2 Kings 10

Ghɨ zuetɨ woyn Ahàb

¹Woyn Ahàb nà n-chî a ntèʼ Sàmalìyà mɨ̀vɨm nsòmbo. Jehù ɨ nyàʼ ŋwàʼlɨ̀ ɨ tum a Sàmalìyà sɨ̂ ghelɨ ghɨ felɨnɨ a Jezlèl nɨ̀ chyeʼsɨ ŋêyn ghelɨ ghì a ghɨ n-tôʼnɨ̀ nɨ̀ woyn Ahàb. Wu n-nyàʼ a ŋwàʼlɨ̀ nâ ghè na, ²“Woyn bò ìfèl nɨ̀ zɨ̀ nɨn chî zɨ̂ àŋena, yi kelɨ mɨ̀nchaʼ mɨ̀ ìwòŋ, kelɨ ɨ̀fwo iwòŋ chî a ntèʼ ma ghɨ baʼlɨ meyn mbàyn jɨ̀ŋ kal. Yi yeyn ŋwàʼlɨ̀ yèyn nô mɨ ɨlvɨ gha, ³yi choʼ wâyn bò ìfèl nɨ̀ zɨ̀ vzɨ̂ a wù n-ghɨ àtì-ati, kfeynɨ-à ɨ lèm achɨ nɨ̀ bò ŋweyn. Yi lêm yi nù nô nɨ̀ àdyaʼa na ka wùl nɨ̂n fsɨ ɨfôyn ɨ bò ìfèl nɨ̀ zɨ̀.”

⁴Àŋena yvɨ iwo ateyn ɨ nà sɨ faynà bɨfɨ na, “Wù ti kæ nà ghɨ ma wù ti meyn to chwò tɨ̀fôyn tɨ̀ bò, ghès ɨ to chwò ti ŋweyn a?”

⁵Àŋena nɨ̂n bɨf tî, wùl ɨ̀ vzɨ̀ a wù nà n-tisɨ awo a ntoʼ nɨ̀ ɨvzɨ̂ a wù nà n-saʼ ntèʼ nâ zɨ̀ baʼsɨ̂ nɨ̀ chyeʼsɨ nɨ̀ ghelɨ ghì a ghɨ nà n-tôʼnɨ̀ nɨ̀ woyn Ahàb ɨ tum bè sɨ̂ Jehù na, “Ghès nɨn ghɨ ghelɨ ghɨ felɨnɨ nɨ̀ và. Ghès nɨn nî nô mɨ ghà ta wà n-kɨŋ, mɨtì ghɨ wi sɨ choʼ sɨ lem wul sɨ a fòyn. Ni nô mɨ ghà ta yi n-jofɨ̀ sɨ̂ và.”

⁶Jehù ɨ nyàʼ ànkùmtɨ̀ a ŋwàʼlɨ sɨ̂ àŋena ɨ bè na, “Yì kæ nà ghɨ a ma abàs gvɨ̂tɨ̀ sɨ nà yvɨnɨ ma, yi gvì nɨ̀ ɨ̀tu woyn bò ìfèl nɨ̀ zɨ̀ ɨ fu sɨ̂ mà a Jezlèl kɨ̀mɨ aleŋ a lvɨ̂yn a libɨs.”

À nà n-ghɨ tì woyn ntoʼ nâ ghèyn mɨ̀vɨm nsòmbo ɨ ghɨ ŋêyn ghelɨ ghì a ghɨ n-tôʼnɨ̀ nɨ̀ àŋena a ghɨ ghelɨ ghɨ tisɨnɨ a Sàmalìyà. ⁷A nà ghɨ ta ghɨ fu ŋwàʼlɨ̀ nâ yèyn sɨ̂ àŋena, àŋena lì woyn ntoʼ nâ ghèyn mɨ̀vɨm nsòmbo ɨ ndu teyntɨ ɨ̀tu àŋena nô ghɨ̀ jɨ̀m ɨ we a nkwòsɨ̀ ɨ tum ghɨ ndu fu sɨ̂ Jehù a Jezlèl. ⁸Wùl ɨ̀ ntum àteyn ɨ ndu chem afu ɨ bè sɨ̂ Jehù na, “Ghɨ gvi meyn nɨ̀ ɨ̀tu woyn ntoʼ vzɨ̀.”

