2 Kings 11

Àtalìyà ŋêyn Jòwâsh

¹À nà n-ghɨ ta Atalìyà kèli na wâyn ŋweyn Ahàzayà kfɨ meyn, wu bè na ghɨ zuetɨ ghelɨ ndo nɨ̀ Ahàzayà ghì a ghɨ kàʼ a ghɨ koʼ ɨfôyn a Judà nô ghɨ̀ jɨ̀m. ²Mɨtì Jèhoshebà ɨ wâyn fòyn Jèholàm ɨ jêmtɨ̀ Ahàzayà ɨ choŋ lù nɨ̀ Jòwâsh ɨ wâyn Ahàzayà sɨ antêynɨ̀ nɨ̀ woyn ntoʼ ghì a ghɨ na n-kɨŋ sɨ zuetɨ ɨ ndu lèm ŋêyn lì ŋweyn a lûm ndo ì lì a ndô Fɨyini na ka Atalìyà zue. Ghɨ faŋ tɨ̀ zuè ŋweyn. ³Ghɨ n-læ lèytɨ ŋêyn lì ŋweyn a ndo nɨ̀ Bôbo Fɨyini sɨ a bèŋsɨ̀ ntufa ta Àtalìyà nà n-saʼ ilaʼ ateyn.

⁴Atalìyà nɨn læ saʼ Judà sɨ a bèŋsɨ̀ ntufa, a nà ghɨ a bêŋsɨ̀ nsòmbo, Jèhòyadà ɨ tum jàŋtɨ̀ ɨ̀tu ɨ sugèyʼsɨ̀ vzɨ̂ a wu nà n-tisɨ sugèyʼsɨ̀ ɨvɨ ɨvɨ. Wù n-jaŋtɨ meyn kɨmɨ nchìsɨ fòyn nɨ̀ ghelɨ ghì a ghɨ n-chi ntoʼ na ghɨ gvi yèyn ŋweyn a ndo nɨ̀ Bôbo Fɨyini. Ghɨ gvì wu yɨ mɨkâyn ŋêyn àŋena a ndô Fɨyini ɨ bè àŋena chfɨ̀nɨ̀ na àŋena nɨn nì kɨ ta wù bè. Àŋena chfɨ̀nɨ̀ wu dyèyn wâyn fòyn sɨ̂ àŋena. ⁵Jèhòyadà nɨ̀n bê meyn sɨ̂ àŋena na, “Iyeynì nɨn ghɨ ìwo zɨ̀ a yi n-kelɨ sɨ nì. Yi seʼ ìfêl achi ɨtuʼ ilaʼ yi gwòtɨ̀ inôyn ì tal anôyn à mòʼa na chî ntoʼ, ⁶anôyn a li-a ɨ chî ɨ̀chfɨ mbàyn vzɨ̀ a ghɨ n-toŋtɨ na ɨchfɨ mbàyn Sûl, a li-a chî ɨ̀chfɨ mbàyn vzɨ̀ a wu n-zɨ dzɨ a ibàm nɨ̀ nchì sîsɨ̀ a sɨ n-chî ndô Fɨyini. ⁷Inôyn zɨ̀ ì bò a yi n-kfa sɨ yvɨ̀tɨ̀ achi ɨtuʼ ilaʼ nâ ghè nɨn kelɨ sɨ ndù a ndô Fɨyini sɨ nà chi fòyn. ⁸Yi n-kelɨ sɨ timi sɨ jɨ̀ŋ sɨ kal fòyn nô mɨ ndà ɨ kelɨ àfo iwòŋ a ŋweyn awu. À mômsɨ̀ mɨ ndà sɨ gvì sɨ baʼsɨ sɨ̂ zɨ̀ yi zue kɨ zue. Yi n-kelɨ sɨ nà ghɨ kɨ a ngùŋ nɨ̀ fòyn nô mɨ wo ta wù ndû.”

⁹Ɨtu vzɨ̀ a wu nà n-tisɨ inôyn i sugèyʼsɨ̀ ɨvɨ ɨvɨ ɨ ni kɨ ta Jèhòyadà ɨ ngàŋ ndô Fɨyini bè. Nô mɨ àtu anòyn à kà ɨ gvì nɨ̀ ghelɨ ghì a wù n-tisɨ sɨ̂ Jèhoyadà ɨ ngàŋ ndô Fɨyini, ɨghî a ghɨ nà n-felɨ̀ achi ɨtuʼ ilaʼ nâ ghè nɨ̀ ɨghî a ghɨ nà n-kelɨ sɨ kfa sɨ yvɨ̀tɨ̀. ¹⁰Àŋena nɨn gvì tî, Jèhoyadà ɨ fu awoŋ nɨ̀ nkyàsɨ iwòŋ sɨ ghaʼlinisɨ nɨ̀ ɨsɨ lælɨnɨsɨ sɨ̂ ɨ̀tu sugèyʼsɨ̀ vzɨ̂ a wu nà n-tisɨ sugèyʼsɨ̀ ɨvɨ ɨvɨ. Awoŋ nâ kèynà nɨ̀ nkyàsɨ iwòŋsɨ nà n-ghɨ a ndô Fɨyini ma à n-læ nà kelɨ fòyn Devìt. ¹¹Nchì nâ sèynsɨ̀ ɨ timi ɨ jɨŋ kali fòyn kelɨ ɨ̀fwo iwòŋ a àŋena ɨwu. Sɨlisɨ nà n-ti a ngùŋ àbaŋ ifu, sɨ lisɨ ɨ ghɨ ma sɨ jɨŋ meyn kàli ndô Fɨyini sɨ zɨ̀tɨ̀ abàs itsɨyn sɨ koʼ sɨ chem abàs ikuè.

