shyasɨ na nyɨŋ kɨ nyɨŋ a wa ibàm sɨ a njoŋ sɨ̀ tal, ma wà n-kɨŋ na ìkoʼi ibemni ku ghelɨ̀ ghya sɨ a mɨ̂chi ɨ̀n tal a?” Faytɨ kfàʼtɨ ɨ fèʼtɨ̀ sɨ̂ mà mà feʼtɨ̀ sɨ̂ Bôbo Fɨyini.

¹⁴Devìt ɨ bè sɨ̂ Gâd na, “Ngeʼ koli meyn mà bem kɨ tèyn. Mɨtì yi jôf na à fu kɨ̀ Bôbo Fɨyini fù ngeʼ sɨ̂ ghesɨ̀ ghelɨ̀ ghem a ghɨ wi wul mɨ̀sòŋ bòm ta Bôbo Fɨyini nɨn kelɨ ìkoysɨ isuyn nô sɨ a ŋaŋ.”

¹⁵Wu bè tì Bôbo Fɨyini ɨ nì ikoʼi ɨ ku ghelɨ Isìlæ̀ kɨ̀ sɨ zɨ̀tɨ̀ bɨsì bɨsì ɨlvɨ nâ ghè bem kɨ tèyn. A læ se sɨ chem achi ghè a Bôbo Fɨyini lèm na yi mæ ateyn ma ghelɨ kfɨtɨ meyn nkam mɨ̀vɨ̂m nsòmbo kɨ̀ sɨ zɨ̀tɨ̀ a ntèʼ Dan sɨ ndù sɨ chem a ntèʼ Beshebà. ¹⁶A nà ghɨ ta nchì Fɨyini zɨ̀ a yì mâʼ ikoʼi nàysì ndù nɨ̀ àwu-a sɨ màʼ ikoʼi ateyn sɨ̂ ghelɨ Jèlusalèm, Bôbo Fɨyini ɨ kfɨnɨ àtem a ŋweyn ɨ bè na, “Visi, ka wa n-fì màʼ. A nà n-ghɨ ɨlvɨ nâ ghè, nchì Fɨyini nâ zɨ̀ ɨ ghɨ alèʼ ghè a Alunà ɨ wul ɨ̀ Jebùs nà n-nî wu nà leŋ asaŋ ateyn.

¹⁷A nà ghɨ ta Devìt yeyn nchì Fɨyini nâ zɨ̀ a yi nà n-zuetɨ ghelɨ tî ɨ bè sɨ̂ Fɨyini fɨ̀ na, “À nì mà mbɨ, ma nî meyn ìwo i bzɨ-i. Ghelɨ gheyn bû bèbsɨ ìwo. Àŋena nɨn ghɨ kɨ ta njɨ̀sɨ̀. Yi n-jôf na wà fu ngeʼ kɨ̀ sɨ̂ mà ghesɨ̀ isas i ndo nɨ̀ mà-i.”

Devìt ɨ bàʼlɨ̀ àbaŋ ifu

¹⁸Gâd ɨ kasi ndu yeyn Devìt achi nâ ghè ɨ bè sɨ̂ ŋweyn na, “Koʼ ndu alèʼ ghè a Alunà nɨ̀n leŋ asaŋ ateyn ɨ bàʼlɨ̀ àbaŋ ifu afu sɨ̂ Bôbo Fɨyini.” ¹⁹Devìt ɨ lù ɨ koʼ alèʼ asaŋ nâ ghè kɨ ighel ta Bôbo nì bè na Gâd gvi ɨ̀ làʼì. ²⁰A nà ghɨ ta Alunà ki ndùsɨ̀ ɨ̀ yèyn ta fòyn Devìt ŋêyn ghelɨ ŋweyn nɨn gvî, wu fvɨ̀ ɨ ndu ɨ fe a ŋweyn asɨ àkfɨ̀ akfɨ ²¹ɨ bɨf na, “Mbæ̀, wà gvì sɨ yeyn wul ɨ felɨnɨ nɨ̀ và sɨ a gha?” Fòyn Devìt ɨ bèynsɨ̀ ɨ bè na, “Mà gvì sɨ yeyn vâ sɨ yuyn alêʼ kèyn a wà n-leŋ asaŋ ateyn. Mɨ n-kɨŋ sɨ baʼlɨ̀ abaŋ ifu ateyn sɨ̂ Bôbo Fɨyini ta ka wù ni a ikoʼi yèynì a yi kù ghelɨ têyn mæ.”

²²Alunà ɨ bè sɨ̂ Devìt na, “Lì nô mɨ ghà ta wà n-kôŋ sɨ fu sɨ̂ Bôbo Fɨyini a mbæ̀. Mbòŋsɨ̀ nɨn ghɨ afêyn sɨ fu sɨ a ifu i nyoʼnɨ-i, ɨfyâŋ ateyn ɨ ghɨ baʼsɨ̂ nɨ̀ ɨ̀fwo vzɨ̀ a mɨ n-leŋ asaŋ ateyn ta ka wà kwo sɨ ɨnkàʼ. ²³Ma fu meyn ɨ̀fwo nâ wèyn nô ɨ̀jɨm sɨ̂ và a mbæ̀.” Alunà ɨ taŋi tì ɨ fi kæ bè sɨ kfeynsɨ na, “Mɨ n-jêm na Bôbo Fɨyini fyafɨ fsɨ vâ nɨ̀ ìfu ì zæ.”

²⁴Mɨtì fòyn Devìt ɨ bè sɨ̂ Alunà na, “Mɨ n-kôŋ sɨ làʼ ɨkwo ateyn. Mɨ n-kôŋ wì sɨ fu ifu sɨ̂ Bôbo Fɨyini femfɨ nɨ̀ afo a, a ghɨ àfo a lû.” Devìt ɨ taŋi tì ɨ làʼ àlêʼ nâ kì baʼsɨ̂ nɨ̀ mbòŋ sìsɨ̀ ɨ fu aso ɨkwo a fɨfâ kɨ chem ndû kilù. ²⁵Devìt ɨ làʼ ɨ̀fwo nâ vzɨ̀ tî ɨ kæ bàʼlɨ̀ abaŋ sɨ fu ifu i nyoʼnɨ-i baʼsɨ̂ nɨ ìfu i sɨ nà chî nɨ̀ mbôynɨ̀. Bôbo Fɨyini ɨ yvɨ ijêm nâ zɨ̀-ì a wù jèm kûm ìlaʼ i ŋweyn ɨ nì ikoʼi ateyn yi mæ̀ sɨ a Isìlæ̀.