2 Kings 12

Jòwâsh ɨ koʼ ɨfôyn a Judà

¹Jòwâsh nɨn læ koʼ ɨfôyn a Judà ma à sɨ ghɨ bèŋsɨ̀ nsòmbo ta Jehù nɨ̀n saʼ Isìlæ̀. Wù n-læ saʼ sɨ a bèŋ mɨ̀vɨm ɨ̀n kæ̀ chî a Jèlusalèm. Izɨyn i nà ŋweyni nà n-ghɨ Zibìyà ma wù lù a ntèʼ Beshebà. ²À nà n-ghɨ ta Jèhòyadà ɨ ngaŋ ndô Fɨyini bu chi, Jòwâsh ɨ nî kɨ àwo kì a kɨ n-ghɨ àti-ati asɨ nɨ̀ Bôbo Fɨyini bòm ta Jèhòyadà nà n-tisɨ ŋweyn. ³Mɨtì wù n-bu læ bebsɨ ɨlwêʼ vzɨ̀ a ghɨ nà n-koʼsɨ mɨyini ateyn, ghelɨ Isìlæ̀ ɨ nà bu fu kɨ tɨ̀fu ɨlwèʼ nâ ghè fî nyôʼ ìleŋ.

⁴Jòwâsh ɨ bè sɨ̂ ngàŋsɨ ndô Fɨyinisɨ̀ na, “Yì na fsɨtɨ̂ ɨ̀kwo vzɨ̀ nô ɨ̀ jɨ̀m a ghɨ n-gvî nɨ̀ ɨ̀ŋweyn a ndô Fɨyini sɨ ifu i laynɨ-i, a ghɨ ɨ̀kwo vzɨ̀ a ghɨ n-se sɨ taŋ ghelɨ, wùl ɨ nà kelɨ sɨ fu nɨ̀ ɨvzɨ̂ a ghelɨ chfɨ̀nɨ̀ sɨ gvi nɨ̀ ɨ̀ŋweyn baʼsɨ̂ nɨ̀ ɨ̀kwo vzɨ̀ a ghelɨ chòʼnɨ choʼnɨ sɨ fu a ndô Fɨyini. ⁵Ngàŋ ndô Fɨyini yeyn alêʼ a ndô Fɨyini ta kɨ bef, wu fsɨ ɨkwo sɨ̂ wùl ɨ̀ mòʼ antêynɨ̀ nɨ̀ ghelɨ ghì a ghɨ n-lêm ɨkwo ɨ̀ faytɨ àlêʼ ateyn. ”

⁶Jòwâsh nɨ̂n bè mɨtì ɨ saʼ sɨ a bèŋsɨ̀ mɨ̀vɨm ɨ̀m bò njvasɨ̀ tal, bula ngàŋsɨ ndô Fɨyinisɨ kasi fàytɨ ɨ̀lwêʼ vzɨ̀ a wu bèf a ndô Fɨyini. ⁷Jòwâsh ɨ kæ tum sɨ jaŋ Jèhòyadà ɨ ngàŋ ndô Fɨyini baʼsɨ̂ nɨ̀ ngàŋsɨ ndô Fɨyini sɨ lisɨ ɨ bɨf sɨ̂ àŋena na, “Bòm ghà ta yi n-faytɨ wì ɨlwêʼ vzɨ̀ a wu bef a ndô Fɨyini a? Ka yi n-fì fsɨ ɨkwo sɨ̂ ghelɨ ghì a ghɨ n-lêm ɨkwo sɨ lèm a yi awu, mɨtì yì fu fvɨ̀sɨ̀ ɨ̀kwo ateyn ghɨ na faytɨ̂ ndô Fɨyini ateyn.” ⁸Ngàŋsɨ ndô Fɨyini nâ sìsɨ̀ ɨ bɨmi na àŋena nɨn bu fsɨ wi ɨkwo sɨ̂ ghelɨ ghì a ghɨ n-lêm ɨkwo ɨ fi bɨmi na a n-bu fì faytɨ̂ wi àŋena ndô Fɨyini.

