2 Samuel 13

Amnòn ŋêyn Tamà

¹Absalòm ɨ wâyn Devìt nà n-kelɨ jêmtɨ̀ izɨyn i ŋweyni ɨ ghɨ Tamà a ghɨ kɨ nô àtu a ngòyn. Amnòn a ghɨ kɨmɨ wâyn Devìt ɨ nà sɨ kôŋ Tamà ɨ wâyn bò ŋweyn. ²Amnòn nà n-kɨŋ sɨ chi nɨ̀ Tamà yi to ghaʼ ŋweyn, iwo ateyn i fu ngeʼ sɨ̂ ŋweyn ɨ chem aleŋ wu nà sɨ koʼi-à. À nà n-ghɨ tì, Tamà ɨ bu duʼ tɨ̀ nà kya wùl ɨ lûmnɨ̀ yi boynɨ̂ wì ta ka Amnòn ni iwo sɨ̂ ŋweyn.

³Amnòn nà n-kelɨ wul ìjèl nɨ̀ ŋweyn ghɨ toŋtɨ̂ na Jonadàb a ghɨ wâyn Shimìyà ɨ wâynà Devìt. Jonadàb nà n-ghɨ wul kuŋlɨ̂ tof nô a jûŋ. ⁴A nà ghɨ achi a li-a Jonadàb ɨ bè sɨ̂ Amnòn na, “Fèʼtɨ sɨ̂ mà na wà n-ghɨ kɨ nô wâyn ntoʼ tèyn nà gvɨ̂yn kêʼ a mɨ̂chi afêyn tèyn a fu ghà ngeʼ sɨ̂ và a?”

Amnòn ɨ bè sɨ̂ ŋweyn na yi n-kôŋ sɨ chi nɨ̀ Tamà ɨ jêmtɨ̀ Absalòm ɨ wâyn bò vzɨ.

⁵Ta wù bè tî, Jonadàb ɨ bè sɨ̂ ŋweyn na, “Nyìŋi ɨkuyn ɨ nà kem nî kɨ na wà n-koʼî kòʼi. Bò vâ gvî sɨ toŋtɨ vâ, wa bè sɨ̂ ŋweyn na wà n-kôŋ na wâyn bò vâ Tamà gvi ɨ̀ fu afo wà yɨ. Bè na wù gvi ɨ̀ ghayn afo ayɨnɨ-a ateyn kɨ̀ nô a wa a ngùŋ ɨ̀ fù sɨ̂ và.”

⁶Wu bè tì Amnòn ɨ ndu nyɨ̀ŋì ɨ nà kem nî na yi n-koʼî kòʼi. Fòyn ɨ ni gvì sɨ toŋtɨ ŋweyn wu bè sɨ̂ ŋweyn na, “Bè sɨ̂ wâyn bò wom Tamà na, mɨ n-kôŋ na wù gvi ghayn afo a yɨnɨ-a kɨ̀ nô afêyn ɨ̀ fu mà yɨ.”

⁷Fòyn Devìt ɨ yvɨ tî ɨ tum jàŋ Tamà a ntoʼ ɨ bè sɨ̂ ŋweyn na, “Ndu yeyn wâyn bò vâ Amnòn a ŋweyn a ndo ɨ ghayn fu afo wù yɨ.” ⁸Tamà ɨ kæ sɨ lù sɨ ndù a ndo nɨ̀ wâyn bò ŋweyn Amnòn ɨ ndu yeyn ŋweyn wu nyɨŋ ɨkuyn. Wu lì ɨ̀nkfɨ̂ŋ ɨ lamtɨ àbayn Amnòn ɨ ki yeyna. ⁹Wu lam mesì ɨ se sɨ fu sɨ̂ ŋweyn wu leʼ na yi n-yɨ wi ɨ bè sɨ̂ Tamà na wù be nô mɨ ndà fvɨ lù. Wu bè tì ghelɨ ghɨli ghì a ghɨ nà n-ghɨ afu ɨ fvɨ̀ ɨ lù. ¹⁰Amnòn ɨ kæ bè sɨ̂ Tamà na, “Zɨ gvi nɨ̀ ɨ̀fwo ɨ yɨnɨ ateyn sɨ̂ mà antêynɨ̀ ndo ta ka wà na yɨsɨ̂ mà ateyn.” Tamà ɨ lì àbayn kì a wù lam ɨ zɨ ndù sɨ fu sɨ wâyn bò ŋweyn Amnòn. ¹¹A nà ghɨ ta wù zɨ ndù sɨ fu na wù yɨ, wu ghal ŋweyn ɨ bè na, “Gvi ghesɨ̀và nyɨŋi a wâyn bô.”

