2 Samuel 15

Absalòm ɨ kul mɨ̀nàng sɨ koʼ ɨfôyn

¹Mɨ̀chi ɨn lì nɨn koʼ meyn chem Absalòm ɨ yuyn fɨ̀nchaʼ fɨlifɨ a gûf nyamsɨ ɨ yuyn nyamsɨ kfaŋ na sɨ na gûfà ɨ kɨŋ ghelɨ mɨ̀vɨm ɨ̀n tâyn na ghɨ na nî ghɨ nà nyɨŋ atû nyamsɨ ndû a ŋweyn asɨ ɨlvɨ ta wù ndû alèʼ. ²Absalòm nà n-bɨs làlì-à wu ndù afaf ghè a ghɨ nà n-saʼ nsaʼsɨ ateyn, a gvî nô mɨ ndà sɨ yeyn fòyn nɨ̀ nsaʼ ŋweyn wu bɨf na wù fvɨ̀ a ntèʼ ikà a. Wul àteyn fêʼtɨ̀, ³wu bè kɨ sɨ̂ ŋweyn na, “Iwo zɨ̀ a wà bè nɨn ghɨ samoʼ mɨtì wùl ɨ ghɨ wi ta fòyn lèm na wù yvɨtɨ nsaʼ zyâ.” ⁴Wu nà n-taŋi tì wu fi bè kfeynsɨ na, “Ghɨ nà n-lem ma sɨ a wûl vzɨ̀ a wù n-saʼ nsaʼsɨ ilaʼ afêyn a nô mɨ ndà na gvî nɨ̀ nsaʼ, ma saʼ kɨ àtì-ati.

⁵A nà n-ghɨ tì wùl gvî nà gvɨmtɨ̂ gvî asɨ nɨ̀ Absalòm sɨ ngvɨmlɨ ŋweyn wu ghal ɨ baʼnɨ ŋweyn. ⁶Absalòm nà n-nî kɨ tì nô mɨ sɨ̂ ndà a Isìlæ̀ ta wù n-gvî sɨ yèyn fòyn nɨ̀ nsaʼ. Ghelɨ ɨ zɨ̀tɨ̀ ɨ nà sɨ kôŋ ŋweyn nô a jûŋ a ilaʼ Isìlæ̀.

⁷A nà ghɨ ibàm i bèŋsɨ̀ kæ̀ wu bè sɨ̂ fòyn na, “Mɨ n-chwotɨ̂ và, visi mà kasi ndù a ntèʼ Heblòn ɨ̀ nì ìwo zɨ̀ a mà tî chfɨ̀nɨ̀ sɨ nì sɨ̂ Bôbo Fɨyini. ⁸À nà n-ghɨ ta mɨ n-chi a ntèʼ Geshù ilaʼi Alàm, ma chfɨ̀nɨ̀ sɨ̂ Bôbo Fɨyini na wù kæ sɨ visi ma kasi gvì a Jèlusalèm a mà ndù a Heblòn nà felɨ̀ sɨ̂ ŋweyn.”

⁹Wu n-taŋi tî fòyn ɨ bɨmi ɨ bè na wù jel a jûŋ. Wu kæ lù sɨ ndù a ntèʼ Heblòn.

¹⁰A nà ghɨ ta Absalòm nɨ̀n ghɨ a Heblòn, wu nyaʼtɨ ɨ tum ghelɨ na ghɨ ndu kɨ ntèʼ sɨ Isìlæ̀ sɨ̀ jɨ̀m ɨ̀ tùsɨ ghelɨ ɨ bè sɨ̂ àŋena na, “Yi læ yvɨ̀ ta ghɨ tòŋ isoŋ nô mɨ ɨlvɨ gha yi nà byaytɨ̂ bê kɨ na, ‘Absalòm sɨ ghɨ fòyn a ilaʼi Heblòn.’” ¹¹A nà n-ghɨ tì ma wù se meyn sɨ ndù a Heblòn ɨ̀ làʼì ghɨ̀lûmnɨ̀ ghɨli a Jèlusalèm ighɨ ibò ŋêyn àŋena ndû amoʼ, ghɨ kya wi iwo zɨ̀ a wù n-nî. ¹²A nà ghɨ ta Absalòm nɨn fu ifu i ŋweyn a Heblòn, wu tum jàŋ Ahitofèl na wù gvi yèyn zɨ afu. Ahitofèl nà n-ghɨ wul ɨ̀ Gilò, a ghɨ wul ɨ̀mòʼ ta wù nà n-tebtɨ fòyn Devìt. Ahitofèl ɨ ndu yeyn Absalòm a Heblòn, ghelɨ ghì a ghɨ nà n-ti ibam nɨ̀ Absalòm ŋêyn àŋena yɨ mɨ̀nàŋ kûm fòyn ɨ nà dvɨ̂ ndû kɨ ndu.