Jehù ɨ bè na, “Yì lem ɨtu ateyn ɨtweʼ ɨ̀ bwò ɨchfɨ mbàyn ta ghɨ ntoynɨ ateyn zɨ̂ gvî a ntèʼ afêyn ɨ̀ vìsi kɨ̀ afu nô ta ka ɨtuʼ layn.”

⁹Ɨtuʼ layn, Jehù ɨ fvɨ ndu timi asɨ nɨ̀ ghelɨ nô ghɨ̀ jɨ̀m ɨ bè na, “Yi bû bèbsɨ ìwo. À tî bàʼtɨ mà ɨ̀ zuè bò ìfèl nɨ̀ mà. Mɨtì à zue ndà ghelɨ ghèyn a ɨtu àŋena nɨn nyɨŋ afêyn tèyn a?” ¹⁰Yì na kya na nô mɨ ghà ta Bobô Fɨyini nɨn læ bè kûm ìsas i ndo nɨ̀ Ahàb nɨn kfeyn a. Bôbo Fɨyini ni meyn ìwo zɨ̀ a wu n-læ bè sɨ̂ wùl ɨ̀ felɨnɨ nɨ̀ ŋweyn Elajà.” ¹¹Jehù nɨn bè tî ɨ zuetɨ mèsì woyn Ahàb ghì a ghɨ nà n-bu ghɨ a Jezlèl nɨ̀ ghelɨ ghɨ tisɨnɨ, nɨ̀ suynsɨ ŋweynsɨ nɨ̀ ngàŋsɨ ndô mɨyini nɨ̀ ŋweyn, ɨ faŋ tɨ̀ vìsi nô wul ta wù nà n-kelɨ iwo sɨ ni nɨ̀ Ahàb.

¹²Jehù nɨn zuetɨ tî ɨ lu ndù dzɨ a abàs a Sàmalìyà ɨ ndu chem a ntèʼ Bet Ekèd afî a nchìsɨ nyamsɨ nà ndû chɨ̂yntɨ̀ ateyn, ¹³ɨ yeyn ghelɨ ndo nɨ̀ Ahàzayà ɨ fòyn Judà ghɨ li afu ɨ bɨf sɨ̂ àŋena na, “À n-ghɨ zɨ ghɨ̀ ndà?”

Àŋena bè na, “Ghès nɨn ghɨ ghelɨ ndo nɨ̀ Ahàzayà ma ghèsɨ̀ kàlì sɨ toŋtɨ ghelɨ ndo nɨ̀ fòyn nɨ̀ ɨ ghɨ nàfòyn.”

¹⁴Jehù ɨ bè sɨ̂ ghelɨ ŋweyn na ghɨ ghaytɨ àŋena kɨ̀ ghɨ to, ghɨ ghaytɨ ɨ ndu zuetɨ àŋena a ngùŋ ìbɨ i mu i Bet Ekèd. Àŋena nà n-chɨ̂yntɨ̀ ghɨ mɨ̀vɨm ɨ̀n kæ̀ nɨ̀ ghelɨ ghɨ̀ bò. Ghɨ n-zuetɨ àŋena ɨ faŋ tɨ̀ vìsi nô wul ɨ̀mòʼ.

¹⁵Jehù ɨ lù sɨ afu ɨ se sɨ ndù ɨ kòynɨ̀ nɨ̀ Jèhonadàb ɨ wâyn Lekàb wu gvî sɨ yeyn ŋweyn. Jehù ɨ toŋtɨ ŋweyn ɨ bɨf na, “A wà ti n-ti ɨchfɨ̂ ɨ̀mòʼ ghesɨ̀và a?”

Jèhonadàb ɨ bɨmi.

Jehù ɨ bè sɨ̂ ŋweyn na, “Yi na ghɨ tì wa làysɨ̀ àwu à kya mà ghal. Wu làysɨ̀ àwu a ŋweyn, Jehù ɨ ghal wu koʼ a fɨnchaʼ fɨ iwòŋ nɨ̀ Jehù. ¹⁶Jehù ɨ bè sɨ̂ ŋweyn na, “Ghesɨ̀và ndu wà yeyn dzɨ zɨ̀ a mà fù ngêŋ yem ateyn sɨ nà nî ifêl i Bôbo Fɨyini.” Jehù nɨ̂n bè tî ɨ bèʼì ŋweyn a fɨnchaʼ.

¹⁷Jehù ɨ ndu chem a Sàmalìyà ɨ zuetɨ ghelɨ ndo nɨ̀ Ahàb ghì a ghɨ nà n-bu ghɨ afu nô ghɨ̀ jɨ̀m. Wu n-læ zuetɨ àŋena kɨ̀ ighel ta Bôbo Fɨyini nɨn læ bè sɨ̂ Elajà.