⁹Jèhòyadà ɨ ngàŋ ndô Fɨyini ɨ lì fɨ̀ntayntayn fɨ lifɨ ɨ bùʼ àbûʼ a nchɨl àteyn ɨ lèm a ngùŋ àbaŋ ifu dzɨ abàs ɨkœ ɨ two ta ghɨ n-zɨ̂ a ndo nɨ̀ Bôbo Fɨyini. Ngàŋsɨ ndô Fɨyini sìsɨ̀ a sɨ nà n-chî ɨchfɨ ndô Fɨyini ɨ nà fsɨ ɨ̀kwo vzɨ̀ a ghɨ n-gvî nɨ̀ ɨ̀ŋweyn nô ɨ̀ jɨ̀m a ndo nɨ̀ Bôbo Fɨyini wê a fɨntàyntayn nâ ghè. ¹⁰Ɨkwo nà n-luyn a fɨntàyntayn nâ ghè mɨlvɨ gha, wùl ɨ̀ vzɨ̀ a wu nà nyâʼtɨ̀ awo a ntoʼ baʼsɨ̂ nɨ̀ ngàŋ ndô Fɨyini i ngaŋtɨnɨ, àŋena gvì ɨ taŋ ɨkwo nâ vzɨ̀ a ghɨ gvì nɨ̀ ɨ̀ŋweyn a ndô Fɨyini ɨ kul a bòsɨ̀. ¹¹Àŋena nà n-kelî àkôyn ɨkwo ateyn, ghɨ fu sɨ̂ ghelɨ ghì a ghɨ n-choʼ lèm na ghɨ na tisɨ̂ ìfêl a ndô Fɨyini, ghelɨ ateyn nà lâʼ ghelɨ ghɨ felɨnɨ nɨ̀ ɨ̀ŋweyn têyn ta ghelɨ ghì a ghɨ n-kom ɨnkâʼ nɨ̀ ghelɨ ghɨ baʼlɨnɨ, ¹²baʼsɨ̂ nɨ̀ ghelɨ ghì a ghɨ n-zue ngòʼsɨ̀. Àŋena nà n-lî ɨ̀kwo ateyn yuyn ɨ̀nkâʼ nɨ̀ ngòʼ sɨ chuynɨsɨ ta ka ghɨ na faytɨ̂ ndô Fɨyini ateyn nɨ̀ ɨ̀fwo ɨlvɨ vzɨ̀ a ghɨ kàʼ a ghɨ faytɨ ndô Fɨyini ateyn.

¹³Ghɨ n-bu læ nà lî ɨ̀kwo vzɨ̀ a ghɨ n-gvî nɨ̀ ɨ̀ŋweyn a ndô Fɨyini sɨ yuyn ɨ̀kfaŋ ɨ ghaʼlɨnɨ̀ vzɨ̀ a ghɨ fàytɨ nɨ̀ aso ɨkwo a fɨfâ nɨ̀ ɨ̀fwo vzɨ̀ a ghɨ n-bâʼ lisɨ abvɨ ateyn a kfɨ̀sɨ lâm baʼsɨ̂ nɨ̀ ɨ̀kfaŋ vzɨ̀ a ghɨ nà n-we mɨluŋ mɨ̀ nyamsɨ ateyn ghɨ nà mɨsì-à. Ghɨ n-bu nà n-yuyn nô mɨ tɨ̀soŋ nɨ̀ ɨ̀fwo vzɨ̀ a ghɨ fàytɨ nɨ̀ àso ɨkwo a fɨfâ kèsa nɨ̀ àso ɨkwo a baŋnɨ-a nɨ̀ ɨ̀kwo ateyn. ¹⁴Ghɨ nà n-lî ɨ̀kwo nâ wèyn fu sɨ̂ ghelɨ ghɨ felɨnɨ àŋena kasi faytɨ ndô Fɨyini nɨ̀ ɨ̀ŋweyn. ¹⁵Ghɨ nà n-fu ɨ̀kwo sɨ̂ ghelɨ ghì a ghɨ n-tisɨ ifêl na ghɨ laʼ ghelɨ ghɨ felɨnɨ ateyn ghɨ bû nà fî kɨŋ na àŋena na fì fêʼtɨ̀ na ghɨ nì ghà nɨ̀ ɨŋweyn a bòm ta àŋena nà n-ghɨ ghelɨ ghɨ samsɨ̂ àŋena. ¹⁶Ghɨ nà n-gvî nɨ̀ ɨ̀kwo sɨ ifu ɨlvɨ ta wùl ɨ̀ nì jas iwo nɨ̀ ɨvzɨ̂ a ghɨ n-fu sɨ ifu na ghɨ lesɨ fu mbɨsɨ ghɨ bû we a fɨntàyntayn nâ ghè. Ɨkwo nâ wèyn nà n-kelɨ ngàŋsɨ ndô Fɨyini.

