2 Samuel 14

Absalòm ɨ kasi kfa sɨ a Jèlusalèm

¹Jowàb ɨ wâyn Zeluwà nɨ̀n yeyn meyn ɨ keli na fòyn Devìt sɨ kôŋ sɨ yeyn Absalòm. ²Jowàb ɨ kæ tum wul na wù ndu ɨ̀ kìni gvì nɨ̀ wùl ɨ wi ɨ̀tofɨnɨ a ntèʼ Tekowà. Ghɨ ndu jàŋ wul ɨ wi ɨlvɨ̀ wu gvì wu bè sɨ̂ ŋweyn na, “Mɨ kɨŋ na wà lèm kɨ̀ na wà n-dzɨ̂ ìkfɨ. Wà sû ɨ̀wuyn, ka wa n-yìsi ɨ màʼ fɨ̀ntsɨ ɨ nà kêʼ ta wà dzɨ̂ meyn ìkfɨ sɨ a ndèyn. ³Jowàb nɨn be na wu baʼtɨ mèsì wu ndu fèʼtɨ̀ ìwo zɨ̀ sɨ̂ fòyn a yi n-bè sɨ̂ ŋweyn. Wu n-taŋi tî ɨ feʼtɨ̀ ìwo zɨ̀ a ka wù ndu ɨ̀ bè.

⁴Wul ɨ wi Tekowà nâ vzɨ̀ ɨ ndù ɨ tɨm alvɨ asɨ nɨ̀ fòyn ɨ bè sɨ̂ ŋweyn na, “Mbæ̀, gàmtɨ ma.”

⁵Fòyn ɨ bɨf sɨ̂ ŋweyn na, “À n-fu ghà ngeʼ sɨ̂ và a?”

Wu bè na, “Mɨ ghɨ wî nkfɨ. ⁶Mbæ̀, mà tî nà kelɨ woyn woyn ghɨ lûmnɨ̀ ghɨ̀bo, àŋena ɨ seʼ ɨ nà nû a gvêyn achi a li-a wùl ɨ ghɨ wi sɨ gwòsɨ, ɨlvì ɨ leŋ zue wâynà ŋweyn. ⁷Ghelɨ isas i ndo nɨ̀ ghèsɨ sɨ bâyn mà. Àŋena nɨn kɨŋ na mà visi ghɨ zue wâyn wom vzɨ̀ a wù tî zuè wâynà ŋweyn tì ɨ̀ sɨ̀sɨ̀ ìkfɨ ateyn. Mɨtì ma mà kæ visi ghɨ zue, a wùl na bu ghɨ wi sɨ yɨ ɨfwo ɨ bò àŋena. Ghɨ kæ zue ŋweyn, a à na ghɨ ma ghɨ lɨmsɨ meyn mèsì àbêŋtɨ̀ ɨvɨs nɨ̀ mà, a izɨyn i lûm wom i le.”

⁸Fòyn Devìt ɨ yvɨtɨ koʼ nɨ̀ ìtaŋi i ŋweyn ɨ bè na, “Kasi wa kfâ. Mɨ n-yeyn na mɨ n-nî ghà kûm ìwo nâ yèynì a wà feʼtɨ̀ têyn a.”

⁹Wul ɨ wî Tekowà nâ vzɨ̀ ɨ bè sɨ̂ ŋweyn na, “Mbæ̀ mɨ n-kya na ghelɨ kàʼ a ghɨ gham vâ bòm ta wà gàmtɨ̀ ma. Mɨ n-kɨŋ na ghɨ gham kɨ̀ mà ghesɨ̀ ghelɨ ndo nɨ̀ bò wom, ka wùl ɨ̀ nî ghàm ntoʼ.”

¹⁰Fòyn ɨ bè sɨ̂ ŋweyn na, “Wùlɨ̀ kæ sɨ fi bè ìwo sɨ̂ và wa gvi fèʼtɨ̀ sɨ̂ mà mà dyeyn iwo sɨ̂ ŋweyn wù læ̂ faŋ tɨ̀ fìtɨ̀ fù ngeʼ sɨ̂ và.”

¹¹Wul ɨ wi àteyn ɨ bè na, “Yi na ghɨ tì a mbæ̀ wa jèm Bôbo Fɨyini fyafɨ ni na ka wùl nâ vzɨ̀ a wù n-kɨŋ sɨ sɨ̀sɨ̀ ikfɨ ateyn i sɨsɨ bòm ta yi kæ gàyn a mà wo wayn.”

