2 Chronicles 9

Nàfòyn Shebà ɨ ndù mùtɨ̀ fòyn Sòlomòn

¹À nà n-ghɨ ta nàfòyn Shebà yvɨ awo kì a fòyn Sòlomòn nì nô à jɨ̀m, fì yvɨ na wù n-tofa wu ndù a Jèlusalèm sɨ bɨbtɨ awo ato-a sɨ̂ ŋweyn sɨ keli na wù n-tofɨ ta ghɨ n-be-a. Wù n-læ se sɨ ndù ɨ ndù ŋêyn ànôyn a ghelɨ̀-à kɨ dvɨ̂ kɨ tèyn, nɨ̀ Kàmêlsɨ̀ ma sɨ beʼi meyn ɨ̀fwo ɨ lɨmtɨnɨ, nɨ̀ àso ɨkwo a baŋnɨ-a kɨ dvɨ̂ kɨ tèyn baʼsɨ̂ nɨ̀ mɨ̀ngòʼtɨ̀ ɨ̀njofɨnɨ̂. Wu n-dù tî, ɨ bɨfɨ nô mɨ ghà sɨ̂ fòyn Sòlomòn ta wu nà n-kfâʼtɨ̀. ²Fòyn Sòlomòn ɨ bèynsɨ̀ àwo kì a wu n-bɨf sɨ̂ ŋweyn nô à jɨ̀m. Nô ìwo-i nɨn bu læ to ghaʼ ŋweyn sɨ bèynsɨ̀. ³A nà n-ghɨ ta nàfòyn Shebà yeyn itof zɨ̀ a fòyn Sòlomòn nɨ̀n kelɨ, ɨ̀ fì yeyn ntoʼ zɨ̀ a wù bàʼlɨ̀, ⁴ɨ̀ yeyn ɨfwo ɨ yɨnɨ vzɨ̀ a ghɨ tòmtɨ abaŋ ɨfwo ɨ yɨnɨ, ɨ̀ fi yeyn dzɨ zɨ̀ a ghelɨ ghɨ tisɨnɨ nɨ̀ ŋweyn nɨn duʼ ateyn, ɨ̀ yeyn kɨmɨ ghelɨ ghì a ghɨ nchwôsɨ̀ ɨfwo yɨnɨ nɨ̀ ghelɨ ghì a ghɨ wetɨ mɨ̀lùʼ a bom nɨ̀ fòyn nɨ̀ dzɨ zɨ̀ a àŋena làf ateyn, baʼsɨ nɨ̀ tɨ̀fu tɨ nyoʼnɨ tìtɨ̀ a wù n-fu a ndô nɨ̀ Bôbo Fɨyini, ɨ nà ghɨ nɨ̀ ìkayni.

⁵Wu kæ bè sɨ̂ fòyn Sòlomòn na, “Awo kì a mà tî yvɨ̀ a ma ilaʼ kûm àwo kì a wà nî nɨ̀ ìtof zɨ̀ a wà n-kelɨ nɨn ghɨ samoʼ. ⁶Ma bu tî nà bimî na iwo zɨ̀ a ghɨ n-bê kûm và nɨn ghɨ samoʼ nô ta ka mà gvi yèyn lvɨ̂yn sɨ a ma ngeŋ. Wà n-tofɨ nô ajûŋ, awo kì a ghɨ tî bè kûm và nɨn chem wi abeʼ iwo zɨ̀ a mà yeyn. Iwo zɨ̀ a mà yeyn nɨn chwô izɨ-ì a mà tî yvɨ. ⁷Ghelɨ ghya nɨn kelɨ àtu a juŋà, ghelɨ ghɨ felɨnɨ nɨ̀ và ghî a ghɨ lum ghɨ kɨ a wa ngùŋ yvɨtɨ̂ àwo itof nɨ̀ và nɨn kelɨ àtu a juŋà. ⁸Ikoʼsɨ-i nɨn ndû sɨ̂ Bôbo Fɨyini ɨ Fɨyini fifɨ. Wù kôŋ meyn và ɨ̀ lèm và sɨ a fòyn na wà na saʼ izɨyn nɨ̀ ŋweyn/saʼ ghelɨ ŋweyn. Fɨyini fɨ nɨn kôŋ ghelɨ Isìlæ̀ kɨŋ sɨ nà toʼnɨ nɨ̀ àŋena kɨ̀ mɨlvɨ ɨ̀n jɨ̀m. Wù lem meyn và sɨ a fòyn na wà na saʼ àŋena kɨ àtì-ati, saʼ fyeʼtɨ̂ wì iwo.”

