2 Chronicles 7

Fòyn Sòlomòn ɨ lèm ndô Fɨyini sɨ a nyɨŋ sɨ̂.

¹À nà n-ghɨ ta fòyn Sòlomòn jèm mèsì, ɨvɨs ɨ lù iyvɨ ɨ suʼi nyòʼ tɨ̀fu tɨ nyoʼnɨtɨ nɨ̀ tɨ̀fu tɨli tìtɨ̀ a ghɨ fù sɨ̂ Bôbo Fɨyini, iŋwâʼ i Bôbo Fɨyini ɨ luyn a ndô Fɨyini. ²Yi n-luyn tî, dzɨ̀ ɨ nà ghɨ wi ta ka ngàŋsɨ ndô Fɨyinisɨ̀ zɨ nà nî ìfêl-i aŋena a ndo nɨ̀ Bôbo Fɨyini. ³Ghelɨ Isìlæ̀ nɨ̂n yèyn ta ɨvɨsɨ nɨn suʼî kalì atû ndô Fɨyini nɨ̀ ìŋwâʼ i Bôbo Fɨyini, àŋena ɨ nguʼ alvɨ a àŋena a nse ɨ chfɨŋsɨ ɨ̀tu àŋena ɨ nà koʼsɨ̂ Bôbo Fɨyini fu àyòŋnɨ̀ sɨ̂ ŋweyn bê na,

“Wù n-jofà, ikôŋ i mɨ̂kàyn nɨ̀ ŋweyni faŋ meyn kɨ̀ samoʼ.”

⁴Fòyn Sòlomòn ŋêyn ghelɨ ghì a ghɨ nà ghɨ afu nô ghɨ̀ jɨ̀m ɨ kæ sɨ nyamsɨ sɨ fu tɨfu ateyn sɨ̂ Bôbo Fɨyini. ⁵Fòyn Sòlomòn nɨn læ sɨ nyamsɨ nkam mɨ̀vɨm ɨ̀n bò njvàsɨ̀ bò baʼsɨ̂ nɨ̀ bzɨsɨ nkam ɨvɨ nɨ̀ nkamsɨ mɨ̀vɨm ɨ̀n bò sɨ ifu sɨ̂ Bôbo Fɨyini. À ti ta fòyn Sòlomòn ŋêyn ghelɨ Isìlæ̀ ghì a ghɨ nà ghɨ afu nô ghɨ̀ jɨ̀m nɨn læ lèm ndô Fɨyini sɨ a nyɨŋ sɨ̂ Bôbo Fɨyini. ⁶Ngàŋsɨ ndô Fɨyinisɨ̀ nɨn læ timi ɨlwèʼ nɨ̀ àŋena ghelɨ ndo nɨ̀ Levì ɨ timi a àŋena ɨlwèʼ nɨ̀ ɨ̀fwo buʼnɨ vzɨ̀ a fòyn Devìt nɨn læ faytɨ na ghɨ na buʼa koʼsɨ̂ Bôbo Fɨyini ateyn. Ghɨ nà buʼ ɨ̀fwo nâ wèyn ɨlvɨ ta wù n-fu àyòŋɨ̀ sɨ̂ Bôbo Fɨyini bê na, “Ikôŋ i mɨ̂kàyn nɨ̀ ŋweyni faŋ meyn kɨ̀ samoʼ.” Ngàŋsɨ ndô Fɨyinisɨ̀ nà n-ti kèʼnɨ̀ ghelɨ ndo nɨ̀ Levì toŋ tɨ̀soŋ, ghelɨ Isìlæ̀ ghɨ̀jɨ̀m ɨ ti a.