Ghɨ zuetɨ ghelɨ ghì a ghɨ nà n-koʼsɨ Bâl

¹⁸Jehù nɨn zuetɨ tî ɨ jàŋtɨ̀ ghelɨ a ntèʼ nô ghɨ̀ jɨ̀m ɨ bè sɨ̂ àŋena na, “Ahàb tî nà koʼsɨ̂ Bâl sɨ ilæ, ma ghɨ sɨ koʼsɨ sɨ chwo ta wù tî nà koʼsɨ. ¹⁹Yì jaŋtɨ nfèʼtɨ̀sɨ ghaʼnɨsɨ nɨ̀ Bâl nô sɨ̀ jɨ̀m nɨ̀ ghelɨ ghì a ghɨ n-koʼsɨ Bâl nô ghɨ̀ jɨ̀m baʼsɨ̂ nɨ̀ ngàŋsɨ ndô mɨyini nɨ̀ Bâlsɨ̀ nô sɨ̀ jɨ̀m. Ka wùl nɨ̂n faŋ antêynɨ̀ nɨ̀ àŋena bòm ta mɨ n-fu ìfu i ghaʼnɨ-i sɨ̂ Bâl. À kæ faŋ mɨ ndà tɨ̀ gvì, a wù kfɨ.” Jehù nà n-bê mɨ̀ tì dɨm ìtof sɨ zuetɨ ghelɨ ghì a ghɨ n-koʼsɨ Bâl.

²⁰Jehù nɨ̀n be meyn na, “Yì jaŋtɨ ghelɨ ghɨ yvɨŋtɨ ɨ̀ kòʼsɨ Bâl.” Àŋena ɨ jàŋtɨ̀. ²¹Wu tum jàŋ ghelɨ ghì a ghɨ n-koʼsɨ Bâl kɨ̀ Isìlæ̀ ì jɨ̀m, ghɨ gvì nô ghɨ̀ jɨ̀m, nô wùl ɨ faŋ tɨ̀ faŋ ibàm. Àŋena zɨ luyn alèʼ ghè a ghɨ n-koʼsɨ Bâl ateyn. ²²Jehù ɨ bè sɨ̂ wùl ɨ̀ vzɨ̀ a wù n-lêm ndzɨ sìsɨ̀ a ghɨ n-mâʼ ɨlvɨ ta ghɨ n-koʼsɨ Bâl na, “Li gvi nɨ̀ dàlasɨ sɨ̂ ghelɨ ghì a ghɨ n-koʼsɨ Bâl nô ghɨ̀ jɨ̀m.” Wu li gvì nɨ̀ ɨ̀nseynsɨ sɨ̂ àŋena.

²³Jehù ŋêyn Jèhonadàb ɨ wâyn Lekàb ɨ zɨ ndù alèʼ ghè a ghɨ n-koʼsɨ Bâl ateyn. Jehù ɨ bè sɨ̂ ghelɨ ghì a ghɨ n-koʼsɨ Bâl na, “Yì faytɨ ki ka wùl na ghɨ a yi antêynɨ̀ koʼsɨ̂ Bôbo Fɨyini, à n-kelɨ sɨ nà ghɨ kɨ ghelɨ ghì a ghɨ n-koʼsɨ Bâl afêyn.” ²⁴Jehù nɨ̂n bè tî, àŋena ɨ fu tɨfu tɨ nyoʼnɨtɨ nɨ̀ tɨ̀fu tɨ litɨ sɨ̂ Bâl. À nà n-ghɨ tì ma Jehù lem meyn ghelɨ abe mɨ̀vɨm nfama ɨ̀ fu nfàsì-fàsì sɨ̂ àŋena na, “Wùl sɨ̂ zɨ̀ kæ visi wul wù leʼ antêynɨ̀ nɨ̀ ghelɨ ghèyn a ghɨ n-koʼsɨ Bâl tèyn, a ghɨ zue ŋweyn alèʼ nɨ̀ wùl nâ vzɨ̀.”

