2 Chronicles 8

Awo a li-a kì a fòyn Sòlomòn nɨn læ nì.

¹Fòyn Sòlomòn nɨ̀n læ bàʼlɨ ndô Fɨyini nɨ̀ ntoʼ ŋweyn sɨ a bèŋsɨ mɨ̀vɨm ɨ̀n bò, ²wu n-bàʼlɨ tî ɨ kasi bàʼlɨ̀ ntèʼ sîsɨ̀ a Hilàm nɨ̀n læ fu sɨ̂ ŋweyn, ghelɨ Isìlæ̀ ɨ nà chî ateyn, ³ɨ kæ lù sɨ ndù a Hamat Zobà sɨ tɨm sɨ yɨ ntèʼ àteyn. ⁴Wù n-læ meyn kasi bàʼlɨ̀ ntèʼ Tadmò a nse iyum ɨ kasi bàʼlɨ kɨmɨ ntèʼ sîsɨ̀ a wù n-læ bàʼlɨ a Hamàt na ghɨ na lèm ɨ̀fwo ateyn. ⁵Fòyn Sòlomòn nɨ̀n kasi meyn bàʼlɨ̀ ntèʼ Bet Holòn abàs ikuè, ɨ bàʼlɨ kɨmɨ ɨyî àbàs itsɨyn ɨ tɨm mbàyn ɨ jɨŋ kali ntèʼsɨ ateyn ɨ we àchfɨ̂ a mbàyn baʼsɨ̂ nɨ̀ mbaŋ sìsɨ̀ a ghɨ n-fôtɨ̀ ateyn. ⁶Wu n-kasi meyn bàʼlɨ̀ ntèʼ Balàt baʼsɨ̂ nɨ̀ ntèʼ sîsɨ̀ a ghɨ n-lêm ɨfwo ateyn ɨ bàʼlɨ kɨmɨ ntèʼ sîsɨ̀ a wu nà n-lêm mɨ̀nchaʼ mɨ̀ ìwoŋ ateyn baʼsɨ̂ nɨ̀ nyamsɨ kfaŋsɨ. Fòyn Sòlomòn nɨ̀n baʼlɨ meyn nô mɨ ghà ta wu nà n-kɨŋ sɨ bàʼlɨ̀ a Lebanòn nɨ̀ Jèlusalèm baʼsɨ̂ nô mɨ nɨ̀ alêʼ àkà ta wu nà n-saʼ.

⁷Ghelɨ ghɨ li nà n-bu chî ilaʼ nâ ghàyn a ghɨ wi ghelɨ Isìlæ̀. Àŋena nà n-ghɨ ghelɨ Hît nɨ̀ ghelɨ Amò ŋêyn ghelɨ Belìz nɨ̀ ghelɨ Hîv baʼsɨ̂ nɨ̀ ghelɨ Jebùs. ⁸Ghelɨ nâ ghèyn nà n-ghɨ woyn ghelɨ tɨlaʼ tìtɨ̀ a ghelɨ Isìlæ̀ nɨn læ tɨm yɨ ɨ faŋ tɨ̀ bèbsɨ sɨ mèsi tɨlaʼ tɨ ateyn tɨ. Fòyn Sòlomòn ɨ kæ lì na àŋena na felɨ̀ sɨ̂ ɨ̀kôs sɨ̂ ŋweyn sɨ koʼ sɨ chem layn. ⁹Mɨtì fòyn Sòlomòn nɨn bu læ lì ghelɨ Isìlæ̀ na ghɨ na felɨ̀ àkôs sɨ̂ ŋweyn. Àŋena nà n-ghɨ sugèyʼsɨ̀, ghɨ ɨ̀tu ndo ìwòŋ, fî tisɨ̂ mɨ̀nchaʼ mɨ̀ ìwòŋ, nɨ̀ ghelɨ ghì a ghɨ n-nyɨŋ nyamsɨ kfaŋ. ¹⁰Fòyn Sòlomòn nɨn læ meyn choʼtɨ ghelɨ Isìlæ̀ ighɨ ì bò nɨ̀ ghelɨ mɨ̀vɨm ɨ̀n tâyn na àŋena na tisɨ̂ ghelɨ ghì a ghɨ n-felɨ̀.

