2 Samuel 12

Natàn ɨ yòl sɨ̂ Devìt

¹Bôbo Fɨyini nɨ̀n tum meyn Nfèʼtɨ̀ Natàn na wù ndu ɨ̀ mò ngàyn sɨ̂ Devìt na, “Ghelɨ ghɨli ghɨ̀bò nɨn læ meyn nà chî a ntèʼ ìlì, ɨlvɨ̀ ɨ ghɨ nô wul ɨ two, ɨlvɨ̀ ɨ ghɨ wul ànfɨf. ²Wul ɨ two nâ vzɨ̀ nà n-kelɨ ìnôyn i nyâmsɨ nɨ̀ ìnôyn i bzɨsɨ kɨ̀ sɨ a idvɨ̀. ³Wul ànfɨf vzɨ̀ ɨ kelɨ wi afo a bu kɨ fɨ̀ bzɨ fɨ njɨ̀ fɨ̀mòʼ ta wù yuyn, nà lemsɨ̂ kɨ akaʼ àmòʼ ŋêyn woyn ŋweyn. Njɨ̀ àteyn nà n-yɨ kɨ àfo kì a wù n-yɨ, nyvɨ kɨmɨ a ŋweyn a bom, à gvî ɨlvɨ fɨli wu chàʼsɨ̀ ɨ ghal yi nà buni-à. Njɨ̀ àteyn nà n-ghɨ kɨmɨ ta wayn ŋweyn ɨ wi.

⁴A nà ghɨ achi a li-a, wùl ɨ gvì sɨ mùtɨ wul ɨ̀two nâ vzɨ̀ wu nà kɨŋ sɨ tal ŋweyn mɨtì kôŋ wì sɨ sɨ bzɨ̂ ŋweyn ìlì ɨ kwo ndu choŋ bzɨ̂ wùl ànfɨf vzɨ̀ ɨ sɨ.”

⁵Devìt ɨ yvɨ iwo ateyn ɨtoŋ yaf ŋweyn nô sɨ a ŋaŋ kûm wul ɨ two nâ vzɨ̀, wu bè sɨ̂ Natàn na, “Mɨ n-bê sɨ̂ và samoʼ sɨ a izɨyn nɨ̀ Bôbo Fɨyini na wùl vzɨ̀ a wu læ mòm iwo nâ yèynì nà n-kelɨ sɨ kfɨ.” ⁶Wù n-kelɨ sɨ laʼ bzɨ sɨ̀ kæ̀ sɨ̂ wul ànfɨf nâ vzɨ̀ jæ ta ka ghɨ zue ŋweyn. Wù môm meyn ìwo yi bem no abɨ ɨ̀ faŋ tɨ̀ kèli ikoynsɨ isuyn sɨ̂ wul ànfɨf nâ vzɨ̀.

⁷Wu n-taŋi tî Natàn ɨ bè sɨ̂ ŋweyn na, “À n-ghɨ kɨ nô và wul ɨ two nâ vzɨ̀. Bôbo Fɨyini fɨ Isìlæ̀ bè na, ‘À tî yìsi mà vâ sɨ a fòyn Isìlæ̀ ɨ̀ bœ̀sɨ̀ và sɨ awu nɨ̀ Sôl. ⁸Mà tî fsɨ̀ ntôʼ Sôl baʼsɨ̂ nɨ̀ ghɨ̀ki ŋweyn ɨ fù sɨ̂ và ɨ̀ fì lèm và sɨ a fòyn Isìlæ̀ nɨ̀ Judà, ma wà nà n-fêʼtɨ̀ sɨ̂ mà na ɨfwo nâ wèyn nɨn kfeynɨ̂ wì sɨ̂ và, ma ma ti meyn fu kfèynsɨ. ⁹Bòm ghà ta wà tî chàs gya Bôbo Fɨyini ɨ̀ mòm ìwo yi bem tèyn a? Wà ti meyn nì ghelɨ Amòn chuʼ zuè Yulìyà ɨ wul ɨ̀ Hêt nɨ̀ fɨ̀nyuèfɨ, wà lî wî ŋweyn sɨ a wa wi. ¹⁰Ta wà tî chàs gya yem ɨ̀ lì wî Yulìyà ɨ wul ɨ̀ Hêt wèyn sɨ a wa wi, mɨ n-ni-à a iwoŋi zɨ ɨ̀ faŋ kɨ̀ faŋ a wa isas i ndo, a à læ̂ nà koʼ mɨ àjâŋ à kà kɨ nà kfɨtɨ̂ kɨ iwòŋ.”

