2 Samuel 22

Devìt ɨ yem njàŋ ɨ koʼsɨ Fɨyini

¹A n-læ nà ghɨ ta Bôbo Fɨyini bœ̀sɨ Devìt sɨ ɨwu nɨ̀ Sôl nɨ̀ mbàynɨ̀sɨ ŋweyn sɨ lisɨ, ²Devìt ɨ nà yem njàŋ bê na,

“Bôbo Fɨyini nɨn ghɨ ìwu ì yemi, ghɨ àlêʼ a leytɨna nɨ̀ mà, ghɨ mbœ̀sɨ̀ yem.

³Fɨyini fɨ nɨn ghɨ ìwu ì yemi zɨ̀ a mɨ n-lêyʼtɨ̀ ateyn.

Wù n-ghɨ ànkyà à kema, ghɨ àdyaʼ kì a kɨ n-bœ̂sɨ̀ ma.

Wu n-ghɨ àlêʼ aleytɨna nɨ̀ mà, ma lêytɨ̀ a ŋweyn. Wù n-ghɨ mbœ̀sɨ̀ yem,

bœ̂sɨ̀ mà sɨ a ɨwu nɨ̀ ghelɨ ghɨ bɨ.

⁴Mɨ n-loyn ìgâmtɨ̀ sɨ̂ Bôbo Fɨyini fìfɨ̀ a fɨ n-kfeynɨ sɨ nà koʼsɨ-a

wu bœ̀sɨ̀ mà sɨ ɨwu nɨ̀ mbàynɨ̀ semsɨ.

⁵Mɨ̀lɨ̀m mɨ̀ ìkfɨ ti meyn jɨ̀ŋ kàl ma,

ankuŋ a bɨ-a fvɨ bæ̀ sɨ li ma.

⁶Mà tî nà kfâʼ na ma kfɨ meyn ghɨ gvɨmì,

mɨ̀lɨ̀m mɨ̀ ìkfɨ ti meyn kù ma.

⁷Mà tî nà ghɨ a ngeʼ, jàŋ Bôbo ɨ Fɨyini femfɨ.

Wu yvɨ̀ gya yem ghɨ a ŋweyn a ndo,

wù ti meyn yvɨ idzɨ̂ ì yemi.

⁸Nse tî meyn nà neʼà,

iyvɨ i neʼà bòm ta Fɨyini fɨ̀ nyòʼsɨ̀ ɨtoŋ.

⁹Fɨleʼfɨ nà n-fvɨ̂ a ŋweyn a ntoŋsɨ azue,

ɨvɨs ɨ fvɨ̂ a ŋweyn ɨchfɨ̀,

ɨkfêtɨ̀ ɨvɨs ɨ boŋ fvɨ-à.

¹⁰Wu n-gwosɨ meyn ìyvɨ ɨ suʼi kàlì a nse,

ɨ nà ti atû mbaʼsɨ fɨmnɨsɨ.

¹¹Wu nà n-tâyn atû nyàm ìlì yi kelɨ tɨ̀wô,

wù nà n-tâyn afyef.

¹²Wu nà n-ghɨ ma wù chɨytɨ meyn ngêŋ ŋweyn

nɨ̀ àbe afɨmnɨ-a, a ghɨ mbàʼsɨ ivɨ.

¹³Ivɨ i nà n-myâyn a ŋweyn asɨ,

ɨvɨsɨ nà bali-à.

¹⁴Gyà Bôbo Fɨyini nà n-gvî iyvɨ têyn ta ivɨ ibyalɨni,

ghɨ yvɨ gya àteyn nô mɨ wo.

¹⁵Wù n-læ meyn tɨm awoŋ kɨ sàsɨ̀ mbàynɨ̀sɨ ŋweyn

ivɨ i myàyn, àŋena ɨ nyɨŋnɨ.

¹⁶Bôbo Fɨyini nà n-tɨm kɨ àzuê ɨ̀ byal sɨ̂ mbàynɨ̀ sɨ ŋweynsɨ, kî jvà ighaʼnɨ ɨ keʼ kɨ a ndayn, nzɨ̀tɨ mbzɨ ɨ keʼ kɨ a ndayn.

¹⁷Wù n-suʼi meyn ɨ gvì iyvɨ,

ɨ ghal fvɨ̀sɨ̀ nɨ̀ mà sɨ a jva yi sœ̂ kɨ tèyn.