¹¹Fòyn Sòlomòn nɨn læ meyn lì wî ŋweyn ɨ wâyn fòyn Ijìb sɨ a ntèʼ nɨ̀ fòyn Devìt ɨ ndu lèm ŋweyn a ndo ghè a wù n-bàʼlɨ sɨ̂ ŋweyn ɨ bè na, “Wî wom nɨn kelɨ wi sɨ nà chî a ntoʼ nɨ̀ Devìt ɨ fòyn Isìlæ̀ bòm ta nô mɨ àlêʼ à kà ta ghɨ zɨ nɨ̀ àntayntayn a mɨ̂kàyn nɨ̀ Bôbo Fɨyini ateyn nɨn ghɨ alèʼ a laynɨ-a.”

¹²Fòyn Sòlomòn nɨn fu meyn tɨ̀fu tɨ nyoʼnɨtɨ sɨ̂ Bôbo Fɨyini atû àbaŋ ifu ghè a wu n-bàʼlɨ ɨchfɨ ndô Fɨyini. ¹³Wù n-fu tɨ̀fu tɨ mɨchi mɨ̀ ɨtuʼ ilaʼ nɨ̀ tɨ̀fu tɨ ayɨ ɨchfɨ njoŋ baʼsɨ̂ nɨ̀ ɨ̀fu ayɨ abayn bula fɨ̀shɨ̀k nɨ̀ ìfu ayɨ ɨlvɨ ta ghɨ kfì wît baʼsɨ̂ nɨ̀ ìfu ayɨ i bàʼlɨ i mɨ̂twò bèŋsɨ̀ jɨ̀m kɨ̀ ighel ta Mosìs nɨ̀n bè. ¹⁴Fòyn Sòlomòn nɨ̀n fu meyn ìfêl sɨ̂ ngàŋsɨ ndô Fɨyinisɨ̀ kɨ̀ ighel ta bò ŋweyn Devìt nɨn læ bè. Wù n-læ meyn lèm ghelɨ ndo nɨ̀ Levì na àŋena na tisɨ̂ ìyem i njàŋsɨ̀, gâmtɨ̀ ngàŋsɨ ndô Fɨyini kɨ̀ mɨchi ɨ̀n jɨ̀m. Wù n-læ meyn lèm nchìsɨ̀ na sɨ na chî àchfɨ̂ a mbàynsɨ̀ kɨ ighel ta Devìt ɨ wul ɨ̀ Fɨyini nɨn læ bè. ¹⁵Ngaŋsɨ ndô Fɨyinisɨ̀ ŋêyn ghelɨ ndo nɨ̀ Levì nɨn nî meyn nô àwo àjɨ̀m ta Devìt nɨn læ bè baʼsɨ̂ nɨ̀ àlêʼ kì a ghɨ n-lêm ɨfwo ateyn.

¹⁶Fòyn Sòlomòn nɨ̀n læ meyn mèsì ìfêl abàʼlɨ̀ a ndô Fɨyini nô ì jɨ̀m kɨ̀ sɨ zɨ̀tɨ̀ achi ghè a ghɨ n-læ we achɨ a ndô Fɨyini sɨ koʼ sɨ chem achi ghè a ghɨ n-læ mèsi ateyn. À ti ta ghɨ n-læ bàʼlɨ mèsi ndô Fɨyini.

¹⁷Ghɨ n-bàʼlɨ mèsi tî, fòyn Sòlomòn ɨ ndù a Eziyon Gebà nɨ̀ Elàt a mbæ̀ jvà ìghaʼnɨ̀ a Edòm. ¹⁸Wu n-dù tî, fòyn Hilàm ɨ tum ngùʼsɨ ghaʼlɨnɨsɨ sɨ̂ ŋweyn a gufɨ̀ ghelɨ ghɨ felɨnɨ nɨ̀ fòyn Hilàm, a ghɨ ghelɨ faytɨ̂ kya jva. Àŋena dyàŋ ŋêyn ghelɨ fòyn Sòlomòn a Ofì ɨ kasi gvì nɨ̀ àso ɨkwo a baŋnɨ-a kɨ dɨlɨ̀ chem kilùsɨ̀ nkam njvàsɨ̀ nsòmbo ɨ fu sɨ̂ fòyn Sòlomòn.