Fòyn ɨ kàyntɨ kɨ na, “Mɨ n-bê sɨ izɨyn nɨ̀ Bôbo Fɨyini ta Fɨ n-chi na nô nyùŋ ɨ nì teynâ wì atu nɨ̀ wâyn và.”

¹²Wul ɨ wi àteyn ɨ fi bè na, “Visi mà bɨf ɨ̀ kfèynsɨ ìwo sɨ̂ và a mbæ̀.”

Wu bɨmi na wu be iwo ateyn.

¹³Wul ɨ wi àteyn ɨ bɨf sɨ̂ fòyn na, “Bòm ghà ta wà mòm inkì iwo tèyn sɨ̂ ghelɨ Fɨyini a? Wâyn vâ Absalòm bu duʼ tɨ̀ kasi sɨ kfa, ma wà kæ sɨ nì iwo nâ yèynì a wà bè têyn a yi kasi ku kɨ̀ vâ. ¹⁴Ghesɨ̀nà ghɨ̀ jɨ̀m læ̀ kfɨtɨ à. Ghesɨ̀nà nɨn ghɨ kɨ tèyn ta mu, ma mɨ̀ sfɨ̀sà ghɨ kaʼ ghɨ bû fì kàsi kùtɨ. Mɨtì Fɨyini fɨ̀ ɨ zue wi zue wùl, Fɨyini fɨ̀ nɨn nî Fɨ kwo kɨŋ dzɨ na wù kasi kfa ɨlvɨ ta wù vìsi ŋweyn.

¹⁵Ma gvì sɨ bè iwo nâ yèynì sɨ̂ và a mbæ̀ bom ta ghelɨ nɨn kfâyntɨ̀ àwo sɨ̂ mà ma fàynà. À ti iwo zɨ̀ a mà nì kfàʼtɨ̀ na mà gvi ɨ̀ tàŋi sɨ̂ và lvɨfɨli a wà bɨmi sɨ nì iwo zɨ̀ a mà bè ¹⁶ɨ̀ fsɨ̀ ma sɨ awu nɨ̀ wùl ɨ̀ vzɨ̀ a wù n-kɨŋ sɨ zue ghesɨ̀ wâyn wom na ghesɨ̀ ŋweyn le ighaʼ zɨ̀ a Fɨyini fɨ̀ fù sɨ̂ ghès.

¹⁷Mà nì kfàʼtɨ̀ a mbæ̀ na wà kæ bè iwo a yi kfɨmtɨ ma bòm ta wà n-ghɨ tèyn ta nchì Fɨyini a mbæ̀, yeyn kelî ìwo i juŋì nɨ i bzɨ-i. Mɨ n-jêm na Bôbo Fɨyini fyafɨ na ghɨ zɨ̂ ŋweyn.”

¹⁸Wu n-taŋi tî fòyn ɨ bè sɨ̂ ŋweyn na, “Mɨ n-bɨf ìwo sɨ̂ và. Ma bɨf wa taŋi kɨ samo.”

Wul ɨ wi ateyn ɨ bè na, “Bɨf a mbæ̀.”

¹⁹Fòyn ɨ bɨf sɨ̂ ŋweyn na, “Awu a Jowàb a nɨn ghɨ iwo afêyn a wà n-nî teyn a?”

Wul ɨ wi àteyn ɨ bɨmi ɨ bè na, “Yi n-ghɨ samoʼ a mbæ̀. Mɨ n-bê sɨ̂ và samoʼ na wùl kàʼ wu bû lèyʼtɨ̀ ìwo sɨ̂ và. À tî bè kɨ̀ nô Jowàb na mà gvi afêyn, fì fèʼtɨ̀ ìwo zɨ̀ a ka mà gvi ɨ̀ bè. ²⁰Jowàb tî nì tèyn a mbæ̀ ta ka wà kfɨnɨ dzɨ zɨ̀ a wà n-yeyn iwo yèynì ateyn. Mɨ n-kya a Mbæ̀ na wà n-tof kɨmɨ ta nchì Fɨyini, yeyn kelî àwo kì a kɨ n-gâyn a ilaʼ afêyn.”

²¹Fòyn ɨ yvɨ tî ɨ kæ jàŋ Jowàb sɨ be sɨ̂ ŋweyn na, yi bɨmi meyn sɨ ni iwo zɨ̀ a wù n-kɨŋ. Ndu jaŋ gvi nɨ̀ wâyn wom Absalòm. ²²Fòyn nɨn læ taŋi tî Jowàb ɨ suʼi ɨ kfɨsɨ ìkêʼ a nse ɨ beyn ŋweyn ɨ bè na, “Mà yeyn meyn keli layn a Mbæ̀ ta wul ɨfelɨnɨ nɨ̀ và na wà n-kôŋ mà bòm ta wà bɨmi meyn sɨ nì iwo zɨ̀ a mà bè.”