Devìt ɨ leʼ lù sɨ a Jèlusalèm

¹³Ghɨ nà nduʼ kɨ tèyn wùl ɨ gvi bè sɨ Devìt na, “Ghelɨ Isìlæ̀ nô ghɨ̀ jɨ̀m sɨ ti kɨ ibàm nɨ̀ Absalòm.”

¹⁴Devìt ɨ yvɨ tî ɨ bè sɨ̂ ghelɨ ghɨ tisɨnɨ nɨ̀ ŋweyn na, “Ghesɨ̀nà nɨn kelɨ sɨ leʼ a bu tì a Absalòm zuetɨ ghesɨ̀nà. Ghesɨ̀nà lu kɨ̀ lvɨ̂yn a bu tì a wù nyɨŋ tèyn ghesɨ̀nà afêyn nô mɨ nɨ̀ ndà ɨ̀lvì a ntèʼ afêyn ɨ̀ zuètɨ.”

¹⁵Ghelɨ ghɨ felɨnɨ nɨ̀ ŋweyn ɨ bè na, “Ghès nɨn gvɨ̂tɨ̀ sɨ ni nô mɨ ghà ta wà bè na ghès ni a mbæ̀.”

¹⁶Fòyn ɨ lù ŋêyn ghelɨ ŋweyn nô ghɨ̀ jɨ̀m ɨ visi kɨ ghɨ̀kì ghɨli ìvɨ̀m a ghɨ suynsɨ ŋweyn na ghɨ na kinî ntoʼ. ¹⁷A nà ghɨ ta àŋena lù ndù chèm a ndo ìgòʼsɨnɨ ighami i ntèʼ ɨ tɨmtɨ afu. ¹⁸Ghɨ n-tɨmtɨ tî nchìsɨ fòynsɨ̀ ɨ nà chwô a ŋweyn asɨ. Ghelɨ Kelèt nɨ̀ ghelɨ Belèt baʼsɨ̂ nɨ̀ sugèyʼsɨ Gât ighɨ ntufa ɨ boŋ gvi chwò a ŋweyn asɨ.

¹⁹Fòyn Devìt ɨ bè sɨ̂ wul ɨ̀ Gât ɨ̂lvɨ̀ a ghɨ nà n-toŋtɨ na Itày na, “Yi n-jof na wà kasi ndù fàŋ zɨ̂ fòyn Absalòm. Wà n-ghɨ tèyn ghɨ wul àtum ta wà tî gvì afêyn. Bòm ghà ta wà n-kɨŋ sɨ gvì a ghès ibàm a? ²⁰Wà bu duʼ mɨ tɨ̀ chìtɨ afêyn. Yi n-jôf wì na mà na jêl chwô nɨ̀ và kya wi mɨ na mɨ ndû wo a. Zɨ̂ ghelɨ̀ ghya kasi. Mɨ n-jêm na Bôbo Fɨyini toʼnɨ nɨ̀ zɨ̀ ɨ̀ dyèyn ìkôŋ sɨ̂ zɨ̀.”

²¹Wu n-taŋi tî, Itày ɨ bè sɨ ikàyntɨ̀ sɨ̂ ŋweyn na, “Mɨ n-bê sɨ̂ và samoʼ sɨ izɨyn nɨ̀ Bôbo Fɨyini fìfɨ̀ a fɨ n-chi na mɨ ndù nô mɨ wo ta wà ndû a mbæ̀. À n-ghɨ mɨ sɨ lì ikfɨ sɨ li ma, a yi li kɨ̀ li mɨtì ma ghɨ wi sɨ kasi sɨ a wa ibàm.”

²²Fòyn Devìt ɨ kæ bè sɨ̂ ŋweyn na, “Ndoyn læ ghɨ lu.” Itày ŋêyn ghelɨ ŋweyn nɨ̀ asas a ndosɨ kì a kɨ n-læ nà ghɨ ŋêyn àŋena ɨ lù ɨ nà sɨ ndu-à.

²³Ghɨ nà ndû tì a yeyn mɨ nda ta fòyn ŋêyn ghelɨ ŋweyn nɨn chwô, wu nà byal dzɨ-à. Àŋena ndù ɨ dyàŋ afoŋlɨ a Kidlòn ɨ koʼ ndù dzɨ a nse ìyum.

²⁴Ghɨ n-se sɨ ndu tî Zadòk ŋêyn Abìyatà ɨ ngàŋsɨ ndô Fɨyini, baʼsɨ̂ nɨ̀ ghelɨ Levì ghì a ghɨ nà n-gâmtɨ̀ a ndo Fɨ̀yinì ɨ boŋ lù. Àŋena nà n-ghɨ ma ghɨ li meyn lù nɨ̀ àntayntayn a mɨ̂kàyn nɨ̀ Fɨyini fɨ̀. Àŋena tom àntayntayn ateyn ɨ visi ghelɨ chwò ɨ mèsì jæ ta ka àŋena beʼi.