⁹Wu n-tàŋi tî ɨ fu aso ɨkwo a baŋnɨ-a sɨ̂ fòyn Sòlomòn kɨ dɨlɨ̀ chem kilùsɨ̀ nkamsɨ̀ nɨ̀ ɨ̀fwo ɨ lɨmtɨnɨ wu dvɨ̂ kɨ tèyn, baʼsɨ̂ nɨ̀ mɨ̀ngòʼtɨ̀ ɨ̀njofɨnɨ̂ mɨ dvɨ̂ kɨ tèyn. À nà n-ghɨ tì bula ɨfwo ɨ lɨmtɨnɨ timi nà ghɨ a Isìlæ̀ ta ɨvzɨ̂ a nàfòyn Shebà nɨn læ fu sɨ̂ fòyn Sòlomòn.

¹⁰(Ghelɨ ghɨ felɨnɨ nɨ̀ fòyn Hilàm nɨ̀ ɨghɨ fòyn Sòlomòn nɨn læ meyn gvì nɨ̀ àso ɨkwo a baŋnɨ-a ma kɨ lù a Ofì ɨ gvi kɨmɨ nɨ̀ fɨ̀kâʼ fɨ algùmfɨ̀ baʼsɨ̂ nɨ̀ mɨ̀ngòʼtɨ̀ ɨ̀njofɨnɨ̂. ¹¹Fòyn Sòlomòn nɨn læ faytɨ mbaŋisɨ ndo nɨ̀ Bôbo Fɨyini, nɨ̀ mbaŋisɨ ntoʼsɨ nɨ̀ fɨ̀kâʼ fɨ algùm nâ fìfɨ̀. Wu n-faytɨ meyn kɨmɨ tɨ̀luŋ kɨ tɨ̀nki tɨjɨ̀m nɨ̀ fɨ̀kâʼ fɨ ateynfɨ ta ka ghelɨ njàŋsɨ̀ na yema buʼa, a ghɨ ɨ̀fwo bula wùl timi yeyn a Judà)

¹²Fòyn Sòlomòn nɨ̀n fu meyn nô mɨ ghà sɨ̂ nàfòyn Shebà ta wu n-bɨf sɨ̂ ŋweyn. Wu n-fu ɨfwo wu dvɨ̂ chwô ɨzvɨ̂ a nàfòyn Shebà nɨn gvi nɨ̀ ɨ̀nŋweyn, wu kasi lù ŋêyn ghelɨ ghɨ felɨnɨ nɨ̀ ŋweyn ɨ ndù a ŋweyn ilaʼ.

Ighaʼ i fòyn Sòlomòn

¹³À nà n-ghɨ nô mɨ a bêŋ ì kà, fòyn Sòlomòn ɨ kelî àso ɨkwo a baŋnɨ-a kɨ dɨlɨ̀ chem kilùsɨ̀ nkamsɨ mɨ̀vɨm ɨ̀n bò njvàsɨ̀ tal. ¹⁴Aso ɨkwo nâ kèynà nà baʼsɨ̂ wì nɨ̀ akî a ghelɨ n-beyʼlɨ̀ nà n-fu. Tɨfôyntɨ Alabìyà tɨ̀ nô tɨ jɨ̀m nɨ̀ ghelɨ ghɨ tisɨnɨ ilaʼ nâ ghè nà n-gvî kɨmɨ nɨ̀ àso ɨkwo a baŋnɨ-a nɨ̀ afɨfâ, sɨ̂ fòyn Sòlomòn.