²³Jowàb ɨ kæ lu sɨ ndù a Geshù sɨ kasi sɨ lì sɨ gvì nɨ̀ Absalòm a Jèlusalèm, ²⁴mɨtì fòyn ɨ bè na, “Mɨ n-kôŋ wì sɨ yeyn ŋweyn, wù ndu nà chî kɨ a ŋweyn a ndo.” Absalòm ɨ ndu nà chi kɨ a ŋweyn a ndo ɨ faŋ tɨ̀ yeyn fòyn.

²⁵Absalòm nà n-ghɨ ɨ̀kuŋ alèʼ àmòʼ. Wù nà n-kelɨ wi nseʼi a ŋweyn ɨwùyn kɨ̀ sɨ zɨ̀tɨ̀ a ŋweyn atu sɨ kàlì sɨ fvɨ̀ ɨvɨ̀. Nô mɨ ndà a Isìlæ̀ ɨ bɨmi na ɨkuŋ ɨlvɨ bu ghɨ wi ta ŋweyn. ²⁶Wu nà n-kelɨ nyuŋ àtu yi dvɨ̂ kɨ tèyn, kom àtu kɨ ɨlvɨ ɨ̀mòʼ a bêŋ ɨlvɨ ta kɨ koʼ chwòsɨ̀ nà sɨ dɨ̀là. Wù nà n-koma ɨ̀ fèʼ, nyuŋ sɨ ateynsɨ nà dɨlɨ̀ chwô kilù .

²⁷Absalòm nà n-kelɨ woyn woyn ghɨ lûmnɨ̀ ghɨ̀bò nɨ̀ wayn wi ghɨ toŋtɨ na Tamà, a ghɨ kɨ nô àtu a ngòyn.

²⁸Absalòm nɨn læ chi bèŋsɨ̀ bò a Jèlusalèm bula wù yeyn fòyn. ²⁹Ɨtuʼ layn achi a li-a wu tum na ghɨ jaŋ Jowàb yì tum ŋweyn sɨ̂ fòyn. Ghɨ ndu bè, Jowàb ɨ leʼ na yi n-gvì wì. Wu fi tum ɨ kfeynsɨ, ghɨ ndù Jowàb ɨ fi leʼ kɨ leʼ. ³⁰Wu bè sɨ̂ ghelɨ ghɨ felɨnɨ nɨ̀ ŋweyn na, “Ba yi n-kya gvêyn Jowàb zɨ̀ a ma ngùŋ gvèyn tì? Asaŋ a balì-a nɨn ghɨ ateyn. Yì ndu nyòʼ gveyn àteyn.” Ghelɨ ghɨ felɨnɨ nɨ̀ ŋweyn nâ ghì ɨ ndu nyòʼ gveyn àsàŋ nâ zɨ̀.

³¹Ghɨ nyòʼ tì Jowàb ɨ lu ndù a ndo nɨ̀ Absalòm ɨ bɨf sɨ̂ ŋweyn na, “Ghelɨ ghɨ felɨnɨ nɨ̀ và gvì nyòʼ gvêyn yem bòm ghà?”

³²Absalòm ɨ bèynsɨ na, “Mà bè na ghɨ ndu nyòʼ bòm ta ma tum meyn jàŋ và wà leʼ na wa n-gvì wì, ma kɨŋ sɨ tum vâ na wà ndu ɨ̀ bɨ̀f sɨ̂ fòyn na sɨ a nyɨŋ tî nà ghɨ ghà na mà kàsi gvì sɨ a Geshù a. Yi tî nà jòf na mà kwo faŋ kɨ̀ afu. Mɨ n-kɨŋ sɨ yeyn fòyn lvɨ̂yn. Mà kæ nà ghɨ ma ma bebsɨ meyn ìwo wu zue ma.”

³³Jowàb ɨ yvɨ tî ɨ ndu fèʼtɨ̀ ìwo ateyn sɨ̂ fòyn, wu bè ghɨ ndu jaŋ gvì nɨ̀ Absalòm. A nà ghɨ ta Absalòm gvì chem asɨ nɨ̀ fòyn ɨ tɨm alvɨ a ŋweyn asɨ ɨ tfɨŋsɨ atu a nse, fòyn ɨ ghal ɨ baʼnɨ ŋweyn.