⁷Fòyn Sòlomòn nɨn læ meyn lèm antêynɨ̀ ɨ̀we vzɨ̀ a wu n-ghɨ ɨchfɨ ndo nɨ̀ Bôbo Fɨyini sɨ a nyɨŋ sɨ Bôbo Fɨyini. Wu n-lèm tî ɨ fu tɨfu tɨ nyoʼnɨtɨ ateyn ɨ fu kɨmɨ ìso-i tɨfu sɨ nà chî nɨ̀ mbôynɨ̀ bòmta abaŋ ifu kì a wù n-læ faytɨ nɨ̀ ìdyayni nà n-læ̂ sɨ̂ tɨ̀fu tɨ nyoʼnɨtɨ nɨ̀ tɨ̀fu tɨ ɨfwo ɨ yɨnɨ tɨ baʼsɨ̂ nɨ̀ ìso-i tɨfu sɨ nà chî nɨ̀ mbôynɨ̀.

⁸Fòyn Sòlomòn nɨn yɨ àyɨ ibàʼlɨ̀ i mɨ̂twò sɨ a mɨchi nsòmbo ŋêyn ghelɨ Isìlæ̀ nô ghɨ̀ jɨ̀m. Ghelɨ læ lù sɨ zɨtɨ̀ a Lebo Hamàt abàs ikuè sɨ ndù sɨ chem ɨfyàyn Ijìb abàs itsɨyn dvɨ̂ kɨ tèyn. ⁹A nà ghɨ a mɨchi nfama, àŋena yvɨ̀ŋtɨ̀ ɨ koʼsɨ Bôbo Fɨyini, bòmta àŋena nà ghɨ ma ghɨ yɨ meyn àyɨ ta ghɨ n-lêm abaŋ ifu sɨ a nyɨŋ sɨ a mɨchɨ nsòmbo, ɨ̀ yɨ kɨ̀mɨ àyɨ ibàʼlɨ̀ i mɨ̂twò sɨ a mɨchi nsòmbo. ¹⁰Aŋena nɨn mesi ayɨ tì a nà ghɨ a mɨchɨ mɨ̀vɨm ɨ̀n bò njvàsɨ̀ tal, Fòyn Sòlomòn ɨ bè na ghelɨ kasi kfâ sɨ aŋena ndosɨ. Àŋena nà n-saŋlɨ̂ nô ghɨ̀ jɨ̀m bòm àwo kì a Bôbo Fɨyini nì sɨ̂ fòyn Devìt ŋêyn fòyn Sòlomòn baʼsɨ̂ nɨ̀ ghelɨ ŋweyn ɨ ghelɨ Isìlæ̀.

Bôbo Fɨyini ɨ fvɨ̀ ikèʼ nɨ̀ Sòlomòn

¹¹À nà n-ghɨ ta fòyn Sòlomòn bàʼlɨ̀ mèsì ndô Bôbo Fɨyini nɨ̀ ntoʼ ŋweyn, ɨ̀ nì mèsì àwo kì a wù nà n-kɨŋ sɨ nì a ndô nɨ̀ Bôbo Fɨyini nô àjɨ̀m nɨ̀ akî a wu nà n-kɨŋ sɨ nì a ntoʼ nɨ̀ ŋweyn, ¹²Bôbo Fɨyini ɨ ni kfa ɨ fvɨ̀ a ŋweyn ikèʼ ɨ bè na,

“Ma yvɨ meyn ìjêm ìzæ ɨ̀ chòʼ ndo yèyn na ghelɨ ghem na fu tɨ̀fu ateyn sɨ̂ mà.