¹⁵Fòyn Sòlomòn nɨ̀n be meyn ghelɨ ghɨ felɨnɨ nɨ̀ ŋweyn ɨ lì àso ɨkwo ɨ leŋ mamtɨ ɨ faytɨ nkyàsɨ̀ iwòŋ sɨ ghaʼlɨnɨsɨ ateyn ighɨ ì bò nô mɨ nkyà ì kà ɨ lî àso ɨkwo kɨ dɨlɨ̀ chem kilùsɨ̀ tal nɨ̀ àbeʼa. ¹⁶Àŋena nɨn faytɨ meyn kɨmɨ nkyàsɨ iwòŋ sɨtelâsɨ̀ ighɨ ì tal nɨ̀ àso ɨkwo a baŋnɨ-a ta ghɨ leŋ màmtɨ, nkyà ìmòʼ ɨ lî àso ɨkwo a baŋnɨ-a kɨ dɨlɨ̀ chem ndû kilùsɨ̀ bò. Ghɨ n-faytɨ tî fòyn Sòlomòn ɨ lèm a ntoʼ ghè a ghɨ bàʼlɨ̀ nɨ̀ ɨ̀nkàʼ ma mɨ̀ lù akù a Lebanòn.

¹⁷Fòyn ɨ kæ faytɨ achɨ a tɨ̂fòyn a ghaʼnɨ-a sɨ nyòtɨ àbâs a li-a nɨ̀ ìsoŋ i atàmì, ɨ lòm a li-a nɨ̀ àso ɨkwo a baŋnɨ-a kɨ kelɨ wi ilɨŋ. ¹⁸Achɨ a tɨfòyn nâ kì nà n-kelɨ mbaŋisɨ ntufa nɨ̀ fɨ̀chɨnɨ̂ fɨ̀ taka fòyn na tomtɨ̂ ɨ̀vɨ ŋweyn atû àteyn, ma ghɨ faytɨ nɨ̀ àso ɨkwo a baŋnɨ-a. Nô mɨ àbas achɨ aka nà n-kelɨ àlêʼ kì a ghɨ lêm ɨkœ ateyn, ma ghɨ tom meyn ànfèʼsɨ̀ a nyâm à bo nô mɨ abàs ɨkœ àkà. ¹⁹Ɨ̀nfyèʼsɨ̀ ɨ nyâm à bo nà n-ghɨ njvàsɨ̀ bò ti a mbaŋisɨ ghê ntufa. Nô mɨ mbaŋi ìkà nà kelɨ ɨ̀nfèʼsɨ̀ ɨ̀bwò ali-a ti ɨkœ nɨ̂nkœ̀ ali-a ti ɨkœ ɨtwo. Ìnki achɨ a tɨ̂fòyn nâ yeynì bu timi nà ghɨ a ntoʼ ìlì. ²⁰Bomsɨ fòyn Sòlomònsɨ̀ nô sɨ̀ jɨm nà n-ghɨ ma ghɨ faytɨ kɨ nɨ̀ àso ɨkwo a baŋnɨ-a. Nô ɨ̀fwo ɨ̀jɨ̀m a ndo afî a ntoʼ/ntoʼ afî a ghɨ bàʼlɨ̀ nɨ̀ ɨ̀nkaʼ ma mɨ̀ lù akù a Lebanòn nà ghɨ ma ghɨ fàytɨ kɨ̀mɨ nɨ̀ àso ɨkwo abaŋnɨ-a kɨ kelɨ wi ilɨŋ. Ghɨ n-bu læ faytɨ nô àfo àmòʼ ateyn nɨ̀ àso ɨkwo a fɨfâ bòm ta ghɨ nà n-lî wì na aso ɨkwo a fɨfâ nɨn ghɨ àfo ɨtuʼ nɨ̀ fòyn Sòlomòn. ²¹Sòlomòn nà n-kelɨ ngùʼsɨ, a gufɨ̀ ghelɨ ghɨ felɨnɨ nɨ̀ Hulàm. À nà n-ghɨ nô mɨ ibàm i bèŋsɨ̀ tal sɨ̀ kà, ngùʼsɨ ɨ gvî a Tashìsh nɨ̀ àso ɨkwo a baŋnɨ-a nɨ a fɨfâ, nɨ̀ àsoŋa àtàmà, kɨ̀mɨ nɨ̀ kaynsɨ baʼsɨ̂ nì mɨ̀nyuyn ɨ̀njofɨnɨ̂ ɨ̀n lì./ Ngùʼsɨ ateynsɨ nà lî bèŋsɨ tal sɨ ndù a Tashìsh sɨ kasi sɨ gvi nɨ̀ àso ɨkwo

