2 Chronicles 10

Ghelɨ Isìlæ̀ ɨ to nɨ̀ àtu-a sɨ̂ Lèhobòwàm

¹Lèhobòwàm nɨn læ meyn ndù a Shekèm a ghɨ tì ma ghelɨ Isìlæ̀ nô ghɨ̀ jɨ̀m yvɨŋtɨ meyn afu sɨ yisi ŋweyn sɨ a fòyn. ²A nà ghɨ ta Jèlobòwàm yvɨ na ghɨ n-kɨŋ sɨ lem Lèhobòwàm sɨ a fòyn, wu bèynlɨ̀ ɨ kasi kfa sɨ a Ijìb. (À nà n-ghɨ tì wu ghɨ a Ijìb ma wù leʼ fòyn Sòlomòn. ³Ghelɨ ghɨ tisɨnɨ a Isìlæ̀ ɨ kæ tum sɨ jaŋ Jèlobòwàm na ŋêyn ghelɨ Isìlæ̀ nô ghɨ̀ jɨ̀m ndu bè sɨ̂ Lehobòwàm na, ⁴“Bò vâ ɨ fòyn Sòlomòn ti meyn nà fu ngeʼ sɨ̂ ghès nô sɨ a ŋaŋ. Wù ti nà ni-à ghesɨ felɨ sɨ̂ ŋweyn nô sɨ a ŋaŋ. Wà kæ fàbtɨ̀ ifêl ì yesi ɨ̀ fàbtɨ̀ task yes, a ghès na yvɨnɨ̂ và.”

⁵Lehobòwàm ɨ bè sɨ̂ àŋena na “Yì ndu ɨ̀ kàsi gvì ibàm i mɨchɨ ɨ̀n tal.” Àŋena ɨ lù.

⁶Àŋena nɨn lù tî fòyn Lehobòwàm ɨ taŋi sɨ̂ chyeʼ sìsɨ̀ a sɨ nà n-tebtɨ bò ŋweyn ɨ fòyn Sòlomòn ɨ bɨf sɨ̂ àŋena na, “Yì n-kfâʼtɨ̀ na mà kàʼ a mà be na gha sɨ̂ ghelɨ ghèyna?”

⁷Àŋena ɨ bèynsɨ̀ ɨ bè sɨ̂ ŋweyn na, “Wà kæ dyèyn atem a juŋà sɨ̂ ghelɨ nâ ghèyn ɨ̀ nì nô mɨ ghà ta àŋena nɨn kɨŋ, taŋi itaŋi ijuŋì sɨ̂ aŋena, a àŋena na lum yvɨnɨ̂ kɨ và.”

⁸Mɨtì Lehobòwàm ɨ faŋtɨ̀ yvɨtɨ̂ iwo zɨ̀ a chyeʼsɨ ateynsɨ bè ɨ kwo ndu sɨ yvɨ sɨ̂ ngvâʼ ŋweyn, à ghɨ ghelɨ ghɨ̀ a ghɨ tebtɨ ŋweyn. /ɨ kwo ndu ɨ yvɨtɨ sɨ̂ woynda tɨkùŋ ghɨ̀ a ŋêyn àŋena nɨn lema amòʼ ghɨ felɨ̀ sɨ̂ ŋweyn, ⁹ɨ bɨf sɨ̂ àŋena na, “Yì nkfâʼtɨ̀ na mà be na gha sɨ̂ ghelɨ ghèyn a? Àŋena nɨn bê na mà fabtɨ ifêl zɨ̀ a bò wom tî nà fu sɨ̂ àŋena.”

¹⁰Ngvâʼ ŋweyn nâ zɨ̀ ɨ bè sɨ̂ ŋweyn na, “Bè sɨ̂ ghelɨ ghì a ghɨ n-bê na wà fabtɨ ifêl zɨ̀ a bò vâ tî nà fu sɨ̂ àŋena na, ‘ifêl zɨ̀ aka wà na fu sɨ̂ àŋena na to chwò izɨ-ì a bò wom tî nà fu-a.’”