¹⁸Wu n-bœsɨ meyn mà sɨ ɨwu nɨ̀ mbàynɨ̀sɨ bemnɨsɨ nɨ̀ mà,

ɨ bœ̀sɨ mà sɨ ɨwu nɨ̀ mbàynɨsɨ̀, sɨ to chwò mà.

¹⁹Mɨ nà n-ghɨ a ngeʼ mbàynɨ̀ sèmsɨ ɨ gvì sɨ nu ma,

Bôbo Fɨyini ɨ bœsɨ̀ mà.

²⁰Wù n-fvɨsɨ meyn ɨ lèm mà alèʼ a juŋà,

wu n-bœ̀sɨ ma bòm ta wu na n-saŋlɨ kûm mà.

²¹Bôbo Fɨyini nà n-saŋlɨ̂ kûm mà bòm ta mɨ nà n-ghɨ àtì-ati,

ɨ màʼtɨ̀ mà bòm ta ɨwu wom nà n-ghɨ .

²²Yi n-ghɨ tèyn bomta mɨ n-jêl a dzɨsɨ nɨ̀ Fɨyini fɨ,

ma bû kàsi sɨ ibàm nɨ̀ Fɨyini femfɨ.

²³Mɨ n-lêm tɨ̀saʼ tɨ ŋweyn nô tɨ̀ jɨ̀m, tɨ lum ghɨ kɨ a mɨ ikfâʼtɨ̀,

ma bû vìsi nô ìwo imòʼ ateyn.

²⁴Ma bû nì ìwo ili na ghɨ gham ma sɨ ateyn,

ma bû nì mbɨ.

²⁵Bôbo Fɨyini màʼtɨ̀ mà bòm ta mɨ n-ghɨ àti-ati,

ɨwu ɨ̀ wom ɨ ghɨ a ŋweyn asɨ.

²⁶“Wà n-ndêyn sɨ̂ ghelɨ ghì a ghɨ n-nî nô mɨ ghà ta wà bè, na wà n-nî nô mɨ ghà ta wà bè a Bôbo,

dyèyn sɨ̂ ɨghî a ghɨ n-kelɨ wi njas na wa n-kelɨ wi njas.

²⁷Wà n-ndyêyn sɨ̂ ghelɨ ghì a mɨtêm mɨ̀ àŋena nɨn layn na wà n-layna,

mɨtì dyêyn sɨ̂ ghelɨ ghɨ bɨ na wà n-bema.

²⁸Wà n-bœ̂sɨ̀ ghelɨ ghì a ghɨ n-gvɨmlɨ ngeŋsɨ

mɨtì wumsɨ̂ ghelɨ ghì a ghɨ n-ghaŋsɨ ɨwuyn.

²⁹Wà n-ghɨ ìbàyn ì yemi a Bôbo,

sâŋ àbe afɨmnɨ-a sɨ a ma dzɨsɨ.

³⁰Mà kàʼ a mà tɨm yɨ sugèyʼsɨ̀ sɨ dvɨ̂ kɨ tèyn bòm àdyaʼ à kya,

ma mà kàʼ a mà yaʼi nô mɨ ìnkì i mbàyn ì kà bòm và.

³¹Mɨ n-kya na dzɨsɨ Fɨyinisɨ nɨn ghɨ àtì-ati,

iwo i Bôbo Fɨyini ɨ kelɨ wi njas.

Wù n-kɨ̂ŋtɨ̀ nô mɨ ndà sɨ a ngeʼ,

ɨlvɨ ta wù ndù sɨ̂ ŋweyn.

³²Fɨyini fɨ lifɨ bu ghɨ wi a bu kɨ Bôbo Fɨyini.

À n-ghɨ kɨ ŋweyn iwu.

³³A n-fu Fɨyini fu àdyaʼ sɨ̂ mà,

a tisɨ̂ ŋweyn dzɨ semsɨ.

³⁴A n-gâmtɨ̀ ŋweyn sɨ nì na ka avɨ à kema nî leyn,

nî na ɨvɨ wom na ghɨ ta ɨvɨ fɨchuè, ma mà kaʼ ma bû fe.

³⁵Wù yeʼi meyn mà, ma na tɨm ìwoŋ,

ɨ̀ yèʼi mà, ma na kya sɨ tɨm fɨ̀nchya ma ghɨ fàytɨ nɨ̀ ìdyayn i.

³⁶Wà n-bœ̂sɨ̀ mà, nî na mà tɨm yɨ iwoŋ.