²²Fòyn Sòlomòn nà n-kelɨ ighaʼ nô sɨ a ŋaŋ fî tofɨ chwô nô mɨ fòyn ɨ̀ kfà a mbzɨ. ²³Tɨfôyntɨ̀ mbzɨ nô tɨ̀ jɨ̀m tɨ̀ nà n-ndû yeyn fòyn Sòlomòn sɨ yeʼi itof zɨ̀ a Fɨyini fɨ̀ fù sɨ̂ ŋweyn. ²⁴À nà n-ghɨ nô mɨ a bêŋ ìkà ghelɨ gvî nɨ̀ tɨ̀futɨ sɨ̂ fòyn Sòlomòn a ghɨ ɨ̀fwo ma ghɨ fàytɨ nɨ̀ àso ɨkwo a fɨfâ nɨ̀ a baŋnɨ-a nɨ̀ dàlasɨ kɨ̀mɨ nɨ̀ ɨ̀fwo ɨ lɨmtɨnɨ nɨ̀ nyamsɨ kfaŋsɨ baʼsɨ̂ nɨ̀ woyn njàkâysɨ̀.

²⁵Fòyn Sòlomòn nɨn baʼlɨ meyn ɨ̀lwêʼ nkamsɨ̀ kæ̀ ɨ nà lêm nyamsɨ kfaŋ nɨ̀ mɨ̀nchaʼ mɨ̀ ìwòŋ ateyn. Wu nà kelɨ nyamsɨ kfaŋ nkamsɨ njvàsɨ̀ bò ma wù lêm meyn sɨ lisɨ a ntèʼsɨ ghê a n-ghɨ n-lêm mɨ̀nchaʼ mɨ̀ ìwòŋ ateyn, ɨ lèm kɨmɨ sɨ lisɨ a ŋweyn a ngùŋ a Jèlusalèm. ²⁶Fòyn Sòlomòn nà n-saʼ tɨ̀fôyn nô tɨ̀ jɨ̀m zɨtɨ̀ a jvâ Yuflèt ndû chem ilaʼ i Fìlisìyà, fî ndû chem ighami i Ijìb. ²⁷Fòyn Sòlomòn nɨn læ meyn nì aso ɨkwo a fɨfâ ɨ nà bɨm dvɨ̂ kɨ ta ngòʼsɨ̀ a Jèlusalèm, ɨ̀nkàʼ mɨ̀ sedà ɨ dvɨ̂ kɨ ta ɨnkâʼ mɨ̀ sikamò isas i kfɨynsɨ. ²⁸Fòyn Sòlomòn nà yuyn nyamsɨ kfaŋsɨ nɨ̀ ŋweyn a Ijìb yuyn kɨmɨ a tɨ̀laʼ tɨ litɨ.

Fòyn Sòlomòn ɨ kfa ndu yeyn ghɨ̀bo ŋweyn.

²⁹Awo a li-a kì a fòyn Sòlomòn nɨn n-læ nì kɨ̀ sɨ zɨ̀tɨ̀ ta wù koʼ ɨfôyn sɨ koʼ sɨ chem a ngòʼsɨ nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ Natàn ɨ nfèʼtɨ̀ ìghaʼnɨ, ɨ̀ nyàʼ kɨ̀mɨ a ŋwàʼlɨ̀ nɨ̀ Àhijà ɨ wul ɨ̀ Shilò. Ghɨ n-nyaʼ meyn kɨmɨ a ŋwàʼlɨ̀ àwo ghè a Idò nɨn læ yeyn ta wù yèyn a jêm kûm Jèlobòwàm ɨ wâyn Nebàt. /Ghɨ n-nyaʼ meyn kɨmɨ ŋwàʼlɨ̀ àwo ghè a kɨ n-fvɨ̀ ikèʼ nɨ̀ Idò kûm Jèlobòwam ɨ wâyn Nebàt. ³⁰Fòyn Sòlomòn nɨn læ saʼ Isìlæ̀ nô ì jɨ̀m sɨ a bèŋsɨ̀ mɨ̀vɨm ɨ̀n kæ̀ chî a Jèlùsalèm, ³¹ɨ kfɨ ghɨ gvɨ̀mì ŋweyn a ntèʼ nɨ̀ bò ŋweyn ɨ Devìt. Lehobòwàm ɨ wâyn ŋweyn ɨ lûmnɨ̀ ɨ koʼ ɨfôyn.