¹¹Bò wom tî nà kaynà yi felɨ̀ nô sɨ a ŋaŋ, mɨtì ma ghɨ sɨ na kaynà yì felɨ̀ chwô tì. Wù tî nà leŋ zɨ̀ nɨ̀ ngvàlìsɨ̀ mɨtì ma ghɨ sɨ nà leŋ zɨ nɨ̀ sùnjoŋnjoŋsɨ.’”

¹²A nà ghɨ ibàm i mɨchɨ ɨ̀n tal, Jèlobòwàm ŋêyn ghelɨ ghɨ tisɨnɨ ghì nô ghɨ̀ jɨ̀m ɨ kasi ndù sɨ̂ Lèhobòwàm kɨ ighel ta wù n-bè na, “Yì ndu ɨ̀ kàsi gvì ibàm i mɨchi ɨ̀n tal.” ¹³Mɨtì Fòyn Lèhobòwàm ɨ faŋtɨ̀ yvɨtɨ iwo zɨ̀ a chyeʼsɨ be sɨ̂ ŋweyn ɨ faŋtɨ taŋi nɨ̀n mbôynɨ̀, ¹⁴ɨ kwo yvɨtɨ ìwo zɨ̀ a ngvaʼ ŋweyn zɨ̀ nì bè ɨ bè sɨ̂ ghelɨ ateyn na, “Bò wom tî nà kaynà yi felɨ̀ nô sɨ a ŋaŋ, mɨ n-nì-à a yì felɨ chwò nô tì. Bò wom tî nà leŋ zɨ̀ nɨ̀ ngvàlìsɨ̀ mɨtì ma ghɨ sɨ nà leŋ zɨ nɨ̀ sùnjoŋnjoŋsɨ.” ¹⁵Fòyn Lèhobòwàm nɨn bu læ yvɨtɨ iwo sɨ̂ ghelɨ nâ ghèyn, a ghɨ dzɨ̀ zɨ̀ a Fɨyini fɨ̀ choʼnɨ sɨ luynsɨ iwo zɨ̀ a wu n-læ bè sɨ̂ Jèlobòwàm ɨ wâyn Nebàt toynɨ̂ a Àhijà ɨ wul ɨ̀ Shilò.

¹⁶A nà ghɨ ta ghelɨ Isìlæ̀ nô ghɨ̀ jɨ̀m yeyn na fòyn bu yvɨ̀tɨ ìwo zɨ̀ a aŋena bè, ɨ kæ be sɨ̂ fòyn na,

“Ghesɨ̀nà nɨn kelɨ wi iwo sɨ ni isas i ndo nɨ̀ Devìt,

kelɨ wi iwo sɨ ni nɨ̀ wâyn Jesè.

Ghelɨ Isìlæ̀, yì kasi ndù sɨ a yi a mɨ̂twò!

Wâyn Devìt, wa saʼ ghelɨ̀ ghya.”

Ghelɨ Isìlæ̀ nô ghɨ̀ jɨ̀m ɨ kæ kasi sɨ kfa. ¹⁷Mɨtì Lèhobòwàm ɨ nà bu saʼ kɨ saʼ ghelɨ Isìlæ̀ ghì a ghɨ nà chi a ntèʼsɨ Judà.

¹⁸Fòyn Lèhobòwàm nɨ̀n tum meyn Adonilàm ɨ wul ɨ vzɨ̀ a wu nà n-kfâyntɨ̀ ghelɨ ghɨ felɨ̀ sɨ adyaʼ mɨtì ghelɨ Isìlæ̀ ɨ tɨmlɨ zue ŋweyn nɨ̀ ngòʼsɨ̀. Lèhobòwàm ɨ koʼ atû fɨ̀nchaʼ fɨ iwòŋ nɨ̀ ŋweyn ɨ leʼ ndù a Jèlusalèm. ¹⁹Sɨ zɨ̀tɨ̀ achi nâ ghè ghelɨ Isìlæ̀ ɨ nà sɨ to nɨ̀ àtu-a nô mɨ sɨ̂ wâyn Devìt ɨ̀kfà ta wù n-saʼ Isìlæ̀ sɨ koʼ sɨ chem layn.