Wà suʼsɨ meyn ngêŋ zya a nse ɨ̀ làysɨ̀ mà.

³⁷Wà gamtɨ meyn mà

ɨ̀ nì na ka mbàynɨ̀ semsɨ ghal ma.

³⁸Mɨ n-læ meyn nyɨŋ ibàm nɨ̀ mbàynɨ̀ semsɨ ɨ zuetɨ àŋena.

Mɨ n-bu læ kasi ibàm nô ta ka mà mesi àŋena.

³⁹Mɨ n-læ meyn kaʼlɨ àŋena ghɨ felɨ a nse nô wùl sɨ ateyn ɨ faŋ tɨ̀ fì tɨ̀ làlì,

ma jèylɨ àŋena nɨ̀ ɨvɨ.

⁴⁰Wà n-fu meyn àdyaʼ sɨ̂ mà na mà na tɨm ìwòŋ,

ɨ nì mbàynɨ̀ semsɨ kfɨtɨ a ma asɨ ma dyàŋ atu nɨ̀ ɨ̀vɨ.

⁴¹Wà n-ni meyn mbàynɨ̀ semsɨ ɨ bèynlɨ̀ ɨ leʼnɨ,

ma mèsì àŋena.

⁴²Àŋena nà n-dzɨ-à, loyn ìgâmtɨ̀ wùl ɨ ghɨ wi sɨ gàmtɨ̀ àŋena.

Àŋena nà dzɨ sɨ̂ Bôbo Fɨyini mɨtì wu faŋtɨ̀ bèynsɨ̀ àŋena.

⁴³Mɨ n-læ leŋ àŋena ghɨ nà bôynɨ̂ kɨ tèyn.

Mɨ n-læ foyn àŋena ta mà foyn achâʼlɨ̀ a dzɨ.

⁴⁴Wà fsɨ meyn mà sɨ ɨwu nɨ̀ ghelɨ ghem,

ɨ̀ lèm mà, ma na saʼ tɨ̀laʼ tɨ dvɨ̂ kɨ tèyn.

Ghelɨ nɨn ghɨ a mɨ isas isaʼ dvɨ̂ kɨ tèyn bula ma ti nà kya àŋena.

⁴⁵Ɨtum nɨn gvî ngvɨmtɨ̂ a ma asɨ,

ma bê nô mɨ ghà àŋena yvɨ kɨ tì.

⁴⁶Àŋena nà n-fâyn mà chɨŋa,

fvɨ gvî sɨ a ɨlwèʼ ɨ leytɨnɨ nɨ̀ àŋena.

⁴⁷Bôbo Fɨyini nɨn chi-à, ma bemsɨ ŋweyn. Wù n-ghɨ ìwu sɨ̂ mà.

Ikoʼsɨ-i nɨn ghɨ sɨ̂ Fɨyini femfɨ, iwu ì yemi nɨ̀n bœ̀sɨ̀ yem.

⁴⁸Wù n-ghɨ Fɨyini fìfɨ̀ a fɨ n-sɨ̂sɨ̀ mbàynɨ̀ semsɨ.

Wù ni meyn tɨlaʼtɨ na ghɨ a ma isas isaʼ.

⁴⁹Wù n-bœ̂sɨ̀ mà sɨ ɨwu nɨ̀ mbàynɨ̀ semsɨ,

nî mà ma koʼnɨ̂ chwô ghelɨ ghì a ghɨ n-bâyn ma.

Wù n-bœsɨ meyn mà sɨ ɨwu nɨ̀ ghelɨ ghɨ bɨ.

⁵⁰Bòm tèyn, mà na koʼsɨ̂ và a Bôbo. Mà na koʼsɨ̂ ìzɨyn ìzæ̀ sɨ̂ ghelɨ ɨtum.

Mà na yem njàŋsɨ̀ koʼsɨ̂ ìzɨyn ì zæ.

⁵¹Wà ti meyn yìsi mà sɨ a fòyn ɨ̀ nà kôŋ mà ɨ̀ fu adyaʼ ma tɨm ɨ̀ yɨ mbàynɨ̀ semsɨ. Fɨyini fɨ dyêyn meyn ìkôŋ ikaynɨ-i sɨ̂ wùl vzɨ̀ a wù yìsi sɨ a fòyn ɨ̀ dyèyn dzɨ sɨ̂ Devìt ŋêyn isas i ndo nɨ̀ ŋweyni kɨ̀ samoʼ.