²⁵A nà ghɨ ta Jehù fu mèsì gvi nɨ̀ ìfu i nyoʼnɨ-i têyn ɨ bè sɨ̂ ghelɨ ghɨ felɨnɨ ghì abe na, “Yì zɨ zuètɨ àŋena. Ka yi n-vìsi nô wùl ɨ̀ mòʼ leʼ.” Ghɨ zuetɨ àŋena nɨ̀ mɨ̀nyuè ɨ kumtɨ ɨ laŋ fvɨ̀sɨ̀ tɨ̀gvɨyn tɨ àŋena abe ɨ zɨ ndù alèʼ a laynɨ-a nɨ̀ Bâl. ²⁶Àŋena nɨn li meyn fvɨ̀ nɨ̀ ngòʼ ì laynɨ sɨ alèʼ ghè a ghɨ n-koʼsɨ Bâl ateyn ɨ nyòʼ ɨ bebsɨ, ²⁷ɨ bɨ̀s àlêʼ kì a ghɨ n-koʼsɨ Bâl ateyn, ghelɨ ɨ kasi ndo àteyn sɨ a ikfɨ̀l sɨ koʼ sɨ chem layn.

²⁸À ti iwo zɨ̀ a Jehù nɨn læ nì ghɨ nà bu koʼsɨ̂ wì Bâl a Isìlæ̀. ²⁹Wu n-læ ni mɨ tì ɨ faŋ tɨ̀ kàsi sɨ a ibàm i mbɨsɨ afî a Jelobòwàm ɨ wâyn Nebàt nɨn læ nì. Wù n-læ meyn nì ghelɨ Isìlæ̀ ɨ nà koʼsɨ̂ ɨ̀nfyèʼsɨ̀ ɨ woyn nyâmsɨ̀ a ntèʼ Betèl nɨ̀ ntèʼ Dân ma ghɨ faytɨ nɨ̀ àso ɨkwo a baŋnɨ-a.

³⁰Bôbo Fɨyini ɨ bè sɨ̂ Jehù na, “Wà nî meyn a jûŋ ta wà nì iwo zɨ̀ a mɨ n-kɨŋ ɨ̀ fì zuètɨ ghelɨ ndo nɨ̀ Ahàb a ghɨ ìwo zɨ̀ a mà tî nà kfâʼtɨ̀ sɨ nì. À læ̀ nà lum saʼ kɨ wul ɨ̀ wayn nɨ̀ và saʼ Isìlæ̀ sɨ chem ɨjwâŋ ɨ̀ kfæ̀.” ³¹Mɨtì Jehù ɨ faŋ tɨ̀ yvɨ̀nɨ isaʼ i Bôbo Fɨyini ɨ Fɨyini fɨ Isìlæ̀ nɨ̀ àtem a ŋweyn à jɨ̀mà. Wu n-bu læ kasi sɨ a ibàm i mbɨsɨ ghê a Jèlobòwàm nɨn læ nì ghelɨ Isìlæ̀ ɨ nà chî àteyn.

³²À nà n-ghɨ a mɨchi nâ ghè a Jehù nɨ̀n saʼ ɨfôyn a Isìlæ̀, Bôbo Fɨyini ɨ zɨ̀tɨ̀ sɨ nì na Isìlæ̀ na lætɨ̂ ndû kɨ ndu. Hazèl ɨ tɨm yɨ ilaʼ i Isìlæ̀ nò ì jɨ̀m. ³³Wu n-tɨm meyn yɨ ɨlwêʼ vzɨ̀ a wu nà n-ghɨ injɨ̀yn i jvâ Jodàn a Gilèd nô ɨ̀ jɨ̀m, (ma à ti abâs a ntèʼ Gâd nɨ̀ Lubèn nɨ̀ Mànasè,) sɨ zɨ̀tɨ̀ a Aluwà a ngùŋ Àfòŋlɨ a Alnòn sɨ toynɨ a Gilèd sɨ ndù sɨ chem a Bashàn.

³⁴Awo a li-a kì a kɨ n-læ gàyn ta fòyn Jehù nà n-saʼ nɨ̀ àwo kì a wu n-læ nì nô à jɨ̀m baʼsɨ̂ nɨ̀ tɨ̀woŋ tìtɨ̀ a sugèyʼ sɨ ŋweynsɨ nɨn tɨm yɨ nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Isìlæ̀tɨ̀.

³⁵Jehù nɨn læ kfɨ ghɨ gvɨ̀mì ŋweyn a Sàmalìyà, Jèhohàz ɨ wâyn ŋweyn ɨ koʼ ɨfôyn. ³⁶Jehù nɨn læ saʼ Isìlæ̀ sɨ a bèŋ mɨ̀vɨm ɨ̀m bò njvàsɨ̀ nfama, chî a Sàmalìyà.