¹³Mà kæ ghal ivɨ na ka yi suʼi, kèsa ɨ̀ tum ngumisɨ na sɨ bebsɨ ɨfwo ɨ yɨnɨ kèsa màʼ tɨkoʼi tɨ bemnɨtɨ antêynɨ̀ nɨ̀ ghelɨ ghem, ¹⁴ghelɨ ghem ghì a ghɨ toŋtɨ àŋena a ma izɨyn kæ ngvɨmlɨ ngeŋsɨ àŋena ɨ̀ jêm, ɨ̀ nà yvɨnɨ̂ mà ɨ̀ kàsi sɨ a ibàm awo a bɨ-a nɨ̀ àŋena a mà yvɨ ijêm i àŋena iyvɨ ɨ̀ lèsɨ̀ fù mbɨsɨ àŋena ɨ̀ nì a ilaʼi àŋena kasî nà ghɨ kɨ ajûŋ/ɨfwo ɨ yɨnɨ na kasî koʼ a àŋena ilaʼ. ¹⁵Sɨ zɨ̀tɨ lvɨ̂yn, mà na faytɨ̂ ki-a, faytɨ̂ yvɨtɨ̂, ìjêm zɨ̀ a ghɨ n-jêm a ndo na ghàyn. ¹⁶Ma choʼ meyn ndo nâ yèyn ɨ̀ lèm sɨ a nyɨŋ na ghɨ na koʼsɨ̂ mà ateyn nô ta ka ghɨ̀ læ̂ ghɨ̀. Mà nà kinî kɨ kini ndo nâ yèyn, tôʼnɨ̀ nɨ̀ ɨ̀nyeyn bòmta a n-ghɨ ndo sɨ a nyɨŋ.

¹⁷“Wà kæ nà felɨ sɨ̂ mà, ta bò vâ fòyn Devìt nà n-felɨ̀, yvɨnɨ̂ tɨ̀saʼ temtɨ, nî nô mɨ ghà ta mà bè, ¹⁸a mà luynsɨ ichfɨ̂nɨ̀ zɨ a mɨ n-læ chfɨ̀nɨ sɨ̂ bò vâ fòyn Devìt ɨ bè na à na lum saʼ kɨ wul ɨ̀ wayn nɨ̀ ŋweyn saʼ Isìlæ̀.

¹⁹“Mɨtì ma zɨ ghelɨ gha kæ faŋ tɨ̀ yvɨ̀nɨ ma nà nî wì awo kì a mɨ n-bê, lêm wì tɨsaʼ temtɨ tìtɨ̀ a mà fù sɨ̂ zɨ̀ ɨ ndù nà koʼsɨ̂ mɨ̀yìnì ɨ̀n lì felɨ̀ sɨ̂ ɨ̀mêyn, ²⁰a mà saŋ fvɨ̀sɨ̀ zɨ̀ sɨ a ilaʼ nâ ghàyn a mà fù sɨ̂ zɨ̀ têyn, ɨ̀ bèyn jɨm sɨ̂ ndo yèyn a mà lèm sɨ a nyɨŋ na ghɨ na koʼsɨ̂ mà ateyn tèyn, ɨ̀ nì a ghelɨ tɨlaʼ tɨ litɨ na chyeʼtɨ-à fî wêsɨ̀ ndo nâ yèyn. ²¹Nô mɨ ta ndô àteyn nɨ̀n jofɨ̀ lvɨ̂yn nô mɨ ndà læ̀ nà chwò ki yeyna wu nà ghɨ nɨ̀ ìkayni, bɨfɨ na, ‘Bòm ghà ta Bôbo Fɨyini nì iwo i bemnɨ yèynì sɨ̂ ilaʼ yèynì nɨ̀ ndô ìkoʼsɨ nɨ̀ ŋweyn yèyn tèyn a?’ ²²Ghɨ læ̀ na bɨf a ghɨ bêynsɨ̀ bê na, ‘À n-ghɨ bòm ta àŋena leʼ kàsi sɨ a ibàm nɨ̀ Bôbo Fɨyini ɨ Fɨyini fɨ ghɨ̀bo àŋena fìfɨ̀ a fɨ n-læ fvɨ̀sɨ àŋena sɨ a Ijìb ɨ ndu nà koʼsɨ̂ mɨ̀yìnì ɨ̀n lù felɨ̀ sɨ̂ ɨ̀mêyn. À ti iwo zɨ̀ a Bôbo Fɨyini màʼ ngeʼ nâ yèyn a àŋena atu.’”