¹²Wu bè sɨ̂ ŋweyn na, “Ka wa n-mòm a wâyn bæ̀ sɨ̂ mà. Ka wa n-ghàl ma sɨ adyaʼ. Ghɨ lum mòm wi ìnkì iwo tèyn a Isìlæ̀. À n-ghɨ kɨ nô ìwo i bzɨ-i. ¹³Mà kæ ni ìnkì iwo nâ yèynì a mà kfɨ iwumi. Ma yi kæ gàyn a ghelɨ Isìlæ̀ na ki và wa chaʼnɨ̂ a àŋena asɨ. Mɨ n-chwotɨ̂ và na wà kwo bè sɨ̂ fòyn na wà n-kôŋ sɨ mala ma. Mɨ n-kya na wà bè wù bû tùynsɨ.” ¹⁴Tamà nɨn taŋi mɨtì Amnòn ɨ faŋ tɨ̀ yvɨ̀tɨ ɨ ghal ɨ chi nɨ̀ ŋweyn sɨ adyaʼ bòm ta wù nà n-to chwò Tamà.

¹⁵Wu n-chi nɨ̀ Tamà nô mɨ ɨlvɨ gha ɨ zɨ̀tɨ̀ ɨ nà sɨ bâyn ŋweyn fu kɨ sɨ̂ ìkfɨ-i. Ibâyn ateyn i nà n-chwô ìkôŋ zɨ̀ a wu nà n-kelɨ sɨ̂ ŋweyn sɨ asɨ ɨ kàyn sɨ̂ ŋweyn na, “Làli fvɨ̀ sɨ afêyn.”

¹⁶Tamà ɨ bè sɨ̂ ŋweyn na, “Ɨ̀ngaŋ. Ijûm nâ yèynì a wà n-jûm ma têyn nɨn bef chwô ìwo zɨ̀ a wà sɨ ghɨ ma wà mom meyn sɨ̂ mà.”

Mɨtì Amnòn ɨ faŋ tɨ̀ yvɨ̀tɨ iwo zɨ̀ a Tamà nɨ̀n bê, ¹⁷ɨ jàŋ wul ɨ̀ felɨnɨ nɨ̀ ŋweyn ɨ bè sɨ̂ ŋweyn na, “Saŋ fvɨ̀sɨ wul ɨ wi wèyn sɨ afêyn ɨ fò ndo.” ¹⁸Wul ɨfelɨnɨ àteyn ɨ saŋ fvɨ̀sɨ̀ ŋweyn ɨ fò ndo. Tamà nà n-ghɨ ma wù maʼ meyn ndzɨsɨ tosɨ sɨ dyêf kɨ tèyn, a ghɨ ndzɨsɨ sìsɨ̀ a Woyn ntoʼ ghɨki ghì a ghɨ nà n-bu duʼ tɨ nà kya wùl ɨ lûmnɨ̀ nà n-mâʼ. ¹⁹Tamà ɨ bàytɨ̀ ndɨsɨ ŋweyn ɨ fuʼ abvɨ ichɨ a ŋweyn atu ɨ gèlì ɨ̀wu atu ɨ nà sɨ byal dzɨ̀ ndû-à.

²⁰Wâynà ŋweyn Absalòm ɨ yeyn ŋweyn ɨ bɨf na, “Wà ndzɨ̂ ghà? Wâyn bò vâ Amnòn ghal meyn chi nɨ̀ và sɨ adyaʼ â? Ka wa n-fì ndzɨ̀, à n-ghɨ wâyn bò vâ. Ka wa n-vìsi iwo ateyn i na fu ngeʼ sɨ̂ và.” Tamà ɨ ndu nà sɨ chî a ndo nɨ̀ wâynà ŋweyn Absalòm, yuŋlɨ̂ afu nô sɨ a ŋaŋ.

²¹A nà ghɨ ta fòyn Devìt yvɨ iwo zɨ̀ a yi gàyn, ɨtoŋ ŋweyn ɨ yaf nô sɨ a ŋaŋ. ²²Absalòm ɨ bàyn Amnòn kɨ̀ samoʼ ɨ nà lum bu taŋî wì sɨ̂ ŋweyn bòm ta wù wùmsɨ jêmtɨ̀ ŋweyn Tamà.

Absalòm ɨ zue Amnòn

²³À nà n-ghɨ ibàm i bèŋsɨ̀ bò, ghelɨ ghɨ felɨnɨ nɨ̀ Absalòm ɨ ndù sɨ sɨ iwî i njɨ̀sɨ̀ nɨ̀ ŋweyn a ntèʼ Bal Hazò ta yi nà n-baʼsɨ a ntèʼ Eflèm. Absalom ɨ laʼì woyn ntoʼ woyn ghɨ lûmnɨ̀ nô ghɨ̀ jɨ̀m na ghɨ gvi afu, ²⁴ɨ ndu bè sɨ̂ fòyn na, wul ɨ̀ felɨnɨ nɨ̀ ŋweyn keli meyn ghelɨ ta ka ghɨ sɨ iwi njɨ̀sɨ̀ nɨ̀ ŋweyn, nà chwotɨ̂ na fòyn gvi afu ŋêyn ghelɨ ŋweyn.