¹⁷A nà n-ghɨ a mɨchɨ nâ ghàyn a ghɨ nà n-kasi faytɨ ndô Fɨyini, Hazèl ɨ fòyn Alàm ɨ koʼ ɨ tɨm yɨ ntèʼ Gât. Wu n-tɨm yɨ tî ɨ lu ndù sɨ keʼ Jèlusalèm. ¹⁸Mɨtì Jòwâsh ɨ fòyn Judà ɨ lì ɨ̀fwo ɨ laynɨ vzɨ̀ a Jèhoshafàt nɨ̀ Jèholàm nɨ̀ Ahàzayà ɨ tɨfôyn tɨ Judà ɨ tɨ asɨtɨ nɨn læ lèm sɨ a nyɨŋ sɨ̂ Bôbo Fɨyini, baʼsɨ nɨ̀ tɨ̀fu tìtɨ̀ a nô ŋweyn nɨn lèm sɨ a nyɨŋ sɨ̂ Bôbo Fɨyini ɨ tum sɨ̂ Hazèl. Wu n-læ tum ɨ baʼsɨ nɨ̀ àso ɨkwo a baŋnɨ-a kì nô à jɨ̀m a kɨ nà n-ghɨ ɨlwèʼ ghè a ghɨ nà n-lêm ɨfwo ateyn a ndo nɨ̀ Bôbo Fɨyini nɨ̀ akî a ghɨ n-lêm ɨfwo ateyn a ntoʼ. Hazèl ɨ fòyn Alàm ɨ kæ lì sɨ fvɨ nɨ̀ sugèyʼsɨ ŋweynsɨ sɨ a Jèlusalèm.

¹⁹Awo a li-a kì a Jòwâsh nɨ̀n læ nì nɨ̀ àwo kì a kɨ n-læ gàyn ta wu nà n-saʼ Judà nɨn ghɨ ma ghɨ nyaʼ meyn a ŋwàʼlɨ mɨ̀tɨtɨ̂ nɨ̀ tɨ̀fôyn tɨ Judàtɨ̀. ²⁰Chyeʼsɨ ŋweynsɨ nɨn læ meyn kul mɨ̀nàŋ ɨ zue ŋweyn a Bet Milò a dzɨ ta yì n-kalì ndû a Silà. ²¹Chyeʼ sìsɨ̀ a sɨ n-læ zue ŋweyn nà n-ghɨ Jozabàd ɨ wâyn Shimìyàt nɨ̀ Jèhozabàd ɨ wâyn Shomà. Jòwâsh nɨn læ kfɨ ghɨ gvɨ̀mì a ngvɨ̀misɨ nɨ̀ ghɨ̀bo ŋweyn a ntèʼ nɨ̀ Devìt, wâyn ŋweyn Amàzayà ɨ koʼ ɨfôyn.