¹¹Bôbo Fɨyini be meyn na, “Mɨ nì ni-à a wùl lali kɨ̀ a wa a ndo ɨ̀ kwò nkfɨm sɨ̂ và. Mɨ nì lî ghɨ̀ki ghya kɨ̀ nô tèyn wa yeyna ɨ̀ fù sɨ̂ wùl wu baʼsɨ̂ sɨ̂ và a wù na chî nɨ̀ àŋena kɨ̀ nô a ntô chuè. ¹²Wà tî nyàʼtɨ nì ni iwo ateyn mɨtì ma ghɨ sɨ nì iyeynì kɨ̀ nô a ndayn, ghelɨ Isìlæ̀ ghɨ̀ jɨ̀m ɨ yeyna.”

¹³Wu n-taŋi tî Devìt ɨ bèynsɨ bè sɨ ŋweyn na, “Ma ni meyn mbɨ sɨ̂ Bôbo Fɨyini.”

Natàn ɨ bè sɨ̂ ŋweyn na, “Bôbo Fɨyini lesɨ meyn fù vâ, wa n-kfɨ wi bòm mbɨ nâ yèyn. ¹⁴Mɨtì wàyn vzɨ̂ a ka ghɨ bzɨ nɨn kfɨ-a bòm ta wà nî meyn mbàynɨ̀sɨ chas Bôbo Fɨyini.”

¹⁵Natàn nɨn taŋi tî nô mɨ ɨlvɨ gha ɨ kasi kfa, Bôbo Fɨyini ɨ nì wàyn vzɨ̂ a wî Yulìyà nɨn bzɨ ŋêyn Devìt ɨ fe ìkoʼi. ¹⁶Devìt ɨ nà jemà chwotɨ̂ Fɨyini na fɨ ni wayn àteyn to. Wu n-læ mèyn jèm sɨ a mɨchi, chî kɨ a kî ndo, bam ɨ̀chfɨ̂. ¹⁷Chyeʼsɨ ŋweynsɨ ɨ gvì ɨ nà sɨ chwotɨ̂ ŋweyn na wù lali sɨ a nse, wu leʼ na yi n-làlì wì ɨ leʼ na yi n-yɨ wi afo ŋêyn àŋena.

¹⁸A nà ghɨ ibàm i mɨ̂chi nsòmbo wayn ateyn ɨ kfɨ. Ghelɨ ghɨ felɨnɨ nɨ̀ Devìt ɨ nà sɨ fâyn sɨ fèʼtɨ sɨ̂ ŋweyn ɨ nà kayntɨ̂ na, “Wàyn tî nà bu ghɨ ɨ two ghesɨ̀nà ɨ taŋi sɨ̂ fòyn Devìt wu yvɨtɨ wi, ghɨ ti n-fèʼtɨ̀ sɨ̂ ŋweyn na wù kfɨ meyn lvɨ̂yn a wù na ku nô ti-a? Wù kàʼ a wù mom iwo.”

¹⁹Devìt ɨ yeyn ta àŋena nɨn chɨ̂mtɨ̀ taŋi sɨ̂ ngeŋsɨ ɨ keli na wayn àteyn kfɨ meyn ɨ bɨf sɨ̂ àŋena na, “Wàyn vzɨ̂ kfɨ meyn â?”

Àŋena bɨmi na wù kfɨ meyn.

²⁰Devìt ɨ yvɨ tî ɨ làli kɨ lali sɨ a ki ndo ɨ sù ɨ̀wuyn ŋweyn ɨ faytɨ yisi ɨ kfɨnɨ ndzɨsɨ ɨ lu ndù a ndo nɨ̀ Bôbo Fɨyini ɨ jèm. A nà ghɨ ta wù kasi kfa, wu bè ghɨ gvì nɨ̀ àfo wu yɨ.

²¹Ghelɨ ghɨ felɨnɨ nɨ̀ ŋweyn ɨ yeyn tî ɨ bɨf sɨ̂ ŋweyn na, “Wà n-ghɨ ti têyn a? Wàyn tî nà ghɨ ɨ two wa dzɨ-à fî bam ɨ̀chfɨ̀, wù kfɨ kfɨ wà kwo lalì ɨ̀ nà yɨ-a?”