²⁵Fòyn ɨ bè na, “Ɨ̀ngaŋ a wâyn wom. Yi n-jôf wì na ghèsɨ̀ gvi ghɨ̀jɨm bòm ta à na ghɨ adɨli sɨ̂ và.” Absalòm ɨ fi chwotɨ fòyn mɨtì wu leʼ na yi n-ndù wì mɨtì ɨ bè na yi n-jêm na nô mɨ ghà ndu kɨ̀ a jûŋ.

²⁶Absalòm ɨ bè sɨ̂ ŋweyn na wù na ghɨ wi sɨ gvì wu bè wâyn bò ŋweyn Amnòn gvi.

Fòyn ɨ bɨf sɨ̂ ŋweyn na, “Wà n-kɨŋ na wù gvi nì ghà?” ²⁷Absalòm ɨ chwotɨ kɨ chwotɨ, wu visi na Amnòn ndu ŋêyn woyn ntoʼ woyn ghɨ lûmnɨ̀ ghɨli.

²⁸Absalòm ɨ nyaʼtɨ ɨ bè sɨ̂ ghelɨ ghɨ felɨnɨ nɨ̀ ŋweyn na, “Amnòn nyvɨ mɨ̀lûʼ mɨ̀ ku ma bê na yì zue ŋweyn yi zue kɨ zue ka yi n-fàyn bòm ta à bè kɨ̀ nô mà. Yì na kelɨ àtem ato.” ²⁹Absalòm ɨ ni bè na ghɨ zue Amnòn nô mɨ ɨlvɨ gha, ghɨ zue kɨ zue. Woyn ntoʼ ghɨli ghì ɨ làlì ɨ koʼ nyamsɨ àŋena ɨ leʼnɨ.

³⁰Àŋena nà bu ghɨ kɨ a dzɨ, Devìt ɨ yvɨ na, Absalòm zuetɨ meyn woyn ntoʼ nô ghɨ̀ jɨ̀m. ³¹Fòyn ɨ lali ɨ ghal bàytɨ̀ ndzɨsɨ sɨ a ɨwùyn ɨ fe a nse. Ghelɨ ghɨ felɨnɨ nɨ̀ ŋweyn ghì a ghɨ nà n-ghɨ afu nô ghɨ̀ jɨ̀m ɨ boŋ bàytɨ̀ ndzɨsɨ àŋena.

³²Jonadàb ɨ wayn wâynà fòyn Devìt vzɨ̀ a ghɨ nà n-toŋtɨ na Shimìyà ɨ bè sɨ̂ fòyn Devìt na, “Mbæ̀, ghɨ zue kɨ̀ Amnòn. Ghɨ bu zuetɨ woyn ntoʼ ghɨjɨ̀m. Amnòn nɨn læ ghal ɨ chi nɨ̀ jêmtɨ̀ ŋweyn Tamà sɨ adyaʼ tî, Absalòm ɨ lem kɨ sɨ achi nâ ghè na yi n-zue ŋweyn. ³³Ka wa n-yvɨ̀tɨ ìwo zɨ̀ a ghɨ gvì bè na woyn ntoʼ kfɨtɨ meyn kɨ ghɨ̀ jɨ̀m tì a mbæ̀. À kfɨ kɨ̀ Amnòn.”

³⁴A nà n-ghɨ tì ma Absalòm leʼ meyn.

Kɨ̀ têyn, wùl ɨ̀ vzɨ̀ a wù n-chi ntoʼ ɨ làysɨ̀ àsɨ ɨ se sɨ ki ɨ yeyn anôyn a ghêl kɨ kalì gvî a kfɨyn abàs a Holonèm ɨ ndu fèʼtɨ̀ ìwo zɨ̀ a wù yeyn sɨ̂ fòyn.

³⁵Jonadàb ɨ bè sɨ̂ fòyn na, “Yeyn læ̂ a mbæ̀, à n-kasî kfa gvî wôyn ghya ghɨli ghì têyn kɨ̀ ighel ta mà nì bè.”

³⁶Wù nà n-taŋî mesì gvî kɨ tèyn woyn ntoʼ ghì ɨ zɨ nɨ̀ ìdzɨ-ì kɨ ghɨ̀ jɨ̀m. Fòyn ŋêyn ghelɨ ghɨ felɨnɨ nɨ̀ ŋweyn ɨ boŋ fe kɨ nɨ̀ idzɨ-ì.

³⁷Absalom nɨn leʼ tî ɨ ndu yeyn Talmày ɨ fòyn Geshù ɨ wâyn Amihùd. Mɨtì fòyn Devìt ɨ nà dzɨ̂ wâyn ŋweyn Amnòn kɨ̀ mɨchi ɨ̀n jɨ̀m.

³⁸Absalòm nɨn leʼ ndu chi bèŋsɨ̀ tal a Geshù. ³⁹A nà ghɨ ta iwo ikfɨ nɨ̀ Amnòn ì bòynɨ sɨ a atem nɨ̀ fòyn Devìt, wu nà sɨ kòŋ sɨ yeyn Absalòm.