²⁵A nà ghɨ ta àŋena ndù chèm a dzɨ fòyn Devìt ɨ bè sɨ̂ Zadòk na, “Li àntayntayn a mɨ̂kàyn nɨ̀ Bôbo Fɨyini kèyn ɨ kasi ndù nɨ̀ ankeyna a ntèʼ. Bôbo Fɨyini kæ sɨ dyèyn atem a juŋà sɨ̂ mà, a mà læ̂ kàsi gvì yèyn àntayntayn ateyn nɨ̀ àlêʼ kì a ghɨ lèm ateyn. ²⁶Mɨtì Fɨyini fɨ̀ ni kæ sɨ bè sɨ̂ mà na, ‘Mɨ n-saŋlɨ̂ wì kûm và,’ kòŋ ɨlvɨ nâ ghè Fɨ ni nô mɨ ghà sɨ̂ mà.”

²⁷Fòyn Devìt nɨn fi meyn bè sɨ̂ Zadòk ɨ ngàŋ ndo Fɨyini zɨ̀ na, “Ba wà n-kya ìwo zɨ̀ a yi n-ghɨ? Lì wâyn vâ Ahimàz baʼsɨ̂ nɨ̀ Jonatàn ɨ wâyn Abìyatà zɨ̂ àŋena kasi kfa kɨ̀ nô nɨ̀ mbôynɨ̀. Zɨ̂ Abìyata li wôyn ghi ghèyn ghɨ̀ bò zɨ̂ àŋena lu. ²⁸Mɨ n-ndù timî alèʼ ghè a ghɨ n-dyaŋ jva ateyn a nse ìyum ɨ̀ nà yvɨtɨ̂ ntûm zya.” ²⁹Zadòk ŋêyn Abìyatà ɨ bèʼì àntayntayn a mɨ̂kàyn nɨ̀ Bôbo Fɨyini ɨ kasi ndù ɨ faŋ a Jèlusalèm.

³⁰Devìt ŋêyn ghelɨ ghɨli ghì ɨ koʼ dzɨ a Kfɨ̂yn Olìfsɨ̀. Devìt nà n-ghɨ kɨ nɨ̀ ɨvzɨ yum ma wù chiytɨ meyn àtu. Wu nà n-jelà dzɨ-à. Ghelɨ ghì a ghɨ nà n-ghɨ ŋêyn ŋweyn nà n-boŋ dzɨnɨ̀-a ma ghɨ boŋ meyn chɨ̀ytɨ ɨ̀tu. ³¹A nà n-ghɨ tì ma ghɨ feʼtɨ̀ meyn sɨ̂ Devìt na Ahitofèl nɨ̀n ghɨ anòyn nɨ̀ ghelɨ afî a kɨ n-yɨ ɨchɨm ŋêyn Absalòm. Devìt ɨ jèm ɨ bè sɨ̂ Bôbo Fɨyini na, “Mɨ n-jêm na wà ni nô mɨ ghà ta Ahitòfèl nɨn bê sɨ̂ Absalòm na kêʼ kɨ sɨ iwo angù.”

³²A nà ghɨ ta àŋena koʼ chèm atû kfɨ̀yn alèʼ ghè a ghelɨ nà ndû jêm ateyn ɨ yeyn Hushày ɨ wul ilaʼi Alkì. Wu nà n-ghɨ ma wù bas meyn ndzɨ sìsɨ̀ a wù màʼ ɨ̀ fì fuʼ abɨ̂l a ŋweyn atu. ³³Devìt ɨ bè sɨ̂ ŋweyn na, “Mà kæ sɨ visi na wà na gvî a ma ibàm a wà fu ngeʼ sɨ̂ mà. ³⁴Mɨtì ma wà kæ sɨ kasi ɨ̀ ndù a ntèʼ Jèlusalèm ɨ̀ chwòtɨ Absalòm ɨ̀ bè na wà tî nà fêl sɨ̂ bò ŋweyn mɨtì nà kɨŋ sɨ nà fel sɨ̂ ŋweyn lvɨ̂yn a wù visi vâ. Wà kæ ni têyn a yi gamtɨ ta ka wà na kòbsɨ̀ Absalòm kûm àwo kì a Ahitofèl na tusɨ̂ ŋweyn na wù ni. ³⁵Zadòk ŋêyn Abìyatà ɨ ngàŋsɨ ndô Fɨyini nɨn ghɨ afu ma wà yvɨ̀ mɨ ghà ta ghɨ bè a ntoʼ a wà nyaʼtɨ̀ fèʼtɨ̀ sɨ̂ àŋena. ³⁶Ahimàz ɨ wâyn Zadòk nɨ̀ Jonatàn ɨ wâyn Abìyatà nɨn ghɨ afu ŋêyn àŋena. Wà yvɨ nô mɨ ghà ta yi n-chwô a ntoʼ wa tum àŋena sɨ̂ mà.”

³⁷Wu n-taŋi tî Hushày ɨ wul ìjèl nɨ̀ ŋweyn nâ vzɨ̀ ɨ kasi ɨ nà zɨ̂ ndû kɨ a Jèlusalèm tèyn Absalòm ɨ boŋ gvi-à.