²²Devìt ɨ bèynsɨ̀ ɨ bè sɨ̂ àŋena na, “Wàyn ti nà ghɨ ɨ two ma bàm ɨ̀chfɨ̂, fî dzɨ a kfâʼ na Bôbo Fɨyini kàʼ a wù koynsɨ isuyn sɨ̂ mà ɨ̀ nì a wù to, ²³mɨtì wù kfɨ a mà nà fî bam ɨ̀chfɨ gha ma mà kàʼ ma bu fì làysɨ̀ ŋweyn sɨ a ikfɨ a? Achi à kema læ̀ kfeyna a mà ndu yèyn ŋweyn mɨtì ma wù kàʼ wu bû fì kàsi gvì.”

²⁴Devìt ɨ taŋi tì ɨ ndù ɨ kfɨmtɨ wî ŋweyn Betshebà ɨ chi nɨ̀ ŋweyn wu timi ɨlvâ, ɨ bzɨ wayn ɨ lûmnɨ̀ àŋena chfɨ̀ ìzɨyn i ŋweyn na Sòlomùn. Bôbo Fɨyini ɨ nà kôŋ wayn àteyn, ²⁵ɨ tum nfèʼtɨ̀ Natàn na wù ndu bè ghɨ chfɨ izɨyn i wayn àteyn na Jèdìdayà ma à ti na Àkòŋ Fɨyini.

²⁶A nà n-ghɨ tì ma Jowàb ŋêyn sugèyʼsɨ ŋweynsɨ tɨm meyn yɨ ntèʼ i to nɨ̀ ghelɨ Amòn zɨ̀ a ghɨ nà n-toŋtɨ na Labà ɨ̀ ghal fsɨ̀ alêʼ kì a fòyn àŋena nà n-chi ateyn. ²⁷Jowàb ɨ tum na ghɨ ndu bè sɨ̂ Devìt na yi nû meyn ntèʼ Labà ɨ̀ ghal fsɨ̀ jva zɨ̀ a àŋena nɨn tu mu ateyn. ²⁸Wù n-fi meyn bè na Devìt yvɨŋtɨ sugèyʼsɨ ŋweyn ɨ̀ gvì jɨ̀ŋ kal ntèʼ ateyn ɨ̀ ghal fsɨ, ma wù kæ faŋ tɨ̀ gvì, a mà tɨm ɨ̀ yɨ ntèʼ àteyn ɨ̀ chfɨ ìzɨyn ateyn nɨ̀ ìzɨyn ì yemi.”

²⁹Devìt ɨ yvɨ̀ŋtɨ̀ sugèyʼsɨ ŋweyn kɨ sɨ̀ jɨ̀m, ŋêyn àŋena ndu tɨm yɨ ntèʼ Labà. ³⁰A nà ghɨ ta àŋena tɨm yɨ ntèʼ àteyn, Devìt ɨ choʼ afol sɨ atu nɨ̀ fòyn Labà ɨ sù. Afol ateyn a nà ghɨ ma ghɨ fàytɨ nɨ̀ àso ɨkwo a baŋnɨ-a kɨ dɨ̂l chem kilùsɨ̀ mɨ̀vɨm ɨ̀n kæ̀ njvàsɨ tal. Àŋena nɨn kumtɨ meyn kɨmɨ ɨ̀fwo ɨlvɨ afu kɨ̀ sɨ a idvɨ̀. ³¹Àŋena nɨn læ meyn lì ɨ fvɨ̀ nɨ̀ ghelɨ afu ɨ kàyn nà ghɨ na felɨ̀ sɨ̂ àŋena. Ghɨli nà n-kom ɨ̀nkâʼ, ghɨli felɨ̀ nɨ̀ njàmsɨ ghɨli felɨ nɨ̀ fɨsɨ, ghɨli bom achaʼ. Nô ntèʼ sɨ̀ jɨ̀m a Amòn nà n-fêl sɨ̂ ŋweyn kɨ̀ a dzɨ nâ ghàyn. Devìt ŋêyn sugèyʼsɨ ŋweynsɨ nô sɨ̀ jɨ̀m ɨ kæ kasi sɨ kfa a Jèlusalèm.