¹²Jèhoyadà ɨ li gvì nɨ̀ Jòwâsh ɨ wâyn fòyn ɨ sù àfol a tɨ̂fòyn a ŋweyn atu, ɨ fu ŋwàʼlɨ̀ tɨ̀saʼ nɨ̀ Bôbo Fɨyini sɨ̂ ŋweyn, ɨ bè na wù sɨ ghɨ fòyn. Àŋena ɨ yisi ŋweyn sɨ a fòyn ghelɨ ɨ nà buʼ ɨ̀wu byal bê na, “Mɨ̀chi myâ dyebtɨ a mbæ̀.”

¹³A nà ghɨ ta Atalìyà yvɨ̀ ta nchìsɨ̀ nɨ̀ ghelɨ ghɨ li nɨn taŋî, wu nyɨŋ ndù a ndo nɨ̀ Bôbo Fɨyini sɨ yeyn na à n-gâyn ghà afu a. ¹⁴Wu n-ndu chem tî ɨ yeyn fòyn wu ti a ngùŋ àtoʼ alèʼ ghè a tɨfôyn tɨ nà n-lum duʼ ateyn ɨchfɨ ndô Fɨyini. Ɨtu sugèyʼsɨ̀ nɨ̀ ghelɨ ghì a ghɨ nà n-toŋ tɨsoŋ ɨ ti a ŋweyn a ngùŋ. Ghelɨ Judà nô ghɨ̀ jɨ̀m ɨ saŋlɨ-à, toŋ tɨ̀soŋ. Atalìyà ɨ yeyn tî ɨ bàs ndzɨsɨ ŋweyn ɨ byal bè na, “Yi beyʼlɨ meyn mà.”

¹⁵Jèhòyadà ɨ ngàŋ ndô Fɨyini ɨ bè sɨ̂ ɨ̀tu sugèyʼsɨ̀ vzɨ̂ a wu nà n-tisɨ sugèyʼsɨ̀ ɨvɨ ɨvɨ na, “Yì li fvɨ̀ nɨ̀ Atalìyà sɨ a ndô Fɨyini, à na kɨŋ mɨ ndà sɨ gàmtɨ ŋweyn, yi zue.” Wu n-bè tî bòm ta wu nà n-kɨŋ wi na ghɨ zue ŋweyn a ndo nɨ̀ Bôbo Fɨyini.” ¹⁶Wu n-bè tî, ghɨ ghal ɨ fvɨ̀ nɨ̀ ŋweyn sɨ a ndô Fɨyini ɨ ndu zue ɨchfɨ mbàyn ntoʼ ghè a ghɨ nà n-toŋtɨ na Ɨchfɨ Mbàyn Nyàm Kfaŋ.

¹⁷Jèhòyadà ɨ kæ nì na fòyn ŋêyn ghelɨ Judà yɨ mɨkâyn na àŋena na koʼsɨ̂ kɨ Bôbo Fɨyini. Wù n-fi meyn nì fòyn ŋêyn ghelɨ ŋweyn ɨ yɨ mɨkâyn na àŋena na yvɨnɨ̂ ŋweyn. ¹⁸Àŋena nɨn yɨ mɨkâyn tì ɨ lù nô ghɨ̀ jɨ̀m ɨ ndù a ndo nɨ̀ fɨyini fɨ Bâlfɨ̀ ɨ bebsɨ ndo àteyn, ɨ bɨ̀ytɨ̀ ɨ̀bwaŋ ifu nɨ̀ ɨ̀nfyèʼsɨ̀ ɨ Bâl ɨ zue Matàn ɨ ngàŋ ndô fɨyini nɨ̀ Bâl asɨ abaŋ nâ ghè.

Jèhòyadà ɨ kæ lem nchìsɨ̀ a ndo nɨ̀ Bôbo Fɨyini. ¹⁹Jèhòyadà nɨ̂n lèm tî ɨ lì ɨ̀tu sugèyʼsɨ̀ vzɨ̂ a wu nà n-tisɨ inôyn i sugèyʼsɨ̀ ɨvɨ ɨvɨ nɨ̀ chyeʼsɨ nɨ̀ ghelɨ ghɨ tisɨnɨ baʼsɨ nɨ̀ ghelɨ Judà nô ghɨ̀ jɨ̀m, ŋêyn àŋena lì fòyn a ndo nɨ̀ Bôbo Fɨyini ɨ ndù nɨ̀ ŋweyn a ntoʼ. Àŋena nɨn zɨ ɨchfɨ mbàyn abàs ikuè ɨ lèm Jòwâsh achɨ a tɨ̂fòyn. ²⁰Ghelɨ judà nô ghɨ̀ jɨ̀m ɨ nà saŋlɨ-à, ntèʼ àŋena ɨ kelɨ mbôynɨ̀ bòm ta ghɨ zuè meyn Atalìyà.

²¹Jòwâsh nɨn læ koʼ ɨfôyn a Judà ghɨ bèŋsɨ̀ nsòmbo.